မကွေးတိုင်း၊ ဂန့်ဂေါမြို့နယ်အတွင်းက လမ်းပန်းဆက်သွယ်ရေးခက်ခဲတဲ့ စစ်ဘေးရှောင် စာသင်ကျောင်း ၁၅ ကျောင်းကို  အမျိုးသားညီညွတ်ရေးအစိုးရ ကြားကာလ ပညာရေးဝန်ကြီးဌာနနဲ့ မြို့နယ်ပအဖအဖွဲ့က နိုဝင်ဘာ ၂၀ ရက်မှာ ကျပ်သိန်း ၁၅၀ ထောက်ပံ့‌ခဲ့ပါတယ်။

ဂန့်ဂေါမြို့နယ်မှာ ကြားကာလကျောင်းပေါင်း ၈၆ ကျောင်းရှိတဲ့အနက် ကျောင်းသား ၅,၀၀၀ ကျော်ရှိတဲ့ ကျောင်း ၁၅ ကျောင်းကို ငွေကျပ်သိန်း ၁၅၀ ထောက်ပံ့ပေးခဲ့တာလို့ ဆိုပါတယ်။

NUG အစိုးရအနေနဲ့ အခက်အခဲအမျိုးမျိုးကြားကနေ ကြားကာလကျောင်း‌တွေကို ထောက်ပံ့ပေးတဲ့အတွက် ကျေးဇူးတင်ရှိကြောင်း၊ ကျန်ရှိနေတဲ့ ကျောင်းတွေကိုလည်း ဆက်လက်ထောက်ပံ့ပေးဖို့ မေတ္တာရပ်ခံတယ်လို့ ဂန့်ဂေါနယ်က ကြားကာလပညာရေးဘုတ်အဖွဲ့ တာဝန်ရှိသူတဦးက ပြောပါတယ်။

ထောက်ပံ့ကြေးပေးအပ်တဲ့ အခမ်းအနားကို မြို့နယ်ပညာရေးဘုတ်အဖွဲ့က တာဝန်ရှိသူတွေ၊ ပြည်သူ့အုပ်ချုပ်ရေးအဖွဲ့၊ ပြည်သူ့ကာကွယ်‌ရေးအဖွဲ့ဝင်တွေ၊ ဆရာ ဆရာမတွေနဲ့ ရပ်မိရပ်ဖတွေ တက်ရောက်ခဲ့ကြတယ်လို့‌ ပြောပါတယ်။

စစ်အာဏာရှင်စနစ်ဆန့်ကျင်​ရေး အာဏာဖီဆန်ရေးလှုပ်ရှားမှုမှာ ပါဝင်နေကြတဲ့ CDM သူရဲကောင်းဝန်ထမ်းအယောက် ၃၀၀ ကို We Pledge CDM အဖွဲ့က ငွေကျပ်သိန်း ၁၅၀ ထောက်ပံ့ပေးနိုင်ခဲ့တယ်လို့ ထုတ်ပြန်ပါတယ်။

ဒီအလှူငွေတွေကိုတော့ ပြီးခဲ့တဲ့ ဇွန် ၂၆ ရက်ကနေ ဇူလိုင် ၂ ရက်နေ့အထိ ကောက်ခံရရှိတဲ့ အလှူငွေတွေထဲက အမှန်တကယ်လိုအပ်နေတဲ့ CDM သူရဲကောင်းတွေကို CRPH ရဲ့ ထောက်ခံချက်နဲ့ We Pledge CDM အဖွဲ့က သေချာစိစစ်ပြီး ပြန်လည်ခွဲဝေ လှူဒါန်း ပေးခဲ့တာလို့ ဆိုပါတယ်။

   We pledge CDM ကတဆင့် လှူဒါန်းလိုက်တဲ့ အလှူငွေတွေ အကျိုးရှိတဲ့နေရာမှာ ထိုက်တန်စွာအသုံးချနေကြောင်းကို သိရှိပြီး ပီတိဖြစ်စေဖို့ ရည်ရွယ်ကာ “We Share To” အစီအစဉ်ကိုလည်း အပါတ်စဉ် စနေနေ့တိုင်း We Pledge CDM ရဲ့ ဖေ့စ်ဘွတ်ခ်စာမျက်နှာပေါ်မှာ တင်ပေးနေတာ ဖြစ်ပါတယ်။

ခုတခါ လှူဒါန်းလိုက်တဲ့ CDM သူရဲကောင်းတွေထဲမှာတော့ ပညာရေးဝန်ထမ်း ၁၂၇ ယောက်နဲ့ We pledge CDM ရဲ့ ဖေ့စ်ဘွတ်ခ် Messenger ကတဆင့် အကူအညီလာ ရောက်တောင်းခံသူ ၁၇၃ ယောက် ပါဝင်တယ်လို့ ဖော်ပြထားပါတယ်။

ဒါ့အပြင် စာရင်းသွင်းထားတဲ့ CDM ဝန်ထမ်းတွေ အလွန်များပြားတဲ့အတွက် စာ ရင်းပေးပြီး အလှူငွေ မရသေးသူတွေအနေနဲ့လည်း စိတ်ရှည်ရှည်နဲ့ စောင့်ပေးဖို့လည်း  မေတ္တာရပ်ခံထားပါတယ်။

လက်ရှိအချိန်ဟာ နွေဦးတော်လှန်ရေးရဲ့ ထောက်တိုင်သုံးခုဖြစ်တဲ့ CDM၊ PDF နဲ့ NUG တို့အတွက် အကူအညီအထောက်အပံ့တွေ အထူးလိုအပ်နေတဲ့ကာလဖြစ်နေပြီး တော်လှန်ရေး အရှိန်မြင့်လာတာနဲ့အမျှ တခြားထောက်တိုင်တွေနည်းတူ PDF လူငယ်တွေအတွက်လည်း အကူအညီတွေ အထူးလိုအပ်နေတယ်လို့ We pledge CDM က ပြောထားပါတယ်။