ကရင်ပြည်နယ်၊ ကြားအင်းဆိပ်ကြီးမြို့နယ်၊ ကျိုက်ဒုံမြို့မရဲစခန်းကို KNLA ပူးပေါင်းတပ်ဖွဲ့က အောက်တိုဘာ ၂၉ ရက် ဒီနေ့မနက်ပိုင်းမှာ တိုက်ခိုက်သိမ်းပိုက်နိုင်ခဲ့တယ်လို့ KNLA သတင်းအရင်းမြစ်ထံက သိရပါတယ်။
ကျိုက်ဒုံမြို့မရဲစခန်းမှာ လုံခြုံရေးယူထားတဲ့ ရဲတပ်ဖွဲ့ဝင်တွေနဲ့ KNLA ပူးပေါင်းတပ်ဖွဲ့ဝင်တွေ စခန်းသိမ်းတိုက်ပွဲအနည်းငယ်ဖြစ်ပြီးနောက် ရဲတပ်ဖွဲ့ဝင်တွေ စခန်းကနေ ထွက်ပြေးသွားကာ ရဲတပ်ဖွဲ့တယောက် သေဆုံးသွားတာတွေ့ရတယ်လို့ တိုက်ပွဲမှာ ပါဝင်သူတစ်ဦးက ဒီဗွီဘီကို ပြောပါတယ်။
ကျိုက်ဒုံမြို့မရဲစခန်းသိမ်းတိုက်ပွဲကနေ ရဲစခန်းထဲရှိ စစ်လက်နက်သိုလှောင်ခန်းထဲက သေနတ် ကျည်ဆန်တွေနဲ့ စစ်အသုံးဆောင်ပစ္စည်းတွေ သိမ်းဆည်းနိုင်ခဲ့ပေမဲ့ အရေအတွက်ကိုတော့ အတည်ပြုလို့ မပြုရသေးပါဘူး။
အောက်တိုဘာ ၂၅ ရက်ကလည်း ကျိုက်ဒုံမြို့နဲ့ မနီးမဝေးရှိ စစ်ကောင်စီတပ်စခန်း တခုဖြစ်တဲ့ (ကွီလုံတိုင်) စခန်းကို KNLA ပူးပေါင်းတပ်က တိုက်ခိုက်သိမ်းပိုက်ခဲ့ပြီး စစ်ကောင်စီ တပ်သား ၃၀ လောက် အသေနဲ့ စစ်သုံ့ပန်းအဖြစ် ဖမ်းဆီးခံရသူတွေရှိခဲ့ကာ လက်နက် ၄၀ ကျော် သိမ်းဆည်းရမိခဲ့ပါတယ်။
