စစ်အာဏာသိမ်းကာလမှာ ကျောင်းသူကျောင်းသားတွေ ပညာရေးမနှောင့်နှေးစေဖို့အတွက် မြောင်မြို့နယ်မှာ ကြားကာလပညာရေးဖော်ဆောင်တဲ့အနေနဲ့ စာသင်ကျောင်းတွေ ဖွင့်လှစ်သင်ကြားနေပြီး ကျောင်းသုံးစာအုပ်တွေနဲ့ ကျောင်းရေရှည်တည်တံ့နိုင်ဖို့ အတွက် ပညာရေးလုပ်ငန်း လိုအပ်ချက်တွေ ဖြည့်စွက်ကူညီနိုင်ဖို့ ဖိတ်ခေါ်ထားပါတယ်။

ပြီးခဲ့တဲ့ မတ် ၁ ရက်ကစတင်ပြီး ပညာရေးလုပ်ငန်းတွေ လုပ်ဆောင်ခဲ့ပြီး လက်ရှိအခြေအနေမှာတော့ ရပ်ရွာလူထုအခြေပြု ပညာရေးမှာ သင်ကြားရေးဆရာ  ၂၂  ယောက်၊ ကျောင်းသား ၃၀၃ ယောက်နဲ့အတူ အခြေခံပညာအလယ်တန်းအဆင့်အထိ စတင်နိုင်ခဲ့တယ်လို့ ဆိုပါတယ်။ 

မြောင်မြို့နယ် ပညာရေးကွန်ရက်က “ရပ်တန့်တာကြာပြီဖြစ်တဲ့ ပညာရေးလုပ်ငန်တွေ စတင်ခွင့်ရခဲ့တယ်။ မိဘပြည်သူ ကျောင်းသား ကာကွယ်ရေးနဲ့ ပညာရှင်တွေနဲ့အတူ မြောင်ပညာရေးကွန်ရက်နဲ့ ချိတ်ဆက်လုပ်ဆောင်ရတဲ့အတွက် ကိုယ့်တစ်ရွာတည်းမဟုတ်ဘဲ အားလုံးပြိုင်တူအတူတူ သင်ကြားရေးစတင်နိုင်တဲ့အတွက် မိဘ၊ ကျောင်းသား၊ ဆရာ ဆရာမအားလုံး ထပ်တူကြည်နူးရပါတယ်။ စာအံသံတွေနဲ့ ကျောင်းတက်ခေါင်းလောင်းထိုးသံ ပြန်ကြားရတော့ ပင်ပန်းရကျိုးနပ်ပါတယ်”လို့ ထုတ်ပြန်ချက်မှာ ပြောထားပါတယ်။

မြောင်ပညာရေးကွန်ရက်ကိုတော့ မြောင်နယ်သူနယ်သားတွေနဲ့ စတင်ဖွဲ့စည်းခဲ့ပြီး ၂၀၂၂ ခုနှစ်၊ မတ် ၁ ရက်က စတင်ပြီး ပညာရေးလုပ်ငန်းတွေကို အကောင်အထည်ဖော်ခဲ့တယ်လို့ သိရပါတယ်။

ဆက်လက်ပြီးတော့လည်း ကြားကာလပညာရေးအတွက် မြောင်ပညာရေးကွန်ရက်နဲ့ လာရောက်ချိတ်ဆက်ထားတဲ့ ကျေးရွာတွေကိုလည်း ကျောင်းတွေ ဖွင့်လှစ်ပြီး ပညာသင်ကြားပေးနိုင်ရေးအတွက် ဆက် လက်လုပ်ဆောင်သွားမယ်လို့ ဆိုပါတယ်။

ဒါ့အပြင် ကြားကာလပညာရေးလုပ်ငန်းဆောင်တာတွေကို ကွန်ရက်သဖွယ် ချိတ်ဆက်ပြီး မြောင်နယ်ပညာရေးမှာ ပါဝင်အားဖြည့်သွားမှာဖြစ်ကာ အမျိုးသားညီညွတ်ရေးအစိုးရ (NUG) ၊   ပညာရေးဝန်ကြီးနဲ့လည်း တွေ့ဆုံခဲ့ကာ မြို့နယ်ပညာရေးလုပ်ငန်းတွေ လုပ်ဆောင်တဲ့ ရည်ရွယ်ချက်၊ မူဘောင်၊ လုပ်ငန်းစဥ်နဲ့ ရည်ရွယ်ချက်တွေကို တင်ပြထားပြီးဖြစ်တယ်လို့ သိရပါတယ်။

ကျောင်းသုံးစာအုပ်များနှင့်ကျောင်းရေရှည်တည်တံ့နိုင်ဖိုအတွက် ပညာရေးလုပ်ငန်း လိုအပ်ချက်များ ဖြည့်စွက်ကူညီလိုပါက m.me/112102391388001 ကို ဆက်သွယ်နိုင်မှာ ဖြစ်ပါတယ်။