မန္တလေးတိုင်း၊ ကျောက်ပန်းတောင်းမြို့နယ်၊ ကျောက်ပန်းတောင်း-မိတ္ထီလာလမ်း၊ လက်ပံပျားတိုက်နယ်၊ မိုင်တိုင်အမှတ် ၃၅/၄ ဖာလုံအနီးမှာ မေ ၃ ရက်၊ ညနေပိုင်းက ကားနှစ်စီး မျက်နှာချင်းဆိုင်တိုက်မိတာကြောင့် လူ ၃ ဦး ထိခိုက်ဒဏ်ရာ ရရှိခဲ့တယ်လို့ မြို့ခံကယ်ဆယ်ရေးအသင်းက ပြောပါတယ်။

မနေ့ညနေ ၃ နာရီလောက်က တောင်ဦးကျေးရွာနားအရောက် လမ်းမမှာ လူ ၂၀ ပါ လိုက်ထရပ်ယာဉ်နဲ့ ဒိုင်နာကားတို့ တိုက်မိတာဖြစ်ပြီး လိုက်ထရပ်ယာဉ်မောင်းက ကားခေါင်းခန်းထဲ ညပ်နေခဲ့တာပါ။

လိုက်ထရပ်ကားဟာ ရန်ကုန်၊ သန်လျင်မြို့နယ်ကနေ ပုဂံ-ပုပ္ပားကို ဘုရားဖူးထွက်လာတာ ဖြစ်ပြီး လမ်းမှာ တဖက်ယာဉ်ကြောကို ကျော်တက်လာတဲ့ ဆီပေပါတင် ဒိုင်နာက ဝင်တိုက်ခဲ့တာလို့ သိရပါတယ်။

ကျောက်ပန်းတောင်းမြို့ခံ ကယ်ဆယ်ရေးအသင်း တာဝန်ရှိသူတဦးက “သန်လျင်ကနေလာတဲ့ ဘုရားဖူးကား လိုက်ထရပ်ပါ၊ လူကြီးက ကျား မ ၁၉ ဦး၊ ကလေးက ၆ နှစ်အရွယ် တဦးပါတယ်။ ဒိုင်နာကားက ရှေ့ကားကိုကျော်တက်တာ လိုက်ထရပ်နဲ့ မျက်နှာချင်းဆိုင်လို တိုက်မိတာပါ။ လိုက်ထရပ်ယာဉ်က ခေါင်းတော့ ပြားသွားတယ်။ ခရီးသည် ၃ ဦးကိုတော့ စိတ်မချရလို့ ကျောက်ပန်းတောင်းဆေးရုံကို ပို့၊ အဲ့ကနေ သက်သာမှ လက်ပံပျားဆေးရုံ ပြန်ပို့ထားပါတယ်” လို့ ပြောပါတယ်။

ယာဉ်တိုက်မှုကြောင့် လိုက်ထရပ်ယာဉ်ပေါ်ပါ ၃ ဦးမှာ လက်ကျိုးဒဏ်ရာနဲ့ ပွန်းပဲ့ဒဏ်ရာ မစိုးရိမ်ရ ရရှိခဲ့ပြီး ဒိုင်နာယာဉ်မောင်းနဲ့အကူက ထိခိုက်မှုမရှိဘူးလို့ သိရပါတယ်။

ယာဉ်တိုက်မှုအရှိန်ကြောင့် ဒိုင်နာယာဉ်က ဘေးတစောင်းတိမ်းမှောက်သွားပြီး လိုက်ထရပ်ယာဉ်ရဲ့ ခေါင်းခန်းလည်း ကြေမွသွားပါတယ်။

အခင်းဖြစ်နေရာကို လက်ပံပျားတိုက်နယ်ရှိ သက်ဆိုင်ရာအဖွဲ့အစည်းတွေနဲ့ မြို့ခံကယ်ဆယ်ရေးအသင်းတွေက ကူညီဆောင်ရွက်ခဲ့ပြီး ထိခိုက်ဒဏ်ရာရရှိသူတွေကို လက်ပံပျားတိုက်နယ်ဆေးရုံ ပို့ဆောင်ထားတယ်လို့ သိရပါတယ်။

မန္တလေးတိုင်း၊ ကျောက်ပန်းတောင်းမြို့နယ်၊ လက်ပံပျားရွာနားမှာ ဧပြီ ၂၄ ရက် နေ့လယ်ပိုင်းက ဘုရားဖူးယာဉ်တစ်စီး အပူရှိန်မြင့်တက်ကာ တာယာပေါက်ကွဲပြီး မီးလောင်မှုဖြစ်ပွားခဲ့တယ်လို့ မြို့ခံ ကယ်ဆယ်ရေးအသင်းက ပြောပါတယ်။

ကားပေါ်မှာ ယာဉ်မောင်းအပါ ၄၅ ဦးနဲ့ ရန်ကုန်မှ ပုဂံကို ဘုရားဖူးထွက်လာကြတာဖြစ်ပြီး နံနက်ပိုင်း ပုဂံက ပြန်ထွက်လာကတည်းက ‌ကားလေအိတ်ပေါက်ကာ ဘရိတ်ရှုးငြိ လာတာလို့ သိရပါတယ်။ 

ကျောက်ပန်းတောင်းအရောက်မှာ ကားပိုင်ရှင်ဖြစ်သူက ကားတာယာကို ရေလောင်းလိုက်ရာမှ တာယာပွင့်ထွက်ပြီး ကား တစ်စီးလုံး မီးလောင်သွားခဲ့တာပါ။ 

မြို့ခံကယ်ဆယ်ရေးအသင်းက "ကားကတော့ ရန်ကုန်ဘက်က ဘုရားဖူးနဲ့ ခရီးသည်တွေပါ၊ ပုဂံညောင်ဦးဘက်ကနေ အပြန် ကားက လေအိတ်ပေါက်လာတာကို ဘရိတ်ရှူးတွေက ညှိနေတော့ ပိုင်ရှင်ကဆင်းကြည့်ခိုင်းတာ၊ သူက နားမလည်တော့ တာယာတွေ ပူနေတယ်ဆိုပြီး ရေလောင်းချလိုက်တာ၊ တာယာက ထပေါက်ပြီးတော့ ကားတစ်စီးလုံး လောင်သွားတော့တာ " လို့ ပြောပါတယ်။

မီးလောင်မှုကြောင့် ခရီးသည်တွေရဲ့ အသုံးအဆောင်ပစ္စည်းတွေ ပျက်စီးသွားတဲ့အပြင် ကားပေါ်ပါ ကလေး ၁၂ ဦးအနက် ၁ ဦးမှာ ပွန်းပဲ့ဒဏ်ရာ မစိုးရိမ်ရ ရရှိပြီး ကျန်ခရီးသည်နဲ့ ယာဉ်မောင်းတွေမှာ ထိခိုက်ဒဏ်ရာ မရရှိဘူးလို့ သိရပါတယ်။

လက်ပံပျားတိုက်နယ်မီးသတ်ဌာနနဲ့ ကယ်ဆယ်ရေးအသင်းတွေက မီးငြှိမ်းသတ်ခဲ့ကြတာကြောင့် နေ့လယ် ၁၁ နာရီ ၅၃ မိနစ်မှာ မီးငြိမ်းခဲ့ပြီး ပျက်စီးဆုံးရှုံးမှုတန်ဖိုးကို တွက်ချက်နေဆဲပါ။                                                        

ကားပိုင်ရှင်နဲ့ ယာဉ်မောင်းဖြစ်သူကို ကျောက်ပန်းတောင်းမြို့နယ်ရဲစခန်းက စစ်ဆေးနေပြီး ခရီး သည်တွေ ရန်ကုန်ပြန်နိုင်ရေးအတွက် ကားစီစဉ်နေတယ်လို့ သိရပါတယ်။