ကရင်ပြည်နယ်၊ ဘုရားသုံးဆူမြို့ (ကေအန်ယူ၊ ဒူးပလာယာခရိုင်) မှာ ကရင့်လက်နက်ကိုင်တပ်ဖွဲ့တွေရဲ့ ညှိနှိုင်းပေးမှုနဲ့ ဆန္ဒပြမှုနဲ့ ဖမ်းဆီးခံရသူတစ်ဦး ပြန်လည်လွတ်မြောက်လာတယ်လို့ မေ ၁၆ ရက်နေ့မှာ မြို့ခံတွေက ပြောပါတယ်။
မေ ၁၄ ရက် မနက်ပိုင်းက ပြောက်ကျားသပိတ် ပြုလုပ်အပြီး နာရီပိုင်းမှာပဲ အကြမ်းဖက်အာဏာသိမ်းစစ်ကောင်စီရဲ့ တပ်နဲ့ရဲတွေက ဆန္ဒပြပြည်သူတွေကို မြို့အနှံ့ လိုက်လံရှာဖွေဖမ်းဆီးရာမှာ ရပ်ကွက် ၂၊ ရေတွင်းလမ်းမှာ နေထိုင်တဲ့ ဒေါ်ဇင်မာနဲ့ နော်ဝါးဂေထူးတို့ နှစ်ဦးရဲ့ နေအိမ်အတွင်းကို အတင်းအဓမ္မဝင်ရောက်ဖမ်းဆီးခဲ့တာပါ။
“တစ်ဦးပြန်လွတ်လာတာ ဟုတ်ပါတယ်။ ကရင့်လက်နက်ကိုင်တပ်ဖွဲ့တွေရဲ့ ညှိနှိုင်းပေးမှုနဲ့ ပြန်လွတ်ပေးလိုက်တာ။ ကျန်တစ်ယောက်ကိုတော့ အမှုဖွင့်ထားတယ် သိရတယ်” လို့ ဖမ်းဆီးခံရသူနဲ့ နီးစပ်သူတစ်ဦးက ပြောပါတယ်။
ဖမ်းဆီးခံရသူနှစ်ဦးအနက် နော်ဝါးဂေထူး တစ်ဦးသာ ပြန်လည်လွတ်မြောက်လာခဲ့တာဖြစ်ပြီး ဒေါ်ဇင်မာဦးကို ပုဒ်မ ၅၀၅-က နဲ့ တရားစွဲဆိုထားပါတယ်။
ဘုရားသုံးဆူမြို့မှာ အကြမ်းဖက်စစ်ကောင်စီက ဆန့်ကျင်တော်လှန်တဲ့ဆန္ဒပြသူတွေကို လိုက်လံဖမ်းဆီးမှုတွေရှိနေပေမယ့် ပြောက်ကျားသပိတ် ဆန့်ကျင်ဆန္ဒပြပွဲတွေ ပြုလုပ်နေကြတာပါ။
ကေအန်ယူ-ဒူးပလာယာခရိုင် ဝင်းရေးမြို့နယ် မာန်အောင်ရွာ အနီးမှာ မနေ့ညက နာရီဝက်လောက် တိုက်ပွဲဖြစ်ပွားခဲ့တာကြောင့် အရပ်သား ၁ ဦး ကျဆုံးပြီး ဒေသခံ ၁ ဦး ပေါင်မှာ ဒဏ်ရာရကာ ရွာသားတစ်ချို့ ထွက်ပြေးတိမ်းရှောင်နေရတယ်လို့ သိရပါတယ်။
ဒဏ်ရရှိသူကို ဆေးရုံပို့ဆောင်ထားပြီး သေဆုံးသူကတော့ ဒေသခံမဟုတ်ဘဲ အလုပ်လာလုပ်နေသူတဦးဖြစ်တယ်လို့ သိရပါတယ်။
အာဏာသိမ်းစစ်အုပ်စုရဲ့ ခလရ-၂၈၃ တပ်က ရွာသားတွေကို ပစ်ခတ်တာ၊ ရွာသားတွေကို အကာအကွယ်ယူလာတာကြောင့် ကရင်အမျိုးသားလွတ်မြောက်ရေးတပ်မတော် (KNLA) ရဲ့ ကျေးရွာလုံခြုံရေး တပ်စခန်းတခုကို စွန့်ခွာပေးခဲ့ရတယ်လို့ သိရပါတယ်။
အာဏာသိမ်းစစ်အုပ်စုရဲ့ တပ်တွေက ကေအန်ယူ-ဒူးပလာယာခရိုငေ ဝင်းရေးမြို့နယ်၊ နို့တကောမြို့နယ်၊ ကော့ကရိတ်မြို့နယ်၊ ကျုံဒိုးမြို့နယ်တို့အတွင်း စစ်ရေးလှုပ်ရှားမှုတွေ သိသိသာသာ တိုးမြင့်လာနေပါတယ်။
အာဏာသိမ်းစစ်အုပ်စုက စစ်ရေးလှုပ်ရှားမှု လုပ်ဆောင်တာနဲ့ တိုက်ပွဲတွေဖြစ်လာတာကြောင့် ဒေသခံပြည်သူတွေ စိုးရိမ်ကြောက်လန့်နေကြရတယ်လို့ သိရပါတယ်။
