ပါကစ္စတန်နိုင်ငံအနောက်တောင်ပိုင်း ကတ်တာမြို့က ကောလိပ်ကျောင်း ဝင်ပေါက်မှာ ဒီဇင်ဘာ ၃၀ ရက်က ပေါက်ကွဲမှုကြောင့် လူလေးယောက်ထက်မနည်း သေဆုံးပြီး ၁၅ ယောက် ဒဏ်ရာရခဲ့ပါတယ်။
အစိုးရ ဘွဲ့လွန်သိပ္ပံကောလိပ် အဓိကဝင်ပေါက်နားက တိုင်အောက်မှာ မြုပ်ထားခဲ့တဲ့ ဖောက်ခွဲရေး ပစ္စည်းက ပေါက်ကွဲတာလို့ ရဲက ပြောပါတယ်။
ကောလိပ်ကျောင်းဝင်းထဲမှာ လူထုစည်းဝေးပွဲအပြီး လူစုခွဲချိန် ဒေသစံတော်ချိန် ည ၉ နာရီ ၄၀ မိနစ်မှာ ပေါက်ကွဲတာလို့ ဘာလိုချီစတန်ပြည်နယ် ရဲချုပ် မူဟမ်မဒ် တာဟီယာရိုင်က ပြောပါတယ်။
အစ္စလာမ္မစ်ပါတီ တရပ်ဖြစ်တဲ့ ဂျမီး တူမာအေ စလာမပါတီရဲ့ ကျောင်းသား တပ်ဆွယ်က ခေါင်းဆောင်တွေနဲ့ လုပ်သားတွေက ညီလာခံအတွက် စုဝေးနေချိန်မှာ ဖောက်ခွဲခံရတာလို့လည်း ဆိုပါတယ်။
ပေါက်ကွဲမှု ဖြစ်ခဲ့တဲ့နေရာကို ကာရံကာ စုံစမ်းစစ်ဆေးနေပြီး ဘယ်အုပ်စုကမှ ဒီတိုက်ခိုက်မှုအတွက် တာဝန်ရှိကြောင်း မပြောသေးပါဘူး။
ဘာလိုချီစတန်ပြည်နယ်ဟာ ဒေသခံ အမျိုးသားရေး ဝါဒီတွေပါတဲ့ အပျော့စား သူပုန်ထနေရာ နယ်မြေပါ။
ဒီပြည်နယ်ဟာ တရုတ်ရဲ့ ခါးပတ်တကွင်း လမ်းတစင်း စီးပွားရေး စင်္ကြံ မဟာဗျူဟာအတွင်း အမေရိကန် ဒေါ်လာ ၆၅ ဘီလျံ ရင်းနှီးမြှုပ်နှံဖို့ အစီအမံရဲ့ အဓိကဖြစ်တဲ့ ဂွါဒါ ရေနက်ဆိပ်ကမ်း အသစ်တိုးချဲ့ရာ နေရာလည်း ဖြစ်ပါတယ်။
