နေပြည်တော်၊ ပုဗ္ဗသီရိမြို့၊ မင်္ဂလာဒီပရပ်ကွက်မှာ ဖေဖော်ဝါရီ ၁ ရက်က ခေတ်ရှေ့ဆောင် ကိုယ်ပိုင်အထက်တန်းကျောင်းရဲ့ ပေ ၅၀ အမြင့်ရှိ သုံးထပ်ကျောင်းခေါင်မိုးပေါ်ကနေ ခုန်ချတော့မယ့် ကျောင်းသူကို ကယ်ဆယ်ရာက ဆရာဖြစ်သူပါ ပြုတ်ကျသေဆုံးခဲ့တယ်လို့ မြို့ခံတွေက ပြောပါတယ်။
သေဆုံးသူ ၁၆ နှစ်အရွယ် မိန်းကလေးဟာ ညနေ ၄ နာရီ ကျောင်းဆင်းချိန်မှာ ကျောင်းခေါင်မိုးရဲ့ အပေါ်ကို တက်သွားတာဖြစ်ပြီး ခုန်ချဖို့ အောက်ကိုလျှောချနေချိန်မှာ အသက် ၂၂ နှစ်အရွယ် ကွန်ပျုတာဘာသာရပ်ဆရာက ခေါင်မိုးပေါ်လိုက်တက်ပြီး လှမ်းဆွဲရာ နှစ်ဦးစလုံး မြေပြင်ပေါ်ပြုတ်ကျခဲ့တာလို့ ဆိုပါတယ်။
ပုဗ္ဗသီရိမြို့ လူမှုကူညီရေးအသင်း တာဝန်ရှိသူတဦးက “ကျောင်းသွားကြိုရင်းနဲ့ ညနေ ၄ နာရီ မိနစ် ၂၀ ဝန်းကျင်လောက်မှာ ဖြစ်တာပါ။ ပြုတ်ကျတဲ့နေရာရောက်တော့ အဲ့က ဆရာလေးကို အရင်ဆုံးစစ်ပါတယ်။ ဘယ်ဘက်လက်ဖျံတချောင်း ကျိုးထားတယ်။ စစ်လိုက်တော့ မရတော့ဘူးပေါ့။ နားတွေ နှာခေါင်းတွေထဲကနေ သွေးတွေထွက်တာများပြီးတော့ မရတော့ဘူးလို့ သုံးသပ်တယ်။ နောက်တယောက် ထပ်စစ်တော့လည်း ခေါင်းမှာ ဒဏ်ရာတွေ များတယ်ပေါ့။ ချက်ချင်း ဆေးရုံပို့ပေမဲ့လည်း ဒဏ်ရာကပြင်းတာပေါ့။ ဟိုကိုအရောက် လိုအပ်တာလုပ်ပေမဲ့လည်း မမီဘူးပေါ့။ ဆရာလေးက ဇက်ကျိုးထားတာ။ ၅ နာရီဝန်းကျင်မှာ ဆုံးသွားပါတယ်။ သမီးငယ်လေးကို ထပ်စစ်တော့ ချက်ချင်း ဦးနှောက်နဲ့ အာရုံကြောဌာနမှာ အော်ပရေးရှင်းလုပ်၊ စီစဉ်ပေမဲ့ ညနေ ၅ နာရီ ၂၀ မှာ ဆုံးသွားပါတယ်” လို့ ပြောပါတယ်။
အဆိုပါကျောင်းမှာ စီစီတီဗွီကင်မရာနဲ့ လုံခြုံရေးတွေလည်းရှိပြီး ခေါင်မိုးပေါ်တက်တဲ့တံခါးကို သော့အမြဲခတ်ထားကြောင်း၊ သေဆုံးသွားတဲ့ ကျောင်းသူက ဘယ်လိုတက်လို့ရသွားတယ် ဆိုတာနဲ့ အဆောက်အဦပေါ်ကနေ ဘာကြောင့်ခုန်ချတယ်ဆိုတာကို မသိရသေးပါဘူး။
ကျောင်းတာဝန်ရှိသူတွေက အခုချိန်အထိ ကျောင်းသားမိဘတွေဆီ ရှင်းလင်းချက်တစုံတရာ မရှိသေးဘဲ ဖြစ်စဉ်နဲ့ပတ်သက်ပြီး အဆိုပါကျောင်းကို ဆက်သွယ်မေးမြန်းပေမဲ့ ပြန်လည်ဖြေကြားခြင်း မရှိပါဘူး။
သေဆုံးသွားတဲ့ ကျောင်းသူနဲ့ ဆရာဖြစ်သူကို ဖေဖော်ဝါရီ ၃ ရက် ညနေ ၃ နာရီက နေပြည်တော် ကွေ့ကြီးသုသာန်မှာ မီးသင်္ဂြိုဟ်မယ်လို့ သိရပါတယ်။
နေပြည်တော်ကောင်စီနယ်မြေ မြို့နယ် ၈ မြို့နယ်အတွင်းရှိ ပုဂ္ဂလိက ကိုယ်ပိုင်အထက်တန်းကျောင်း ၁၆ ကျောင်း ကျောင်းဖွင့်ခွင့် အပိတ်ခံရတယ်လို့ စုံစမ်းသိရပါတယ်။
ပညာရေးအသိုင်းအဝိုင်းနဲ့ နီးစပ်သူတစ်ဦးက “နိုင်ငံရေးနဲ့ ငြိစွန်းတာရယ်၊ နောက်တချို့ကျောင်းတွေကတော့ လိုအပ်ချက်တွေရှိတာရယ် အဓိကကတော့ နိုင်ငံရေးပဲ။ ဒါပေမဲ့ ပြန်လည်စိစစ်မယ်လို့လည်း ကြားတယ်။ ၁၆ ကျောင်းမှာ တကယ်မဟုတ်ဘဲနဲ့ နာမည်ပါလာတဲ့ ကျောင်းတွေ၊ နိုင်ငံရေးနဲ့ မငြိတဲ့ ကျောင်းတွေကို ပြန်ဖွင့်ခိုင်းမှာပေါ့။ ငြိတဲ့ကျောင်းတွေတော့ အပြီးပိတ်သိမ်းမယ်လို့လည်း ကြားတယ် “ လို့ ပြောပါတယ်။
အပိတ်ခံရတဲ့ကျောင်းတွေရဲ့ အမည်စာရင်း အတိအကျမသိရသေးပေမယ့် လတ်တလော ထွက်ပေါ်နေတဲ့ သတင်းတွေအရ ဥတ္တရသီရိမြို့နယ်က CAE ကိုယ်ပိုင်အထက်တန်းကျောင်း၊ ဇမ္ဗူသီရိမြို့နယ်က မဟာပညာကိုယ်ပိုင်အထက်တန်းကျောင်း၊ လယ်ဝေးမြို့နယ်က ထူးချွန်၊ တပ်ကုန်းမြို့နယ်က တော်၀င်စတဲ့ နာမည်ကြီးကျောင်းတွေ ပါ၀င်တယ်လို့ သိရပါတယ်။
အပိတ်ခံရတဲ့တာနဲ့ ပတ်သက်ပြီး အဆိုပါ ကျောင်းတာဝန်ရှိသူတွေကိုတော့ ဆက်သွယ်မေးမြန်းနိုင်ခြင်း မရှိသေးပါဘူး။
လက်ရှိ ၂၀၂၂-၂၀၂၃ ပညာသင်နှစ်အတွက် မနက်ဖြန် မေလ ၂၆ ရက်နေ့ကစပြီး ဇွန် ၁ ရက်နေ့ကို တနိုင်ငံလုံး ကျောင်းအပ်နှံရေး ရက်သတ္တပတ်ဖြစ် စစ်ကောင်စီက သတ်မှတ် ကြေညာထားပါတယ်။
စစ်ကောင်စီလက်အောက်မှာ ပြန်ဖွင့်လှစ်မယ့်ကျောင်းတွေမှာ ပညာမသင်ကြဖို့နဲ့ စစ်ကျွန်ပညာရေးကို ဆန့်ကျင်ကြဖို့ ကျောင်းသားသမဂ္ဂတွေက တိုက်တွန်းနေသလို ဆရာ၊ ဆရာမတွေ အများအပြားကလည်း အာဏာဖီဆန် CDM လှုပ်ရှားမှုမှာ ပါဝင်နေကြပါတယ်။
