တိုက်ဖွန်းမုန်တိုင်း နမ္မဒေါဟာ ဂျပန်နိုင်ငံရဲ့ တောင်ဘက်အကျဆုံး ကျူရှူးကျွန်းကို စက်တင်ဘာ ၁၈ ရက်က ဝင်ရောက် တိုက်ခတ်ခဲ့တယ်လို့ ဂျပန်မိုးလေဝသအေဂျင်စီ (JMA) က သတိပေးချက် ထုတ်ပြန်ထားပါတယ်။

မုန်တိုင်းရာသီရဲ့ ၁၄ ခုမြောက် တိုက်ဖွန်းမုန်တိုင်းဟာ ကျူရှူးကျွန်းဆီ ချဉ်းကပ်လာချိန်မှာ အားပျော့သွားပေမယ့် စံချိန်တင်မိုးရွာနိုင်ပြီး မြစ်ရေလျှံမှုအန္တရာယ်ကို JMA က သတိပေးထားပါတယ်။

တိုက်ဖွန်းမုန်တိုင်းကြောင့် မီယာဇာခိစီရင်စုမှာရှိတဲ့ ဘတ်စ်ကား မှတ်တိုင်ကို ပြုတ်ကျပြီး ကာဂိုရှီးမားခရိုင်က ပါချင်ကိုဆိုင်ရဲ့ ပြတင်းပေါက်တွေ ပြုတ်ကျခဲ့တာ အပါအဝင် ကျူရှူး တောင်ပိုင်းမှာ ပျက်စီးဆုံးရှုံးခဲ့တယ်လို့ အများပြည်သူပိုင်ရုပ်သံ NHK က ပြောပါတယ်။

မီးရထား အော်ပရေတာတွေနဲ့ လေကြောင်းလိုင်းတွေဟာလည်း ဝန်ဆောင်မှုတွေကို ဖျက်သိမ်းခဲ့ပါတယ်။

စတိုးဆိုင်လုပ်ငန်းစု Seven-Eleven Japan ကလည်း စတိုးဆိုင်ပေါင်း ၉၅၀ လောက်ကို ယာယီပိတ်ထားခဲ့ပါတယ်။

မုန်တိုင်းဟာ အရှေ့ဘက်ကွေ့လာပြီး ဂျပန်နိုင်ငံရဲ့ အဓိကကျွန်းဖြစ်တဲ့ ဟွန်ရှူးကျွန်းဆီကို ဖြတ်ကျော် ဝင်ရောက်မယ်လို့လည်း ခန့်မှန်းထားပါတယ်။ 

စက်တင်ဘာ ၂၁ ရက်မှာ ပင်လယ်ပြင်ဆီကို ရွေ့လျားမယ်လို့လည်း ခန့်မှန်းရပါတယ်။  ရေကြီးလို့ တိုဇာ့အိ မြေအောက်ရထားလိုင်းကို ဆိုင်းငံ့ထားရပါတယ်။ မြို့တော် တိုကျိုမှာတော့ မိုးသည်းသည်း ထန်ထန် ရွာနေပါတယ်။  

ဂျပန်၊ အမေရိကန်နဲ့ ပြင်သစ်တို့ ဂျပန်နိုင်ငံ တောင်ပိုင်းက ကျူရှူးကျွန်းမှာ မေ ၁၅ ရက်က အတူပူးတွဲ စစ်ရေးလေ့ကျင့်မှု ပြုလုပ်ခဲ့ကြပါတယ်။ 

မီယာဇာကီ စီရင်စုနယ်၊ ခိရိရှိမား လေ့ကျင့်ရေးကွင်းမှာလုပ်တဲ့ ၃ ပွင့်ဆိုင် စစ်ရေးလေ့ကျင့်မှုထဲမှာ ဂျပန်မြေပြင်ကာကွယ်ရေးတပ်ရဲ့ သယ်ယူပို့ဆောင်ရေး ရဟတ်ယာဉ်ကနေ ပြင်သစ်စစ်တပ် ဆင်းလာပြီးတော့ တပ်ဖွဲ့တွေ စုပေါင်းပြီး မိုးသည်းသည်းထဲမှာ လေ့ကျင့်ရေးလုပ်ကြပါတယ်။ 

ဂျပန်နိုင်ငံတဝှမ်းမှာ အဟန့်အတားနဲ့ တုံ့ပြန်မှုစွမ်းရည် ပိုအားကောင်းဖို့နဲ့ အင်ဒို-ပစိဖိတ်ဒေသတွင်း တည်ငြိမ်အေးချမ်းရေးအတွက် ဒီ ၃ နိုင်ငံ ပူးတွဲစစ်ရေးလေ့ကျင့်မှုဟာ မလုပ်မဖြစ်တဲ့ အလွန်ကို အဓိပ္ပာယ်ရှိတဲ့ လေ့ကျင့်မှုပါလို့ ဂျပန်မြေပြင်ကာကွယ်ရေးတပ်ဖွဲ့က ဗိုလ်မှူးကြီး မာဆာရှီ ဟီရာကီက ပြောပါတယ်။ 

 ဂျပန်နဲ့ မဟာမိတ်အမေရိကန်တို့ဟာ အတူတကွ ပုံမှန်လေ့ကျင့်လေ့ရှိပြီး ပြင်သစ်စစ်တပ်က ဂျပန်လေ့ကျင့်မှုမှာ ပထမဆုံးအကြိမ်အဖြစ် ပါဝင်လာတာပါ။ 

ဒီကမ္ဘာမှာ ဝေမျှနေထိုင်သူအချင်းချင်း အတူရင်ဘောင်တန်း ရှိနေဖို့ လိုတယ်လို့ ပြင်သစ်စစ်တပ်က ဒုဗိုလ်မှူးကြီး ဟင်နရီမာစီလူးက ပြောပါတယ်။

 ပြင်သစ်နဲ့ ကာကွယ်ရေးဆိုင်ရာ ပူးပေါင်းဆောင်ရွက်မှုကို ပိုမိုနက်ရှိုင်းစေခြင်းအားဖြင့် ဂျပန်ဟာ အရှေ့ပင်လယ်နဲ့ တောင်တရုတ်ပင်လယ်တို့မှာ တရုတ်ရဲ့ အခိုင်အမာ ပြောဆို လုပ်ကိုင်နေခြင်းအပေါ် အဟန့်အတားဖြစ်စေဖို့ ရည်ရွယ်ပုံရတယ်လို့ ဂျပန် Nikkei သတင်းစာကဖော်ပြခဲ့ပါတယ်။ 

စနေနေ့ကပြုလုပ်တဲ့ စစ်ရေးလေ့ကျင့်မှုမှာ နိုင်ငံသုံးနိုင်ငံမှ စစ်သားစုစုပေါင်း ၂၂၀ ပါဝင်ခဲ့ပြီး ဝေးလံခေါင်သီတဲ့ကျွန်းတွေကို ကာကွယ် စောင့်ရှောက်နေတယ်ဆိုတဲ့ အခြေအနေကို ပြနေတာပါ။

 ဒီ ၃ နိုင်ငံအပြင် ဩစတြေးလျရေတပ်ကလည်း အရှေ့တရုတ်ပင်လယ်က ပူးတွဲစစ်ရေး လေ့ကျင့်မှုမှာ ပါဝင်နေပါတယ်။