မန္တလေးမြို့၊ ချမ်းမြသာစည်မြို့နယ် မနော်ဟရီလမ်း၊ ၁၁၀ လမ်းနဲ့ ၆၄ လမ်းထောင့်ရှိ ကမ္ဘောဇဘဏ်အနီးမှာ မေလ ၂ ရက် နေ့လယ် ၁ နာရီခွဲလောက်က  ဓားပြတိုက်ခံခဲ့ရမှု ဖြစ်ပွားခဲ့ပါတယ်။

ကမ္ဘောဇဘဏ်ကို လာတဲ့သူတယောက်ထံကနေ   လူ ၄ ယောက်က  Mark II အိမ်စီးကား တစီးနဲ့ ရောက်ပြီး ငွေကျပ် သိန်း ၁၀၀၀ လုယူသွားတာ ဖြစ်တယ်လို့ သိရပါတယ်။

အနီးပတ်ဝန်းကျင်ရှိ ပြည်သူ တဦးက  “ဘဏ်မှာ ငွေသွင်းလာတာလား။ ငွေထုတ်လာတာတော့ မသိဘူး။ ဖြစ်တာတော့ ဘဏ်နားမှာ ဖြစ်တာ။ လုတဲ့သူတွေမှာ သေနတ်တွေပါတယ်လို့တော့ ပြောသံကြားတယ်။ တချို့ကလည်း ကားကို တားစစ်တယ် ထင်နေကြတာ” လို့ ပြောပါတယ်။

ဒီနေ့ညနေပိုင်းမှာ စစ်ကောင်စီတပ်သားနဲ့ အရပ်ဝတ်လက်နက်ကိုင်တွေဟာ လမ်းဆုံလမ်းခွ နေရာတိုင်းမှာ ဆိုင်ကယ်၊ ကားတွေ ရပ်တန့် စစ်ဆေးနေကြပါတယ်။

ပြည်ပအလုပ်အကိုင်အေဂျင်စီတွေ သက်တမ်းတိုးလျှောက်ထားပါက ဘဏ်ငွေစုစာအုပ်မှာ ကျပ်သိန်း ၁၀၀၀ ရှိကြောင်း ပြသရမယ်လို့ အာဏာသိမ်းစစ်ကောင်စီ လက်အောက်ခံအလုပ်သမားဝန်ကြီးဌာနက ညွန်းကြားထားတယ်လို့ သိရပါတယ်။

မတ်လ ၁ ရက်ကစပြီး လိုင်စင်သက်တမ်းပြည့်တဲ့ ပြည်ပအလုပ်အကိုင်အေဂျင်စီတွေအနေနဲ့ လိုင်စင်သက်တမ်းတိုး လျှောက်ထားချိန်မှာ မန်နေဂျင်းဒါရိုက်တာတစ်ဦးတည်းအမည်နဲ့ ငွေကျပ်သိန်း ၁၀၀၀ ရှိကြောင်း ငွေစုစာအုပ်မိထ္ထူ၊ Bank Statement မူရင်းပူတွဲတင်ပြရမယ်လို့ ညွန်ကြားထားတာပါ။

ဒါ့အပြင် လိုင်စင်သက်တမ်းတိုးကတ်ကို ရုံးချုပ်မှာ လာရောက်ထုတ်ယူချိန် ဘဏ်စာအုပ်မူရင်း တပါတည်း ယူဆောင်လာဖို့နဲ့ အဲဒီကျပ်သိန်း ၁၀၀၀ ကို ကြားကာလမှာ သုံးစွဲခွင့်ရှိပြီး ထပ်မံသက်တမ်းတိုးလိုပါက တပ်တင်ပြရမယ်လို့ ဆိုပါတယ်။

ပြည်ပအလုပ်အကိုင်အေဂျင်စီတွေဟာ ပုံမှန်အာမခံကြေးကိုလည်း အလုပ်သမားရုံးမှာ ပေးသွင်းထားရသလို အခု စုငွေကျပ်သိန်း ၁၀၀၀ ပြသခိုင်းတဲ့အပေါ် အခက်တွေ့နေကြပါတယ်။

စစ်ကောင်စီအနေနဲ့ ဘဏ်ထဲငွေစီးဝင်ဖို့အတွက် အေဂျင်စီတွေကို အသုံးချအကျပ်ကိုင်တာလို့လည်း ပြည်ပအလုပ်အကိုင်အေဂျင်စီတွေက မှတ်ချက်ပြုပါတယ်။

“အလုပ်တွေရပ်ထားရတာလည်း ကြာနေပြီ။ ဒါကိုငွေစုစာရင်းပြခိုင်းတာ အဆင်မပြေဘူး။ သူတို့ဖြစ်ချင်တာကိုအတင်းဆွဲလုပ်နေတာ” လို့ အမည်မဖော်လိုသူ ပြည်ပအလုပ်အကိုင်အေဂျင်စီလုပ်ငန်းရှင်တစ်ဦးက ပြောပါတယ်။

ပြည်ပအလုပ်အကိုင်အေဂျင်စီတွေဟာ ၂၀၂၀ မတ်လကတည်းက ကိုဗစ်ကပ်ရောဂါကြောင့် ပြည်ပအလုပ်သမားစေလွှတ်တဲ့ လုပ်ငန်းတွေ ရပ်နားထားရတာပါ။