ရခိုင်ပြည်နယ်၊ ကျောက်ဖြူမြို့နယ်၊ ကျောက်ခမောက်ကျေးရွာအနီး ရှောက်ချောင်းဖျားဒေသမှာ ဧပြီ ၂၆ ရက်မနက်က ဝေလငါးမန်း (Whale Shark) အမျိုးအစား ငါးကြီးတကောင် သောင်တင်သေဆုံးနေတာတွေ့ရှိခဲ့တယ်လို့ မျက်မြင် ဒေသခံတွေက ပြောပါတယ်။
ချောင်းကြားမှာ သောင်တင်ပြီး သေဆုံးနေတဲ့ ဝေလငါးမန်း အမျိုးအစား ငါးကြီးဟာ အရှည် ၂၆ ပေခန့်နဲ့ လုံးပတ် ၁၀ ပေခန့်ရှိကြောင်း ငါးလုပ်ငန်းဦးစီးဌာနကနေ သိရပါတယ်။
ငါးဖမ်းလုပ်ငန်း လုပ်ကိုင်နေတဲ့ ဒေသခံ တံငါသည်တွေက“ငါးကြီးက ချောင်းကြားထဲမှာ ဝင်ပြီး သေနေတာ၊ ဘယ်လိုလုပ်ပြီး ဒီလောက်ငါးကြီး ချောင်းကြားထဲရောက်လာလဲ မပြောတတ်ဘူးဗျ။ ဒီရေအတက်မှာ ရောက်လာပြီး ဒီရေအကျမှာ ဆင်းမရဘဲ တင်ကျန်ပြီး သေဆုံးသွားတာ ဖြစ်နိုင်တယ်ဗျ” လို့ ပြောပါတယ်။
အဆိုပါ ဝေလငါးမန်း အမျိုးအစား ငါးကြီး သောင်တင်သေဆုံးနေတဲ့နေရာမှာ ကျောက်ဖြူမြို့မှ ၁၈ မိုင်ခန့်ဝေးတဲ့ ကျောက်ခမောက်ကျေးရွာနဲ့ တမိုင်ခန့်အကွာရှိ ရှောက်ချောင်းချောင်းဖျား (ဒေသအခေါ်) ပါးစပ်ချောင်းဖျားရှိ ကမ်းစပ်တနေရာမှာ တွေ့ရှိခဲ့တာဖြစ်ကြောင်း ကျောက်ခမောင်းကျေးရွာသားတွေက ပြောပါတယ်။
လက်ရှိမှာ သေဆုံးနေတဲ့ငါးကြီးကို ကျေးရွာသားတွေက ကျောက်ခမောက်ကျေးရွာကို စက်လှေမှာ ကြိုးတွေနဲ့ချည်နှောင်တွဲယူ သယ်ဆောင်ခဲ့ပြီး ရွာအနီးချောင်းစပ်မှာ ထားထားကြောင်း ရွာသားတွေထံက သိရပါတယ်။
ပြီးခဲ့တဲ့ ဧပြီ ၁ ရက်ကလည်း ကျောက်ဖြူမြို့နယ်၊ ကျောက်ခမောက်ရွာအနီးမှာ အရှည် ၂၆ ပေရှိ ဝေလငါးမန်းတကောင် သောင်တင်သေဆုံးနေတာ တွေ့ရှိခဲ့ပါသေးတယ်။
အလားတူ ၂၀၁၈ ခုနှစ် ဖေဖော်ဝါရီ ၂ ရက်က ရခိုင်ပြည်နယ် မာန်အောင်မြို့နယ်နဲ့ မိုင်ပေါင်း ၂၇ မိုင်ခန့်ဝေးတဲ့ ပင်လယ်ကမ်းခြေမှာ အလျား ၄၃ ပေခန့်ရှိပြီး ပုပ်ပွနေတဲ့ ဝေလာငါးသေတကောင် တွေ့ရှိခဲ့သလို ၂၀၂၀ ဇန်နဝါရီ ၁၆ ရက်ကလည်း ရခိုင်ပြည်နယ်၊ မောင်တောမြို့နယ်တောင်ပိုင်း၊ အလယ်သံကျော် ကမ်းခြေအနီးမှာ ဝေလငါးတကောင် သောင်တင်သေဆုံးခဲ့ပါတယ်။
