ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်၊ တက္ကနာ့ဖ်မြို့နယ်ရှိ လေဒါ ရိုဟင်ဂျာဒုက္ခသည်စခန်း ၂ ခုမှာ ဧပြီ ၁၈ ရက် ည ၁၂ နာရီလောက်က မီးလောင်မှုဖြစ်ပွားတာကြောင့် နေအိမ် ၃၀ နီးပါး ပျက်စီးဆုံးရှုံးခဲ့ပါတယ်။

ရိုဟင်ဂျာဒုက္ခသည်တွေ ဝိုင်းဝန်းငြှိမ်းသတ်လိုက်တာကြောင့် မီးငြိမ်းသွားခဲ့ပြီး မီးလောင်ကျွမ်းမှုကြောင့် လေဒါဒုက္ခသည်စခန်း အမှတ် ၂၄ မှာ နေအိမ်အလုံး ၃၀ နီးပါးနဲ့ အမှတ် ၂၆ မှာ နေအိမ် ၁ လုံး ပျက်စီးဆုံးရှုံးသွားတယ်လို့ ဒုက္ခသည်တွေက ပြောပါတယ်။

လောလောဆယ်မှာ မီးလောင်မှုနဲ့ပတ်သက်ပြီး ဘာကြောင့် မီးလောင်ကျွမ်းမှုဖြစ်တယ် ဆိုတာကို အသေးစိတ် မသိရသေးပါဘူး။

ပြီးခဲ့တဲ့ မတ်လ ၅ ရက်ကလည်း ကော့ဇ်ဘဇားခရိုင်ရှိ ရိုဟင်ဂျာဒုက္ခသည်စခန်းမှာ မီးလောင်ပြီး လူနေအိမ် ၂,၈၀၀၊ ဆေးရုံနဲ့ ပညာသင်ကြားရေးစင်တာ အပါအဝင် အဆောက်အဦ ၉၀ ကျော် မီးလောင်ပျက်စီးခဲ့ကာ လူပေါင်း ၁၂,၀၀၀ ကျော် အိုးမဲ့အိမ်မဲ့ ဖြစ်ခဲ့ကြရပါတယ်။

ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်ရှိ ရိုဟင်ဂျာ ဒုက္ခသည်စခန်းတွေကို မတ် ၁၅ ရက်မှာ  ပြင်သစ်သံအမတ်ကြီး မာရီမတ်စ်ဒူပေးနဲ့အဖွဲ့ သွားရောက်ပြီး ရိုဟင်ဂျာဒုက္ခသည်တွေနဲ့ တွေ့ဆုံဆွေးနွေးခဲ့ကြောင်း ဒုက္ခသည်စခန်း တာဝန်ရှိသူတွေဆီက သိရပါတယ်။

ဒုက္ခသည်စခန်းတာဝန်ရှိသူတဦးက “သူ အဓိကထား ဆွေးနွေးတာက ဒုက္ခသည်တွေ လုံခြုံရေးပါ။ ဒုက္ခသည်စခန်းတွေက ကျယ်ပြန့်တော့ ဒုက္ခသည်တွေကို ပစ်မှတ်ထား သတ်ဖြတ်နေတဲ့ အကြမ်းဖက်အဖွဲ့တွေက ခိုလှုံနေကြတာ။ ဘင်္ဂလားအစိုးရလည်း လက်တွေ့မှာ ဘယ်လိုမှ ကာကွယ်မပေးနိုင်ဘူး။ အဲဒါကို ကျနော်တို့ဘက်က အဓိက တင်ပြခဲ့ကြတယ်” လို့ ပြောပါတယ်။

ဘင်္ဂလားဒေ့ရှ်နိုင်ငံဆိုင်ရာ ပြင်သစ်သံအမတ်ကြီးဟာ ဒုက္ခသည်စခန်းရဲ့ အဓိကစိန်ခေါ်မှု ဖြစ်တဲ့ လုံခြုံရေး၊ ကာကွယ်ရေးနဲ့ လူသားချင်းစာနာထောက်ထားမှုဆိုင်ရာ အကူအညီပေးရေး ဝန်ဆောင်မှုတွေအပြင် သဘာဝပတ်ဝန်းကျင် ကာကွယ်ထိန်းသိမ်းရေး၊ ရာသီဥတုဆိုင်ရာ လုပ်ဆောင်ချက်တွေကိုပါ တွေ့ဆုံဆွေးနွေးခဲ့ကြောင်း ဘင်္ဂလားဒေ့ရှ် UNHCR ရုံး ထုတ်ပြန်ချက်မှာ ဖော်ပြထားပါတယ်။

ဒုက္ခသည်စခန်းမှာ ရိုဟင်ဂျာတွေဟာ ဆင်းရဲဒုက္ခတွေ၊ ဘက်စုံအခက်အခဲတွေ၊ မီးရှို့ မီးလောင်ခံရမှုတွေနဲ့ နှိပ်စက်ညှဉ်းပန်းမှုပေါင်း များစွာနဲ့ ကြုံတွေ့နေရတာတွေကို တင်ပြခဲ့ကြတယ်လို့ ဒုက္ခသည်တွေဆီက သိရပါတယ်။

စစ်ကောင်စီကစေလွှတ်တဲ့ ကိုယ်စားလှယ်အဖွဲ့ဟာလည်း မတ် ၁၅ ရက်က ဘင်္ဂလားဒေ့ရှ်နိုင်ငံမှာ ရောက်ရှိနေပြီး ရိုဟင်ဂျာဒုက္ခသည်တွေနဲ့ တွေ့ဆုံခဲ့ပါတယ်။