လူမျိုးတုံးသတ်ဖြတ်မှုကနေ အသက်ရှင်ကျန်ရစ်တဲ့ ရိုဟင်ဂျာတွေကို လူသတ်ကွင်းတွေဆီ ပြန်ပို့ခြင်းကနေ တားဆီးဖို့ ကုလသမဂ္ဂအတွင်းရေးမှူးချူပ်အနေနဲ့ ချက်ချင်း ကြားဝင် ဆောင်ရွက်ပေးဖို့ အရပ်ဘက်အဖွဲ့အစည်းပေါင်း ၂၀၀ ကျော်က လက်မှတ်ရေးထိုး တောင်းဆိုလိုက်ပါတယ်။

ရခိုင်ပြည်နယ်က ရိုဟင်ဂျာတွေဟာ လက်ရှိအချိန်အထိ ဖိနှိပ်ခံနေရပြီး လူမျိုးရေးခွဲခြားမှု စနစ်အောက်မှာ နိုင်ငံသားဖြစ်ခွင့်ကို ငြင်းပယ်ခံနေရဆဲဖြစ်ကာ သူတို့ဟာ ပြည်တွင်း ဒုက္ခသည်စခန်းတွေမှာ လွတ်လပ်စွာသွားလာခွင့်မရှိဘဲ ပိတ်လှောင်ခံနေရပြီး စားနပ်ရိက္ခာ၊ ကျန်းမာရေး၊ ပညာရေးနဲ့ အသက်မွေးဝမ်းကျောင်းမှုစတဲ့ မရှိမဖြစ်လိုအပ်တဲ့ ဝန်ဆောင်မှုတွေကို ဖြတ်တောက်ခံထားရတယ်လို့လည်း ထုတ်ပြန်ချက်မှာ ဖော်ပြထားပါတယ်။

ရှေ့ပြေးအသံအဖွဲ့၊ မြန်မာရိုဟင်ဂျာများအသင်း ယူကေ၊ အမျိုးသမီးများအဖွဲ့ချုပ် (မြန်မာနိုင်ငံ)၊ Myanmar Accountability Project စတဲ့ အဖွဲ့တွေပါဝင်တဲ့ အဖွဲ့အစည်း ၂၀၀ ကျော် လက်မှတ်ရေးထိုးထားပြီး မတ် ၂၀ ရက်စွဲနဲ့ ထုတ်ပြန်တဲ့ ထုတ်ပြန်ချက်ထဲမှာတော့ ဘင်္ဂလားဒေ့ရှ်မှ ရိုဟင်ဂျာဒုက္ခသည်တွေကို မြန်မာနိုင်ငံဆီ ပြန်လည်ပို့ဆောင်ရေး အကြမ်းဖက်စစ်အုပ်စုရဲ့  ‘ရှေ့ပြေးစီမံချက်’မှာ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) နဲ့ ကမ္ဘာ့စားနပ် ရိက္ခာ အစီအစဉ် (WFP) တို့လို အဖွဲ့အစည်းတွေ ပါဝင်ဆောင်ရွက်မှုကို ပြင်းပြင်းထန်ထန် ရှုတ်ချကြောင်းလည်း ဖော်ပြပါတယ်။

အဆိုပါ ပူးတွဲထုတ်ပြန်ချက်မှာတော့ ကုလသမဂ္ဂရဲ့ လျှို့ဝှက်စွာပါဝင်မှုနဲ့ ဘင်္ဂလားဒေ့ရှ်နိုင်ငံ၊ ကော့ဇ်ဘဇားကို မြန်မာစစ်ကောင်စီခန့်ဝန်ကြီး ဦးကိုကိုလှိုင်နဲ့အဖွဲ့ သွားရောက်တဲ့ ခရီးစဉ်ကို လွယ်ကူချောမွေ့စေရေး ဆောင်ရွက်ပေးရာမှာပါဝင်မှုတို့ကြောင့် ထိတ်လန့်တုန်လှုပ်ရကြောင်း လည်း ဖော်ပြထားတဲ့အပြင် ပါဝင်ကူညီခဲ့တဲ့ ကုလသမဂ္ဂအေဂျင်စီတွေက သူတို့အသုံးပြုခဲ့တဲ့ လှေတွေပေါ်ကနေ UN မှတ်အသားတွေကို ဖယ်ရှားခဲ့တယ်လို့ ဆိုပါတယ်။

ရိုဟင်ဂျာဒုက္ခသည်တွေအနေနဲ့ မြန်မာနိုင်ငံကို ဘေးကင်းလုံခြုံမှုရှိပြီး မိမိဆန္ဒအလျောက် ဂုဏ်သိက္ခာရှိစွာနဲ့ ရေရှည်တည့်တံ့တဲ့ နေရပ်ပြန်နိုင်ရေးအခြေအနေ မရှိနေတဲ့အချိန်မှာ ရည်ရွယ်ချက်ရှိရှိ အတင်းအကျပ် နေရပ်ပြန်ပို့ဖို့ ကြိုးပမ်းမှုမှာ ကုလသမဂ္ဂက ပါဝင်ဆောင်ရွက်နေတာဟာ ရှည်လျားကြာမြင့်နေပြီဖြစ်တယ်လို့ဆိုပါတယ်။

ခုလိုလုပ်ဆောင်မှုက အဆိုပါလုပ်ရပ်ရဲ့ နောက်ဆက်တွဲတခုဖြစ်ကာ မြန်မာနိုင်ငံအရေးမှာ ကုလ သမဂ္ဂရဲ့ “ကြားနေရေး” ဆိုတဲ့ ရပ်တည်ချက် မရှိတာကို ဖော်ထုတ်ပြသနေသလို ဘက်မလိုက်ရေးနဲ့  “မည်သူမျှ ထိခိုက်နစ်နာမှုမရှိစေရေး” ဆိုတဲ့ လူသားချင်းစာနာ‌ ‌ထောက်ထားမှုဆိုင်ရာ အခြေခံမူတွေကို လိုက်နာဖို့ ပျက်ကွက်နေတာက ကုလသမဂ္ဂရဲ့ လုပ်ရပ်အပေါ် မြန်မာလူထုရဲ့ ယုံကြည်မှုကို ပိုမိုပျက်ပြားစေတယ်လို့ ထုတ်ပြန်ချက်မှာ ဖော်ပြပါတယ်။

ပြီးခဲ့တဲ့ မတ် ၁၅ ရက်တုန်းက ဘင်္ဂလားဒေ့ရှ်ကို မြန်မာစစ်အုပ်စုက သွားရောက်ခဲ့မှုဟာ UNHCR နဲ့ WFP တို့ ပါဝင်တယ်လို့သိရတဲ့ နေရပ်ပြန်ပို့ရေး ‘ရှေ့ပြေးစီမံချက်” ရဲ့ အစိတ်အပိုင်းတခုဖြစ်ပြီး တရုတ်အစိုးရရဲ့ ကြားဝင်စေ့စပ်မှုနဲ့ တရားမဝင်စစ်အုပ်စုနဲ့ ဘင်္ဂလာဒေ့ရှ်တို့ကြား နှစ်နိုင်ငံသဘောတူစာချူပ် ချူပ်ဆိုမှုရဲ့ ရလဒ်ဖြစ်တယ်လို့ ဆိုပါတယ်။

စစ်ကောင်စီခန့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီး ဦးကိုကိုလှိုင် ဦးဆောင်တဲ့ အဖွဲ့ဟာ ရခိုင်ပြည်နယ် မောင်တောနယ်စပ်ကတဆင့် ဘင်္ဂလားဒေ့ရှ်နိုင်ငံ ကော့ဇ်ဘဇားရှိ ဒုက္ခသည်တွေနဲ့ တွေ့ဆုံဖို့ သွားရောက်ခဲ့တာဖြစ်ပြီး ဒီခရီးစဉ်မှာ စစ်ကောင်စီလက်အောက်ခံ လဝကနဲ့ ရဲတပ်ဖွဲ့ဝင်တွေအပါအဝင် စုစုပေါင်း အယောက် ၂၀ လောက် လိုက်ပါသွားခဲ့တာ ဖြစ်ပါတယ်။

ကုလသမဂ္ဂအနေနဲ့ သူတို့ရဲ့ ရှက်ဖွယ်ကောင်းသော စနစ်ပိုင်းဆိုင်ရာနဲ့ အဆောက်အအုံပိုင်းဆိုင်ရာ ပျက်ကွက်မှုတွေကို အဆုံးသတ်ပြီး စစ်ရာဇဝတ်ကောင်တွေနဲ့ လူမျိုးတုံး သတ်ဖြတ်တဲ့ စစ်အုပ်စုကို ကူညီပံ့ပိုးမယ့်အစား လူမျိုးတုံးသတ်ဖြတ်မှု ကျူးလွန်ခံရသူတွေ၊ အသက်ရှင် ကျန်ရစ်သူတွေနဲ့ မြန်မာနိုင်ငံပြည်သူလူထုကို ကူညီပံ့ပိုးရန် အချိန်တန်ပြီဖြစ်တာမို့ ကုလသမဂ္ဂ အတွင်းရေးမှူးချုပ်အနေနဲ့ မြန်မာနိုင်ငံက ကုလသမဂ္ဂအေဂျင်စီတွေရဲ့ လုပ်ငန်းဆောင်ရွက်မှုတွေကို စုံစမ်းစစ်ဆေးပေးဖို့နဲ့ သူတို့ရဲ့ ပါဝင်ပတ်သက်မှုနဲ့ ပံ့ပိုးကူညီမှုတွေဟာ မြန်မာပြည်သူတွေအပေါ် လူ့အခွင့်အရေး ချိူးဖောက်မှုတွေ ထပ်မံမဖြစ်ပေါ်စေဖို့လည်း ထုတ်ပြန်တောင်းဆိုလိုက်တာပါ။

နေရပ်ပြန်ဖို့အတွက် နိုင်ငံသားမှတ်ပုံတင်ထုတ်ပေးဖို့ အပါအဝင် အချက် ၃ ချက်ကို ရိုဟင်ဂျာဒုက္ခသည်တွေက ဘင်္ဂလားဒေ့ရှ်နိုင်ငံမှာ ရောက်ရှိနေတဲ့ မြန်မာစစ်ကောင်စီကိုယ်စားလှယ်အဖွဲ့ထံ တောင်းဆိုခဲ့ကြကြောင်း ဒုက္ခသည်ခေါင်းဆောင်တွေက ပြောပါတယ်။

စစ်ကောင်စီဝန်ကြီး ဦးကိုကိုလှိုင် ခေါင်းဆောင်တဲ့အဖွဲ့ဟာ မတ်လ ၁၅ ရက်ကတည်းက မြန်မာ- ဘင်္ဂလားဒေ့ရှ်နယ်စပ် ကော့ဇ်ဘဇားရှိ ရိုဟင်ဂျာဒုက္ခသည်တွေကို သွားရောက်တွေ့ဆုံပြီး လူ ၁၀၀၀ ကျော်လောက်ကို  နေရပ်ပြန်ခေါ်ဖို့ စီစဉ်နေတာပါ။

ရိုဟင်ဂျာဒုက္ခသည်တွေကတော့ သူတို့ကို နိုင်ငံသားမှတ်ပုံတင်ကတ်ပြားထုတ်ပေးဖို့၊ မူလနေရာမှာပြန်ပြီး နေရာချပေးဖို့နဲ့  တခြားတိုင်းရင်းသား ၁၃၅ မျိုးလို တရားမျှတမှုနဲ့ အသွားအလာ လွတ်လပ်ခွင့်ပေးဖို့ အချက် ၃ ချက်ကို တောင်းဆိုထားပြီး မရရင် မြန်မာနိုင်ငံကို မပြန်ဘူးလို့ စစ်ကောင်စီထံ တောင်းဆိုထားပါတယ်။

အာဏာသိမ်း အကြမ်းဖက်စစ်အုပ်စုနဲ့ ထိတွေ့ဆက်ဆံနေကြတဲ့ ကုလသမဂ္ဂ အေဂျင်စီတွေ၊ ရန်ပုံငွေအဖွဲ့တွေ၊ အစီအစဥ်တွေနဲ့ မြန်မာနိုင်ငံအတွင်း လုပ်ကိုင်နေကြတဲ့ အခြားအစုအဖွဲ့ အသီသီးတွေဟာ မကြာသေးမီက တရားဝင်မှုမရှိတဲ့ မြန်မာစစ်အုပ်စုနဲ့ သဘောတူ စာချုပ်အသစ်တွေ ထပ်မံချုပ်ဆိုတာ၊ ခန့်အပ်လွှာတွေ ပေးအပ်တာတွေ လုပ်ဆောင်ခဲ့တဲ့အပေါ် အပြင်းထန်ဆုံး ရှုတ်ချလိုက်တယ်လို့ အရပ်ဘက်လူထုအဖွဲ့အစည်း ၆၃၈ ဖွဲ့က ထုတ်ပြန်ပါတယ်။

အဆိုပါ အဖွဲ့အစည်းတွေထဲမှာတော့ အမည်မဖော်ပြလိုတဲ့ အဖွဲ့အစည်း ၂၃၉ ဖွဲ့ အပါအဝင် လူ့အခွင့်အရေးဆိုင်ရာ တက်ကြွလှုပ်ရှားနေတဲ့ အဖွဲ့အစည်းတွေဖြစ်ကြတဲ့ Justice for Myanmar၊ ညီမျှခြင်းမြန်မာ (Equality Myanmar) နဲ့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) တို့လို အဖွဲ့အစည်းတွေက လက်မှတ် ရေးထိုးထားကြတာ ဖြစ်ပါတယ်။

ကုလသမဂ္ဂ အဖွဲ့အစည်းတွေအနေနဲ့ မြန်မာစစ်အုပ်စုကို တရားဝင်မှုရရှိစေရေး လုပ်ဆောင်နေမှုတွေကို ရပ်တန့်ရမှာဖြစ်ပြီး အဲဒီအစား မြန်မာနိုင်ငံရဲ့ တရားဝင်အစိုးရဖြစ်တဲ့ အမျိုးသားညီညွတ်ရေးအစိုးရ၊ တိုင်းရင်းသားလက်နက်ကိုင် တော်လှန်ရေးအဖွဲ့တွေနဲ့သာ လုပ်ဆောင်ရမှာဖြစ်ကြောင်းနဲ့ လတ်တလောမှာတော့ ဒီကိစ္စအပေါ် ကုလသမဂ္ဂ အတွင်းရေးမှူးချုပ် မစ္စတာ အန်တိုနီယိုဂူတာရတ်စ်ဆီ စာရေးသားပေးပို့ တောင်းဆိုထားတယ်လို့ ဆိုပါတယ်။

အဆိုပါစာထဲမှာတော့ မြန်မာနိုင်ငံရှိ အကျပ်အတည်းကို ဖြေရှင်းဖို့အတွက် အခြေခံမူတွေအပေါ် ရပ်တည်တဲ့ ညှိနှိုင်းပူးပေါင်းဆောင်ရွက်တဲ့ ကုလသမဂ္ဂရဲ့ တုံ့ပြန်ဆောင်ရွက်မှုကို အတွင်းရေးမှူးချုပ်ကိုယ်တိုင် ကြားဝင်ဆောင်ရွက်ပေးဖို့လည်း တိုက်တွန်းထားတဲ့အပြင် တခြား ကုလသမဂ္ဂ အဖွဲ့အစည်းတွေ အနေနဲ့လည်း တရားမဝင် လူသတ်စစ်အုပ်စုကို တရားဝင်မှု ရရှိစေမယ့် ဘယ်လိုပူးပေါင်းဆောင်ရွက်မှုနဲ့ ထိတွေ့ဆက်ဆံမှု ပုံစံအားလုံးကို ချက်ချင်းရပ်ဆိုင်းကြဖို့လည်း တိုက်တွန်း တောင်းဆိုထားတာပါ။

အရပ်ဘက်လူထုအဖွဲ့အစည်း ၂၅၆ ဖွဲ့ဟာ ပြီးခဲ့တဲ့ ၂၀၂၁ ခုနှစ် ဒီဇင်ဘာလ ၁၀ ရက်ကလည်း ကုလသမဂ္ဂ အဖွဲ့အစည်းတွေကို စစ်အုပ်စု တရားဝင်မှုရရှိစေမယ့် ဘယ်လိုထိတွေ့ဆက်ဆံမှု မဆို မလုပ်ဆောင်ဖို့ တိုက်တွန်း တောင်းဆိုခဲ့ပြီး ဖြစ်တယ်လို့ ဆိုပါတယ်။

မြန်မာပြည်သူတွေနဲ့ အရပ်ဘက် လူထုအဖွဲ့အစည်းတွေက တောက်လျှောက် တောင်းဆိုခဲ့ကြပေမဲ့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA)၊ ကုလသမဂ္ဂ အပြည်ပြည်ဆိုင်ရာ ကလေးများရန်ပုံငွေအဖွဲ့ (UNICEF)၊ ကုလသမဂ္ဂ စားနပ်ရိက္ခာနှင့် စိုက်ပျိုးရေးအဖွဲ့ (FAO)၊ ရွှေ့ပြောင်းသွားလာနေထိုင်ခြင်းဆိုင်ရာ နိုင်ငံတကာအဖွဲ့အစည်း (IOM) အားလုံးတို့ဟာ ပြီးခဲ့တဲ့ သြဂုတ်လနဲ့ စက်တင်ဘာလတွေ အတွင်း စစ်အုပ်စုနဲ့ သဘောတူစာချုပ်အသစ်တွေ လက်မှတ်ရေးထိုးခဲ့ကြသလို ရာထူးခန့်အပ်လွှာတွေလည်း သွားရောက်အပ်နှင်းခဲ့ကြတာ ဖြစ်ပါတယ်။

အဆိုပါ လူသိရှင်ကြား အခမ်းအနားတွေ၊ ဓာတ်ပုံတွေကို စစ်အုပ်စုက သူတို့ရဲ့ တရားဝင်မှု ရရှိရေး ဆက်လက်ကြိုးပမ်းမှုမှာ ဝါဒဖြန့်ချိရေးလက်နက်အဖြစ် အသုံးချခဲ့ကြပြီး မြန်မာပြည်သူတွေဟာ စစ်အုပ်စုရဲ့ အာဏာသိမ်းဖို့ ကြိုးပမ်းမှုကို ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်နေ့ကတည်းက မပျက်မကွက် ငြင်းဆန်တော်လှန်လာခဲ့ကြတာဖြစ်တယ်လို့ ဖော်ပြထားပါတယ်။

မကြာသေးခင်က ကုလသမဂ္ဂ အဖွဲ့အစည်းတွေ လုပ်ဆောင်ခဲ့တဲ့ လုပ်ရပ်တွေဟာ စစ်အုပ်စုနဲ့ အတူရပ်တည်လိုက်တာ ဖြစ်တဲ့အပြင် မြန်မာပြည်သူတွေအပေါ် စစ်အုပ်စုရဲ့ နိုင်လိုမင်းထက်ပြုမှုတွေ အဆုံးသတ်ရေးနဲ့ ဖက်ဒရယ်ဒီမိုကရေစီစနစ် တည်ထောင်ရေးအတွက် ဒီကနေ့ထိတိုင် တစုတစည်းတည်း ခုခံတော်လှန်နေကြတဲ့ ပြည်သူတို့ရဲ့ ကြိုးစားအားထုတ်မှုနဲ့ အနစ်နာခံ စတေးမှုတွေကို မှေးမှိန်ထိခိုက်စေတယ်လို့လည်း ကုလသမဂ္ဂ အတွင်းရေးမှူးချုပ်ဆီ ရေးသားပေးပို့တဲ့ စာထဲမှာ ဖော်ပြထားပါတယ်။

အဆိုပါလုပ်ရပ်တွေဟာ ကုလသမဂ္ဂ အဖွဲ့အစည်းတွေအနေနဲ့ မဖြစ်မနေ လိုက်နာရမယ့်အပြင် ကိုယ်တိုင် တာဝန်ယူ တာဝန်ခံမှု ရှိစေဖို့အတွက် ကုလသမဂ္ဂရဲ့ ပူးတွဲစီမံဆောင်ရွက်မှုဆိုင်ရာ စံသတ်မှတ်ချက်တွေနဲ့ ထိတွေ့လုပ်ဆောင်မှုဆိုင်ရာ မူဘောင်တို့မှာ ပြဋ္ဌာန်းပါရှိတဲ့ ဘက်မလိုက်ရေး၊ ကြားနေရေး၊ အမှီအခိုကင်းရေးနဲ့ “မည်သူမျှ ထိခိုက်နစ်နာမှု မရှိစေရေး” ဆိုတဲ့ ဒီမိုကရေစီ၊ လူ့အခွင့်အရေးနဲ့ လူသားချင်း စာနာထောက်ထားမှုဆိုင်ရာ အခြေခံမူတွေကို ချိုးဖောက်တာလည်း ဖြစ်တယ်လို့ ဆိုပါတယ်။

မြန်မာပြည်သူတွေက သူတို့ရဲ့ တရားဝင်အစိုးရဖြစ်တဲ့ NUG နဲ့ သံအမတ်ကြီး ဦးကျော်မိုးထွန်းတို့ကို ကုလသမဂ္ဂမှာ ကိုယ်စားပြုစေလိုကြောင်း ကျယ်ကျယ်လောင်လောင်၊ ရှင်းရှင်းလင်းလင်း ထုတ်ဖော်ပြီးသား ဖြစ်တဲ့အပြင် မြန်မာနိုင်ငံအတွင်း ဖက်ဒရယ် ဒီမိုကရေစီနဲ့ လူ့အခွင့်အရေးအတွက် ရုန်းကန်ကြိုးစားနေမှုတွေကို ကုလသမဂ္ဂနဲ့ အဖွဲ့ဝင်နိုင်ငံတွေက အပြည့်အဝ အသိအမှတ်ပြု လေးစားရမှာဖြစ်တယ်လို့လည်း ဖော်ပြပါတယ်။

ဒါကြောင့်မို့ ကုလသမဂ္ဂအေဂျင်စီတွေ၊ ရန်ပုံငွေအဖွဲ့တွေ၊ အစီအစဥ်တွေနဲ့ တခြားသော အဖွဲ့အစည်းအားလုံးတို့ အနေနဲ့ တရားမဝင် လူသတ်စစ်အုပ်စုကို တရားဝင်မှုပေးနေတာ၊ အထူးသဖြင့် သဘောတူစာချုပ်အသစ်တွေ ချုပ်ဆိုတာတွေ၊ စစ်အုပ်စုဆီ အသိအမှတ်ပြုမှုတွေ တင်ပြနေတာတွေကို ချက်ချင်းရပ်တန့်ဖို့အပြင် မြန်မာနိုင်ငံရဲ့ အကျပ်အတည်းကို ဖြေရှင်းဖို့အတွက် ညှိနှိုင်းပူးပေါင်းထားတဲ့ တုံ့ပြန်လုပ်ဆောင်ချက်တရပ်ကို ကုလသမဂ္ဂ အတွင်းရေးမှူးချုပ်အနေနဲ့ ဦးစီးလုပ်ဆောင်ပေးဖို့လည်း လေးနက်စွာ တိုက်တွန်းထားပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။