ကချင်ပြည်နယ်ဖားကန့်ဒေသမှာ ကျောက်စိမ်းရိုင်းတူးဖော်တဲ့ လုပ်ငန်းတွေကို ဆက်လက်တူးဖော် ထုတ်လုပ်ခွင့် မပြုတော့ဘူးလို့ စစ်ကောင်စီက အမိန့်စာထုတ်ပြန်ခဲ့ပေမဲ့ မြေပြင်မှာတော့ စက်ယန္တရားတွေ အလုံးအရင်းနဲ့ တရားမဝင်တူးဖော်နေမှုတွေရှိနေဆဲပဲလို့ ဒေသခံတွေက ပြောကြပါတယ်။

သားစဉ်မြေးဆက်တူးဖော်စားသောက်နိုင်ရန်ဖို့ဆိုပြီး စစ်ကောင်စီလက်အောက်ခံ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက လုံးခင်း၊ ဖားကန့်ရတနာ နယ်မြေအပါအဝင် မော်လူး-မော်ဟန်ဒေသမှာရှိတဲ့ ကျောက်မျက်ရတနာအရိုင်း တူးဖော်တဲ့လုပ်ငန်းတွေကို ဆက်လက်လုပ်ကိုင်ခြင်းမပြုဖို့  ဧပြီလ ၁ ရက်က ထုတ်ပြန်ထားတာပါ။

အခုလိုအမိန့်မျိုးကို အာဏာသိမ်းစစ်ကောင်စီလက်ထက်မှာ  ထုတ်ပြန်ခဲ့တာဟာ နှစ်ကြိမ်ရှိပြီ ဖြစ်ပြီး အာဏာသိမ်းပြီးခါစ  ၂၀၂၁ ခုနှစ်ကလည်း တစ်ကြိမ်ထုတ်ခဲ့ပါတယ်။  

အဲဒီလိုစစ်ကောင်စီဘက်က အမိန့်တွေ အကြိမ်ကြိမ်ထုတ်ပြန်နေပေမဲ့ ဖားကန့်ရတနာနယ်မြေမှာတော့ တရားမဝင်ကျောက်စိမ်းတူးဖော်တဲ့လုပ်ငန်းတွေကို စက်ယန္တယားကြီးတွေ အမြောက်အမြားအသုံးပြုပြီး ဆက်လက် လုပ်ကိုင်နေဆဲဖြစ်တယ်လို့ ဒေသခံတွေက ပြောပါတယ်။

ကျောက်စိမ်းတူးဖော်ရေးလုပ်ငန်းတွေကို  စစ်ဗိုလ်ချုပ်အဟောင်း၊ အသစ်တွေရဲ့ မိသားစုဆွေမျိုးအသိုက်အဝန်း ကုမ္ပဏီတွေ၊   ကေအိုင်အိုစစ်ဗိုလ်ချုပ်သားသမီးတွေ၊ သူတို့နဲ့နီးစပ်သူတွေရဲ့ ကုမ္ပဏီတွေ၊  ‘ဝ’ ကုမ္ပဏီတွေဖြစ်တဲ့ မြန်မာတကောင်း၊ တစ်သုံးလုံး၊ နေမင်းကမ္ဘာ (သံလွင်တောင်တန်း) ၊ KNDPC စတဲ့ကုမ္ပဏီတို့က အများစုလုပ်ကိုင်နေပြီး စစ်ကောင်စီလက်အောက် နယ်မြေခံတပ်ကို လစဉ်ကြေးပေးသွင်းကာ လုပ်ကိုင်နေကြတာလို့ ဒေသခံတွေကပြောပါတယ်။

ဖားကန့်ရတနာနယ်မြေမှာရှိတဲ့ ကျောက်စိမ်းလုပ်ကွက်အားလုံးဟာ ၂၀၂၁ ခုနှစ်ကတည်းက လိုင်စင်သက်တမ်းကုန်ဆုံးခဲ့တာဖြစ်ပြီး အခုအခါ အဆိုပါသက်တမ်းကုန် လုပ်ကွက်တွေပေါ်မှာ တရားမဝင်ကျောက်စိမ်းတူးဖော်မှုတွေ ဆက်လက်လုပ်ကိုင်နေတာဖြစ်ပါတယ်။   

တရားမဝင်ကျောက်စိမ်းတူးဖော်မှုလုပ်ငန်းတွေ ကြောင့် မြေစာပုံပြိုကျတာ၊  နွံကန်ပွင့်ကျတာ အပါအဝင် လုပ်ငန်းခွင်အန္တရာယ်ကျရောက်မှုကြောင့် လူတွေသေဆုံးခဲ့ရာ မကြာခဏဖြစ်ပေါ်ခဲ့ ပါတယ်။

ဖားကန့်မှာ လူအစုလိုက်အပြုံလိုက်  သေဆုံးမှုတွေဖြစ်ခဲ့ပေမယ့် တရားဝင်ကျောက်စိမ်းတူးဖော်မှု လုပ်ငန်းတွေကို ဒီနေ့အချိန်ထိ ထိန်းချုပ်နိုင်တာမရှိဘူးလို့ ဒေသခံတွေက ပြောပါတယ် ။ 

စစ်ကောင်စီက အမိန့်စာတွေထုတ်ပြန်နေပေမဲ့  မြေပြင်မှာတော့ နိုင်ငံတော်နဲ့ အကျိုးတူလုပ်ခဲ့ကြတဲ့ ခေတ်ကလို စက်ယန္တရားကြီးတွေအလုံးအရင်းအရင်းနဲ့ နေ့ရောညပါ တရားမဝင်တူးဖော်ခဲ့ကြတာကြောင့်  အချိန်တိုအတွင်းမှာ ကျောက်စိမ်းတောင်တွေ ကုန်ဆုံးနေပြီလို့  ဒေသခံတွေက ပြောပါတယ်။

ဖားကန့် ရတနာမြေမှာ စစ်အစိုးရအဆက်ဆက်  စစ်ဗိုလ်ချုပ်တွေနဲ့ မိသားစုဆွေမျိုးအသိုက်အဝန်းရဲ့ ကုမ္ပဏီတွေ၊ စစ်တပ်နဲ့ ဆက်နွှယ်တဲ့ ကုမ္ပဏီတွေ၊ ခရိုနီသူဌေးတွေက နှစ်ပေါင်းများစွာ စက်ယန္တရားကြီးတွေနဲ့ ကျောက်မျက်တွေ တူးဖော်ခဲ့ကြသလို၊ အခု ၂၀၂၁ ခုနှစ် စစ်အာဏာသိမ်းပြီးနောက်မှာလည်း တိုင်းပြည်ရဲ့အဖိုးတန် ကျောက်မျက်သယံဇာတတွေကို စိတ်တိုင်းကျ တူးဖော်ခဲ့ကြပြီးနောက်မှာ လုပ်ခွင့်မပြုဘူးလို့ စစ်ကောင်စီက ကြေညာလိုက်တာ ဖြစ်ပါတယ်။