ကရင်ပြည်နယ်၊ ကော့ကရိတ်မြို့တွင်းမှာ စစ်ကောင်စီတပ်တွေနဲ့ KNLA ပူးပေါင်းတပ်တွေ နှစ်ဖက်တိုက်ပွဲတွေပြင်းထန်နေပြီး စစ်ကောင်စီက မြို့တွင်း လူနေရပ်ကွက်အတွင်းကိုပါ လေယာဉ်နဲ့ ဗုံးကြဲနေတယ်လို့ မြေပြင်တိုက်ပွဲမှာ ပါဝင်နေတဲ့ KNLA တပ်မှူးတယောက်က ဒီဗွီဘီကို ပြောပါတယ်။

အောက်တိုဘာ ၂၁ ရက် ဒီမနက်ပိုင်းကစပြီး ကော့ကရိတ်မြို့တွင်းကို KNLA ပူးပေါင်းတပ်တွေက ကော့ကရိတ်-မြဝတီလမ်းဟောင်း အမှတ် ၃ ဂိတ်နေရာကနေ စတင်ပြီး စစ်ကောင်စီအုပ်ချုပ်ရေးအဖွဲ့ ရုံးစိုက်ရာ အနီးတဝိုက်ကို ဝင်ရောက်တိုက်ခိုက်နေတာပါ။

နှစ်ဖက်တိုက်ပွဲအတွင်း ကော့ကရိတ်မြို့၊ အမှတ် ၁ ရပ်ကွက် ထန်းပင်ကုန်း၊ အမှတ် ၇ ရပ်ကွက် (တံတားဦး)၊ ကွက်သစ်နေရာတွေကို စစ်ကောင်စီရဲ့ စကခ ၁၂ က လှိုင်ဝအမြောက်ကုန်းနဲ့ ခလရ ၉၇ တပ်တွင်းကနေ လက်နက်ကြီးတွေနဲ့ အဆက်မပြတ် ပစ်ခတ်နေသလို လေကြောင်းကနေ ဗုံးကြဲတိုက်ခိုက်ခဲ့ပါတယ်။

ကရင်အမျိုးသားလွတ်မြောက်ရေးတပ်မတော် (KNLA) တပ်မှူး စောကျော်သက်က “အခြေအနေကတော့ တိုက်ပွဲဖြစ်နေတယ်။ လေယာဉ်ပျံလာကြဲတာ အခေါက် ၂၀ ရှိပြီ။ မြို့သိမ်းတော့ မဟုတ်ပါဘူး။ မြို့ထိန်းဖို့ရှိတယ်။ သိမ်းဖို့မဟုတ်ပါဘူး။ မြို့က ဒီနေ့မှစတယ်။ အားလုံး ဒီနေ့နဲ့ဆိုရင် တိုက်ပွဲက ၄ ရက်ရှိပြီ။ အာရှလမ်းမဘက်ကော အခု ကော့ကရိတ်ဘက်ကော အားလုံး ၄ ရက်ရှိနေပြီ” လို့ ပြောပါတယ်။

စစ်ကောင်စီတပ်ဖွဲ့ဝင်တွေရဲ့ လက်နက်ကြီးပစ်ခတ်မှုကြောင့် ရဲတပ်ဖွဲ့ဝင်မိသားစုရဲ့ နေအိမ်ပေါ် လက်နက်ကြီး ကျရောက်ပေါက်ကွဲခဲ့တဲ့အတွက် မိသားစုဝင်တဦး ထိမှန်သေဆုံးခဲ့သလို ၃ ဦး ထိမှန်ဒဏ်ရာရရှိခဲ့ပြီး ဆက်လက်ပြီး သေဆုံးဒဏ်ရာရရှိသူတွေ ရှိနိုင်သလို ကော့ကရိတ် အချုပ်ထောင်ပါ ပွင့်သွားပြီလို့ မြိုခံပြည်သူတဦးက ပြောပါတယ်။

တိုက်ပွဲဝင်နေတဲ့ Lion Battalion Commando -ဗျူဟာစစ်ကြောင်းကလည်း ဗျူဟာမှူး ဗိုလ်အယ်စေးဝါး ဦးဆောင်ကာ မိတ်ဘက် တော်လှန်ရေးတပ်ဖွဲ့တွေနဲ့အတူ မြို့သိမ်းတိုက်ပွဲကို စတင်ဆင်နွဲနေပြီလို့ သတင်းထုတ်ပြန်ထားပါတယ်။

မြို့ပြအနီးကပ်တိုက်ပွဲဖြစ်လို့ တိုက်ပွဲဝင် ရဲဘော်တွေအတွက် ကျည်ကာအပါအဝင် စစ်ရေးအထောက်အပံ့ပစ္စည်းတွေ လိုအပ်နေလို့ မိဘပြည်သူတွေ ပါဝင်ကူညီပေးကြဖို့လည်း မေတ္တာရပ်ခံထားပါတယ်။

အောက်တိုဘာ ၁၉ ရက်က စတင်ပြီး ကေအန်ယူ တပ်မဟာ ၆ နယ်မြေ၊ ကော့ကရိတ်-မြဝတီ (အာရှလမ်း) တောနော်ရေတံခွန်အနီးမှာ စစ်ကောင်စီတပ်၊ နယ်ခြားစောင့် (BGF) ပူးပေါင်းတပ်တွေနဲ့ KNLA ပူးပေါင်းတပ်ဖွဲ့တို့ နှစ်ဖက်တိုက်ပွဲဖြစ်ပွားခဲ့ရာက စစ်ကောင်စီရဲ့ ခရိုင်၊ မြို့နယ် အုပ်ချုပ်ရေးအခြေစိုက်ရာ မြို့တွင်းကို KNLA ပူးပေါင်းတပ်ဖွဲ့ ဝင်ရောက်တိုက်ခိုက်ခဲ့တာပါ။

အဆိုပါတိုက်ပွဲတွေကြောင့် ကော့ကရိတ်-မြဝတီ (အာရှလမ်း) ကို ဖြတ်သန်းသွားလာခွင့် ပိတ်ထားတဲ့အတွက် ခရီးသည်ယာဉ်တွေ၊ ကုန်စည်ယာဉ်တွေဟာ နီးစပ်ရာနေရာတွေမှာ ရပ်နားထားရသလို တချို့ခရီးသည်တွေဟာ နီးစပ်ရာ ရာဘာခြံနဲ့ လမ်းဘေးဝဲယာမှာ ယာယီခိုလှုံနေရပါတယ်။

ဩဂုတ် ၁၅ ရက် မနက် ၁၀ နာရီလောက်က ကော့ကရိတ်-မြဝတီလမ်းဟောင်း (ကားလမ်းဘေး) အနီး ကော့ကရိတ်ခရိုင်ရဲတပ်ဖွဲ့စခန်းနဲ့ မြို့တွင်းက မြို့မရဲစခန်းကို KNLA ပူးပေါင်းတပ်ဖွဲ့တွေက ဝင်ရောက်တိုက်ခိုက်ခဲ့ပါတယ်။ အဲဒီတိုက်ပွဲအတွင်း စစ်ကောင်စီဘက်က ရဲမှူးအပါအဝင် ၁၂ ဦးသေဆုံးပြီး ၄ ဦး ထိခိုက်ဒဏ်ရာရရှိခဲ့သလို လက်နက်ခဲယမ်းတွေကိုပါ သိမ်းဆည်းခံခဲ့ရပြီး မြို့နယ်ဥပဒေအရာရှိတဦးနဲ့ ရုံးအကူတဦး ဖမ်းဆီးခံခဲ့ရပါတယ်။

ကရင်ပြည်နယ်၊ ကော့ကရိတ်မြို့နယ်ရှိ စစ်ကောင်စီ အခြေကုပ်စခန်းတခုဖြစ်တဲ့ ကြိတ်စခန်းကို KNLA ပူးပေါင်းတပ်ဖွဲ့တွေက စက်တင်ဘာ ၂၀ ရက်နေ့က တိုက်ခိုက်သိမ်းပိုက်နိုင်ခဲ့တယ်လို့ ကရင်အမျိုးသားအစည်းအရုံးက သတင်းထုတ်ပြန်ပါတယ်။

သြဂုတ်လ ၈ ရက်ကစတင်ပြီး တပ်စခန်းအတွင်းတပ်စွဲထားတဲ့ ခမရ- ၅၅၇ တပ်ရင်းက တပ်ဖွဲ့ဝင်တွေကို ပိတ်ဆို့ပြီးရိက္ခာဖြတ်တောက်ကာ  KNLA တပ်ရင်း ၁၈၊ ဒေါနစစ်ကြောင်း-SOG ပူးပေါင်းတပ်ဖွဲ့တွေက စခန်းတစ်ခုလုံးကို တိုက်ခိုက်သိမ်းပိုက်နိုင်ခဲ့တာပါ။

စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် ၇ ဦးသေဆုံးပြီး ၂ ဦး ဒဏ်ရာနဲ့ ဖမ်းဆီးရမိခဲ့သလို MA ကျည်ဘောက် ၁၇ ခု၊ 9 MM ၄၄ တောင့်၊ M16 ကျည်ဘောက် ၄ ခု၊ sinper ကျည်ဘောက် ၃ ခု၊ 60 MM ၁၂ လုံး၊ 73 MM ၁၁ လုံး၊ အီနာဂါ ၁ လုံး၊ 40 MM ၁၀ လုံး၊ BA109 လက်ပစ်ဗုံး ၂ လုံး၊ 73 ယမ်းတောင့် -၅ တောင့်၊ စက်လက်ကျည် ၂၂၉ တောင့်၊ AKကျည်ဘောက်ဝိုင်း ၁ ခု၊ စကားပြောစက် ၂ လုံး၊ ဖုန်း ၃ လုံး၊ 5.56 ကပစကျည်  ၂၂၂၃ တောင့်၊ စိန်ပြောင်းချိန်သီး ၁ ခု၊ MA 5 ကျည် ၂ တောင့်ကို သိမ်းဆည်းရမိခဲ့ပါတယ်။

ဒါအပြင် RPG ၂ လက်၊ BA 100 စိန်ပြောင်း ၁ လက်၊ ငါးကြင်းမြီးစက်လက် ၁ လက်၊ ပြောင်းပို ၁ ခု၊ AK ၁ လက်၊ MAS စနိုက်ပါ ၁ လက်၊ MA4.MAK ပူးတွဲ ၁ လက်၊ MA1 ၂ လက်၊ MA3 ၂ လက်၊ MA5 ၂ လက်၊ MG3 ၁ လက် သိမ်းဆည်းရမိခဲ့တယ်လို့ ကေအန်ယူကထုတ်ပြန်ထားပါတယ်။

ကေအန်ယူထိန်းချုပ်နယ်မြေတွေအတွင်း တပ်မဟာ ၇ ကလွဲရင် ကျန်နယ်မြေတွေမှာ တိုက်ပွဲတွေ နေ့စဉ်ဖြစ်ပွားနေသလို စစ်ကောင်စီက တဖက်မှာ ငြိမ်းချမ်းရေးဖိတ်ခေါ်ပြီး တိုင်းရင်းသားဒေသတွေကို စစ်အင်အားတိုးချဲ့ပြီး စစ်ရေးလှုပ်ရှားမှုတွေ ပိုမို လုပ်ဆောင်လာတဲ့အတွက် နှစ်ဖက်တိုက်ပွဲတွေ ပြင်းထန်နေသလို လေကြောင်းတိုက်ခိုက်မှုတွေပါ လုပ်ဆောင်နေပါတယ်။