ကရင်အမျိုးသားအစည်းအရုံး (ကေအန်ယူ) ခေါင်းဆောင်ပိုင်းအပါအဝင် ဗဟိုကော်မတီဝင်တွေကို ပြန်လည်ရွေးချယ်မယ့် ၁၇ ကြိမ်မြောက် ကွန်ဂရက်ကို ဧပြီ ၂၄ ရက်နေ့က စတင်ကျင်းပနေပါတယ်။

အဆိုပါကွန်ဂရက်မှာ ခေါင်းဆောင်ပိုင်းအပြောင်းအလဲအတွက် ရွေးကောက်ပွဲတွေ လုပ်သွားမှာဖြစ်ပြီး ကရင်ပြည်သူတွေ လက်ရှိ တောင်းဆိုဖော်ပြနေတဲ့ ခေါင်းဆောင်ပိုင်းတချို့ရဲ့ ဒုစရိုက်မှုနဲ့မကင်းတဲ့  စီးပွားရေးပိုင်ဆိုင်ရာ လုပ်ဆောင်မှုတွေနဲ့ ပတ်သက်လို့ အရေးယူဆောင်ရွက်သွားဖို့ ရှိနေတယ်လို့ ကော်မတီနဲ့ နီးစပ်သူတဦးက ပြောပါတယ်။

ဒီကွန်ဂရက်မှာ တပ်မဟာအသီးသီးက ကိုယ်စားလှယ်တွေနဲ့ ကရင်လူမှုအဖွဲ့အစည်းပေါင်းစုံက ကိုယ်စားလှယ်တွေ တက်ရောက်သလို တချို့ တိုက်ပွဲဖြစ်ပွားတဲ့ဒေသတွေက ကိုယ်စားလှယ်တွေ ကတော့ အင်တာနက်အွန်လိုင်းကနေ တက်ရောက်ကြပါတယ်။

ကိုဗစ်-၁၉ ကပ်ရောဂါဖြစ်ပွားမှုနဲ့ စစ်တပ်အာဏာသိမ်းမှုကြောင့် ကွန်ဂရက်ကို မူလပုံမှန်ကျင်းပရမယ့် ကာလထက် သုံးနှစ်လောက် နှောင့်နှေးပြီး ကျင်းပရတာဖြစ်ပေမဲ့ လက်ရှိမှာတော့ ကွန်ဂရက်တက်ရောက်သူ ၇၅ ရာခိုင်နှုန်းကျော်တဲ့အတွက် အထမြောက် ကျင်းပနိုင်တာဖြစ်ပါတယ်။

ကေအန်ယူရဲ့ ဖွဲ့စည်းပုံအရ ရွေးကောက်ပွဲကျင်းပနိုင်ရေး တက်ရောက်သူ အနည်းဆုံး ၇၅ ရာခိုင်နှုန်းရှိပါက ကွန်ဂရက်ကျင်းပနိုင်တာဖြစ်လို့ အခုတခေါက် ညီလာခံမှာ‌တော့ လူပေါင်း ၂၀၀ နီးပါး တက်ရောက်ကြောင်းလည်း အဆိုပါ ကော်မတီနဲ့ နီးစပ်သူက ပြောပါတယ်။

ကေအန်ယူ ကရင်အမျိုးသားအစည်းအရုံးရဲ့ ၁၀ ဦးမြောက် ဥက္ကဋ္ဌကို ရွေးကောက်တင်မြှောက်ဖို့ ရှိတဲ့အတွက် ခေါင်းဆောင်သစ် ဘယ်သူဖြစ်လာမလဲဆိုတာ ကရင်လူထုအသိုက်အဝန်းအကြားမှာ စိတ်ဝင်စားမှု မြင့်တက်နေပါတယ်။

ပြီးခဲ့တဲ့ ဖေဖော်ဝါရီ ၂၃ ရက်နေ့က ကမ္ဘာတဝန်းမှာရှိတဲ့ ကရင်အဖွဲ့အစည်း ၆၈ ဖွဲ့က ကေအန်ယူ ဗဟိုအလုပ်အမှုဆောင်တဖွဲ့လုံး နုတ်ထွက်ပေးဖို့ အိတ်ဖွင့်ပေးစာ ပေးပို့တောင်းဆိုထားပါတယ်။

ဒီလိုတောင်းဆိုထားတဲ့ အကြောင်းတွေထဲမှာ ကရင်ပြည်နယ်၊ မောထိုတလေးနယ်မြေမှာ ပြုလုပ်တဲ့ စီမံကိန်းဖွင့်ပွဲမှာ ကေအန်ယူ ဗဟိုအလုပ်အမှုဆောင်ကော်မတီဝင် ကာကွယ်ရေးဌာန ဌာနမှူး ပဒိုစောရောဂျာခင် တက်ရောက်ခဲ့တဲ့ကိစ္စ အရေးယူဆောင်ရွက်ခဲ့တာမရှိခြင်း၊ ရွှေကုက္ကိုမြို့သစ်နဲ့နီးတဲ့ ဟွမ်ယာမြို့သစ်စီမံကိန်းကို ပဒိုစောရောဂျာခင်က ခွင့်ပြုချက်ပေးခဲ့မှုကို အရေးယူဆောင်ရွက်ခဲ့မှုမရှိတာနဲ့ ကေအန်ယူရဲ့ မူဝါဒနဲ့ ဆန့်ကျင်လုပ်ဆောင်နေတဲ့ ခေါင်းဆောင်တွေကို အရေးယူမှုမရှိတဲ့ အချက်တွေကို ထောက်ပြထားပါတယ်။

ဒါ့အပြင် အာဏာသိမ်းစစ်ကောင်စီကပေးတဲ့ ဂုဏ်ထူးဆောင်ချီးမြှင့်ဆုကို လက်ခံခဲ့တဲ့ ကေအန်ယူ  ဥက္ကဋ္ဌ ဗိုလ်ချုပ်ကြီး စောမူတူးစေးဖိုးနဲ့ ကေအန်ယူ ဆုံးဖြတ်ချက်နဲ့  ညွှန်ကြားမှုကို ဆန့်ကျင်ပြီး စစ်ကောင်စီနဲ့ လက်တွဲအလုပ်လုပ်နေတဲ့ ဗဟိုအမြဲတမ်းကော်မတီဝင် ခေါင်းဆောင်တချို့ရဲ့ အပြုအမူတွေဟာ ကေအန်ယူ ဗဟိုအလုပ်မှုဆောင်ကော်မတီနဲ့ ဗဟိုအမြဲတမ်းကော်မတီ နှစ်ရပ်လုံးရဲ့ ကျဆင်းနေတဲ့ ခေါင်းဆောင်မှုပြဿနာကို ပြသနေတာဖြစ်ကြောင်း ထောက်ပြခဲ့ပါတယ်။

လက်ရှိကျင်းပနေတဲ့ ကွန်ဂရက်ကနေ ဗဟိုကော်မတီအသစ်ကို ပုံမှန်အတိုင်း မဲစနစ်နဲ့ ရွေးချယ်မှာဖြစ်ပါတယ်။

ကွန်ဂရက်ကျင်းပတဲ့ကာလဟာ ကရင်ပြည်နယ်ဒေသအနှံ့အပြားမှာ တိုက်ပွဲတွေ အပြင်းအထန် နေ့စဉ်နဲ့အမျှ ဖြစ်ပွားနေချိန်နဲ့လည်း တိုက်ဆိုင်နေပါတယ်။

ကရင်အမျိုးသားအစည်းအရုံး (ကေအန်ယူ) မှာ ပထမဆုံးဥက္ကဋ္ဌက စောစံဖိုးသင် ဖြစ်ပါတယ်။  ခေတ်အဆက်ဆက် ကေအန်ယူ ဥက္ကဋ္ဌတွေအဖြစ် စောစံဖိုးသင် ၁၉၄၇၊ စောဘဦးကြီး ၁၉၄၇ မှ ၁၉၅၀၊ စကောလယ်တော ၁၉၅၀ မှ ၁၉၅၃၊ စောဟံတာသာမွေး ၁၉၅၃ မှ ၁၉၆၃၊ မန်းဘဇံ ၁၉၆၃ မှ ၁၉၇၅၊ စောဘိုမြ ၁၉၇၆ မှ ၂၀၀၀၊ စောဘသင်စိန် ၂၀၀၀ မှ ၂၀၀၈၊ စောတာမလာဘော ၂၀၀၈ မှ ၂၀၁၂၊ စောမူတူးစေးဖိုးကတော့ ၂၀၁၂ မှ လက်ရှိအချိန်အထိ တာဝန်ထမ်းဆောင်နေတာ ဖြစ်ပါတယ်။

အမျိုးသားတန်းတူရေး၊ ကိုယ်ပိုင်ပြဋ္ဌာန်းခွင့်နဲ့ တခြားသော ရပိုင်ခွင့် အခွင့်အရေးတွေအတွက် စည်းစည်းလုံးလုံးနဲ့ ကြိုးပမ်းအားထုတ်အကောင်အထည်ဖော်ဖို့  ကရင်အမျိုးသားအစည်းအရုံး (ကေအန်ယူ) ဥက္ကဋ္ဌ ဗိုလ်ချုပ်ကြီးစောမူတူးစေးဖိုးက တိုက်တွန်းလိုက်ပါတယ်။

ဒီကနေ့ ကျရောက်တဲ့ ၇၄ နှစ်မြောက် ကရင့်အမျိုးသားနေ့မှာ သဝဏ်လွှာပေးပို့ တိုက်တွန်းထားတာ ဖြစ်ပြီး ကရင်အမျိုးသားတွေရဲ့ သမိုင်း၊ ဂုဏ်အင်္ဂါရပ်တွေနဲ့ အမျိုးသားလက္ခဏာ အစစ်အမှန်တွေကို ၁၉၄၈ ခု ဖေဖော်ဝါရီ ၁၁ ရက်ကလို ညီညီညွတ်ညွတ် ဆက်လက်ဖောင်ဆောင်ပြီး မြင့်တင်ဖို့ လည်း တိုက်တွန်းထားပါတယ်။

ဒါ့အပြင် လူမျိုးတိုင်း ဘာသာတရားတိုင်းအတွက် လွတ်လပ်မှု၊ တန်းတူမှုနဲ့ ကိုယ်ပိုင်ပြဋ္ဌာန်းခွင်တွေကို အာမခံချက်ပေးနိုင်ပြီး နိုင်ငံသူနိုင်ငံသားအားလုံးနဲ့ ပြည်သူ တရပ်လုံး မျှော်လင့်စောင့်စားနေတဲ့ ဖယ်ဒရယ်ဒီမိုကရေစီ ပြည်ထောင်စုကြီး တည်ဆောက်နိုင်ရေးအတွက် ကြိုးပမ်းအားထုတ်နေတဲ့ လူမျိုး၊ အဖွဲ့အစည်းတိုင်းနဲ့ လက်တွဲကောင်အထည်ဖော်ဖို့လည်း ကေအန်ယူခေါင်းဆောင်က တိုက်တွန်းထားပါတယ်။

အမျိုးသားညီညွတ်ရေးအစိုးရ(NUG)ကလည်း   စစ်အာဏာရှင်စနစ်ကို ဆန့်ကျင်ပြီး ပြည်သူလူထုနဲ့ တသားတည်းရပ်တည်ကာ နိုင်ငံရေးနဲ့ တော်လှန်ရေးကဏ္ဍတွေမှာ ဦးဆောင်မှုပြုနေကြတဲ့ ကရင်တိုင်းရင်းသားခေါင်းဆောင်နဲ့အဖွဲ့စည်းတွေကို လေးစားကျေးဇူးတင်တယ်လို့ (၇၄)နှစ်မြောက် ကရင်အမျိုးသားနေ့သို့ ပေးပို့တဲ့ သဝဏ်လွှာမှာ ပြောကြားလိုက်ပါတယ်။

ဖယ်ဒရယ်ဒီမိုကရေစီ ပြည်ထောင်စုကြီးတည်ဆောင်ရေးအတွက် အရေးကြီးလှတဲ့ ဒီနေ့အချိန် ကာလမှာ အကြမ်းဖက်စစ်ကောင်စီရဲ့ အဓမ္မ အာဏာသိမ်းမှုကို  နိုင်ငံတဝန်းလုံးရှိ တိုင်းရင်းသားပြည်သူတရပ်လုံး ခုခံဆန့်ကျင်တွန်းလှန်နေရာမှာ ကရင်တမျိုးသားလုံးက ပြည်ထောင်စုစိတ်ဓာတ်မျိုးနဲ့ ဖေးမကူညီ ပံ့ပို့းပေးခဲ့ကြတာဟာ ကျေးဇူးတင်ဖွယ်ရာ ကောင်းလှကြောင်းလည်း ဖော်ပြပါတယ်။

ပြည်ထောင်စုကြီး ရင်ဆိုင်နေရသည့် လက်ရှိနိုင်ငံရေးအကျပ်အတည်းများကို အောင်မြင်စွာ ကျော်လွှားပြီး ဖက်ဒရယ်ဒီမိုကရေစီပြည်ထောင်စုကြီး ဖြစ်ထွန်းပေါ်ပေါက်လာရေး အရေးတော်ပုံ ခရီးလမ်းမှာ ကရင်တိုင်းရင်းသား သွေးချင်းတွေအပါအဝင် ပြည်ထောင်စုဖွား တိုင်းရင်းသား ညီအစ်ကိုမောင်နှမတွေ အားလုံး ဟန်ချက်ညီညီ စည်းစည်းလုံးလုံး လျှောက်လှမ်းကြဖို့လည်း တိုက်တွန်းထားပါတယ်။

အလားတူ တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် လက်မှတ်ရေးထိုးထားတဲ့ တိုင်းရင်းသား လက်နက်ကိုင်တော်လှန်ရေးအဖွဲ့အစည်းများ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST ကလည်း ကရင်အမျိုးသားတို့ဟာ လွတ်လပ်ရေးမရခင်ကတည်းက နိုင်ငံရေးနိုးကြားသူတွေဖြစ်ပြီး အမျိုးသားလွတ်မြောက်မှုတော်လှန်ရေးလှုပ်ရှားမှုများစတင်ချိန် ၁၉၄၉ ခုနှစ်မှာလည်း ဦးဆောင်ဦးရွက်ပြုခဲ့တဲ့ အမျိုသားတော်လှန်ရေးသမိုင်းကိုလည်း မှတ်တမ်းတင်ကြောင်း ကရင်အမျိုးသားနေ့သို့ပေးပို့သော သဝဏ်လွှာမှာ ပြောဆိုထားပါတယ်။

ဒါ့အပြင် ဒီနောက်ပိုင်း ခေတ်အဆက်ဆက် တိုင်းရင်းသားတပ်ပေါင်းစုအသီးသီးမှာ နှစ်ရှည်လများ ဦးဆောင်ခဲ့ပြီးနောက် ငြိမ်းချမ်းရေးလုပ်ငန်းစဉ် ပေါ်ပေါက်လာချိန်မှာလည်း ဘဝတူ ညီနောင် ၇ ဖွဲ့ ဦးဆောင်ပြီး တနိုင်ငံလုံး ပစ်ခတ်တိုက်ခိုက်မျု ရပ်စဲရေးသဘောတူစာချုပ် (NCA) ကိုလည်း ရှေ့တန်းကနေ လက်မှတ်ရေးထိုးခဲ့တဲ့ကရင်အမျိုးသားတော်လှန်ရေးအဖွဲ့ ကေအန်ယူကိုလည်း ဂုဏ်ပြုအပ်ကြောင်း PPST ရဲ့ သဝဏ်လွှာမှာ ဖော်ပြထားပါတယ်။

ဒီကနေ့  ဖေဖော်ဝါရီ ၁၁ရက်နေ့မှာ ကျရောက်တဲ့ ၇၄ နှစ်မြောက် ကရင်အမျိုးသားနေ့ ဂုဏ်ပြုအထိမ်းအမှတ်အနေနဲ့ ရန်ကုန်တိုင်း အပါအဝင် ဒေသအသီးသီးရှိ ကရင်လူငယ်တွေက  စစ်အာဏာရှင်စနစ်ကို ဆန့်ကျင်တွန်းလှန်ခြင်း လှုပ်ရှားမှု အစီအစဉ်တွေလည်း လုပ်ဆောင်ခဲ့ကြပါတယ်။ 

၁၉၄၈ ခုနှစ်၊ ဖေဖော်ဝါရီ ၁၁ ရက်  မြန်မာတစ်ပြည်လုံးရှိ ကရင်လူထု လေးသိန်းကျော်က နိုင်ငံရေးကြွေးကြော် သံ ၄ ချက်ဖြစ်တဲ့  ကရင်ပြည်ချက်ချင်းပေး (လွတ်လပ်ရေး)၊ ဗမာတကျပ်၊ ကရင်တကျပ် ချက်ချင်းပြ (တန်းတူရေးနှင့် ဒီမိုကရေစီရေး)၊ လူမျိုးရေးအဓိကရုဏ်း အလိုမရှိ (စည်းလုံးညီညွတ်ရေး)၊ ပြည်တွင်းစစ် အလိုမရှိ (ငြိမ်းချမ်းရေး)စတဲ့ ကြွေးကြော်သံတွေကို  မြို့ပေါ်တက်ကာ ငြိမ်းချမ်းစွာ ဆန္ဒပြခဲ့ကြပါတယ်။

၁၉၅၃ ခုနှစ်၊ နိုဝင်ဘာလမှာ ဖာပွန်မြို့မှာ ကျင်းပခဲ့တဲ့  ကော်သူးလေပြည်လုံးဆိုင်ရာ ကွန်ဂရက်မှာ ဖေဖော်ဝါရီလ ၁၁ ရက်ကို ကရင်အမျိုးသားနေ့လို့ သတ်မှတ်သွားဖို့  တညီတညွတ်တည်း အတည်ပြုခဲ့ကြပါတယ်။

ဓာတ်ပုံ- KNU