မြန်မာနိုင်ငံ၊ ကရင်ပြည်နယ်ရှိ စစ်ဘေးရှောင်ပြည်သူတွေအတွက် ရန်ပုံငွေရှာဂီတဖျော်ဖြေပွဲကို  ကရင်တိုင်းရင်းသူ တေးသံရှင် နော်မာသထူးဝါးအပါအဝင် ကိုးရီးယားတေးသံရှင်တွေ ပူးပေါင်းပြီး တောင်းကိုရီးယားနိုင်ငံ၊ အင်ချွန်းမြို့၊ ဖျောင်းဂန်းဘုရားကျောင်းခန်းမမှာ  မတ်လ ၁၈ ရက် ဒီနေ့ ညမှာ ကျင်းပဖို့ရှိနေပါတယ်။

ဂီတဖျော်‌‌ဖြေပွဲကို ကိုရီးယားရောက်ကရင်ကွန်မြူနတီ (KCK)အဖွဲ့၊ KEEN (Karen Equipped Embrace Nation) အဖွဲ့နဲ့ ဖျောင်းဂန်း‌ (တောင်ကိုရီးယား) အသင်းတော်တို့ ပူးပေါင်းပြီး စီစဉ်တာဖြစ်ပါတယ်။

ထိုင်း - မြန်မာနယ်စပ်ကနေ ကိုးရီးယားနိုင်ငံကိုရောက်လာတဲ့ ကရင်တိုင်းရင်းသားတွေနဲ့ တောင်ကိုးရီးယားပြည်သူတွေအကြား ကောင်းမွန်စွာ အတူယှဥ်တွဲနေထိုင်မှုကို ဖေါ်ပြလိုတာနဲ့ လက်ရှိ နွေဦးတော်လှန်ရေးနဲ့ မြန်မာ့လွတ်လပ်ရေးတိုက်ပွဲကြောင့် ကရင်ပြည်နယ်ကို ရောက်ရှိနေကြတဲ့ မြန်မာနိုင်ငံသားတွေအရေးကို ကိုးရီးယားနိုင်ငံသားတွေက အာရုံစိုက်စေရေး ရည်ရွယ်ကျင်းပတာလို့  ဂီတဖျော်ဖြေပွဲစီစဥ်တဲ့ KCK တာဝန်ရှိသူ တဦးက ဒီဗွီဘီကို ပြောပါတယ်။

ဒီဖျော်ဖြေပွဲမှာ နော်မာသထူးဝါး(ဝါန်နီဟွာ)နဲ့အတူ ကိုရီးယားအဆိုတော်တွေဖြစ်တဲ့ ဂျောင်ချိုအာ၊ ချားဆူးဂယောင်၊ ဂန်အူးဂျင်၊ ကင်အာလင်း၊ လီဂန်ဂျွန်တို့ပါဝင် သီဆိုကြမှာ ကရင် လူငယ်တေးဂီတဝိုင်းနဲ့ ကိုးရီးယားဂီတပညာရှင်တွေ ပူးပေါင်းပြီး တီးခတ်သွားကြမှာ ဖြစ်ပါတယ်။

တေးသံရှင် နော်မာသထူးဝါဟာ ထိုင်း-မြန်မာနယ်စပ်ကနေ ကိုရီးယားနိုင်ငံမှာ သွားရောက် အခြေချနေထိုင်ခဲ့သူဖြစ်ပြီး ငယ်စဉ်ကတည်းက သီချင်းဆိုပြိုင်ပွဲမှာ ဝင်ရောက်ယှဉ်ပြိုင်ခဲ့ရာက   တစိုက်မတ်မတ် ကြိုးစားလေ့လာသင်ယူရင်း တောင်ကိုးရီးယားနိုင်ငံမှာ လူသိများတဲ့ တေးသံရှင်တယောက် ဖြစ်လာခဲ့ပါတယ်။

နော်မာသထူးဝါဟာကို တောင်ကိုးရီးယားနိုင်ငံ၊ ဂယောင်ဂီပြည်နယ် မီးသတ်ဌာနချုပ် (မီးဘေးဒုက္ခသည်များကူညီကယ်ဆယ်ရေးဌာန)က ပြန်ကြားရေးသံတမန်အဖြစ် မတ်လ ၁၀ ရက်နေ့မှာ ဂုဏ်ပြု ခန့်အပ်ခဲ့ပါတယ်။

အခုဂီတ ဖျော်ဖြေပွဲကို ဝင်ကြေး လက်မှတ်တစ်စောင် ကိုရီးယား ဝမ်ငွေ ၂၀၀၀၀ သတ်မှတ်ထားပြီး  ရရှိလာတဲ့ အလှူတွေကို ကရင်ပြည်နယ်ရှိ စစ်ဘေးဒဏ်ခံနေရတဲ့ ပြည်သူတွေအတွက် စားနပ်ရိက္ခာနဲ့ ဆေးဝါးတွေလှူဒါန်းမှာဖြစ်သလို လွတ်မြောက်နယ်မြေသို့ ရောက်ရှိနေတဲ့ တိုင်းရင်းသားညီအစ်ကို မောင်နှမတွေ ထံသို့ လှူဒါန်းသွားမယ်လို့ ပွဲစီစဉ်သူတွေက ပြောပါတယ်။

ရန်ပုံငွေတွေကို ထိုင်းနိုင်ငံ မဲဆောက်မြို့ အခြေစိုက် ကရင်ဒုက္ခသည်ကော်မတီ (KRC) နဲ့ တခြား NGO တွေကနေတဆင့် ချိတ်ဆက်ပြီး စစ်ဘေးရှောင်ပြည်သူတွေထံ ထိထိရောက်ရောက် ပို့ဆောင် သွားမယ်လို့လည်း သိရပါတယ်။

ကိုရီးယား အင်ဒီဂီတပညာရှင်များအစည်းအရုံးက အဆိုတော်တွေဟာ ဒီမိုကရေစီအတွက် တိုက်ပွဲဝင်နေတဲ့ မြန်မာပြည်သူတွေကို ရည်စူးထားတဲ့သီချင်းတပုဒ်ကို ထုတ်လွှင့်တော့မှာ ဖြစ်ပါတယ်။ 

မြန်မာဒီမိုကရေစီကို ထောက်ခံအားပေးတဲ့ ဒီအနုပညာရှင်တွေဟာ လာမယ့်တနင်္လာနေ့မှာ ရော့ခ်ဂီတပုံစံနဲ့ သီဆိုထားတဲ့ “March For the Beloved” ဆိုတဲ့ သီချင်းကို ထုတ်လွှင့်တော့မယ်လို့ မေ ၂၇ ရက်နေ့မှာ ကြေညာခဲ့ပါတယ်။ 

Ta-Copy အဖွဲ့က ကင်မ်ဂျေဂွတ်၊ ABTB ရော့ခ်အဖွဲ့က ရှင်ဂါရမ်၊ ပတ်ခ်ဂွမ်ဟုန်နဲ့ Fishingirls ရော့ခ်တီးဝိုင်းမှ ဗီယန်နာဖင်းဂါးတို့ အပါအဝင် အင်ဒီအဆိုတော် ၁၃ ယောက်တို့က ပါဝင်သီဆိုမှာဖြစ်ပါတယ်။ 

မြန်မာပြည်ငြိမ်းချမ်းရေးအတွက် မျှော်လင့်ချက်တွေကို သီချင်းနဲ့ဖော်ထုတ်ဖို့ ရည်ရွယ်ပြီး မြန်မာစစ်တပ်ရဲ့ လူ့အခွင့်အရေးချိုးဖောက်မှုတွေ ရပ်တန့်ဖို့အတွက် အနုပညာရှင်တွေက မေတ္တာနဲ့ပါဝင်ထားကြတာလို့ အင်ဒီဂီတပညာရှင်များ အစည်းအရုံးက ရှင်းပြပါတယ်။ 

“March For the Beloved” သီချင်းဟာ ၁၉၈၀ ခုနှစ်က မေလ ၁၈ ရက် ဂွမ်ဂျူးအရေးအခင်းအတွင်းမှာ သေဆုံးခဲ့ရသူတွေကို အောက်မေ့တဲ့ ကိုရီးယားဒီမိုကရေစီလှုပ်ရှားမှု ကိုယ်စားပြု အမှတ်သင်္ကေတ သီချင်းဖြစ်ပါတယ်။ ဒီသီချင်းရဲ့ မူရင်းတေးရေးဆရာ ကင်မ်ဂျုံရူလ်က အနုပညာရှင်တွေရဲ့ရည်ရွယ်ချက်ကို ကြားလိုက်တဲ့အခါမှာ အင်ဒီးအဖွဲ့ရဲ့ ပြန်လည်သီဆိုပုံဖော်မှုမှာ ပါဝင်ဖို့အသင့်ပါပဲလို့ ပြောပါတယ်။