မွန်ပြည်နယ်၊ ကျိုက်ထိုမြို့နယ်၊ ဇီးပြောင်းကျေးရွာအုပ်စု၊ ကညင်အိုင်ကျေးရွာမှာ စစ်ကြောင်းထိုးလာတဲ့ စစ်ကောင်စီတပ်က ဒေသခံနေအိမ်နဲ့ တဲတွေကို မီးရှို့ဖျက်ဆီးသွားတယ်လို့ ကေအန်ယူ သထုံခရိုင်က ဇန်နဝါရီ ၂၅ ရက်မှာ ထုတ်ပြန်ပါတယ်။
တပ်အင်အား ၁၀၀ ကျော်ပါတဲ့ စစ်ကောင်စီစစ်ကြောင်းဟာ မနေ့ ဇန်နဝါရီ ၂၄ ရက်က ကညင်အိုင်ကျေးရွာထဲ ဝင်ရောက်လာပြီးနောက် ဒေသခံ ဦးလှိုင်ဝင်းရဲ့ နေအိမ်နဲ့ တဲ ၂ လုံးကို မီးရှို့ဖျက်ဆီးသွားခဲ့တာပါ။
ဒေသခံတွေ နေအိမ်တွေကို တိုက်ပွဲမရှိဘဲ မီးရှို့ဖျက်ဆီးသွားတဲ့ စစ်ကောင်စီတပ်ဟာ ကျိုက်ထိုမြို့နယ်အခြေစိုက် စစ်ကောင်စီ ခြေမြန်တပ်ရင်း ခမရ-၂၀၇ တပ်ရင်း ဖြစ်တယ်လို့ ကေအန်ယူက ဆိုပါတယ်။
လက်ရှိမှာတော့ အဲဒီစစ်ကြောင်းဟာ ဝင်းဒက်ကွင်းနဲ့ ကျောက်မိုင်းတွေဘက်မှာ ဝင်ရောက် တပ်စွဲထားတဲ့အတွက် နှစ်ဖက် စစ်ရေး ဆက်လက်တင်းမာနေတယ်လို့ သထုံခရိုင် PDF တာဝန်ခံ ကိုအေးမင်းထွန်းက ဒီဗွီဘီကို ပြောပါတယ်။
ကျိုက်ထိုမြို့နယ်မှာ ပြီးခဲ့တဲ့ရက်ပိုင်းကလည်း စစ်ကောင်စီတပ်ရင်းတွေကနေ လက်နက်ကြီး ပစ်ခတ်မှုကြောင့် ဝင်းကံ၊ ဇီးပြောင်း၊ ပျဉ်းကတိုးကုန်း၊ ခရွဲကျေးရွာအုပ်စုက ဒေသခံ ၃,၈၀၀ ကျော်ဟာ နေရပ်စွန့်ခွာ ထွက်ပြေးနေရတယ်လို့ သိရပါတယ်။
ကျိုက်ထိုမြို့နယ်မှာ စစ်ကောင်စီတပ်က လက်နက်ကြီးနဲ့ ရည်ရွယ်ချက်ရှိရှိ ပစ်ခတ်ခဲ့တာကြောင့် ဇန်နဝါရီ ၁ ရက်ကနေ ၂၃ ရက်အထိ အရပ်သား ၁ ဦး သေဆုံးပြီး ၁၀ ဦး ဒဏ်ရာရှိထားတယ်လို့ ကေအန်ယူ သထုံခရိုင်က ထုတ်ပြန်ထားပါတယ်။
မွန်ပြည်နယ်၊ ကျိုက်ထိုမြို့နယ်ထဲမှာ အကြမ်းဖက်စစ်ကောင်စီတပ်တွေနဲ့ KNLA ပူးပေါင်းတပ်ဖွဲ့တွေကြား တိုက်ပွဲဖြစ်ခဲ့ပြီး စစ်ကောင်စီဘက်က ၁၃ ဦးသေဆုံးကာ ၄ ယောက် ထိခိုက်ဒဏ်ရာရရှိခဲ့တယ်လို့ ကရင်အမျိုးသားအစည်းအရုံး (ကေအန်ယူ)က ထုတ်ပြန်ပါတယ်။
ဒီတိုက်ပွဲဟာ ပြီးခဲ့တဲ့ ဩဂုတ် ၁၉ ရက်ညနေ ၅ နာရီကျော်လောက်က ဖြစ်ပွားခဲ့တာဖြစ်ပြီး ကျိုက်ထိုမြို့နယ်၊ လက်ပံပင်ရွာအနီးမှာ နယ်မြေကျူးကျော်တပ်စွဲထားတဲ့ စစ်ကောင်စီတပ်ဖွဲ့ အင်အား ၁၀၀ လောက်နဲ့ KNLA ပူးပေါင်းတပ်တွေအကြားတိုက်ပွဲဖြစ်ပွားခဲ့တာလို့ ဆိုပါတယ်။
KNLAနဲ့ပူးပေါင်းတပ်ဖွဲ့တွေဘက်ကတော့ ထိခိုက်မှုမရှိပြန်လည်ဆုတ်ခွာနိုင်ခဲ့ကာ ပစ်ခတ်မှု ဖြစ်ပွားပြီးနောက် အဲဒီနေ့ညနေပိုင်းမှာပဲ အဆိုပါစစ်ကောင်စီတပ်က အနီးနားက ကျေးရွာတွေကို လက်နက်ကြီးတွေနဲ့ ပစ်ခတ်ခဲ့တာကြောင့် မဲရုံးလေး၊ လက်ပံပင်၊ ကျောက်ပုံ ကျေးရွာတွေက ရွာသူရွာသားတွေ ဘေးလွတ်ရာကို ထွက်ပြေးတိမ်းရှောင်နေရတယ်လို့လည်း ထုတ်ပြန်ချက်မှာ ဖော်ပြပါတယ်။
ကေအန်ယူ ကျိုက်ထိုမြို့နယ်အတွင်း စစ်ကောင်စီတပ်တွေ လက်နက်ကြီးရမ်းသန်းပစ်ခတ်မှုတွေ ကြောင့် လတ်တလောမှာ ဒေသခံ စစ်ဘေးရှောင်ဦးရေ ၂၂,၂၇၉ ယောက်အထိ ရှိလာခဲ့ပြီလို့ ဆိုပါ တယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ ခုခံစစ်ကို ဆင်နွှဲနေကြတာဖြစ်ပါတယ်။
အမျိုးသားညီညွတ်ရေးအစိုးရ (NUG) က နောက်ဆုံးထုတ်ပြန်ချက်မှာတော့ မြန်မာနိုင်ငံတဝန်း ပြည်သူ့ခုခံတော်လှန်စစ် အရှိန်မြှင့်နေပြီး ဇူလိုင် ၇ ရက်ကနေ ဩဂုတ် ၆ ရက်အထိ တစ်လတာကာလအတွင်း အကြမ်းဖက်စစ်ကောင်စီဘက်က ၂,၁၅၁ ယောက် သေဆုံးခဲ့တယ်လို့ ဆိုပါတယ်။
နိုင်ငံတဝန်း တိုက်ပွဲဖြစ်ပွားမှုအနေနဲ့ ကရင်ပြည်နယ်မှာ ၂၁၉ ကြိမ်၊ စစ်ကိုင်းတိုင်းမှာ ၂၀၂ ကြိမ်နဲ့ အများဆုံးဖြစ်ပွားခဲ့ပြီး ရန်ကုန်တိုင်းကတော့ ဗုံးပေါက်ကွဲမှု ၇၄ ကြိမ်နဲ့ အများဆုံးဖြစ်ခဲ့တယ်လို့ ထုတ်ပြန်ချက်မှာ ဖော်ပြပါတယ်။
Photo-KNU
