မြင်းခြံအကျဉ်းထောင်မှာ ဖမ်းဆီးထိန်းသိမ်းခံနေရတဲ့ ကျောင်းသားလူငယ်   ၅ ယောက်ကို  အကြမ်းဖက်စစ်အုပ်စုက ရာဇသတ်ကြီး ပုဒ်မ ၅၀၅(က) နဲ့ အမှုဖွင့်ပြီး ဒီနေ့ မေလ ၂၆ ရက်မှာ မြင်းခြံ​ခရိုင်တရားရုံးအတွင်း ရုံးထုတ်ခဲ့ပါတယ်။

မြင်းခြံနည်းပညာ​ကောလိပ် ကျောင်းသားများသမဂ္ဂ (ဗကသများအဖွဲ့ချုပ်) ဗကသ ကျောင်းသား ကိုစိုးရာဇာထွန်းလွင်နဲ့ ကိုငယ်၊ ကိုကျော်ဇင်ဦး၊ ကိုကောင်း​ဝေယံ(၁၈နှစ်မပြည့်)၊ ကိုအောင်ကိုကိုတို့အား မြင်းခြံ အမှတ် ၁ ရဲစခန်းက ပုဒ်မ ၅၀၅(က) ၊ အမှတ် ၂ ရဲစခန်းက ပုဒ်မ ၅၀၅(က) တို့နဲ့ အမှုဖွင့်ထားတာပါ။

ကျောင်းသားတွေကို ဒီနေ့ညနေ ​မြင်းခြံ​ခရိုင်တရားရုံးအတွင်း ရုံးထုတ်ပြီး ညနေ ၅နာရီ.ကျော်က မြင်းခြံ အကျဉ်းထောင်သို့ ပြန်လည်ပို့ဆောင်လိုက်တယ်လို့ သိရပါတယ်။ လာမယ့် မေလ ၂၈ ရက်နေ့ သောကြာနေ့မှာ ထပ်မံ ရုံးထုတ်ဖို့ ရှိပါတယ်။

တနင်္သာရီတိုင်း ထားဝယ်မြို့မှာ ဒီနေ့ မနက်ပိုင်း ၇ နာရီခွဲ စတင်ထွက်ခဲ့တဲ့ စစ်အာဏာရှင်ဆန့်ကျင်ရေး ကျောင်းသားပြည်သူ စုပေါင်းသပိတ်ဟာ ၁၅ မိနစ်အကြာမှာ ဖြိုခွဲခံလိုက်ရပြီး ကျောင်းသား ၅ ဦး ရိုက်နှက်ဖမ်းဆီးခံရတယ်လို့ သိရပါတယ်။

ဆယ်တန်းကျောင်းသားတွေဖြစ်တဲ့ ကောင်းထက်ကျော်၊ ကိုယ်ပိုင်အထက်တန်းကျောင်းက ကိုနေဇော်အောင်၊ ပညာဥယျာဥ်ကိုယ်ပိုင်အထက်တန်းကျောင်းက ကိုအောင်ပြည့်ဖြိုးတို့အပါအဝင် အခြေခံပညာကျောင်းက ကျောင်းသူ ၁ ဦးနဲ့ ထားဝယ်နည်းပညာတက္ကသိုလ်ကျောင်းသား နှစ်ဦးတို့ ဖမ်းဆီးခံလိုက်ရတာပါ။ 

အင်ဂျင်နီယာကျောင်းသားနှစ်ဦးထဲက တစ်ဦးကတော့ အဖမ်းမခံရခင် သေနတ်ကျည်ထိသွားတယ်လို့ မျက်မြင်က ပြောပါတယ်။

သပိတ်စစ်ကြောင်း လူစုခွဲအပြီးမှာပဲ ရပ်ကွက်တွေမှာ ပတ်နေတဲ့ ရဲကားနဲ့စစ်ကားတွေက လူစုခွဲရာ တစ်နေရာစီ လမ်းကြားတွေအထိ လိုက်လံဖမ်းဆီးခဲ့ကြလို့ အခုလိုဖြစ်ရတာလို့ သပိတ် ပါဝင်ခဲ့တဲ့ ကျောင်းသားတွေက ပြောပါတယ်။ 

ဖမ်းဆီးစဥ်က ကျောင်းသားတွေကို ကြမ်းကြမ်းတမ်းတမ်းရိုက်နှက်ပြီးမှ ခေါ်ဆောင်သွားတာလို့ ဆိုကြပါတယ်။ ကျောင်းသားတွေအပြင် သပိတ်စစ်ကြောင်းမှာ ပါဝင်ခဲ့သူတွေရဲ့ ဆိုင်ကယ်တချို့ပါ အယူခံလိုက်ရတယ်လို့လည်း သိရပါတယ်။

လက်ရှိမှာ အသက်မပြည့်သေးတဲ့ ကျောင်းသားတွေကိုပါ ထားဝယ်မြို့ တိုက်ခိုက်ရေးရဲရုံးမှာ ထားပြီး ရက်ရက်စက်စက်စစ်ကြောရေးလုပ်နေတယ်လို့ သိရပါတယ်။

အဖမ်းခံလိုက်ရတဲ့ ကျောင်းသားတွေမှာ သက်သေခံပစ္စည်းအဖြစ် အလံတွေပါသွားတယ်လို့လည်း မျက်မြင်တွေက ဆိုပါတယ်။