တိုင်းပြည်မှာ ငွေသားပြတ်လပ်နေတာကြောင့် လျှပ်စစ်မီးပြဿနာအတွက် အမြန်ဖြေရှင်းပေးနိုင်ခြင်း မရှိကြောင်း ဇူလိုင် ၁၈ ရက်မှာ ကျူးဘားအစိုးရက ဝန်ခံပြောကြားလိုက်ပါတယ်။

ကျူးဘားကျွန်းနိုင်ငံမှာ လက်ရှိ လျှပ်စစ်ဓာတ်အား လိုအပ်ချက်က ကျော်လွန်များပြားနေတယ်လို့ စွမ်းအင်နဲ့ သတ္တုတွင်းဝန်ကြီး လီဗန်အာရွန်တီခရုဇ်က ဇူလိုင် ၁၈ ရက်က ရှင်းပြပြောဆိုခဲ့ပါတယ်။

ရန်ပုံငွေနည်းပါးမှုကြောင့် ပြုပြင်ထိန်းသိမ်းမှုကို ရွှေ့ဆိုင်းထားရတဲ့ ကျူးဘားနိုင်ငံရဲ့ သက်တမ်းလွန် ဓာတ်အားပေးစက်ရုံပေါင်း ၂၀ မှာ ပြိုကျပျက်စီးမှုတွေအပြင် ဒီနှစ်မှာ မီးစက် ၂ လုံး မီးလောင်သွားမှုတွေကြောင့် ပူပြင်းတဲ့ နွေလတွေနဲ့ နောက်နှစ်တွေအထိ မီးပြတ်နိုင်ခြေကို အဆုံးသတ်မယ်ဆိုတဲ့ မျှော်လင့်ချက်တွေ ပြိုကျသွားရကြောင်း ဝန်ကြီးက ပြောပါတယ်။ 

နေ့စဉ် မီးပျက်တာ လေးနာရီအထိ ကြာနိုင်ပြီး ဒါဟာ ပုံမှန်ဖြစ်သွားနိုင်ပါတယ်။ ရာသီဥတု ပူပြင်းရတဲ့ကြားထဲ ရေရှည်မီးပျက်ဒဏ် ခံစားနေရတဲ့ ကျူးဘားနိုင်ငံသားတွေ စိတ်မသက်မသာ ဖြစ်ကုန်ကြရပါတယ်။ 

ကျူးဘားဟာ လောင်စာဆီရဲ့ ၅၀ ရာခိုင်နှုန်းကျော်ကို တင်သွင်းနေပြီး အများစုကို ဗင်နီဇွဲလားကနေ တင်သွင်းပါတယ်။

လျှပ်စစ်ဓာတ်အားရဲ့ ၅ ရာခိုင်နှုန်းလောက်ဟာ တခြားအရင်းအမြစ်တွေက လာပါတယ်။ ဓာတ်အားပြတ်တောက်မှုဟာ ၂၀၁၉ ခုနှစ်က ပြင်းထန်တဲ့ အမေရိကန် ပိတ်ဆို့အရေးယူမှု အသစ်တွေနဲ့ စတင်ခဲ့ပြီး  ကပ်ရောဂါနဲ့အတူ အခု ရုရှားရဲ့ ယူကရိန်းကို ကျူးကျော်မှုတွေကြောင့် နက်ရှိုင်းနေတဲ့ စီးပွားရေးအကျပ်အတည်းက ပိုပြီးဆိုးရွားလာပါတယ်။

Photo- Reuters

နိုဝင်ဘာ ၁၈ က ကျင်းပတဲ့ ၂၀၂၁ ခုနှစ် လက်တင်ဂရမ်မီဆုပေးပွဲမှာ တနှစ်တာအတွက် အကောင်းဆုံးသီချင်းဆုကို ကျူးဘားအစိုးရဆန့်ကျင်ရေး ဆန္ဒပြလှုပ်ရှားမှုရဲ့ နိုင်ငံတော်သီချင်းဖြစ်လာတဲ့ ပါထရီယာ-အီ- ဗီဒါ အမည်ရှိ တော်လှန်ရေး ဟစ်ဟော့ပ်သီချင်း  ဆွတ်ခူးရရှိသွားပါတယ်။ 

ရက်ဂေတန် ၂ ယောက်တွဲ အကဂီတအဖွဲ့ဖြစ်တဲ့ ဂျန်းတဲ-ဒယ်-ဇိုးနား ၊ နာမည်ကျော် ဟစ်ဟော့ဂီတအဖွဲ့ အိုရီးရှပ်စ်စ် အဖွဲ့မှ ယော့ချွယ်လ်နဲ့ အဆိုတော် တေးရေးဆရာ ဒယ်ဆယ်မဲရ်-ဘွေနို တို့အပြင် ကျူးဘားအတိုက်အခံ အနုပညာရှင်တွေက ရက်ပ်ပါနှစ်ဦးဖြစ်တဲ့ မိုက်ကဲလိုဆိုဘို နဲ့ အလ်ဖှန်းကီ တို့က ဒီသီချင်းကို ပူးပေါင်း သီဆိုဖျော်ဖြေ တင်ဆက်ခဲ့ပါတယ်။ 

အနုပညာရှင် တယောက်စီတိုင်းဟာ သီချင်းစာသား စကားလုံးတွေကို နာကျင်မှုတွေ၊ ဒေါသတွေ၊ မျှော်လင့်ချက်တွေ၊ စိတ်အားထက်သန်မှုတွေပါ ထည့်သွင်း ပေါက်ကွဲသီဆိုခဲ့ကြပါတယ်။

သီချင်းစာသားတွေထဲမှာ အတွေးအခေါ်ပိုင်းဆိုင်ရာ သည်းမခံနိုင်မှု၊ အစားအစာပြတ်လပ်မှုနဲ့ ကျွန်းပေါ်မှာ အနာဂတ်ပျောက်နေတဲ့ကျူးဘားလူငယ်တွေ ထွက်ခွာသွားမှုတွေကို ရည်ညွှန်းစပ်ဆို ထားပါတယ်။  ဒီသီချင်းဟာ တစ်နှစ်တာအကောင်းဆုံး မြို့ပြသီချင်းဆုကိုလည်း ရရှိခဲ့ပါသေးတယ်။ 

အမိမြေနဲ့ဘဝလို့ အဓိပ္ပာယ်ရတဲ့ ဒီသီချင်းဟာ ငါ့နိုင်ငံအတွက်၊ လွတ်လပ်စွာ ထုတ်ဖော်ခွင့်နဲ့ ကျူးဘားတွေရဲ့ လွတ်လပ်မှုအတွက်ပဲလို့ တေးသံရှင် ဘွေနိုက အကောင်းဆုံး မြို့ပြသီချင်းဆုကို လက်ခံရရှိပြီးနောက်မှာ ပြောကြားခဲ့ပါတယ်။ 

အစိုးရမီဒီယာတွေကတော့ ဒီသီချင်းဟာ ကျူးဘားရဲ့အဖြစ်မှန်ကို လွဲမှားစေတယ်လို့ ပြောဆိုကြပြီး တာဝန်ရှိသူတွေကတော့ နိုင်ငံရဲ့ စီးပွားရေး အကြီးကျယ် မပြေလည်မှုတွေကို စစ်အေးခေတ် အမေရိကန် ပိတ်ဆို့မှုအပေါ် ပြစ်တင်ပြောဆိုကြပါတယ်။  

ပါထရီယာ-အီ- ဗီဒါ သီချင်းဟာ နောက်ပိုင်းမှာ နိုဝင်ဘာ ၁၅ ရက် ပြုလုပ်ဖို့စီစဉ်ထားတဲ့ ဆန္ဒပြပွဲတွေအတွက် လူထုအော်သံတခု ဖြစ်လာခဲ့ပါတယ်။