မန္တလေးတိုင်း၊ မိုးကုတ်မြို့အနောက်ပိုင်း ကျပ်ပြင်ရဲစခန်းအနီးမှာ ဇန်နဝါရီ ၂၃ ရက် ည ၇ နာရီလောက်က ဗုံးပေါက်ကွဲခဲ့တယ်လို့ ဒေသခံတွေဆီက သိရပါတယ်။
“အရင်ရှေ့တရက်ကလည်း ကျပ်ပြင်က ဒေါ်နန်းကြည်တောင်နားမှာ ဗုံးတလုံးကွဲသေးတယ်။ မနေ့ညက ရဲစခန်းနားမှာကွဲတာ၊ လူထိခိုက်မှုတော့ မရှိဘူး။ အစတွေတော့ ခေါင်မိုးတွေမှာ လာမှန်တယ်” လို့ ရပ်ကွက်နေ ဒေသခံတဦးက ပြောပါတယ်။
ကျပ်ပြင်ရဲစခန်းအနီးမှာ ဗုံးပေါက်ကွဲခဲ့ပြီးနောက် သေနတ်ပစ်သံ ငါးချက်ခန့်ကြားခဲ့ရပြီး ရပ်ကွက်တွေအတွင်း စစ်ကောင်စီတပ်က လှည့်လည်စစ်ဆေးတာတွေ လုပ်ခဲ့တယ်လို့ သိရပါတယ်။
မိုးကုတ်မြို့အနောက်ပိုင်း မိုင်းဟုမ်းကျေးရွာအနီးမှာ စစ်တပ်က ဇန်နဝါရီ ၂၀ ရက်က လေယာဥ်အသုံးပြု ပစ်ခတ်ခဲ့တာကြောင့် NUG PDF တပ်ရင်း-၁၂၂၂ က စစ်ကြောင်းမှူး ကျဆုံးခဲ့တယ်လို့ သိရပါတယ်။
စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တွေ မြို့အနီးတဝိုက်မှာ ထိတွေ့မှု ဖြစ်ပွားခဲ့ပြီးနောက် မြို့တွင်းမှာ အခုလို ဗုံးပေါက်ကွဲမှုတွေ ဖြစ်ပွားခဲ့ပေမဲ့ ဘယ်အဖွဲ့က လုပ်ဆောင်တယ် ဆိုတာကိုတော့ တရားဝင် သတင်းထုတ်ပြန်တာ မရှိသေးပါဘူး။
မန္တလေးတိုင်း မိုးကုတ်မြို့အနောက်ပိုင်းက ကျပ်ပြင်ရဲစခန်းကနေ မူးယစ်ဆေးတွေ ဖြန့်ဖြူးရောင်းချနေတာကြောင့် မတ် ၁၅ ရက်နေ့က ဝင်ရောက် ပစ်ခတ်တိုက်ခိုက်ခဲ့တာလို့ Red Wolves of Mogok အဖွဲ့ တာဝန်ရှိသူတဦးက ပြောပါတယ်။
“အနောက်ပိုင်းစခန်းကနေ မူးယစ်ဆေးတွေ ဖြန့်ဖြူးရောင်းချနေတယ်လို့ သတင်းရထားတာကြောင့် သတိပေးတဲ့အနေနဲ့ ပစ်ခတ်တိုက်ခိုက်ခဲ့တာ၊ ဆေးရောင်းတဲ့သူတွေကို ခြေရာခံတော့ စခန်းထဲကို ဝင်ထွက်သွားလာနေတာကို တွေ့နေရတယ်။”
မိုးကုတ်မြို့အတွင်းမှာ စစ်ကောင်စီတပ်က အာဏာသိမ်းပြီးနောက် မူးယစ်ဆေးသုံးစွဲသူတွေ ပိုမိုများလာပြီး ဓားပြတိုက်တာ၊ လုတာတွေ ဆက်တိုက်ဖြစ်နေတယ်လို့ ဒေသခံတွေက ပြောပါတယ်။
အမည်မဖော်လိုသူ ဒေသခံတဦးက “အခုက မူးယစ်ဆေးတွေကို တရားဝင်လို ရောင်းချနေကြတာ၊ ဖမ်းမယ့်သူကလည်း မရှိဘူးလေ၊ ရောင်းတဲ့နေရာတွေကလည်း အများကြီးပဲ၊ ခုဆို မိုးကုတ်တမြို့လုံးနီးပါး ဆေးတွေပျံ့နေတာ” လို့ ပြောပါတယ်။
မိုးကုတ်မြို့ရဲ့ ကျောက်မျက်လုပ်ကွက် တွင်းအဟောင်းတွေ၊ ဝင်ငွေရတဲ့နေရာတွေ၊ လုပ်ငန်းရှိတဲ့ နေရာတွေမှာ မူးယစ်ဆေးကို တွင်တွင်ကျယ်ကျယ် ရောင်းဝယ်နေကြတယ်လို့ ဆိုပါတယ်။
မူးယစ်ဆေးတွေက မိုးကုတ်မြို့ထဲကို လမ်းကြောင်း ၃ ကြောင်းနဲ့ ဝင်ရောက်နေပြီး မူးယစ်ဆေးတွေ ဖမ်းဆီးရမိနေတယ်လို့လည်း သိရပါတယ်။
မိုးကုတ်မြို့ ပင်တောင်ကျေးရွာအနီးမှာ ဖေဖော်ဝါရီ ၁၇ ရက်နေ့က ကားတစီးကို ရှောင်တခင် စစ်ဆေးရာမှာ မူးယစ်ဆေး ကျပ် ၂ ဘီလီယံကျော်ဖိုး ဖမ်းဆီးရမိခဲ့တယ်လို့ တအာင်းအမျိုးသားလွတ်မြောက်ရေးတပ်မတော် (TNLA) က ထုတ်ပြန်ထားပါတယ်။
မူးယစ်ဆေးတွေကို စစ်ကောင်စီတပ်က ဖမ်းဆီးတာတွေ ရှိနေပေမယ့် ဖမ်းမိသူတွေကို ပြန်လွှတ်ပေးနေတယ်လို့လည်း အမည်မဖော်လိုသူ ဒေသခံတဦးက ပြောပါတယ်။
“သူတို့က သတင်းရတယ်ဆိုပြီး ဖမ်းတယ်၊ မိပြီးရင် ပြန်လွှတ်တယ်၊ ပြီးရင် သူတို့က အဲ့ဆေးသမားတွေကို ထောက်လှမ်းရေးပုံစံနဲ့ ထားတယ်၊ ဆေးရောင်းသူတွေက ဖမ်းမိပြီးရင်လည်း ပြန်လွတ်တာပဲ။”
စစ်တပ်က အာဏာသိမ်းပြီးနောက်ပိုင်း မိုးကုတ်မြို့က ဒေသခံ ပြည်သူတွေအနေနဲ့ နေအိမ်တွေ ဓားပြတိုက်ခံရတာ၊ လုယက်ခံရတာတွေအပြင် မီးကွင်းပစ်ပြီး ပိုက်ဆံတောင်းခံရတာတွေ ကြုံတွေ့နေရပြီး ဘယ်အဖွဲ့က လုပ်ဆောင်နေတယ်ဆိုတာကို မသိရသေးပါဘူး။
ဖေဖော်ဝါရီ ၂၅ ရက်နေ့ကလည်း မိုးကုတ်မြို့ နန်းနွဲ့အနီးမှာ အသက် ၅၆ နှစ်အရွယ် ဂေါ်ရခါးလူမျိုး အမျိုးသမီးတဦး ရိုက်နှက်လုယက်ခံရပြီး သေဆုံးသွားတယ်လို့ ဒေသခံတွေဆီက သိရပါတယ်။
မန္တလေးတိုင်း မိုးကုတ်မြို့အနောက်ပိုင်း ကျပ်ပြင်ရပ်ပန်းမကျောက်သပိတ်ရပ်ကွက်က ဘိလိယက်ခုံကို မတ် ၁၆ ရက် ည ၉ နာရီလောက် စစ်ကောင်စီတပ်က ဝင်ရောက်ပစ်ခတ် ဖမ်းဆီးတာကြောင့် ၃ ဦး ကျည်ထိမှန်ခဲ့ပြီး ၅ ဦး ဖမ်းဆီးခံရတယ်လို့ ဒေသခံတွေက ပြောပါတယ်။
ဒေသခံတဦးက “ကြူခုံထဲကို သေနတ်နဲ့ရမ်းပစ်ပြီး ဖမ်းတာ၊ အနီးအနားအိမ်က မှန်တွေပါ ထိပြီး ကွဲတယ်၊ သေနတ်နဲ့ဝင်ပစ်ပြီး ဖမ်းတာဆိုတော့ ၃ ယောက် ကျည်ထိသွားတယ်” လို့ ပြောပါတယ်။
ဘိလိယက်ခုံထဲကို ဘာကြောင့် ဝင်ရောက် ပစ်ခတ်ဖမ်းဆီးတယ်ဆိုတာ မသိရသေးဘဲ ကျည်ထိမှန်သူတွေကတော့ ဆေးရုံမှာ ဆေးကုသမှု ခံယူနေရတယ်လို့ သိရပါတယ်။
မိုးကုတ်မြို့က ကျပ်ပြင်ရဲစခန်း တိုက်ခိုက်ခံရပြီးနောက် စစ်ကောင်စီတပ်က အနီးအနား ရပ်ကွက်တွေကို တအိမ်တက်ဆင်း လိုက်လံရှာဖွေခဲ့ပြီး နေအိမ်တခုအတွင်း ကျောက်မျက်တွင်းလုပ်ရာမှာသုံးတဲ့ ယမ်းတုံးမိတာကြောင့် ၁ ဦးကို ပစ်ခတ်ဖမ်းဆီးသွားတယ်လို့ နီးစပ်သူတဦးက ပြောပါတယ်။
"အိမ်ထဲမှာ ယမ်းတုံးမိလို့ဆိုပြီး ဖမ်းတာ၊ အဲ့အိမ်ကလူက စစ်တပ်ကလူတွေကို လေးခွနဲ့ ပစ်လိုက်တာ၊ စစ်သားတွေက ပြန်ပစ်တော့ နဖူးကိုထိသွားတယ်၊ သေမသေတော့ အတိအကျ မသိရသေးဘူး။"
စစ်ကောင်စီတပ်က မိုးကုတ်မြို့အရှေ့ပိုင်းမှာ စစ်ကားတွေနဲ့ တန်းစီလှည့်လည် စစ်ဆေးနေသလို အနောက်ပိုင်းမှာလည်း စစ်ဆေးမှုတွေ တင်းတင်းကျပ်ကျပ် လုပ်ဆောင်နေတယ်လို့ သိရပါတယ်။
မန္တလေးတိုင်း၊ မိုးကုတ်မြို့အနောက်ပိုင်း ကျပ်ပြင်ရဲစခန်းရှေ့ကနေ မတ် ၁၆ ရက် ည ၁၀ နာရီဝန်းကျင်က ဖြတ်သွားတဲ့ ဆိုင်ကယ်တစီး ပစ်ခတ်ခံရပြီးနောက် ဆိုင်ကယ်မောင်းနှင်လာသူ ၂ ဦး သေဆုံးခဲ့တယ်လို့ ဒေသခံတွေဆီက သိရပါတယ်။
အခင်းဖြစ်နေရာအနီး နေထိုင်သူတဦးက "ညဘက် မြို့ထဲမောင်းသွားတဲ့ ဆိုင်ကယ်တစီးအသံ ကြားတယ်၊ စခန်းပေါ်ကနေ ဆက်တိုက် သေနတ်နဲ့ပစ်တာ၊ စခန်းနားကို အကပ်မခံဘူး" လို့ ပြောပါတယ်။
စစ်ကောင်စီတပ်တွေက ညဘက် မိုးကုတ်မြို့အနှံ့ တအိမ်တက်ဆင်း လိုက်လံရှာဖွေ စစ်ဆေးပြီးနောက် လမ်းပေါ်တက်လာတဲ့ ဆိုင်ကယ်တွေ့ရင် ပစ်သတ်မယ်လို့ ခြိမ်းခြောက်သွားကြောင်း ဆိုပါတယ်။
ဒေသခံတဦးက "ကျောက်သပိတ်ထဲက ထွက်လာတဲ့ ဆိုင်ကယ်ကို လှမ်းပစ်တာ၊ ပစ်ပြီးတော့ ဒေါင့်ဆိုင်လမ်းမှာ ၂ ယောက်သေနေတာကို တွေ့တယ်" လို့ ပြောပါတယ်။
သေနတ်နဲ့ ပစ်ခတ်ခံရသူတွေက ကျောက်မျက်တွင်းလုပ်ကိုင်တဲ့ တွင်းသမားတွေဖြစ်ကာ ၃ ဦး စီးလာကာ ၂ ဦးသေဆုံးခဲ့တာလို့ သိရပါတယ်။
မိုးကုတ်မြို့မှာ မတ်လ ၁၅ ရက်နေ့ မနက်ပိုင်းက ကျပ်ပြင်ရဲစခန်း တိုက်ခိုက်ခံရပြီး စစ်ကောင်စီတပ်က ၃ ဦးသေဆုံးကာ ၂ ဦး ဒဏ်ရာရခဲ့တာကြောင့် စစ်ကောင်စီတပ်က လိုက်လံရှာဖွေ စစ်ဆေးနေတာတွေကို တင်းတင်းကျပ်ကျပ် လုပ်ဆောင်နေတယ်လို့ ဒေသခံတွေက ဆိုပါတယ်။
မိုးကုတ်မြို့မှာ ည ၈ နာရီကနေ မနက် ၄ နာရီအထိ ညမထွက်ရအမိန့် ထုတ်ပြန်ထားတာဖြစ်ပြီး အချိန်ကျော်လွန်ပြီး သွားပါက စစ်ကောင်စီတပ်က ပစ်ခတ်ဖမ်းဆီးနေတယ်လို့ ဆိုပါတယ်။
