ရခိုင်ပြည်နယ်၊ ကျောက်တော်မြို့နယ်ရှိ မဟာမုနိ စစ်ဘေးရှောင်စခန်း အပါအဝင် စခန်း ၃ ခုကို စစ်ကောင်စီက မတ်လ ၃၁ ရက်နေ့ နောက်ဆုံးထား ဖျက်သိမ်းခိုင်းထားပြီး စစ်ဘေးရှောင်တွေကို အတင်းအဓမ္မ နေရပ်ပြန်ကြဖို့ ဖိအားပေးထားတယ်လို့ စစ်ဘေးရှောင်စခန်း တာဝန်ခံတွေဆီက သိရပါတယ်။

စခန်းတာဝန်ခံတဦးက “မတ်လ ၃၁ ရက်နေ့ နောက်ဆုံးထားပြီး ဖျက်သိမ်းပေးဖို့ မြို့နယ်အုပ်ချုပ်ရေးအဖွဲ့က တာဝန်ရှိသူတွေ မနေ့က လာပြောသွားတာ။ စခန်းတွေ ဖြိုပြီးတာနဲ့ နေရပ်ပြန်ကြဖို့ အမိန့်ပေးသွားတာ” လို့ ပြောပါတယ်။

ဖျက်သိမ်းပြီး အတင်အဓမ္မ နေရပ်ပြန်ဖို့ ဖိအားပေးခံနေရတဲ့ စစ်ဘေးရှောင်စခန်းတွေမှာ မဟာမုနိစစ်ဘေးရှောင်စခန်း၊ ရှမ်းရွာစစ်ဘေးရှောင်စခန်းနဲ့ သိမ်ကျောင်းစစ်ဘေးရှောင်စခန်းတို့ ဖြစ်ကြောင်း စစ်ဘေးရှောင်တွေထံက သိရပါတယ်။

“သူတိုကတော့ နေရပ်ပြန်တဲ့ စစ်ဘေးရှောင် အိမ်ထောင်စုကို ငွေကျပ် ၆ သိန်းနဲ့ သုံးလစာ ရိက္ခာထောက်ပံ့ပေးသွားမယ်လို့ ပြောတယ်” လို့ စစ်ဘေးရှောင်တဦးက ​ပြောပါတယ်။

စစ်ဘေးရှောင်အများစုကတော့ နေရပ်ပြန်ချင်ကြပေမဲ့ စစ်ကောင်စီက ရပ်ရွာအနီး စစ်ကျန်လက်နက်နဲ့ မြေမြှုပ်မိုင်းတွေ ရှင်းလင်းမပေးသေးတဲ့အပြင် ကျေးရွာအနီး တပ်စွဲထားတာကြောင့် လွတ်လပ်စွာ သွားလာလုပ်စားခြင်း မပြုနိုင်ဘဲ စားဝတ်နေရေး အခက်အခဲတွေ ကြုံတွေ့လာမှာကို စစ်ဘေးရှောင်တွေ စိုးရိမ်နေကြတာပါ။

ကျောက်တော်မြို့နယ်ရှိ စစ်ဘေးရှောင်စခန်း ၁၀ ခုကျော်က စစ်ဘေးရှောင်ဦးရေ ၁,၁၇၀ ကျော် နေရပ်ပြန်ဖို့ စာရင်းပေးထားပေမဲ့ လက်ရှိ စစ်ကောင်စီမှာ ဘတ်ဂျက်မရှိသေးတာကြောင့် စစ်ဘေးရှောင် အိမ်ထောင်စု ၆၄၄ စုကို ပထမဆုံး နေရပ်ပြန်ခိုင်းနေတာဖြစ်တယ်လို့ ကျောက်တော်မြို့မှ စစ်ကောင်စီအဖွဲ့ဝင်တဦးက ဆိုပါတယ်။

စစ်ကောင်စီက ဖိအားပေး နေရပ်ပြန်ခိုင်းထားတဲ့ မဟာမုနိ စစ်ဘေးရှောင်စခန်းက အိမ်ထောင်စု ၄၄၃ စုက ၄၂၆ စု နေရပ်ပြန်ကြမှာဖြစ်ပြီး ကျန် ၁၇ စုကတော့ မဖျက်သိမ်းသေးတဲ့ ညောင်ချောင်းစစ်ဘေးရှောင်စခန်းမှာ နေထိုင်သွားမှာဖြစ်ပါတယ်။

အလားတူ သိမ်ကျောင်းစစ်ဘေးရှောင်စခန်းမှာ အိမ်ထောင်စု ၂၆ စုရှိကာ ၉ စုမှာ နေရပ်ပြန်မှာဖြစ်ပြီး ကျန် ၁၇ စုကတော့ အနီးအနားရှိ သိမ်ပြင်ကျောင်း စစ်ဘေးရှောင်စခန်းမှာ နေထိုင်သွားမှာဖြစ်ပါတယ်။

ရှမ်းရွာစစ်ဘေးရှောင်စခန်းမှာတော့ အိမ်ထောင်စု ၄၃ စုရှိပြီး သူတို့အားလုံး မိမိနေရပ်ကို ပြန်ကြမှာဖြစ်တယ်လို့ စစ်ဘေးရှောင်စခန်း တာဝန်ခံတွေထံက သိရပါတယ်။

ပြီးခဲ့တဲ့ ၂၀၂၃ ခုနှစ် ဇန်နဝါရီလနဲ့ ဖေဖော်ဝါရီလအတွင်း စစ်ကောင်စီ ပြည်ထောင်စုဝန်ကြီးတွေ ရခိုင်ရှိ စစ်ဘေးရှောင်စခန်းတွေကို သွားရောက်ကာ စစ်ဘေးရှောင်တွေ နေရပ်ပြန်ကြဖို့ ဖိအားပေး တိုက်တွန်းခဲ့ပြီးနောက် မြေပုံ၊ မင်းပြား၊ မြောက်ဦးနဲ့ ပုဏ္ဏားကျွန်းမြို့နယ်တွေက စစ်ဘေးရှောင်စခန်းတချို့ကို ပိတ်သိမ်းပြီး စစ်ဘေးရှောင်တွေကို အတင်းအကျပ် နေရပ်ပြန်ပို့နေကြတာလည်း ဖြစ်ပါတယ်။

ရခိုင်ပြည်နယ်မှာ စစ်ကောင်စီတပ်နဲ့ ရက္ခိုင့်တပ်တော် (အေအေ) တို့ ၂ဝ၁၈၊ ၂ဝ၁၉၊ ၂ဝ၂ဝ နဲ့ ၂ဝ၂၂ ခုနှစ်တွေမှာ ဖြစ်ပွားခဲ့တဲ့ တိုက်ပွဲတွေကြောင့် စစ်ဘေးရှောင်ဦးရေ ၂ သိန်းကျော်အထိ ရှိခဲ့ပြီး လက်ရှိ နေရပ်မပြန်နိုင်သေးတဲ့ စစ်ဘေးရှောင် ၆၀,၀၀၀ ကျော် ရှိနေသေးကြောင်း ထွေအုပ်စာရင်းတွေအရ သိရပါတယ်။

ရခိုင်ပြည်နယ်၊ ကျောက်တော်မြို့နယ်မှာ နိုဝင်ဘာ ၁၇ ရက် ဒီကနေ့ စစ်ကောင်စီတပ်က စက်လှေတစီးကို လက်နက်ကြီးလက်နက်ငယ်တွေနဲ့ ပစ်ခတ်လို့ မရမာကြီးလူမျိုး လူငယ် ၂ ယောက်ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။

ကျောက်တော်မြို့နယ် ဒုံရွာက ပလက်ဝဘက်က လိုင်းဘုတ်ကို ပစ္စည်းသွားပို့တဲ့ ဒုံးရွာက စက်လှေတစ်စီးကို ဒီနေ့ နိုဝင်ဘာလ ၁၇ ရက်နေ့ မနက် ၁၀ နာရီခွဲလောက်မှာ ကျောက်တော် အခြေစိုက် စခက ၉ ကလက်နက်ကြီးလက်နက်ငယ်တွေနဲ့ ပစ်ခတ်လို့ မရမာကြီးလူမျိုး အမျိုးသား ၂ ယောက် ဒဏ်ရာရရှိကာ တယောက်ကတော့ ရေထဲကို ခုန်ဆင်းလို့ လွတ်မြောက်သွားတယ်လို့ ဒုံးကျေးရွာဒေသခံတယောက်က ပြောပါတယ်။

စခက ၉ ကပစ်ခတ်လိုက်လို့ ဒဏ်ရာရရှိသူတွေကတော့ ဒုံးကျေးရွာက အသက် ၂၀ နှစ်အရွယ် ကိုရစ်က်ရဲ့ ဦးခေါင်းနဲ့ အသက် ၂၂ နှစ်အရွယ် ကိုနီရှားရဲ့ ပေါင်မှာ ဒဏ်ရာတွေရရှိခဲ့လို့ လူမှုကူညီရေးကားနဲ့ ကျောက်တော်ပြည်သူ့ဆေးရုံကို ပို့ဆောင်ထားပြီး ဦးခေါင်း ဒဏ်ရာရတဲ့လူနာကတော့ စိုးရိမ်ရတယ်လို့ ဆိုပါတယ်။

ကျောက်တော်မြို့နယ် ချောင်းတူကျေးရွာကိုလည်း နိုဝင်ဘာ ၁၆ ရက် နေ့လယ်ပိုင်းမှာ ကန်စောက်တောင်အခြေစိုက် ခမရ ၅၃၉ တပ်ရင်းက လက်နက်ကြီးနဲ့ ပစ်ခတ်လို့ ပြည်သူ ၄ ယောက် သေဆုံးကာ ၃ ယောက် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။