စစ်ကောင်စီတပ်လက်အောက်ခံ ပြည်သူ့စစ်အဖွဲ့ဝင် ၂ ယောက်အပါအဝင် လူသတ်၊ ပြန်ပေးဆွဲမှုတွေ ကျူးလွန်ခဲ့သူ ၄ ယောက်ကို မြန်မာအမျိုးသား ဒီမိုကရက်တစ်မဟာမိတ်တပ်မတော် (MNDAA) က မေ ၁ ရက်နေ့မှာ လူမြင်ကွင်းမှာ သေဒဏ်ပေးခဲ့တယ်လို့ The Kokang သတင်းမှာဖော်ပြပါတယ်။
ကိုးကန့်ဒေသ အထူးဒေသ ၁ အုပ်ချုပ်ရေးအဖွဲ့ရဲ့ မူပန်းခရိုင်ထဲက ယာယီတရားရုံးကနေ စီရင်ချက်ချလိုက်တာဖြစ်ပြီး လားရှိုးမြို့မှာ ပြစ်မှု ၂၅ ခုကျူးလွန်ခဲ့ကြတာလို့ ဆိုပါတယ်။
သေဒဏ်ပေးခံရသူတွေကတော့ မန်ပန်ပြည်သူ့စစ်အဖွဲ့ဝင် အသက် ၂၃ နှစ်အရွယ် ရှိဝေ့ယုံ၊ အသက် ၂၉ နှစ်အရွယ် ကော်ရှောက်ဝေ၊ မန်ပန်ပြည်သူ့စစ်အဖွဲ့ဝင် အသက် ၂၁ နှစ်အရွယ် ကော်ရှောက်ခွမ်နဲ့ အသက် ၁၈ နှစ်အရွယ် ရှိဝေ့ချန်တို့ ဖြစ်ကြပြီး သူတို့ဟာ လားရှိုးမြို့မှာ နေထိုင်တဲ့ တရုတ်လူမျိုးတွေဖြစ်တယ်လို့လည်း ဆိုပါတယ်။
သူတို့ကို ၂၀၂၃ ခုနှစ် ဖေဖော်ဝါရီ ၂၅ ရက်ကနေ မတ် ၁၇ ရက်နေ့အတွင်း ဖမ်းဆီးမိခဲ့တာဖြစ်ပြီး သူတို့ဟာ တရုတ်နိုင်ငံသား ၁ ယောက်၊ မြန်မာနိုင်ငံသား ၈ ယောက်ကို သတ်ဖြတ်ခဲ့တယ်လို့ ဆိုပါတယ်။
အမှုနဲ့ပတ်သက်တဲ့ ငွေနဲ့ ပစ္စည်းတန်ဖိုးပေါင်းကတော့ တရုတ်ငွေ ၄ ဒသမ ၇၇ သန်းနဲ့ မြန်မာငွေ ၇၄၅၁ သန်း ဖြစ်ပြီး CROWN ကား ၅ စီး၊ VO ၁ စီး၊ Lexus ၁ စီး၊ TOYOTA ၁ စီး၊ Land Cruiser ၁ စီးနဲ့ လက်စွပ် ၂ ကွင်းတို့ဖြစ်ပြီး တရားခံတွေ သုံးစွဲပြီးကျန်တာတွေကို ဆက်လက်ရှာဖွေနေတယ်လို့ ဆိုပါတယ်။
သူတို့ဟာ ၂၀၂၂ ခုနှစ် ဇူလိုင်လမှာ လားရှိုးမြို့ပေါ်က အမျိုးသမီးတယောက်ကို ပြန်ပေးဆွဲပြီး ကျပ်သိန်း ၃၀၀ ကျော်တောင်းခံခဲ့သလို မြို့ပေါ်ကနေအိမ်တွေကို သေနတ်၊ ဓား စတာတွေနဲ့ ဝင်ရောက် ဓားပြတိုက်ခဲ့ကြတယ်လို့ ဆိုပါတယ်။ တနှစ်လုံးမှာ ဓားပြမှု ၁၃ မှုနဲ့ လူသတ်မှု ၁ မှု၊ ပြန်ပေးဆွဲမှု ၂ မှုကို ကျူးလွန်ခဲ့ကြပြီး ၂၀၂၃ ခုနှစ်မှာလည်း ဖေဖော်ဝါရီလအထိ ဓားပြမှု၊ လူသတ်မှုနဲ့ ပြန်ပေးဆွဲတာတွေလုပ်ခဲ့တယ်ဆိုတာ ဝန်ခံကြတယ်လို့ ဆိုပါတယ်။
သေဒဏ်ပေးတဲ့နေရာကို လူ ၂၀၀ ကျော်လာရောက်ပြီး တရားခံတချို့ကတော့ တိမ်းရှောင်နေတုန်းဖြစ်တယ်လို့လည်း ဆိုပါတယ်။
မြန်မာနိုင်ငံမှာ စစ်တပ်ကအာဏာသိမ်းပြီးနောက်ပိုင်း ပိုမိုများပြားလာတဲ့ ရာဇဝတ်မှုတွေကြောင့် ပြည်သူတွေရဲ့ အသက်အိုးအိမ်ကို ကာကွယ်စောင့်ရှောက်ဖို့ အထူးဒေသ(၁)အုပ်ချုပ်ရေးအဖွဲ့နဲ့ MNDAA တို့က ဒေသအုပ်ချုပ်ရေးအဖွဲ့နဲ့ တပ်ဖွဲ့ တွေကို ရာဇဝတ်မှုကျူးလွန်သူတွေကို နှိမ်နင်းတိုက်ဖျက်ဖို့အမိန့်ပေးခဲ့ပြီး လားရှိုး၊ မူဆယ်စတဲ့နေရာတွေမှာ ဓားပြတိုက်ဖျက်ရေးလုပ်ငန်းကို ဆောင်ရွက်နေတယ်လို့လည်း ဆိုပါတယ်။
စစ်အာဏာသိမ်းပြီး တနိုင်ငံလုံးကို မီးလောင်တိုက်သွင်း ဖျက်ဆီးသတ်ဖြတ်နေတဲ့ အခြေအနေကနေ လွတ်မြောက်ရေးအတွက် စစ်ကောင်စီကိုခုခံတော်လှန်တိုက်ပွဲဝင်နေတဲ့ အဖွဲ့တွေအားလုံးနဲ့ ပူးပေါင်းတိုက်ပွဲဝင်သွားမယ်လို့ မြောက်ပိုင်း ညီနောင်မဟာမိတ် တိုင်းရင်းသား လက်နက်ကိုင်အဖွဲ့တွေက ကတိပြုလိုက်ပါတယ်။
ဒီကနေ့ ဧပြီ ၁၀ ရက်မှာ ကျရောက်တဲ့ ၁၄ နှစ်မြောက် ရက္ခိုင့်တပ်တော်အတွက် တအောင်းအမျိုးသားလွတ်မြောက်ရေးတပ်မတော်(TNLA)၊ မြန်မာအမျိုးသားဒီမိုကရက်တစ် မဟာမိတ်တပ်မတော်(MNDAA)တို့အပါအဝင် NUG ကာကွယ်ရေးဝန်ကြီးဌာနနဲ့ ပြည်သူ့ကာကွယ်ရေးတပ်ဖွဲ့ ၁၀ ဖွဲ့ကျော်က သဝဏ်လွှာအသီးသီးပေးပို့ရာမှာ ဖော်ပြထားတာ ဖြစ်ပါတယ်။
စစ်ကောင်စီက အာဏာသိမ်းပြီးနောက် ပြည်မနဲ့တောင်တန်း မခွဲခြားတော့ဘဲ တနိုင်ငံလုံးရှိ ပြည်သူလူထုနဲ့ ရပ်/ရွာတွေကို မီးလောင်တိုက်သွင်းပြီး ဖျက်ဆီးသတ်ဖြတ်တာ၊ အကျဉ်းချတာ၊ နိုင်ငံရဲ့ စီးပွားရေးဖွံ့ဖြိုးမှုနဲ့ လူမှုဘဝအားလုံး ဖျက်ဆီးခံရကာ မသေချာ မရေရာမှုတွေနဲ့ ပြည်နှက်နေတဲ့အခြေနေမှာ ညီနောင်မဟာမိတ် ၃ ဖွဲ့ဟာ ဒီအခြေအနေက လွတ်မြောက်နိုင်ဖို့ စစ်ကောင်စီကို တော်လှန်တိုက်ပွဲဝင်နေတဲ့ အဖွဲ့အစည်းတွေနဲ့ အတူတကွ ခိုင်မာစွာ လက်တွဲကာတိုက်ပွဲဝင်ကြမယ်လို့ ဆိုပါတယ်။
ညီနောင်မဟာမိတ် ၃ ဖွဲ့ဟာ ပြည်ထောင်စု နိုင်ငံရေးဆွေးနွေးညှိနှိုင်းရေး ကော်မတီ(FPNCC) အဖွဲ့ဝင်တွေဖြစ်လို့ FPNCC က ထုတ်ပြန်ထားတဲ့ "နိုင်ငံရေးဆွေးနွေးမှုအပေါ် တိုင်းရင်းသားလက်နက်ကိုင် တော်လှန်းရေးအဖွဲ့အစည်းတွေရဲ့ မူဝါဒနဲ့ရပ်တည်ချက်" အတိုင်း ခိုင်မာစွာရပ်တည်ပြီး မိမိတို့ရဲ့ သက်ဆိုင်ရာ လူမျိုးနဲ့ နယ်မြေကို ကိုယ်စားပြုပြီး လုပ်ငန်းတွေ လုပ်ကိုင်ဆောင်ရွက်နေတဲ့အဖွဲ့တွေ ဖြစ်တယ်လို့လည်း သဝဏ်လွာမှာ ရေးသားထားပါတယ်။
တိုင်းပြည်တဝန်း လှည်းနေလှေအောင်း မြင်းဇောင်းမကျန် ဆင်နွှဲနေတဲ့ နွေဦးတော်လှန်ရေး ပြည်သူ့ခုခံတွန်လှန်စစ်ဆင်ရေးမှာ အေအေဟာ အဖိနှိပ်ခံ ပြည်သူလူထုနဲ့ တတူရပ်တည်ပြီး ဘုံရန်သူကို ပြင်းပြင်းထန်ထန် ခုခံတွန်းလှန်နေတဲ့အပြင် တော်လှန်ရေးအင်အားစုတွေကိုလည်း လက်တွဲကူညီပေးနေတယ်လို့လည်းဆိုပါတယ်။
ဘုံရန်သူ စစ်ကောင်စီကို အပြီးသတ်ချေမှုန်းနိုင်ဖို့ အတူတကွစုစည်းညီညွတ်စွာနဲ့ ရုန်ကန်ဖောက်ထွက် ကြိုးစားကြရမှာဖြစ်ပြီး ရက္ခိုင့်တပ်တော်အနေနဲ့ ရက္ခိုင့်ပြည်သူလူထုရဲ့ နိုင်ငံရေးအမျိုးသားရေး မျော်မှန်းချက်တွေကိုလည်း တပါးတည်းအပြည့်အဝ အကောင်အထည်ဖော်ဆောင်နိုင်ပါစေလို့ NUG ကာကွယ်ရေးဝန်ကြီးဌာနကလည်း သဝဏ်လွှာပေးပို့ ဆုတောင်းပေးထားပါတယ်။
ဒါအပြင် စစ်တပ်အာဏာသိမ်းပြီးနောက် ပေါ်ပေါက်လာတဲ့ ပြည်သူ့ကာကွယ်တပ်ဖွဲ့ပေါင်း ၁၀ ကျော်နဲ့ အရပ်ဘက်အဖွဲ့အစည်းတချို့ကလည်း သဝဏ်လွာအသီးသီးပေးပို့ထားကြပါတယ်။
ရက္ခိုင့်တပ်တော် (အေအေ)ကို ၂၀၀၉ ခုနှစ်က ကချင်ပြည်နယ်ရှိ ကချင်လွတ်မြောက်ရေးတပ်(KIA)ရဲ့ ဌာနချုပ် လိုင်ဇာမြို့မှာ လူငယ် ၂၆ ဦးနဲ့ စတင်ထူထောင်ခဲ့ကြတာ ဖြစ်ပါတယ်။
