ရှမ်းပြည်နယ်မြောက်ပိုင်း၊ တရုတ် - မြန်မာနယ်စပ်၊ ကြူကုတ် (ပန်ဆိုင်း) - ဝမ်တိန် ဂိတ်ကနေ ကုန်ကား အဝင်၊ အထွက်ကို မတ် ၂၀ ရက်နေ့မနက် ၆ နာရီကစ ပြန်လည်ဖွင့်လှစ် လိုက်ပြီလို့ နယ်စပ် ဒေသခံတွေက ပြောပါတယ်။

"ဟုတ်တယ်။ ဒီနေ့ ဖွင့်တယ်။ ဘာတွေ ဘယ်လို ဝင်ထွက်လို့ရလဲတော့ ကျနော် အတိအကျ မသိသေးဘူး" လို့ ဌာနဆိုင်ရာ ဝန်ထမ်းတဦးက ပြောပါတယ်။

ပို့ကုန်ပစ္စည်းတွေအနေနဲ့ သစ်သီးနဲ့ ကြံကို ခြောက်ဘီး၊ ဆယ့်နှစ်ဘီး၊ တွဲကားတို့နဲ့ တင်ပို့ခွင့်ပြုပြီး တရုတ်ဘက်ထဲက မြန်မာဘက် အပြန်ကို ခါလီသာ ဝင်ခွင့်ပြုကြောင်း၊ တရုတ်ဘက်ထဲကနေ ကုန်ပစ္စည်း တင်လာလိုပါက ကျင်းစန်းကျော့ ဂိတ်ကနေသာ ထွက်ရမှာဖြစ်ကြောင်း နယ်စပ် ကုန်သည်လုပ်ငန်းရှင်တွေက ပြောပါတယ်။

"ဒီမနက်ဖွင့်ပြီ။ လူတော့ ခွင့်မပြုဘူးတဲ့။ ကုန်ကားတွေက ရတယ်။ ကားတစီး လူတဦးပေါ့" လို့ ပန်ဆိုင်းမြို့မှာ အလုပ်လုပ်နေသူ အမျိုးသားတဦးက ပြောပါတယ်။

တရုတ်ဘက်က သွင်းကုန်အနေနဲ့ လူသုံးကုန်၊ ဆေးဝါး၊ လျှပ်စစ်ပစ္စည်း နဲ့ စားသောက်ကုန်တွေကို ခြောက်ဘီးနဲ့သာ တင်သွင်းခွင့်ပြုကြောင်း နယ်စပ် လုပ်ငန်းရှင်တွေဆီက သိရပါတယ်။

ကိုဗစ်ကပ်ရောဂါကြောင့် ကြူကုတ် (ပန်ဆိုင်း) - ဝမ်တိန် ဂိတ်ကို ပြီးခဲ့တဲ့ ၂၀၂၁ ဇူလိုင် ၈ ရက်နေ့ကစ တရုတ်ဘက်က အကန့်အသတ်မရှိ ပိတ်ထားခဲ့တာဖြစ်ပြီး ၂၀၂၂ ခုနှစ် နှစ်ကုန်ပိုင်း တရုတ်နိုင်ငံထဲ ကိုဗစ် Zero စနစ် ဖြေလျှော့လိုက်ချိန်ကစ တရုတ်ဘက်ကနေ မြန်မာနိုင်ငံနဲ့ ထိစပ်နေတဲ့ နယ်စပ်ဂိတ်တွေကို တခုပြီးတခု ဖွင့်လှစ်လိုက်တာဖြစ်ပြီး မြန်မာဘက်ကလည်း တဖြည်းဖြည်းချင်းစီ ပြန်လည်ဖွင့်လှစ်ခဲ့တာပါ။

လက်ရှိမှာတော့ မူဆယ်နယ်စပ်ဂိတ်တွေ ဖြစ်တဲ့ မန့်ဝိန်း - ကျယ်ဂေါင် ဂိတ်ကနေ ခြောက်ဘီး ကုန်တင်ယာဉ်တွေ၊ နန်းတော် - ကျယ်ဂေါင် ဂိတ်ကနေ လူ၊ ဆင်ဖြူ - ကျယ်ဂေါင် ဂိတ်ကနေ လူနဲ့ ခြောက်ဘီးအောက် ယာဉ်ငယ်တွေ၊ ကျင်းစန်းစကျော့ - ဝမ်တိန် ဂိတ်ကနေ ရှစ်ဘီးနဲ့ အထက် ကုန်တင်ယာဉ်တွေ၊ ချင်းရွှေဟော် - မုန်းတိန်ဂိတ်ကနေ ဆယ့်နှစ်ဘီး ကုန်တင်ယာဉ်တွေ စသဖြင့် ဝင်ထွက် ခွင့်ပြုနေတာဖြစ်ပြီး လူဝင် လူထွက် နယ်စပ်ဖြတ်ကျော်ခွင့် စာအုပ်ကိုတော့ တရုတ်နိုင်ငံ နဲ့ ထိစပ်နေတဲ့ မြို့တွေထဲက အိမ်ထောင်စု စာရင်းရှိသူတွေကိုသာ ထုတ်ပေးနေတာဖြစ်ပါတယ်။

Pra Jaw

စစ်ကိုင်းတိုင်း၊ ကလေးမြို့ ဒေသကွပ်ကဲရေးစစ်ဌာနချုပ်နဲ့ ထောက်ပို့တပ်က တပ်ဖွဲ့ဝင်တွေဟာ ပြည်သူလူထုပိုင်တဲ့ ကုန်တင်ကားတွေကို ချောဆွဲပြီး မတ်လ ၉ ရက် မနက်ပိုင်းက ကလေးမြို့ကနေ ချင်းပြည်နယ်ဘက်ကို တက်သွားပြီလို့ ဒေသခံတွေက ပြောပါတယ်။

စစ်ကောင်စီရဲ့ သံချပ်ကာတင့်ကား ၂ စီး အပါအဝင် ကုန်တင်ကားစုစုပေါင်း ၂၈ စီးဟာ စစ်ကောင်စီတပ်သားတွေရဲ့ လုံခြုံရေးအပြည့်နဲ့ လက်နက်ခဲယမ်းတွေ၊ စားနပ်ရိက္ခာတွေ သယ်ဆောင်သွားတာကို မြင်ခဲ့ရတယ်လို့ မြို့ခံတဦးက ဒီဗွီဘီကို ပြောပါတယ်။

“ကုန်တင်ကားက ၂၆ စီး၊ တင့်ကားက ၂ စီး၊ အဲ့ဒီကုန်တင်ကားထဲမှာ စစ်သားတွေရော လိုက်စီးတယ်။ ကားပေါ်မှာ မိုးကာတွေ၊ လက်နက်တွေ သယ်သွားတာ မြင်လိုက်တယ်။”

မတ်လ ၆ ရက်ကစပြီး စစ်ကောင်စီက မြို့ခံတွေရဲ့ ကုန်တင်ကားတွေ အပါအဝင် ၁၂ ဘီးကား အစီး ၃၀ ဝန်းကျင်ကို ချောဆွဲထားပြီး မိမိတို့ရဲ့စစ်ဌာနချုပ်ကို ခေါ်ဆောင်ထားတယ်လို့ သိရပါတယ်။

မုံရွာ၊ မန္တလေး၊ ရန်ကုန်ဘက်ကို ကုန်တင်ကုန်ချပြုလုပ်တဲ့ ကားတွေကို စစ်ကောင်စီက ချောဆွဲထားတာကြောင့် တချို့ကားတွေ မြို့ထဲကို မဝင်ရဲကြဘဲ လမ်းမှာသာ အခြေအနေ စောင့်ကြည့်နေရတယ်လို့ မြင့်မြတ်ကံသာကားဂိတ်မှ ကုန်တင်ယာဉ်မောင်းတဦးက ပြောပါတယ်။

“သူတို့က ချောဆွဲနေတော့ မဖြစ်မနေ လိုက်ရမှာလေ။ သူတို့လက်နက်တွေ တင်ခိုင်းပြီး ပတ်မောင်းနေရလို့တော့ တို့မိုင်းဆွဲခံပြီး သေကုန်မှာပေါ့။ အခုတော့ စောင့်ကြည့်နေရတဲ့ အနေအထားပဲ။”

စစ်ကောင်စီက မြို့တွင်းကိုဝင်လာတဲ့ ကုန်တင်ကားတွေကို ချောဆွဲထားပြီး ကျန်ရှိနေတဲ့ ကုန်တင်ကားတွေ မြို့ထဲကိုမဝင်ရဲတာကြောင့် မြို့တွင်းကုန်စုံဆိုင်တချို့မှာ ကုန်ပစ္စည်းတွေ ပြတ်တောက်နေတယ်လို့ မြို့ခံတွေက ပြောပါတယ်။

မတ်လ ၇ ရက်ကစပြီး စစ်ကောင်စီတပ်သား အင်အား ၇၀ ဝန်းကျင်ဟာ ကလေးမြို့ဘက်ကနေ ချင်းတောင်ဘက်ကို ခြေချင်တက်ရောက်သွားပါတယ်။

ကလေးမြို့မှ ချင်းတောင်တက်တဲ့ လမ်းမတွေပေါ်မှာ အချိန်မရွေး တိုက်ပွဲတွေ ဖြစ်ပေါ်လာနိုင်တာကြောင့် မိဘပြည်သူတွေအနေနဲ့ ခရီးသွားတာ၊ တောထွက်တာ မပြုလုပ်ကြဖို့ PDF Zoland နဲ့ ကလေးမြို့ပြစီမံချက်အဖွဲ့က အသိပေး ထုတ်ပြန်ထားပါတယ်။

စစ်ကောင်စီရဲ့ အတင်းအကျပ် ချောဆွဲမှုကြောင့် လိုက်မောင်းပေးရတဲ့ ကားသမားတွေအတွက် စိတ်ပူမိတယ်လို့ ကုန်‌တင်‌ယာဉ်မောင်းတွေက ဆိုထားပြီး ဒီနေ့ ချင်းတောင်ဘက်ကိုတက်တဲ့ ကားတွေဟာ ချင်းပြည်နယ်၊ ဟားခါးမြို့မှာ ရိက္ခာချမယ်လို့ ဒေသခံတွေက ခန့်မှန်းထားကြပါတယ်။

ဓာတ်ပုံ-CNDF(ယနေ့မနက်ချင်းတောင်ကိုတက်နေတဲ့ကားများ)