တနင်္သာရီတိုင်း၊ ထားဝယ်မြို့မှာ မေ ၁ဝ ရက် တရက်တည်း စစ်ဆေးသူ ၁၆၂ ယောက်မှာ ၁၃ ဦး တွေ့ရှိခဲ့တယ်လို့ စစ်ကောင်စီ တိုင်းကျန်းမာရေးက မေ ၁၁ ရက်မှာ ထုတ်ပြန်ပါတယ်။

အစုလိုက်အပြုံလိုက် ကူးစက်မှုနဲ့ပတ်သက်ပြီး ထားဝယ်မြို့ခံ ပရဟိတအသင်းတွေကို ဆက်သွယ်မေးမြန်းရာ အဆိုပါ အစုလိုက်အပြုံလိုက် ကူးစက်မှုနဲ့ပတ်သက်ပြီး အကူအညီ တောင်းခံတာ မရှိတဲ့အတွက် အတိအကျ မသိရကြောင်း ပြောပါတယ်။

မေ ၆ ရက်ကလည်း ထားဝယ်မြို့မှာ ကိုဗစ်အတည်ပြုလက္ခဏာ စစ်ဆေးတွေ့ရှိရသူ ၆ ဦး တွေ့ရှိခဲ့ပါတယ်။

မေ ၁ ရက်ကနေ ၁၁ ရက်အထိ ထားဝယ်ခရိုင် ၄ မြို့နယ်မှာ ကိုဗစ်အတည်ပြုလူနာ ၃၆ ဦး စစ်ဆေးတွေ့ရှိပြီး ၆ ဦး ဆေးရုံဆင်းခွင့်ရပြီဖြစ်ကြောင်း စစ်ကောင်စီ တိုင်းကျန်းမာရေးဌာနရဲ့ အချက်အလက်တွေအရ သိရပါတယ်။

မေ ၁၁ ရက်ကလည်း ထားဝယ်ခရိုင်အတွင်း ၇၅ ယောက် စစ်ဆေးရာ သရက်ချောင်းမြို့နယ်မှာ ၁ ဦး၊ ရေဖြူမြို့နယ်မှာ ၂ ဦး၊ စုစုပေါင်း ၃ ဦး ကိုဗစ်အတည်ပြုလူနာ အဖြစ် စစ်ဆေးတွေ့ရှိခဲ့ပါတယ်။

ဧပြီလလယ်ကစပြီး တနင်္သာရီတိုင်းမှာ ကိုဗစ်ကူးစက်သူတွေ ပြန်တွေ့ရှိလာကာ အခု မေလဆန်းပိုင်းမှာတော့ အစုလိုက်အပြုံလိုက် ကူးစက်မှုတွေပါ ရှိလာနေပါတယ်။

ပဲခူးတိုင်းအနောက်ပိုင်း၊ ပြည်မြို့၊ ခုတင် ၅၀၀ ဆေးရုံမှာ ကိုဗစ်-၁၉ ရောဂါနဲ့ အမျိုးသားတဦး မတ်လ ၇ ရက် ညနေပိုင်းမှာ သေဆုံးခဲ့တယ်လို့ မြို့ခံပရဟိတအသင်းနဲ့ မိသားစုဝင်တွေထံက သိရပါတယ်။

သေဆုံးသူမှာ လည်ချောင်းကင်ဆာရောဂါ ခံစားနေရသူဖြစ်ပြီး ဆေးရုံမှာ ဆေးကုသဖို့ ရက်ပြည့်လို့ လာရောက်စဉ် ဆေးစစ်ချက်အရ ကိုဗစ်ပိုးတွေ့ရှိခဲ့တာလို့ ဆိုပါတယ်။

မိသားစုဝင်တဦးက “ဆေးခန်းပြဖို့ ရက်ချိန်းပြည့်လို့ ဆေးရုံကြီးသွားတာ ကင်ဆာအထူးကု ဆရာဝန်ကြီးက ဆေးစစ်ချက်အကုန်ယူရမယ်ဆိုပြီး စစ်ဆေးချက်ယူမှ ကိုဗစ်ပိုးပါ တွေ့ခဲ့တာပါ” လို့ ပြောပါတယ်။

သေဆုံးခဲ့သူမှာ ကိုမင်းအောင် အသက် (၃၆ နှစ်) ဖြစ်ပြီး ဆေးစစ်ပြီးနောက် ကိုဗစ်ရောဂါပိုး အထူးစောင့်ကြည့်ကြပ်မတ်ဆောင် အရောက်မှာပဲ သေဆုံးခဲ့တာလို့ သိရပါတယ်။

သင်္ကြန်ပွဲတော်ကာလနောက်ပိုင်း ပြည်တွင်းမှာ အိုမီခရွန် မျိုးရိုးဗီဇပြောင်း (Arcturus) ရောဂါပိုး ပြန့်ပွားခဲ့ပြီး မတ်လ ၅ ရက်အထိ ကျန်းမာရေးဝန်ကြီးဌာန စစ်ဆေးချက်အရ ရောဂါပိုး ကူးစက်ခံရသူ ၁,၀၀၀ ကျော်ရှိပြီလို့ သတင်းထုတ်ပြန်ထားပါတယ်။

ပြည်မြို့မှာ ကိုဗစ်-၁၉ ရောဂါပိုး ကူးစက်ခံရသူ မြန်အောင်မြို့က အဘွားတဦး မတ်လ ၂ ရက်နေ့က သေဆုံးခဲ့ပြီး အခု နောက်ထပ်တဦး ထပ်မံသေဆုံးခဲ့တာပါ။

သေဆုံးရုပ်အလောင်းကို ပြည်မြို့ ခေတ္တရာလူငယ် နာရေးကူညီမှုအသင်းက အေးငြိမ်းရာသုသာန်မှာ နေ့ချင်းပြီး မီးသင်္ဂြိုဟ်ပေးခဲ့ပါတယ်။

တနင်္သာရီတိုင်းမှာ မေ ၆ ရက်နေ့ တရက်တည်း ကိုဗစ်-၁၉ ကူးစက်ခံရသူ ၁၂ ဦးတွေ့ရှိတယ်လို့ စစ်ကောင်စီတိုင်းကျန်းမာရေးဦးစီးဌာနက မေ ၇ ရက်နေ့မှာ ထုတ်ပြန်ပါတယ်။ 

တနင်္သာရီတိုင်း၊ မြို့နယ် ၁ဝ ခုက စစ်ဆေးသူ ၂၃၁ ဦးမှာ ထားဝယ်မြို့နယ်က ၆ ဦးနဲ့ မြိတ်မြို့နယ်က ၆ ဦး စုစုပေါင်း ၁၂ ဦး တွေ့ရှိခဲ့တာဖြစ်ပါတယ်။

“မေလ ၆ ရက်နေ့တုန်းက ၃ ယောက်ကတော့ ကူညီသယ်ဆောင်ပေးဖို့ အကူအညီတောင်းတယ်။ ၇ ရက်နေ့အတွက် ၆ ယောက်ကတော့ အကူအညီတောင်းလာတာမျိုးမရှိသေးဘူး။ ကိုဗစ်လက္ခဏာပြပြီး ဖျားနေတဲ့လူနာတော့ သိပ်မရှိဘူး။ စစ်လိုက်ရင် ကိုဗစ်တွေ့နေတာတော့ ရှိတာပေါ့” လို့ ထားဝယ်မြို့ လူမှုကူညီကယ်ဆယ်ရေးအသင်းတခုရဲ့တာဝန်ရှိသူက ပြောပါတယ်။

မြိတ်မြို့ကတော့ ခရီးသွားမယ့် လင်မယားမှာ ကိုဗစ်စစ်ဆေးတွေ့ရှိခဲ့ပြီး ထိတွေ့ဆက်စပ်သူ ကလေးတဦးအပါဝင် နောက်ထပ်လေးဦးကို ထပ်စစ်ဆေးရာ ကိုဗစ်အတည်ပြုလက္ခဏာ တွေ့ရှိရတာလို့ မြိတ်မြို့ခံပရဟိတအသင်းတွေဆီကသိရပါတယ်။

တနင်္သာရီတိုင်းမှာ သင်္ကြန်ကာလအပြီး ဧပြီ ၁၉ ရက်ကနေ မေ ၆ ရက်နေ့အထိ ကိုဗစ်အတည်ပြုလူနာ ၄၆ ဦး စစ်ဆေးတွေ့ရှိရပြီး ဆေးရုံဆင်းခွင့်ရသူ ၁၆ ဦး ရှိပြီလို့ စစ်ကောင်စီတိုင်းကျန်းမာရေးဦးစီးဌာနရဲ့အချက်အလက်အရသိရပါတယ်။

ကိုဗစ်ကူးစက်မှုပြန်ဖြစ်လာပြီးနောက် အခြားတိုင်းနဲ့ပြည်နယ်တွေမှာ သေဆုံးမှုတွေရှိနေပြီး တနင်္သာရီတိုင်းမှာတော့ ကိုဗစ်အတည်ပြုလက္ခဏာနဲ့ သေဆုံးသူ မရှိသေးဘူးလို့ သိရပါတယ်။

တနင်္သာရီတိုင်း မြိတ်ခရိုင် မြိတ်မြို့နဲ့ တနင်္သာရီမြို့ကို ဆက်သွယ်ထားတဲ့ ဇဝဲ-တကူ ကားလမ်းကို ဧပြီ ၇ ရက်က စပြီး တပတ်ကြာ ဖြတ်သန်းခွင့် ပိတ်လိုက်တယ်လို့  ဒေသခံတွေက ပြောပါတယ်။

အဲဒီလမ်းမှာ စစ်ကောင်စီက ဂိတ်စခန်းချကာ ခရီးသွားတွေဆီက‌ ပိုက်ဆံတောင်းပြီး ပြန်လည်ခွဲယူ ရာမှာ အဝေမတည့်ဘဲ အချင်းချင်း ပြဿနာတက်တာကြောင့် အခုလို ပိတ်လိုက်ရတယ်လို့ ပြည်သူ့ကာကွယ်ရေးတပ်ဖွဲ့ ထုတ်ပြန်ထားပေမဲ့ အမှန်တကယ် ပိတ်တဲ့အကြောင်းကိုတော့ စုံစမ်းနိုင်ခြင်း မရှိပါဘူး။

အာဏာသိမ်းချိန်တည်းက ဇဝဲဂိတ်မှာ စခန်းချပြီး ဒီနေ့အထိ ခရီးသွားတွေဆီက ငွေကြေး အတင်းတောင်းတာ‌အပြင် ဖမ်းဆီးရိုက်နှက်တာ‌တွေ ခြိမ်းခြောက်တာ‌တွေကိုလည်း လုပ်ဆောင် နေတယ်လို့ သိရပါတယ်။

ဒေသခံပြည်သူတဦးက "သူတို့က မျက်နှာသိတွေကိုဆို ပိုက်ဆံမ‌တောင်းဘူး။ သူတို့ မသိတဲ့ သူတွေဆိုရင် ပိုက်ဆံတောင်းရမ်းကြမ်းတယ်။ ဆိုင်ကယ်တွေလည်း သိမ်းတယ်။ သွားတောင်း‌ရင် ပြန်ရိုက် လွှတ်တာတွေလည်း ရှိတယ်။ ကားသမားတွေဆိုလည်း အမြဲတမ်း ပိုက်ဆံ‌ပေးရတယ်။ မပေးရင်ပြဿနာရှာတယ်" လို့ ပြောပါတယ်။

၂၀၁၉ နှစ်လယ်ပိုင်းက မိုးသည်းထန်စွာ ရွာသွန်းတာကြောင့် တနင်္သာရီမြစ်ရေကြီးပြီး တောင်ပြိုကျတာတွေ ဖြစ်ပွားခဲ့ရာ တကူ-ဇဝဲကားလမ်းပေါ်ရှိ ကိုးမိုင်တောင်မှာ မြေပြိုကျကာ လမ်းပြတ်ထွက်သွားပြီး မြိတ်မှ တညက်ကျေးရွာကိုသွားတဲ့ တောင်ရှည်တံတားမှာလည်း ရေစီးအားကြောင့် ပြတ်ထွက်သွားခဲ့ဖူးပါတယ်။ 

ဒါအပြင် တနင်္သာရီမြို့နယ်၊ တုံးဗျောကြီးရွာမှာရှိတဲ့ စစ်ကောင်စီဂိတ်မှာလည်း ခရီးသွားတွေနဲ့ ကုန်ကားတွေဆီကနေ ငွေကြေးအတင်းတောင်းရမ်းတာမျိုးတွေ ရှိတယ်လို့ ခရီးသွားတဦးက ပြောပါတယ်။

မတ်လ မကုန်ခင်အချိန်ကလည်း တနင်္သာရီမြို့နယ် ကမ္ပလိုင်းဂိတ်မှာ ဒေသခံလူငယ် ၄ ‌ယောက်ကို စစ်ကောင်စီရဲ့ ဂိတ်တပ်သားတွေကနေ ပစ်ခတ်ဖမ်းဆီးခဲ့တယ်လို့ သိရပါတယ်။