ကရင်ပြည်နယ်၊ ကျုံဒိုးမြို့နယ်မှာ ဧပြီ ၃ ရက်က ရိုးမဟာရွာ၊ မနီကုန်းအပိုင်းကို စစ်ကောင်စီတပ်က လက်နက်ငယ်တွေနဲ့ ပစ်ခတ်လို့ ကလေးငယ် ၁ ဦး ကျဉ်ဆန်ထိမှန် သေဆုံးခဲ့တယ် ဒေသခံတွေထံက သိရပါတယ်။
မနေ့ မနက် ၈ နာရီလောက်က စစ်ကောင်စီသားတွေဟာ တိုက်ပွဲမဖြစ်ဘဲ ကျေးရွာအတွင်းကို လက်နက်ငယ်တွေနဲ့ ပစ်ခတ် ဝင်ရောက်လာတာကြောင့် အိမ်ရှေ့ ဆိုင်ကယ်ပြင်ဆိုင်ထဲမှာရှိနေတဲ့ ကလေးငယ်တစ်ဦး ကျည်ထိမှန်သေဆုံးခဲ့တယ်လို့ ကျေးရွာသူတဦး ကပြောပါတယ်။
"ရွာထဲကိုဝင်လာတဲ့အချိန် သေနတ်တွေနဲ့ပစ်တော့ အကုန်လုံးကပြေးပုန်းကြတယ်။ ဘယ်တပ်ကမှန်းမသိလိုက်ဘူး။ ကလေးက အပြင်သွားနေတဲ့ သူ့အဖေကို ဆိုင်ထဲမှာ ထိုင်စောင့်နေရင်း စစ်ခွေးတွေက ရမ်းသန်းပစ်တော့ထိသွားတာ။”
ပစ်ခတ်မှုကြောင့် အသက် ၁၂ နှစ် အရွယ် စောဝေသာလီထွန်းဟာ ပေါင်မှာ ကျည်ထိမှန်ခဲ့တဲ့ ဒဏ်ရာကြောင့် ဆေးရုံကို ပို့ဆောင်ခဲ့ပေမဲ့ လမ်းမှာပဲ သေဆုံးသွားခဲ့ပါတယ်။
ဧပြီ ၂ ရက် ညနေ ၆ နာရီဝန်းကျင်မှာလည်း ငါးတိုင်ရေပူကျေးရွာကို ခမရ ၅၄၆ တပ်က လက်နက်ကြီးနဲ့ပစ်ခတ်လို့ အမျိုးသမီးကြီးတယောက် ဗိုက်မှာဒဏ်ရာရရှိခဲ့ပြီး ဆေးကုသမှုခံယူနေရပါတယ်။
ကရင်ပြည်နယ်မှာ ၂၀၂၁ ခုနှစ် မှ ၂၀၂၃ ခုနှစ် မတ်လအထိ စစ်ဘေးရှောင်ဦးရေ ၅ သိန်းကျော်ရှိပြီး တိုက်ပွဲအတွင်း ထိခိုက်ဒဏ်ရာရရှိသူ ၈၄၁ ဦးနဲ့ သေဆုံးသူ ၅၂၂ ဦးထိ ရှိလာပြီးဖြစ်တယ်လို့ Karen Women’s Organization−KWO ရဲ့ စာရင်းတွေအရ သိရပါတယ်။
ပြီးခဲ့တဲ့ရက်ပိုင်းက တိုက်ပွဲပြင်းထန်ဖြစ်ပွားခဲ့တဲ့ ကရင်ပြည်နယ်၊ ကော့ကရိတ်ခရိုင်၊ ကျုံဒိုးမြို့နယ်ထဲက မီးပုံပွဲကွင်းမှာ ဒေသတွင်း ရိုးရာပွဲတော်ဖြစ်တဲ့ မီးပုံပွဲကို ဖေဖော်ဝါရီ ၁ ရက်ကနေ စတင်ကျင်းပဖို့ ပြင်ဆင်နေတယ်လို့ ပွဲစီစဉ်သူတွေက ပြောပါတယ်။
အဲဒီလို မီးပုံပွဲမကျင်းပခင် မီးပုံတိုင်ထူပွဲကို ဇန်နဝါရီ ၂၈ ရက်မှာ ကျင်းပခဲ့ပြီး မီးပုံပွဲကိုတော့ ဖေဖော်ဝါရီ ၁ ရက်ကနေ ၄ ရက်နေ့ထိ ၄ ရက် ကျင်းပသွားမှာဖြစ်ကာ အခုကျင်းပတာက ၁၉၇ ကြိမ်မြောက် ရှိပြီဖြစ်တယ်လို့လည်း ဆိုပါတယ်။
နယ်မြေအေးချမ်းတည်ငြိမ်မှုမရှိတဲ့အချိန်မှာ အခုလို ပွဲကျင်းပတာကို ဝေဖန်မှုတွေရှိနေပေမဲ့ ရှေးအစဉ်အဆက်က ပြုလုပ်လာခဲ့တာဖြစ်သလို မီးပုံပွဲ မကျင်းပနိုင်တဲ့နှစ်မှာ ဘေးအန္တရာယ်အမျိုးမျိုး ဖြစ်လာမယ်လို့ ဟိုးအရင်တည်းက အယူရှိတဲ့အတွက် အခုလို ကျင်းပဖြစ်တာလို့လည်း ပွဲစီစဉ်သူက ပြောပါတယ်။
မီပုံပွဲကို ဓမ္မသုခကျောင်း (ရသေ့ကျောင်း) ဆရာတော်ကြီးက အဓိက ဦးဆောင်ကျင်းပတာ ဖြစ်ပြီး ဒကာတွေ၊ ရွာသူရွာသားတွေနဲ့ အဖွဲ့အစည်းတချို့က နိုင်တဲ့ဘက်က လာရောက်ဝိုင်းဝန်းကူညီကြပြီး လုံခြုံရေးကိုလည်း ဝိုင်းဝန်းလုပ်ဆောင်ကြတယ်လို့ သိရပါတယ်။
ပြီးခဲ့တဲ့ရက်ပိုင်းက ကျုံဒိုးမြို့နယ်ထဲမှာ စစ်ကောင်စီနဲ့ KNLA လက်အောက်ခံ ပူးပေါင်းတပ်တွေ တိုက်ပွဲ ပြင်းပြင်းထန်ထန် ဖြစ်ပွားခဲ့ပြီး စစ်ကောင်စီက နေအိမ်တွေကို မီးရှို့ဖျက်စီးခဲ့လို့ ဒေသခံပြည်သူ ၁၀,၀၀၀ ကျော် နေရပ်စွန့်ခွာ ထွက်ပြေးနေကြရပါတယ်။
