မွန်ပြည်နယ်၊ ကျိုက်ထိုမြို့နယ်၊ ကျိုက်ထီးရိုးတောင်တန်း၊ မြစိမ်းတောင်အနီးမှာ တောထဲ ဟင်းရှာသွားတဲ့ အရပ်သား အထမ်းသမားတစ်ဦး မြေမြှုပ်မိုင်းနင်းမိတာကြောင့် သေဆုံးသွားတယ်လို့ ဒေသခံတွေနဲ့ လူမှုကယ်ဆယ်ရေးအဖွဲ့တွေက ဒီဗွီဘီကို ပြောပါတယ်။

ကျိုက်ထီးရိုးဒေသခံ အသက် ၂၅ နှစ်အရွယ် ကိုခင်မောင်ထွေးဟာ ပြီးခဲ့တဲ့ မတ် ၂၁ ရက်နေ့ နေ့လယ်ပိုင်းက မြစိမ်းတောင်အနီး ပတ်ဝန်းကျင်မှာ မိသားစု စားဝတ်နေရေးအတွက် ပိန္နဲနဲ့ ဒူးရင်းသီးတွေ ရှာဖွေဖို့ ထွက်သွားခဲ့တာပါ။  

အဲဒီနောက် ကိုခင်မောင်ထွေး ပြန်မရောက်လာတာကြောင့် မတ် ၂၂ ရက်နေ့ ညနေပိုင်းက လိုက်လံရှာဖွေစဉ် မြေမြှုပ်မိုင်းထိပြီး သေဆုံးလျက် ပြန်လည်တွေ့ရှိခဲ့တာပါ။

မြေမြှုပ်မိုင်း နင်းမိတာကြောင့် ကိုခင်မောင်ထွေးဟာ ညာဘက်ခြေချင်းဝတ် ပြတ်လုနီးပါး ဒဏ်ရာရရှိပြီး သွေးထွက်လွန်ကာ သေဆုံးခဲ့ပါတယ်။

ကိုခင်မောင်ထွေးဟာ ကျိုက်ထီးရိုးတောင်ပေါ်မှာ အထမ်းသမားအဖြစ် လုပ်ကိုင်သူဖြစ်ပြီး ကလေးငယ် ၂ ဦးနဲ့ ဇနီး ကျန်ရှိခဲ့တယ်လို့ ဒေသခံတွေက ဆိုပါတယ်။

သေဆုံးသွားတဲ့ ကိုခင်မောင်ထွေးရဲ့ ရုပ်အလောင်းကို ဒေသခံတွေ အပါအဝင် လူမှုကယ်ဆယ်ရေးအဖွဲ့ အကူအညီနဲ့ ကင်းမွန်ချောင်းတိုက်နယ်ဆေးရုံသို့ ပို့ဆောင်ထားတယ်လို့ သိရပါတယ်။

ကျိုက်ထီးရိုးတောင်တန်း ပတ်ဝန်းကျင်ဟာ စစ်ကောင်စီတပ်အပြင် ကရင်အမျိုးသားအစည်းအရုံး KNU နဲ့ ပြည်သူ့ကာကွယ်ရေးတပ်ဖွဲ့ PDF တွေလည်း စစ်ရေးလှုပ်ရှားတာတွေ ရှိနေတာပါ။

ပြီးခဲ့တဲ့နှစ် မတ် ၈ ရက်နေ့ကလည်း ကျိုက်ထီးရိုးတောင်အနီး တောထဲဟင်းရှာသွားတဲ့ အသက် ၁၄ နှစ်အရွယ် လူငယ် တစ်ဦး မြေမြှုပ်မိုင်းမိခဲ့တာကြောင့် ပြင်းထန်ဒဏ်ရာရရှိထားခဲ့ပါတယ်။

မွန်ပြည်နယ်မှာတော့ စစ်တပ် အာဏာသိမ်းပြီးနောက် တကျော့ပြန် မြေမြှုပ်မိုင်း ပေါက်ကွဲမှုတွေကြောင့် အရပ်သား ၅ ဦးထက်မနည်း သေဆုံးထားသလို ဒဏ်ရာရသူ ၁၀ ဦးနီးပါးအထိ ရှိလာခဲ့တာပါ။

မွန်ပြည်နယ်၊ ကျိုက်ထိုမြို့နယ်၊ ကျိုက်ထီးရိုးတောင်ပေါ်မှာ စစ်ကောင်စီတပ် အင်အား ၁၀၀ လောက်နဲ့ လာရောက်တပ်စွဲထားတယ်လို့ ကျိုက်ထီးရိုးဒေသခံတွေနဲ့ တော်လှန်အင်အားစုတွေက ဒီဗွီဘီကို ပြောပါတယ်။

စစ်ကောင်စီတပ်ဟာ ကျိုက်ထီးရိုးတောင်ရှိ ကျီးကန်းပါးစပ်၊ မုဆိုးတောင်နဲ့ လေယာဉ်ကွင်းနေရာတွေမှာ ဇွန် ၁၃ ရက်ကစပြီး လာရောက်တပ်စွဲ နေထိုင်နေတာ ဖြစ်ပါတယ်။

ကျိုက်ထီးရိုးတောင်ပေါ်မှာ စစ်ကောင်စီတပ်က ဘာကြောင့် လာရောက်တပ်စွဲထားလဲဆိုတဲ့ အခြေအနေကို မသိပေမဲ့ စိုးရိမ်ထိတ်လန့်မှုတွေ ရှိနေတယ်လို့ ဒေသခံတွေက ပြောပါတယ်။

စစ်ကောင်စီတပ်က ကျိုက်ထီးရိုးတောင်ပေါ်မှာ လာရောက်တပ်စွဲပြီးနောက် ဇွန် ၁၄ ရက်က ကျိုက်ထီးရိုး တောင်တက်လမ်းပေါ်ရှိ ရသေ့တောင်ရဲကင်းစခန်း တိုက်ခိုက်ခံခဲ့ရပါတယ်။

အဲဒီရဲကင်းစခန်းကို ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းအဖွဲ့က သွားရောက်ပစ်ခတ်ခဲ့တာဖြစ်ပြီး ရဲတဦး သေဆုံးခဲ့တယ်လို့ ကျိုက်ထိုတော်လှန်ရေးအင်အားစု KRF တာဝန်ခံက ပြောပါတယ်။

ကျိုက်ထီးရိုးတောင်ပေါ်မှာတော့ စစ်ကောင်စီတပ်က မကြာခဏ လာရောက်တပ်စွဲ နေထိုင်လေ့ရှိပြီး အခုအခါမှာတော့ တပ်အင်အား ၁၀၀ လောက်ထိ အသုံးပြုလာတာ ဖြစ်ပါတယ်။

ဆံတော်ရှင် ကျိုက်ထီးရိုးစေတီဟာ နှစ်စဉ် ပြည်တွင်း၊ ပြည်ပ ဘုရားဖူး သန်းနဲ့ချီ လာရောက်ဖူးမြော်နေတာဖြစ်ပြီး စစ်တပ်အာဏာသိမ်းပြီးနောက် ဘုရားဖူးဝင်ရောက်မှု သိသိသာသာ ကျဆင်းနေပါတယ်။