ကချင်ပြည်နယ်၊ ဖားကန့်မြို့နယ်ထဲက စစ်ရေးအရအရေးပါတဲ့ စစ်ကောင်စီတပ်စခန်းတစ်ခုကို သိမ်းပိုက်နိုင်ခဲ့တယ်လို့ ကချင်လွတ်မြောက်ရေးတပ်မတော် (KIA) သတင်းပြန်ကြားရေးတာဝန်ခံ ဗိုလ်မှူးကြီးနော်ဘူက အတည်ပြုပါတယ်။
ဖားကန့်မြို့နယ်၊ နမ်ဂျန်ဒေသမှာရှိတဲ့ စစ်ကောင်စီရဲ့ တပ်စခန်းသုံးခုကို KIA တပ်တွေက နိုဝင်ဘာ ၁၄ ရက် မနက် ၇ နာရီဝန်းကျင်မှာ တပြိုင်နက်တည်း ဝင်ရောက်တိုက်ခိုက်ခဲ့တာဖြစ်ပြီး တပ်စခန်းတစ်ခုကိုတော့ သိမ်းဆည်းနိုင်ခဲ့တယ်လို့ ဗိုလ်မှူးကြီးနော်ဘူကပြောပါတယ်။
ကျန်နှစ်ခုကိုတော့ မြေပြင်သတင်းတွေ တက်မလာသေးတာကြောင့် သိမ်းနိုင်မှုရှိ၊ မရှိ အတည်ပြုလို့မရသေးဘူးလို့ဆိုပါတယ်။
"အဲဒီတပ်စခန်းတွေက အင်အား ငါးဆယ်အောက်ရှိတဲ့ တပ်စခန်းငယ်လေးတွေပါ။ ဒါပေမဲ့ စစ်ရေးအရ အရေးပါတဲ့တပ်စခန်းတွေဖြစ်ပါတယ်" လို့ ဗိုလ်မှူးကြီးနော်ဘူကပြောပါတယ်။
စစ်ကောင်စီဘက်ကတော့ သူတို့တပ်စခန်းတွေ ဝင်တိုက်ခံရပြီးနောက်မှာ ဖားကန့်ဗျူဟာကုန်းဘက်ကနေ လက်နက်ကြီးနဲ့ပစ်ခတ်တာတွေ၊ လေယာဉ်နဲ့ပစ်ခတ်တာတွေကို လုပ်ဆောင်ခဲ့တယ်လို့သိရပါတယ်။
ကေအိုင်အေထိန်းချုပ်နယ်မြေဖြစ်တဲ့ တနိုင်း-လီဒိုလမ်းမဘက်မှာလည်း စစ်ကောင်စီက လက်နက်နဲ့ ရိက္ခာတွေ ဖြည့်တင်းနေတာကြောင့် တိုက်ပွဲတွေ တောက်လျှောက်ရှိနေပါတယ်။
ကချင်ပြည်နယ် ဝိုင်းမော်မြို့နယ်အတွင်းရှိ ဆမားကုန်းမှာ အခြေချထားတဲ့ အကြမ်းဖက်စစ်ကောင်စီ တပ်စခန်းတစ်ခုအား ကေအိုင်အေက ထပ်မံတိုက်ခိုက်သိမ်းပိုက်ထားတယ်လို့ ကေအိုင်အေအရာရှိတစ်ဦးက အတည်ပြုပြောပါတယ်။
"ဧပြီ ၂၈ ရက်နေ့ မနက်ပိုင်း ၁၀ နာရီ၀န်းကျင်အချိန်မှာ ကချင်ပြည်နယ် ဝိုင်းမော်မြို့နယ်အတွင်းရှိဆမားကုန်းမှာ အခြေချထားတဲ့ အကြမ်းဖက်စစ်ကောင်စီစစ်တပ်ရဲ့ အိုခိုင်းခက်စခန်းအား ကချင်လွတ်မြောက်ရေးတပ်မတော်(KIA) တပ်ဖွဲ့ဝင်များက ဝင်ရောက်တိုက်ခိုက်သိမ်းပိုက်ခဲ့ပါတယ်။"
ဧပြီလ ၂၇ ရက်နေ့က တိုက်ပွဲမှာတော့ ကချင်လွတ်မြောက်ရေးတပ်မတော် (KIA) ဘက်က ၂ ဦးကျဆုံးခဲ့ကာ အကြမ်းဖက်စစ်ကောင်စီဖက်က ဗိုလ်အဆင့် ၆ ဦးအပါအ၀င် အယောက် ၄၀ အထက် ကျဆုံးတယ်လို့ ဆိုပါတယ်။
အကြမ်းဖက်စစ်ကောင်စီတပ်ဖွဲ့ဘက်က တိုက်ပွဲတိုင်းမှာ ဂျက်ဖိုက်တာတွေ အသုံးပြုတိုက်ခိုက်ခဲ့သလို အသံတိတ် ဗုံးကျဲလေယာဉ်တွေနဲ့လည်း တိုက်ခိုက်နေတယ်လို့ သိရပါတယ်။
ကချင်ပြည်နယ်အတွင်း နေ့စဉ်တိုက်ပွဲတွေ အပြင်းအထန် ဖြစ်ပွားနေတဲ့ အခြေအနေကို အာဏာသိမ်း စစ်ကောင်စီရဲ့ မီဒီယာတွေမှာ ထုတ်လွှင့်ခြင်းမရှိဘဲ သတင်းအမှောင်ချထားပါတယ်။
