စစ်ကိုင်းတိုင်း၊ ကန့်ဘလူမြို့နယ်၊ ကျောက်တိုင်ရွာကို စစ်ကောင်စီတပ်က နိုဝင်ဘာ ၂၂ ရက် ဒီနေ့မနက် ၉ နာရီမှာ စတင်မီးရှို့နေတယ်လို့ ကန့်ဘလူဒေသခံတွေက ပြောပါတယ်။

ရွာကိုမီးရှို့နေတဲ့ စစ်ကောင်စီတပ်ဟာ စစ်သားအင်အား ၁၀၀ ကျော်နဲ့ ကာဘိုးဘက်ကနေ ဝင်ရောက်လာပြီး နိုဝင်ဘာ ၂၂ ရက် မနက် ၇ နာရီ ၁၅ မိနစ်လောက်က ကျောက်တိုင်ရွာထဲကို လက်နက်ကြီး၊ လက်နက်ငယ်တွေနဲ့ ပစ်ခတ်ကာ ဝင်ရောက်လာတယ်လို့ ဆိုပါတယ်။

ကန့်ဘလူ‌ဒေသခံတဦးက “ရွာကို မီးရှို့နေတယ်။ ရွာသားတွေကတော့ အကုန်ထွက်ပြေးနေကြရတယ်။ မီးခိုးတွေကတော့ ရွာထဲကနေ ထွက်နေတာ မြင်ရတယ်။ အခုအချိန်အထိ ရွာထဲကနေ စစ်ကောင်စီတပ်တွေ မထွက်သေးတော့ အပျက်အစီး အတိအကျ ပြောလို့မရသေးဘူး။ ဘာကြောင့် ရွာကို အခုလို မီးရှို့တာလဲဆိုတာကတော့ မသိဘူး။ ရွာသားတွေကတော့ သူတို့လာပြီဆိုကတည်းက အကုန် ရွာထဲမနေရဲဘဲ ထွက်ပြေးနေကြရတယ်။ ကျနော်တို့ရွာက လူတွေကတော့ အကုန်ထွက်ပြေးနေရတယ်။ ကျန်တဲ့ရွာကလူတွေလည်း ထွက်ပြေးနေကြတယ်” လို့ ပြောပါတယ်။

ကန့်ဘလူ‌မြို့နယ်‌ တောင်ပိုင်းမှာ စစ်ကောင်စီတပ်ဖွဲ့တွေနဲ့ ပျူစောထီးတွေရဲ့ မီးရှို့ဖျက်ဆီးမှုကြောင့် ပြည်သူပိုင်နေအိမ်ပေါင်း ၂၀၀ လောက် မီးလောင်ပျက်စီး ဆုံးရှုံးခဲ့ပါတယ်။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ ကျောက်တိုင်ရွာသား ၄၀ ကျော်ကို စစ်ကောင်စီတပ်က မတ် ၁ ရက်နေ့ နေ့လယ် ၂ နာရီလောက်မှာ အကြောင်းမဲ့ဖမ်းဆီးထားတယ်လို့ ဒေသခံတွေက ပြောပါတယ်။

အဲဒီစစ်ကောင်စီတပ်ဖွဲ့ဟာ မုံရွာ နမခကနေ ရဟတ်ယာဉ် ၄ စီးနဲ့ လာရောက်ချထားတဲ့ တပ်သားတွေလို့ ဆိုပါတယ်။

“သူတို့ လေယာဉ်ယာဉ်နဲ့ ပထမ စစ်သားလာချတယ်။ အဲလိုလာချပြီး စစ်ကောင်စီတပ်က ရွာကို ပတ်ပတ်ဝိုင်းပြီး ထွက်ပေါက်တွေ အကုန်ပိတ်ထားတယ်။ အဲဒီလိုပိတ်ပြီး ရွာသား ၄၀ ကို ဖမ်းထားတယ်။ ဘာလို့ အခုလို ရွာသားတွေကို ဖမ်းရတာလဲဆိုတော့ ဒီလူတွေကို လူသားဒိုင်းအဖြစ် အသုံးပြုရအောင်လို့ ဖမ်းတာဖြစ်နိုင်တယ်” လို့ ရွာသားတဦးက ပြောပါတယ်။

စစ်ကောင်စီတပ်တွေဟာ ဖမ်းဆီးထားတဲ့ ကျောက်တိုင်ရွာသားတွေကို ကျေးရွာ စာသင်ကျောင်းဝင်းအတွင်းမှာ ထားရှိပြီး ဖမ်းဆီးခံ ရွာသား ၄၀ ထဲမှာ မင်းကျီကျေးရွာက ၃ ယောက်လည်း ပါတယ်လို့ ဒေသခံတွေက ပြောပါတယ်။

စစ်ကောင်စီက  ကျောက်တိုင်ကျေးရွာကို ပိတ်ဆို့ဖမ်းဆီးနေတာကြောင့် ကျောက်တိုင်ရွာအနီး မြင်းသည်ကျေးရွာက ဒေသခံတွေက ထွက်ပြေးတိမ်းရှောင်နေကြတယ်လို့ သိရပါတယ်။