စားဝတ်နေရေး ခက်ခဲနေတဲ့ ပြည်သူ ၁၀၀၀ ကျော်ကို ဒေါပုံမြို့နယ် ဝါဆိုမှတ်တိုင်အနီးက May Yu Mart မှာ သြဂုတ် ၂၈ ရက် ညနေပိုင်းက ဆန်၊ သို့မဟုတ် ပဲ ဘာပဲယူယူ တရာကျပ်နဲ့ ရောင်းချခဲ့တယ်လို့ မြို့ခံတွေက ပြောပါတယ်။

ဒေါပုံမြို့နယ် ဝါဆိုမှတ်တိုင်အနီး ယမုံနာလမ်းထောင့်နဲ့ ဓမ္မစေတီလမ်းထောင့်မှာ ဩဂုတ် ၂၈ ရက် ညနေ ၃ နာရီကစတင်ကာ ရောင်းချပေးတာလို့ သာကေတမြို့နယ်နေ ပြည်သူတဦးက DVB ကို ပြောပါတယ်။

“ဆိုင်က ပထမ လူသုံးရာပဲ ရောင်းပေးမယ်လို့ ကြေညာထာတာ။ နောက်တော့ လူက တစ်ထောင်လောက်ရှိတော့ အကုန်ရောင်းပေးတယ်။ မရှိနေတဲ့အချိန်ဆိုတော့ ဆန်လေးလုံးကို တစ်ရာနဲ့ရတာဆိုတော့ အဆင်ပြေတာပေါ့။”

ဆန်၊ သို့မဟုတ် ပဲကို ဒေါပုံ၊ သာကေတ၊ သန်လျင်၊ တာမွေ၊ မင်္ဂလာတောင်ညွန့် စတဲ့ မြို့နယ်တွေက အခြေခံလူတန်းစားတွေ လာရောက်ဝယ်ယူကြတယ်လို့ ဝါဆိုမှတ်တိုင်အနီးမှာ နေသူတဦးက ဒီဗွီဘီ ကို ပြောပါတယ်။

“ဝမ်းလည်းသာတယ်၊ စိတ်ထဲလည်း မကောင်းဘူး။ ပြည်တွင်းမှာ လူတွေ ဘယ်လောက် အခက်အခဲဖြစ်နေလဲဆိုတာ ဆန် လေးလုံးနဲ့ မိုးထဲ ရေထဲမှာ လာဝယ်ကြတဲ့သူတွေ အများကြီးပဲ၊ မိသားစု သုံးဦးဆို ဆန်တပြည်ခွဲရမှာလေ၊ အဲဒါကြောင့် လာတိုးဝယ်ကြတာ။” 

May Yu Mart (Dawbon Branch) မှာ အရင်က ဆန်၊ Red Ruby တံဆိပ် ဆန်လုံးရှည်  (Long Grain Rice) - 1Kg နဲ့ Red Ruby တံဆိပ် ပဲဝါလေး - 300g တို့ကို (တစ်ထုပ်) ကို တစ်ရာကျပ်နဲ့ လူ ၄၀၀ သာ ရောင်းချမယ်လို့ စီစဥ်ထားပေမဲ့ လာရောက်ဝယ်ယူသူ များပြားလွန်းတာကြောင့် လူ ၁၀၀၀ ကျော် ရောင်းချပေးခဲ့တယ်လို့ May Yu Mart တာဝန်ခံက ဒီဗွီဘီကို ရှင်းပြပါတယ်။

“လူက များတော့ လေးရာပဲ ရောင်းပေးမယ်ဆိုတဲ့ အစီအစဥ်ကို ဖျက်ပြီး လာတဲ့လူ အကုန်ရောင်းပေးလိုက်တာ။ တစ်ထောင်ကျော် ရှိတယ်။ နောက်ထပ်ရောင်းပေးဖို့လည်း အစီအစဥ်ရှိတယ်။” 

ပြီးခဲ့တဲ့  သြဂုတ် ၁၇ ရက် မနက်ပိုင်းကလည်း သင်္ဃန်းကျွန်းမြို့နယ် ဘဝမြင့်မှတ်တိုင်အနီးရှိ Aladdin Men Fashion ဆိုင်မှာ ဆန်တစ်ပြည် ၁၀၀ ကျပ်၊ ကြက်ဥတစ်ကတ် ၁၀၀ ကျပ်နဲ့ ရောင်းချပေးခဲ့ပါတယ်။

နွယ်အေးစွန္နီဂျာမေဗလီ လူမှုရေးအသင်းက ဒေါပုံမြို့နယ်ထဲက ရပ်ကွက်တွေမှာ ကြက်ဥ ၆ လုံးကို တစ်ရာကျပ်နဲ့ ရောင်းချပေးနေတာလည်း ရှိပါတယ်။

စစ်တပ် အာဏာသိမ်းပြီးနောက် မြန်မာနိုင်ငံမှာ အလုပ်အကိုင် အခွင့်အလမ်း ရှားပါးလာပြီး ကုန်ဈေးနှုန်း ကြီးမြင့်လာတာကြောင့် လုပ်ငန်းရှင်တွေနဲ့ လူမှုရေးအဖွဲ့အစည်းတွေက ရောင်းချပေးနေတာပါ။

မန္တလေးဈေးကွက်မှာ အခု နိုဝင်ဘာလထဲ ကုလားပဲ လက်ကျန်များနေပြီး ဈေးနှုန်းကျဆင်း နေတယ်လို့ ပဲကုန်သည်တွေဆီက သိရပါတယ်။

အောက်တိုဘာလထဲမှာ ကုလားပဲတစ်ပိသာကို ငွေကျပ် ၃၀၀၀ နဲ့ ၃၂၀၀ ကြားမှာရှိခဲ့ပေမယ့် နိုဝင်ဘာလထဲမှာတော့ တစ်ပိသာကို ငွေကျပ် ၂၆၀၀ ကျပ်အထိ ကျဆင်းနေတယ်လို့ သိရပါတယ်။

မနှစ်က ကာလတူအချိန်မှာ ကုလားပဲ ၃ တင်းဝင်တစ်အိတ်ကို ငွေကျပ် ၁၃၅,၀၀၀ ကျပ်ရှိခဲ့ပြီး ဒီနှစ်ပေါက်ဈေးကတော့ ၁၂၀,၀၀၀ - ၁၂၂,၀၀၀ ဝန်းကျင်အထိ  ဈေးနှုန်းကျဆင်းပေမယ့် အရောင်းအဝယ် တည်ငြိမ်နေတယ်လို့ ပွဲရုံတွေက ဆိုပါတယ်။

“ဒီနှစ်နိုဝင်ဘာ လဆန်းမှာတော့ ကုလားပဲက တစ်ပိသာကို  အောက်တိုဘာက ၃,၀၀၀ - ၃,၂၀၀ ကနေပြီးတော့ ဒီနေ့ဆိုရင် ကုလားပဲခြမ်းတစ်ပိသာဆိုရင် ၂၆၀၀ အထိကျတယ်။ ကုလားပဲလုံး အနေနဲ့ကတော့ မန္တလေးဈေးကွက်ထဲမှာ ၃ တင်းတစ်အိတ်ကို ၁၃၅,၀၀၀ လောက်ကနေပြီးတော့ ဒီနှစ်ပေါက်ဈေးဟာဆိုရင် ၁၂၀,၀၀၀ - ၁၂၂,၀၀၀ အထိ ဈေးနှုန်းကျလာတယ်။ အခုလို ကျဆင်းလာတာက အရောင်းအဝယ်မကောင်းလို့ မဟုတ်ဘူး။ အရောင်းအဝယ်တွေလည်း ကောင်းတယ်”လို့ မန္တလေးက ပွဲရုံ ပိုင်ရှင်တစ်ဦးက ပြောပါတယ်။

မနှစ်က ရာသီဥတု ကောင်းခဲ့တဲ့အတွက် ကုလားပဲအထွက်ကောင်းပြီး လက်ကျန်များနေကာ  အခု အချိန်ဟာ ကုလားပဲ အသစ်ပေါ်ချိန်ဖြစ်နေတာကြောင့် ဈေးနှုန်းကျဆင်းနေတာလို့ ပွဲရုံပိုင်ရှင်တွေက ဆိုပါတယ်။ 

နှစ်တိုင်းမှာ တန်ဆောင်မုန်းလထဲမှာ ကုလားပဲဈေးနှုန်း မြင့်တက်လေ့ရှိပြီး ဒီနှစ်မှာတော့ ကျဆင်းနေတာဖြစ်ပါတယ်။ 

ပဲသစ်ကလည်းပေါ်ခါနီးအချိန်ဖြစ်နေတယ် ကုလားပဲကလည်း မနှစ်က အထွက်နှုန်းကောင်းထားတဲ့ အတွက် ကုလားပဲလက်ကျန်ကို လူတွေက အများကြီးကျန်ရင် ဒီထက်ကျမှာစိုးလို့ အခု ထုတ်ရောင်းတယ်။ 

“ထုတ်ရောင်းလို့ ဈေးတွေက အခုလို ကျလာတာဖြစ်တယ်။ တကယ်တမ်းဆိုရင် အခုအချိန်က ကထိန်ရာသီတန်ဆောင်မုန်း ရာသီဖြစ်နေလို့ ဈေးက မူရင်းဈေးထက်တောင်ပိုတက်သင့်တယ်။ ဒါပေမယ့် ဈေးနှုန်းက အဲဒီလိုမျိုး မတက်ဘဲနဲ့ အခုလိုမျိုးကျနေတယ်” လို့ ကုန်သည် နောက်တစ်ဦးက ပြောပါတယ်။ 

များနေတဲ့ ကုလားပဲ လက်ကျန်တွေကို လက်ထဲမှာ မထားဘဲ ကုန်သည်တွေက ထုတ်ရောင်းကြတဲ့ အတွက် အခုလို ဈေးနှုန်း ကျဆင်းနေတာလို့ သိရပါတယ်။