ကရင်နီ (ကယား) ပြည်နယ်၊ ဒီးမော့ဆို၊ ကုန်းသာကျေးရွာမှာ ဒေသခံ ပြည်သူ့ကာကွယ်ရေးတပ်တွေနဲ့ စစ်ကောင်စီတပ်တို့ ဩဂုတ် ၁၇ ရက် ညပိုင်းက ထိတွေ့တိုက်ပွဲ ပြင်းထန်ခဲ့ပြီး စစ်ကောင်စီဘက်က ၆ ယောက်လောက် သေဆုံးနိုင်တယ်လို့ ကရင်နီတော်လှန်ရေးတပ်ပေါင်းစု (KRU) က ဩဂုတ် ၁၈ ရက်မှာ ထုတ်ပြန်ထားပါတယ်။

ဩဂုတ် ၁၇ ရက် ညနေ ၄ နာရီခွဲကနေ ၆ နာရီခွဲအထိ နှစ်နာရီကြာ ဒီးမော့ဆို၊ ကုန်းသာကျေးရွာမှာ ထိတွေ့တိုက်ပွဲ ပြင်းထန်ခဲ့တာပါ။

တိုက်ပွဲအတွင်း Kareni Revolution Union-KRU နဲ့ မဟာမိတ် DMO PDF တို့ ပူးပေါင်းတိုက်ခိုက်ခဲ့ပြီး စစ်ကောင်စီတပ်ဘက်က ၆ ယောက်ခန့် သေဆုံးကာ ဒဏ်ရာရသူတွေ ရှိခဲ့ပြီး KRU မှ ရဲဘော်တယောက် မစိုးရိမ်ရဒဏ်ရာ ရရှိခဲ့တယ်လို့ ဆိုပါတယ်။

ညနေ ၅ နာရီခွဲလောက်မှာ စစ်ကောင်စီတပ်က ပြည်သူ့နေအိမ်တလုံး မီးရှို့ခဲ့ပြီး လက်နက်ကြီးတွေ၊ အတွဲလိုက်ဒုံးတွေ၊ စက်လက်နက်တွေနဲ့ မနားတမ်း ပစ်ခတ်ခဲ့သလို ပြည်သူ့ကာကွယ်ရေးတပ်ဘက်မှလည်း 81MM စတဲ့ လက်နက်ကြီးတွေနဲ့ ပြန်လည်ပစ်ခတ် ခုခံနိုင်ခဲ့တယ်လို့ သိရပါတယ်။

အဆိုပါ စစ်ကောင်စီတပ်ဟာ ဒီးမောဆိုမြို့နယ်ကို စစ်အင်အား လက်နက်အင်အား အလုံးအရင်းနဲ့ ထိုးစစ်ဆင်ဖို့ ဩဂုတ် ၁၄ ရက်ကတည်းက ပြင်ဆင်နေတာလို့ DMO PDF ကနေ သိရပါတယ်။

စစ်ရေးအခြေအနေဟာ ဩဂုတ် ၁၄ ရက်ကတည်းက တင်းမာနေခဲ့ပြီး ဒီးမောဆိုနယ်မြေကို ပြန်ထိန်းချုပ်နိုင်ဖို့အတွက် ကြိုးစားနေတယ်လို့ ယူဆရကြောင်း ပြည်သူ့ကာကွယ်ရေးတပ် ဒီးမောဆိုမြို့နယ် (DMO PDF) သတင်းပြန်ကြားရေးတာဝန်ရှိသူက ပြောပါတယ်။

ကယား(ကရင်နီ)တော်လှန်ရေးတပ်ပေါင်းစု (KRU) အနေနဲ့ လက်ရှိတိုက်ပွဲတွေမှာ နောက်မဆုတ်တမ်း ခုခံတိုက်ထုတ်လျက်ရှိကြောင်း ပြည်သူတွေကို သတင်းကောင်းပါးပြီး လက်နက်၊ ကျည်ဆန်တွေ လှူဒါန်းလိုပါက page ကနေတဆင့် ဆက်သွယ်လှူဒါန်းနိုင်တယ်လို့ KRU က ထုတ်ပြန်ထားပါတယ်။

ကယားပြည်နယ်၊ လွိုင်ကော်မြို့နယ်၊ ကုန်သာကျေးရွာမှာ အောက်တိုဘာ ၁၃ ရက် မနက်က  ထောင်ထားတဲ့ မိုင်းတလုံး မတော်တဆ  ပေါက်ကွဲမှုကြောင့် အမျိုးသား  ၃ ဦး ထိခိုက်ဒဏ်ရာရရှိခဲ့ပါတယ်။

ဒီကနေ့မနက် ၈ နာရီလောက်က ကုန်းသာကျေးရွာက တောင်ယာသွားတဲ့လမ်းမှာ ထောင်ထားတဲ့ မိုင်းအစတွေ့လို့ ကောက်ရာကနေ ပေါက်ကွဲမှုဖြစ်ပြီး ၃ ယောက်ထိခိုက်ဒဏ်ရာရခဲ့တာလို့ ဒေသခံတဦးက ပြောပါတယ်။

ဒဏ်ရာရရှိသူတွေဟာ အမျိုးသားတွေဖြစ်ပြီး အသက် ၂၉ နှစ်နဲ့ ၄၁ နှစ်အကြားဖြစ်ပါတယ်။ တယောက်က ညာခြေသလုံး လက်မဝက်လောက် ပေါက်သွားကာ နောက်တဦးက  ခြေသလုံး မိုင်းစ ဖောက်ဝင်ခဲ့ပြီး ကျန်တဦးကတော့ ဘယ်လက်ကောက်ဝတ်ပေါက်ပြဲခဲ့ကြောင်း ရွှေလွိုင်ကော် မရဟိတအသင်းက  ထုတ်ပြန်ထားပါတယ်။

ဒဏ်ရာရသူတွေကို ရွှေလွိုင်ကော်ပရဟိတအသင်းက သွားရောက်သယ်ယူပြီး လွိုင်ကော်ပြည်သူ့ဆေးရုံကို ပို့ဆောင်ပေးခဲ့ပါတယ်။

လွိုင်ကော်မြို့နယ်၊ ကုန်းသာကျေးရွာမှာ စက်တင်ဘာလကုန်ပိုင်းက ဒေသခံ ကရင်နီပူးပေါင်းတပ်နဲ့ စစ်ကောင်စီတပ်ဖွဲ့ဝင်တို့အကြား တိုက်ပွဲတွေ ပြင်းထန်ခဲ့ပြီး လူနေအိမ်တွေ မီးလောင်ထိခိုက်ပျက်စီးခဲ့သလို  ကျေးရွာသားတွေလည်း  ထွက်ပြေးတိမ်းရှောင်ခဲ့ကြရပါတယ်။