တနင်္သာရီတိုင်း ပုလောမြို့နယ်၊ ပဝတ်ဖျားရွာမှာ မြေမြှုပ်မိုင်းနင်းမိတာကြောင့် ပုလောက သားအမိနှစ်ဦး သေဆုံးခဲ့ပါတယ်။

ဇန်နဝါရီ ၂၃ ရက် ညနေ ၅ နာရီခွဲလောက်က သားအမိနှစ်ယောက် ရွာလမ်းဘေး လမ်းလျှောက်သွားရင်း မိုင်းနင်းမိတာကြောင့် မိခင်ဖြစ်သူ ကိုယ်ဝန် ၆ လရှိ နော်မူးနော် အခင်းဖြစ်နေရာမှာ သေသွားပြီး သားဖြစ်သူ စော်လေးလေးကတော့ ပုလောမြို့ ပြည်သူဆေးရုံရောက်ပြီး ၉ နာရီလောက်မှာ သေဆုံးသွားခဲ့တယ်လို့ ဒေသခံတွေက ပြောပါတယ်။

စစ်ကောင်စီက PDF တွေ လာတိုက်မှာကြောက်လို့ ပဝတ်ဖျားရွာနားမှာ မိုင်းထောင်ထားတာ ဖြစ်ပြီး ပဝတ်ကုန်ရွာမှာ စစ်ကောင်စီ တပ်သား ၄၀ ကျော် တပ်စွဲနေတယ်လို့ ဒေသခံရွာသားတစ်ဦးက ပြောပါတယ်။ 

အဲဒီလို မြေမြှုပ်မိုင်းတွေကို စစ်ကောင်စီတပ်သားတွေသာ အသုံးပြုပြီး ပီဒီအက်ဖ်တွေက လက်လုပ်မိုင်းဘဲ အသုံးပြုတာလို့ ဆိုပါတယ်။

ရွာသားတွေနေတဲ့ ရွာလမ်းတွေမှာ မြေမြှုပ်မိုင်းထောင်တာဟာ ရွာသားတွေအတွက် အန္တရာယ် များလွန်းတာကြောင့် စိုးရိမ်သောကရောက်နေကြတယ်လို့ ဒေသခံတွေက ပြောပါတယ်။

မြန်မာနိုင်ငံမှာ ကျန်းမာရေးစနစ် ပြိုလဲနေတာကြောင့် ကိုယ်ဝန်ဆောင် အမျိုးသမီးတွေ လိုအပ်တဲ့ အရေးပေါ်သားဖွားပြုစုစောင့်ရှောက်မှု မရရှိပါက တစ်လအတွင်း မသေသင့်ဘဲ မိခင် ၂၅၀ လောက် သေဆုံးနိုင်တယ်လို့  UNFPA နဲ့ UN Women တို့က ခန့်မှန်းထားပါတယ်။

မြန်မာနိုင်ငံအတွင်း ပိုမိုဆိုးရွားလာတဲ့ နိုင်ငံရေးနဲ့ကျန်းမာရေးဆိုင်ရာ အကျပ်အတည်းတွေက အမျိုးသမီးတွေနဲ့ မိန်းကလေးတွေအပေါ် သက်ရောက်မှုတွေနဲ့ပတ်သက်ပြီး ဩဂုတ် ၁ ရက်နေ့က ပူးတွဲထုတ်ပြန်ချက်မှာ ခန့်မှန်းဖော်ပြထားတာပါ။

မြန်မာနိုင်ငံမှာ လက်ရှိ ကိုယ်ဝန်ဆောင်နေတဲ့ အမျိုးသမီးအရေအတွက် ၆၈၅,၀၀၀ ကျော်ရှိတယ်လို့  UNFPA နဲ့ UN Women တို့က ခန့်မှန်းထားပါတယ်။

မြန်မာနိုင်ငံမှာ စစ်တပ်က အာဏာသိမ်းပြီးနောက် ခြောက်လတာကာလအတွင်း နိုင်ငံရေးနဲ့ ပြည်သူ့ကျန်းမာရေးဆိုင်ရာ အကျပ်အတည်းတွေကို ဆိုးရွားစွာ ရင်ဆိုင်နေရပြီး ပဋိပက္ခဖြစ်ပွားမှုတွေ မြင့်တက်လာတာနဲ့အတူ အမျိုးသမီးတွေနဲ့ မိန်းကလေးငယ်တွေရဲ့ဘဝတွေက အလွန်စိုးရိမ်ရဖွယ်ရှိနေတယ်လို့ ထုတ်ပြန်ချက်က ဆိုပါတယ်။

ဖေဖော်ဝါရီ ၁ ရက်နေ့နောက်ပိုင်း မြန်မာနိုင်ငံက အမျိုးသမီးအလုပ်သမားတွေအပေါ် သက်ရောက်မှုအနေနဲ့ ခန့်မှန်းခြေ အမျိုးသမီးဦးရေ ၅၈၀,၀၀၀ လောက် အလုပ်အကိုင် ဆုံးရှုံးကြရပြီး ကျန်းမာရေးစနစ်ပြိုလဲတာ၊ ဆေးရုံတွေ တိုက်ခိုက်ခံရတာ၊ ငွေကြေးဆိုင်ရာ အခက်အခဲတွေကြုံတွေ့ရတာနဲ့ လှုပ်ရှားသွားလာမှု ကန့်သတ်ချက်တွေကြောင့် အမျိုးသမီးတွေနဲ့ မိန်းကလေးငယ်တွေဟာ လိင်မှုနဲ့ မျိုးဆက်ပွား ကျန်းမာရေး ဝန်ဆောင်မှုတွေရရှိဖို့ စိန်ခေါ်မှုတွေရှိခဲ့တယ်လို့ ဆိုပါတယ်။

ဒါ့အပြင် အသက် ၁၀ နှစ်နဲ့ ၁၉ နှစ်ကြား ဆယ်ကျော်သက် မိန်းကလေးငယ်ပေါင်း ၅ သန်းနီးပါးမှာ ပြည်သူ့ကျန်းမာရေး ထိခိုက်မှု၊ စာသင်နှစ် ဆုံးရှုံးမှုနဲ့ လုံခြုံရေးဆိုင်ရာ တားမြစ်ချက်တွေ၊ အကြောက်တရားတွေကို ဆိုးရွားစွာ ရင်ဆိုင်နေရတယ်လို့ ပါရှိပါတယ်။

မြန်မာနိုင်ငံမှာ အခုလို လူမူစီးပွားဆိုင်ရာ အခြေအနေတွေ ယိုယွင်းပျက်စီးလာတာကြောင့် အရင်က လူသားချင်းစာနာထောက်ထားမှုဆိုင်ရာ အထောက်အပံ့ပေးမှုအောက်မှာ မပါဝင်ခဲ့တဲ့ လူပေါင်းသိန်းချီဟာ လူသားချင်း စာနာထောက်ထားမှု အကူအညီတွေ လိုအပ်လာနေတယ်လို့လည်း ထုတ်ပြန်ချက်မှာဖော်ပြထားပါတယ်။

ကုလသမဂ္ဂ လူဦးရေဆိုင်ရာ ရန်ပုံငွေအဖွဲ့ (UNFPA) နဲ့ ကမ္ဘာ့ကုလသမဂ္ဂအမျိုးသမီးများအဖွဲ့ (UN Women) တို့ဟာ မိတ်ဖက်အဖွဲ့တွေနဲ့အတူ အသက်ကယ်ဆယ်ရေး လူမှုဘ၀ဆိုင်ရာနဲ့ ကျန်းမာရေးဆိုင်ရာ ဝန်ဆောင်မှုတွေကို မြန်မာနိုင်ငံမှာရှိတဲ့ အမျိုးသမီးတွေနဲ့ မိန်းကလေးငယ်တွေ ရရှိစေဖို့ ဆက်လက်ဆောင်ရွက်သွားမယ်လို့လည်း ထုတ်ပြန်ထားပါတယ်။