ကျူးဘားနိုင်ငံမှာ ဆန္ဒပြပွဲအများအပြားကို ဦးဆောင်ခဲ့တဲ့ အနုပညာရှင်များအဖွဲ့ဖြစ်တဲ့ ဟာဗားနား အခြေစိုက် ဆန်-အစ်စီဒရို လှုပ်ရှားမှုမှာ ထင်ရှားတဲ့ ထိပ်တန်းအနုပညာရှင်-အတိုက်အခံ နှစ်ယောက်ကို ဇွန် ၂၄ ရက်က ကျူးဘားတရားရုံးတခုကနေ နှစ်ချီကြာရှည်တဲ့ ထောင်ဒဏ်တွေ ချမှတ် လိုက်ပါတယ်။
တက်ကြွလှုပ်ရှားသူ အော်တီရို အလ်ကန်တာရာက နိုင်ငံတော်အလံကို အသရေဖျက်မှု၊ အများပြည်သူ မထီမဲ့မြင်ပြုမှုနဲ့ အများပြည်သူ မငြိမ်သက်အောင် လုပ်ဆောင်မှုတို့နဲ့ ထောင်ဒဏ် ၅ နှစ် ချမှတ်ခံခဲ့ရပြီး မေကဲလ် ကက်စ်တီလို ကတော့ အလားတူ ရာဇ၀တ်မှုတွေအပြင် တခြားကျူးလွန်မှုတွေအတွက် ထောင်ဒဏ် ၉ နှစ် ချမှတ်ခံခဲ့ရတာဖြစ်ကြောင်း ကျူးဘားအစိုးရ ရှေ့နေရုံးရဲ့ ဇွန် ၂၄ ရက် ထုတ်ပြန်ချက်အရ သိရပါတယ်။
နိုင်ငံခြားသတင်းထောက်တွေ၊ လူ့အခွင့်အရေးအဖွဲ့တွေေနဲ့ သံတမန်တွေကို တရားခွင်သို့ တက်ရောက်ခွင့် ပိတ်ပင်ထားပါတယ်။
ဇွန် ၂၄ ရက်က နိုင်ငံပိုင်မီဒီယာဟာ တရားခွင်မှာ ဖော်ပြထားတဲ့ အထောက်အထား တချို့ကို အသေးစိတ်ဖော်ပြခဲ့ပြီး သူတို့ ၂ ဦးရဲ့လုပ်ရပ်တွေအတွက် မျှတတဲ့ တရားစီရင်မှု လို့ ဆိုပါတယ်။
ဒီပြစ်ဒဏ်ချမှတ်တာတွေက အဓိပ္ပာယ်မရှိတဲ့ လုပ်ရပ်လို့ လူ့အခွင့်အရေးအဖွဲ့တွေရဲ့ စွပ်စွဲချက်တွေ ကို ပယ်ချခဲ့ပါတယ်။
ပြီးခဲ့တဲ့ ဇူလိုင်လက အစိုးရဆန့်ကျင်ရေး ဆန္ဒပြပွဲတွေအပြီးမှာ ကျူးဘားအစိုးရဟာ ဖိနှိပ်မှုတွေကို အရှိန်မြှင့် လုပ်ဆောင်ခဲ့ကြောင်း လူ့အခွင့်အရေးအဖွဲ့တွေက ပြောပါတယ်။
နိုင်ငံတကာလွတ်ငြိမ်းချမ်းသာခွင့်အဖွဲ့က သူတို့ ၂ ဦးကို “ယုံကြည်ချက်ကြောင့် အကျဉ်းကျသူများ” လို့ ခေါ်ဆိုခဲ့ပါတယ်။
အော်တီရို အလ်ကန်တာရာနဲ့ ကက်စ်တီလို တို့ရဲ့ ဆန်-အစ်စီဒရို လှုပ်ရှားမှုဟာ အမေရိကန်က ညွှန်ကြားထားတဲ့ အပျော့စား အာဏာသိမ်းမှုရဲ့ တစိတ်တပိုင်း ဆိုပြီး ကျူးဘားနိုင်ငံပိုင်မီဒီယာက အရင်က ခေါ်ဆိုထားပေမယ့် အတိုက်အခံ အနုပညာရှင် နှစ်ယောက်ကတော့ စွဲချက်တွေကို ငြင်းဆန်ထားပါတယ်။
သူတို့နှစ်ဦးဟာ သူတို့ရဲ့ ပြစ်ဒဏ်တွေကို အယူခံဝင်ဖို့ ၁၀ ရက် အချိန်ရတယ် လို့ နိုင်ငံပိုင်မီဒီယာက ကြေညာခဲ့ပါတယ်။
