ကချင်ပြည်နယ် ဗန်းမော်ခရိုင် ရွှေကူမြို့ ရပ်ကွက် (၁) ရှမ်းကုန်းမှာနေတဲ့ မသဲသဲ(ရွှေမြင့်မိုရ်)နာမည်နဲ့ အွန်လိုင်းကနေဈေးရောင်းတဲ့ ကိုယ်ဝန်ဆောင် အမျိုးသမီးတဦးကို "ထပ်တူခံပြန်စားရပါစေ" ဆိုတဲ့ မှတ်ချက်ရေးသားလို့ ဇွန် ၂၇ ရက်နေ့ညမှာ စစ်ကောင်စီ တပ်ဖွဲ့ဝင်တွေ လာရောက် ဖမ်းဆီးသွားတယ်လို့ မြို့ခံတွေက ပြောပါတယ်။
ပြည်တွင်းသတင်းဌာနတခုက ပြီးခဲ့တဲ့ ဇွန် ၂၂ ရက်နေ့က ရေးသားဖော်ပြထားတဲ့ (ပွင့်ဖြူ PDF ၁၂ ဦးကျဆုံးကာ ၃ ဦး အဖမ်းခံရမှုတွင် အဓိကလက်သည် စစ်ကောင်စီတပ်ဘက်က တပ်မှူး) ဖြစ်ကြောင်း ရေးသားထားတဲ့ သတင်းအောက်မှာ "ထပ်တူခံပြန်စားရပါစေ" ဆိုတဲ့ မှတ်ချက်ပေးထားတဲ့စာကြောင့် လာရောက်ဖမ်းဆီးသွားတာလို့ ဆိုပါတယ်။
"အရပ်ဝတ်တွေနဲ့ လာခေါ်သွားတာ အဲ့ဒီအမျိုးသမီးက မွေးခါနီးနေပြီ၊ ကိုယ်ဝန်အရင့်အမာကြီးနဲ့ အွန်လိုင်းမှာ ဈေးရောင်းရင်း မွေးစရိတ်စုနေတာ” လို့ သူနဲ့ရင်းနှီးတဲ့ အသိုင်းအဝိုင်းက DVB ကို ပြောပါတယ်။
အဆိုပါအမျိုးသမီးရဲ့ အမျိုးသားနဲ့ အသက် ၂ နှစ်အရွယ်သားအပါအဝင် အစ်မဖြစ်သူကိုပါ ဖမ်းဆီးခေါ်ဆောင်သွားပြီး ညတွင်းချင်း ပြန်လွှတ်ပေးပေမယ့် မသဲသဲကိုတော့ ရဲစခန်းမှာ ဆက်လက်ဖမ်းဆီးထားတယ်လို့ မြို့ခံတွေက ပြောပါတယ်။
စစ်ကောင်စီကို ထောက်ခံတဲ့ Ko Khant အမည်ရှိ လူမှုကွန်ရက်စာမျက်နှာ Telegram မှာ ဇွန်လ ၂၃ ရက်နေ့က မသဲသဲ ဓာတ်ပုံတွေနဲ့ မှတ်ချက်ပေးထားတဲ့ စာကြောင်းကိုဖော်ပြကာ ဖုန်းနံပါတ်နဲ့ နေရပ်အတိအကျပေးပြီး ဖမ်းဆီးဖို့ ရေးသားထားတာလို့ ဆိုပါတယ်။
ရေဦးမြို့နယ် ၊ငြုတ္တုံရွာအနီး ရေဦး - ဒီပဲယင်းလမ်းမပေါ်မှာ နိုဝင်ဘာလ ၂၁ ရက် မနက်ပိုင်းက ခရီးသွားကိုယ်ဝန်ဆောင်တစ်ဦး ဗိုက်နာလာလို့ လမ်းခုလတ် ခြုံကြားမှာပဲ အနီးအနားက အမျိုးသမီးတွေရဲ့အကူအညီနဲ့ အောင်မြင်စွာ မီးဖွားပေးလိုက်ကြတယ်လို့ သိရပါတယ်။
“ဆိုင်ကယ်နဲ့ မောင်နှမနှစ်ယောက်လာကြတာတဲ့ဗျ။ အဲဒီနားရောက်တော့ အပေါ့သွားခြင်တယ်ဆိုပြီး ဗိုက်နာလာလို့ ပတ်ဝန်းကျင်က အမျိုးသမီးတွေရဲ့အကူအညီနဲ့ ချုံကြားမှာပဲ မီးဖွားပေးလိုက်ကြတာလို့ သိရတယ်။ ကလေးရော လူကြီးပါ ကျန်းမာကြပါတယ်။ ကျနော်တို့ ရေဦးဆေးရုံကို ကူညီပို့ဆောင်ပေးလိုက်တယ်” လို့ ပုညကုသလ လူမှုကူညီရေးအသင်းက ပြောပါတယ်။
အဆိုပါ အမျိုးသမီးဟာ အခြားမြို့နယ်တခုကလို့သိရပြီး မောင်နှမနှစ်ယောက် ရေဦးမြို့နယ်အတွင်းလာစဉ် လမ်းမှာပဲ မီးဖွားခဲ့တာဖြစ်ပါတယ်။
အမျိုးသမီးနဲ့ကလေးကို ဆေးဝါးအကူအညီပေးနိုင်ဖို့ ပုညကုသလလူမှုကူညီရေးအသင်းက သွားရောက်ခေါ်ဆောင်ပြီး ရေဦးမြို့ ပြည်သူ့ဆေးရုံကို ပို့ဆောင်ပေးခဲ့တယ်လို့သိရပါတယ်။
