ကရင်ပြည်နယ်၊ ကော့ကရိတ်မြို့မှာ သြဂုတ် ၃၀ ရက်ကစပြီး ည ၆ နာရီမှ မနက် ၄ နာရီအထိ ညမထွက်ရတားမြစ်မိန့် ပုဒ်မ ၁၄၄ ကို မြို့နယ်စစ်ကောင်စီအုပ်ချုပ်ရေးက ထုတ်ပြန်လိုက်ပါတယ်။
ကော့ကရိတ်မြို့မရဲစခန်းတိုက်ခိုက်ခံရပြီးနောက် အခုလိုထုတ်ပြန်လိုက်တာဖြစ်ပြီး လက်ရှိတားမြစ်မိန့်ဟာ ၂၀၂၂ ခုနှစ် အောက်တိုဘာ ၃၀ ရက်အထိ နှစ်လ အတည်ဖြစ်တယ်လို့ ဆိုပါတယ်။
ကော့ကရိတ်မြိုခံပြည်သူတစ်ဦးက “မြို့ကလူတွေ စီးပွားရေးကအဆင်မပြေတဲ့အထဲ အခုလိုအချိန်ကန့်သတ်လိုက်တော့ ဘာလုပ်စားမလဲ။ လောင်းကစားဝိုင်းတွေကျ ကြိုက်တဲ့အချိန် သွားလို့ရတယ်။ သူတို့အဖွဲ့နဲ့တွေရင် ဂိမ်းဆိုင်လို့ပြောရင် အဆင်ပြေတယ်။ ဂိမ်းဆိုင်တွေက ငွေပေးထားတော့ သူတို့နဲ့အဆင်ပြေတယ်။ အခုရက်ပိုင်း သူခိုးတွေက ပိုသောင်းကျန်းလာတယ်။ သူခိုးက မြေလျို မိုးပျံလို့ရလား"လို့ ဆိုပါတယ်။
ကော့ကရိတ်-မြဝတီလမ်းဟောင်း(ကားလမ်းဘေး)အနီး ခရိုင်ရဲတပ်ဖွဲ့စခန်းနဲ့ မြို့တွင်းက ကော့ကရိတ်မြို့မရဲစခန်းကို ဩဂုတ် ၁၅ ရက် မနက် ၁၀ နာရီလောက်က KNLA ပူးပေါင်းတပ်ဖွဲ့က တိုက်ခိုက်ခဲ့တာမှာ စစ်ကောင်စီဘက်ကရဲမှူးအပါအဝင် ၇ ဦးသေဆုံးပြီး ၄ ဦးဒဏ်ရာရရှိခဲ့သလို လက်နက်ခဲယမ်းတွေကိုပါ သိမ်းဆည်းခံခဲ့ရတာပါ။
ဒါ့အပြင် မြို့နယ်ဥပဒေအရာရှိတစ်ဦးနဲ့ ရုံးအကူတစ်ဦး ဖမ်းဆီးခံခဲ့ရပြီး တိုက်ပွဲအတွင်းထိခိုက်ဒဏ်ရာရရှိခဲ့တဲ့ ရဲတပ်ဖွဲ့ဝင် ၅ ဦးကလည်း ဆေးကုသမှုခံယူရင်ထပ်မံသေးဆုံးခဲ့ပါတယ်။
တိုက်ပွဲဖြစ်ပြီးနောက် စစ်ကောင်စီက မြို့ဝင်မြို့ထွက်လမ်းအားလုံးကို ပိတ်ဆို့ထားပြီး မြို့အဝင်ကြာပန်းလမ်းတစ်လမ်းကို ဖွင့်လှစ်ပေးထားကာ အဲဒီလမ်းကို လုံခြုံရေးရယူ တင်းကျပ်စစ်ဆေးနေသလို အချိန်ကျော်လွန်ပြီး ကော့ကရိတ်မြို့တွင်း သွားလာသူတွေကို ပစ်မိန့်ပေးထားပါတယ်။
ကော့ကရိတ်မြို့တွင်းမှာ စစ်ကောင်စီတပ်တွေက လုံခြုံရေးအကြောင်းပြပြီး လှုပ်ရှားသွားလာနေတဲ့အတွက် ဒေသခံတွေဟာ နေထိုင်စားသောက်ရေးမှာ အခက်အခဲတွေနဲ့ရင်ဆိုင်နေရတယ်လို့ မြို့ခံပြည်သူတွေက ပြောပါတယ်။
ဩဂုတ် ၁၅ ရက် KNLA ပူးပေါင်းတပ်ဖွဲ့တွေဆုတ်ခွာသွားတဲ့လမ်းကြောင်းကို စစ်ကောင်စီ အမြောက်တပ်နဲ့ သံချပ်ကားယာဉ်တွေက လက်နက်ကြီးနဲ့ ပစ်ခတ်တဲ့အတွက် ဒေသခံ ၇ ဦးထိမှန်ဒဏ်ရာရရှိခဲ့ပြီး အသက် ၂ နှစ်အရွယ်ကလေးငယ်တစ်ဦး သေဆုံးခဲ့ပါတယ်။
ဩဂုတ် ၁၇ ရက်က စစ်ကောင်စီတပ်ဖွဲ့ဝင်အင်အား ၂၀ ကျော်ဟာ ကားနှစ်စီးနဲ့ ကော့ကရိတ်မြို့အတွင်းဝင်ရောက်လာပြီး သေနတ်ပစ်ဖောက်ခဲ့ရာမှာ ဆေးရုံကုန်းနဲ့ ဝင်းကြီးရပ်ကွက်ပိုင်းက လူနေအိမ်တချို့ ကျည်ထိမှန်ခဲ့ပါတယ်။
ဒါအပြင် ဩဂုတ် ၂၁ ရက်ကလည်း စစ်ကောင်စီတပ်က လက်နက်ကြီးနဲ့ ပစ်ခတ်လို့ မြဝတီမြို့ကို သွယ်တန်းထားတဲ့ ဓာတ်အားလိုင်းတာဝါတိုင်နှစ်တိုင် ထိမှန်ပျက်စီးခဲ့ပါတယ်။
လက်ရှိအချိန်အထိလည်း ကော့ကရိတ်မြို့အနီးဝန်းကျင်မှာ စစ်ကောင်စီတပ်တွေအင်အားတိုးပြီး စစ်ရေးလှုပ်ရှားတာတွေ ပိုမိုလုပ်ဆောင်လာတဲ့အတွက် KNLA ပူးပေါင်းတပ်ဖွဲ့တွေနဲ့ တိုက်ပွဲတွေ ထပ်မံဖြစ်ပွားနေပါတယ်။
အခုလိုစစ်ကောင်စီက မြို့ကိုပိတ်ဆို့ပြီးလုံခြုံရေးတင်းကျပ်ထားတဲ့အပြင် သေနတ်နဲ့ လိုက်လံပစ်ခတ်နေတာတွေကြောင့် မြို့ခံပြည်သူတွေဟာ စိုးရိမ်ကြောက်လန့်ပြီး ပြောင်းရွေ့သွားသူတွေလည်း ရှိနေပါတယ်။
ကရင်ပြည်နယ် ကော့ကရိတ်မြို့ပေါ်မှာ ဩဂုတ် ၁၅ ရက် ဒီကနေ့ ဖြစ်ပွားခဲ့တဲ့တိုက်ပွဲအတွင်း အကြမ်းဖက်စစ်ကောင်စီဘက်က ရဲမှူးအပါအဝင် ၁၂ ယောက်သေဆုံးခဲ့တယ်လို့ ကရင်အမျိုးသားအစည်းအရုံး (ကေအန်ယူ)က ထုတ်ပြန်ပါတယ်။
ဒါ့အပြင် လက်နက် ၆ လက်နဲ့အတူ တရားဥပဒေအရာရှိ ၁ ယောက်၊ ရုံးလုပ်သား ၁ ယောက်တို့ကိုပါ အရှင်ဖမ်းမိခဲ့တယ်လို့ ဆိုပါတယ်။
တိုက်ပွဲအတွင်း အကြမ်းဖက်စစ်တပ်ဘက်က ကျေးရွာတွေဘက်ကို လက်နက်ကြီး အချက် ၅၀ ထက်မနည်းပစ်ခဲ့ပြီး အရပ်သားတယောက် စိုးရိမ်ရတဲ့ ဒဏ်ရာရရှိခဲ့တယ်လို့ ဆိုပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ ဒေသခံပြည်သူ့ကာကွယ်ရေးတပ်ဖွဲ့တွေ၊ တိုင်းရင်းသာလက်နက်ကိုင်တပ်ဖွဲ့တွေနဲ့ အကြမ်းဖက်စစ်ကောင်စီတပ်တွေကြား တိုက်ပွဲတွေလည်း ပြင်းထန်နေပါတယ်။
အမျိုးသားညီညွတ်ရေးအစိုးရ (NUG) ကတော့ မြန်မာ့နွေဦးတော်လှန်ရေးမှာ ရရှိထားခဲ့တဲ့ ရန်ပုံငွေတွေထဲက ၉၀ ရာခိုင်နှုန်းကို ကာကွယ်ရေးအသုံးစရိတ်အဖြစ် အသုံးပြုထားတယ်လို့ ပြောပေမယ့် မြေပြင်မှာတော့ လက်နက်အင်အားတောင့်တင်းတဲ့ အကြမ်းဖက်စစ်တပ်ကို တိုက်ခိုက်ဖို့အတွက် ဒေသခံပြည်သူ့ကာကွယ်ရေးတပ်တွေဟာ အပေါ့စားလက်နက်တွေ၊ အခြေခံသုံး ရိုင်ဖယ်တွေနဲ့ လက်လုပ်ဖောက်ခွဲရေးပစ္စည်းတွေကို သုံးနေရသလို လိုအပ်ချက်တွေလည်း ရှိနေတာ ဖြစ်ပါတယ်။
ဒါပေမယ့် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်းလမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ပြီးခဲ့တဲ့ ဇွန် ၂၁ ရက် သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။
မြန်မာနိုင်ငံတဝန်းမှာတော့ ပဋိပက္ခနဲ့ တိုက်ပွဲတွေကြောင့် အမျိုးသမီးနဲ့ ကလေးငယ်တွေ အပါအဝင် နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ ဒသမ ၂ သန်းကျော် ရှိလာခဲ့ပြီဖြစ်ကာ ပြီးခဲ့တဲ့ ဇူလိုင်လ အတွင်းမှာတော့ ပြည်တွင်းနေရပ် စွန့်ခွာသူဦးရေ အများဆုံးစံချိန်တင်ခဲ့တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ထားပါတယ်။
အဲဒီထဲမှာတော့ ပြီးခဲ့တဲ့ ၂၀၂၁ ခုနှစ် အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် ပြည်တွင်းနေရပ်စွန့်ခွာသူ ၈၆၆,၀၀၀ ယောက်နဲ့ အဲဒီမတိုင်မီ ပဋိပက္ခတွေကြောင့် ပြည်တွင်းနေရပ် စွန့်ခွာသူ ၃၄၆,၀၀၀ ယောက်ပါဝင်တယ်လို့ ဆိုပါတယ်။
