ကယား( ကရင်နီ )ပြည်နယ် ၊ ဒီးမော့ဆိုမြို့၊ ကုန်းသာတိုက်ပွဲအတွင်း ပျောက်ဆုံးနေတဲ့ တော်လှန်ရေး ရဲဘော် ၁ ဦးကို စစ်ကောင်စီက ဖမ်းဆီးသတ်ဖြတ်လိုက်ပြီလို့ ကရင်နီတော်လှန်ရေး တပ်ပေါင်းစု KRU ထံက သိရပါတယ်။
ကျဆုံးသွားတဲ့ ရဲဘော်ဟာ KRU လက်အောက်ခံ GZ-21 Loikaw မှ အသက် ၂၁ နှစ်အရွယ် ရဲဘော် မောင်သန်းထိုက်ဇော် (ခ) အယ်လွမ်းဖြစ်ပြီး ဒီဇင်ဘာ ၇ ရက်က ကုန်းသာကျေးရွာအတွင်း အင်အားအလုံးအရင်းနဲ့ စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကို ခုခံတိုက်ခံရင်း တိုက်ပွဲအတွင်း ပျောက်ဆုံးနေတဲ့ ရဲဘော် ၁ ဦးလည်း ဖြစ်ပါတယ်။
ကရင်နီတော်လှန်ရေးတပ်ပေါင်းစု KRU မှ တာဝန်ရှိသူက "စစ်ကောင်စီက ထုတ်ပြန်လာတဲ့ ဓာတ်ပုံတွေနဲ့ ရဲဘော်ရဲ့ အဝတ်အစားတွေ၊ ကျနော်တို့ တပ်စွဲခဲ့စဉ်က အသုံးအဆောင် ပစ္စည်းတွေကို ကြည့်ပြီး အတည်ပြုလိုက်တယ်။ Dead body တော့ မရပါဘူး။ စစ်( - ) တွေလက်ထဲမှာပါ’လို့ ဒီဗွီဘီကို ပြောပါတယ်။
ဒီးမော့ဆိုမြို့နယ်၊ ပူဖားကျေးရွာမှာလည်း ဒီဇင်ဘာ ၇ ရက်က ဖြစ်ပွားခဲ့တဲ့ တိုက်ပွဲအတွင်း ကရင်နီအမျိုးသားများကာကွယ်ရေးတပ် တပ်ရင်း-၆ မှ ရဲဘော် ၃ ဦး ကျဆုံးသွားခဲ့ကြောင်း အဖွဲ့က ထုတ်ပြန်ထားပါတယ်။
ပြီးခဲ့တဲ့ ဒီဇင်ဘာ ၇ ရက်က ကရင်နီတော်လှန်ရေးတပ်ပေါင်းစု KRU ထိန်းချုပ်ထားတဲ့ နယ်မြေအတွင်း စစ်ကောင်စီတပ်က စစ်ကြောင်း ၃ ကြောင်းနဲ့ ထိုးစစ်ဆင်လာတာကြောင့် တစ်နေကုန်နီးပါး တိုက်ပွဲပြင်းထန်ခဲ့ပြီး တိုက်ပွဲအတွင်း စစ်ကောင်စီတပ်သား ၅ ဦး သေဆုံးခဲ့ပါတယ်။
ကယား(ကရင်နီ)ပြည်နယ်၊ ဒီးမော့ဆိုမြို့ ကုန်းသာကျေးရွာ တိုက်ပွဲမှာ JPDF တပ်ရင်းမှ ရဲဘော် တဦး မိုင်းနင်းမိပြီး စိုးရိမ်ဒဏ်ရာရသွားတယ်လို့ JPDF တပ်ရင်းက ပြောပါတယ်။
ဇူလိုင် ၁၈ ရက် မနက် ၁၀ နာရီက ကုန်းသာကျေးရွာမှာ တပ်စွဲထားတဲ့ စစ်ကောင်စီတပ်နဲ့ ကရင်နီတော်လှန်ရေးတပ်ပေါင်းစု (KRU) တို့ နာရီဝက်ကြာ ထိတွေ့ တိုက်ပွဲဖြစ်ပွားခဲ့ပြီး တိုက်ပွဲအတွင်း စစ်ကောင်စီဘက်မှ ထိခိုက်ဒဏ်ရာရသူ များပြားခဲ့တယ်လို့ ဆိုပါတယ်။
JPDF တပ်ရင်း တာဝန်ရှိသူက “စစ်ကောင်စီဘက်က စစ်ကြောင်း ထိုးလာတာကို ကင်းတက် ထောက်ရင်း နင်းမိုင်းထိတာ။ ခြေထောက် တဖက် ပြတ်သွားတယ်။ ဆေးဝါးကုသထားတယ်။ ဆေးရုံကတော့ နည်းနည်းဒုက္ခရောက်တာပေါ့” လို့ ပြောပါတယ်။
တိုက်ပွဲဖြစ်ပြီးနောက်မှာ စစ်ကောင်စီတပ်တွေဟာ တိုက်ပွဲနဲ့ မသက်ဆိုင်တဲ့ ပြည်သူ နေအိမ်တွေ ကို မီးရှို့ဖျက်ဆီးတာ၊ ကျေးရွာတွေကို လက်နက်ကြီးနဲ့ ပစ်ခတ်တာတွေ လုပ်နေတယ်လို့ သိရပါတယ်။
