ကိုလံဘီယာနဲ့ ဗင်နီဇွဲလားနိုင်ငံတို့ဟာ နှစ်အတန်ကြာ အဆင်မပြေဖြစ်နေတဲ့ နှစ်နိုင်ငံ ဆက်ဆံရေးနဲ့ စီးပွားရေးအရ တင်းတင်းကျပ်ကျပ် ကန့်သတ်ထားတဲ့ ဆက်ဆံရေးတွေအပြီးမှာ ကုန်သွယ်မှုကနေ ဒေါ်လာ ဘီလီယံပေါင်းများစွာ ရရှိနိုင်ဖို့အတွက် စက်တင်ဘာ ၂၆ ရက်က အဓိက နယ်စပ်ဖြတ်ကျော်မှုမှာ ကုန်တင်ပို့ဆောင်မှုကို ပြန်လည်ဖွင့်လှစ်ခဲ့ပါတယ်။

ကိုလံဘီယာရဲ့ ကူကူတာမြို့နဲ့ ဗင်နီဇွဲလားပြည်နယ် တာချီရာမြို့အကြား ဖြတ်လမ်းတွေကနေ ကျောက်မီးသွေး၊ အိမ်သာသုံးစက္ကူနဲ့ သစ်သီးတွေလို ကုန်ပစ္စည်းတွေကို ဖြတ်ကျော် သယ်ဆောင်ခွင့်ပြုထားတဲ့ ပြန်လည်ဖွင့်လှစ်မှုဟာ ကိုလံဘီယာရဲ့ လက်ဝဲသမ္မတသစ် ဂူစတာဗို ပက်ထရိုရဲ့ အဓိကမဲဆွယ်ရေး ကတိတစ်ခု ဖြစ်ပါတယ်။ 

စက်တင်ဘာ ၂၆ ရက်က ပက်ထရိုဟာ ဆိုင်မန်ဘိုလီဗာ တံတားကို ခြေလျင်ဖြတ်ကျော်ပြီး ဗင်နီဇွဲလားဘက်ခြမ်းကို ကူးသွားခဲ့ပြီး တခြားကိုလံဘီယာနဲ့ ဗင်နီဇွဲလားအရာရှိတွေနဲ့အတူ နှစ်ဖက် စစ်တီးဝိုင်းတွေက နိုင်ငံတော်သီချင်းတွေ တီးမှုတ်ကြတာကို နားထောင်ခဲ့ပါတယ်။ 

ပက်ထရိုက ဗင်နီဇွဲလားသမ္မတ နိကလပ်စ် မာဒူရိုနဲ့ ပထမဆုံး တွေ့ဆုံမယ့်ရက်ကို မသတ်မှတ်ရသေးကြောင်း၊ ကိုလံဘီယာနဲ့ ဗင်နီဇွဲလား စီးပွားရေး နှစ်ရပ်စလုံး ပေါင်းစည်းဖို့ လိုအပ်ကြောင်း သတင်းထောက်တွေကို ပြောပါတယ်။

ဖွင့်ပွဲအခမ်းအနားကို မတက်ရောက်နိုင်ခဲ့တဲ့ ဗင်နီဇွဲလားသမ္မတ မာဒူရိုက နှစ်နိုင်ငံကြား ကူးသန်းရောင်းဝယ်ရေး ဆက်ဆံရေးတွေ အဆင်ပြေမယ့်နေ့ကို ရောက်လာမယ်ဆိုတာ သိထားပြီးသားပါလို့ ကာရာကာ့စ်မြို့တော်ကနေ လှမ်းပြောကြားပါတယ်။ 

ကုန်တင်သယ်ယူပို့ဆောင်မှုကို အရင်က မြောက်ပိုင်းဖြတ်လမ်း တခုတည်းကိုသာ ဖြတ်သန်းခွင့် ပြုထားတာပါ။ ကူကူတာအနီးရှိ ဒုတိယလမ်းတံတားကို ရက်သတ္တပတ်တွေအတွင်း ဖွင့်လှစ်မှာ ဖြစ်ကြောင်းလည်း ပက်ထရိုက ပြောပါတယ်။

ကုန်တင်ထရပ်ကားတွေကို မနက် ၁၀ နာရီကနေ ညနေ ၅ နာရီကြားမှာ နေ့စဉ် ဖြတ်ကျော်နိုင်ကြောင်း ဗင်နီဇွဲလား သယ်ယူပို့ဆောင်ရေးဝန်ကြီး ရာမန်ဗေလာစ်ကွက်ဇ်က သီးခြားရှင်းလင်းပွဲတစ်ခုမှာ ပြောကြားခဲ့ပြီး လူကူးလမ်းတွေကိုလည်း သိပ်မကြာခင်မှာ စလုပ်တော့မှာဖြစ်ကြောင်း ပြောပါတယ်။

ကီလိုမီတာ ၂၀၀၀ ကျော် ရှည်လျားတဲ့ နယ်စပ်မျဉ်းပေါ်ရှိ နှစ်နိုင်ငံကုန်သည်တွေဟာ ပုံမှန်ပြန်ဖြစ်ရေးကို စိတ်အားထက်သန်စွာ စောင့်မျှော်နေကြပြီး ပွင့်လင်းတဲ့ ကုန်သွယ်မှုကနေ သူတို့ဆီကို ကုန်ကြမ်းနဲ့ ဖောက်သည်သစ်တွေ ရရှိဖို့ မျှော်လင့်နေကြပါတယ်။