တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ်၊ ကျခတ္တပင်အင်း ကျေးရွာမှာ အလယ်တန်း ကျောင်းအုပ်ဆရာမကြီး အပါအဝင် ရွာသား ၅ ယောက် အောက်တိုဘာ ၂၂ ရက် ညက နေအိမ်တွေမှာ သေနတ်နဲ့ပစ်ခတ်ခံရလို့ ၄ ယောက် သေဆုံးသွားပြီး တယောက်က ရေဖြူဆေးရုံမှာ အတွင်းလူနာအနေနဲ့ ကုသနေရတယ်လို့  ဒေသခံတွေက ပြောပါတယ်။ 

သေဆုံးသွားသူတွေကတော့ ကျခတ္တပင်အင်းရွာ အလယ်တန်းကျောင်းအုပ်ဆရာမကြီး ဒေါ်အေးမိုးဆွေ၊ ခင်ပွန်းဖြစ်သူ ကျောင်းဆရာအငြိမ်းစား ဦးဖိုးခိုင်နဲ့ အသက် ၅၀ ကျော်အရွယ် ဦးဝင်းသိန်း၊ ဒေါ်အောင်ဆန်းမဲတို့လင်မယား ဖြစ်ပါတယ်။

“ဖြစ်သွားတာက ညပိုင်းမှာပါ၊ ရွာသားတွေကမနက်မှသိရတာပါ။ ဈာပနတွေကိုတော့ ဒီနေ့ညနေ( အောက်တိုဘာ ၂၃) ပြုလုပ်ပြီးပြီ” လို့ ရွာသားတဦး ကပြောပါတယ်။ 

အခုပစ်ခတ်ခံရပြီး သေဆုံးခဲ့တဲ့ဖြစ်စဉ်နဲ့ပတ်သက်ပြီး ဘယ်အဖွဲ့အစည်းက လုပ်ခဲ့တယ်ဆိုတာကို တာဝန်ခံ ထုတ်ပြန်တာမျိုး မတွေ့ရသေးသလို ဘာကြောင့် ပစ်ခတ်သတ်ဖြတ်ရတာလဲဆိုတာလည်း မသိရသေးပါဘူး။

ကျခတ္တပင်အင်းရွာ စာသင်ကျောင်းမှာ ပြီးခဲ့တဲ့ဇွန်လကလည်း မပေါက်ကွဲသေးတဲ့ ဗုံးတွေ့တယ်ဆိုပြီး ကျောင်းပိတ်ခဲ့ရတဲ့ဖြစ်စဉ် ရှိခဲ့ပါတယ်။

ရေဖြူအနောက်ဘက်ကမ်းဒေသ ဖြစ်တဲ့ ပုဂေါဇွန်း၊ ရလိုင်၊ ကျခတ္တပင်အင်း၊ ဧကနိနဲ့ နဘုလယ်ဒေသကရွာတွေမှာ တော်လှန်ရေးအင်အားစုတွေဘက်က စစ်တပ်နဲ့နီးစပ်သူတွေကို စစ်ကောင်စီသတင်းပေးဆိုပြီး သတ်တာမျိုးရှိသလို စစ်ကောင်စီလက်အောက်ခံ စွန်ရဲအဖွဲ့၊ သွေးသောက်အဖွဲ့တွေကလည်း ရွာသားတွေကို ဖမ်းဆီးသတ်ဖြတ် အလောင်းဖျောက်တာတွေလည်း ရှိနေပါတယ်။

ဒါ့အပြင် ဘယ်အဖွဲ့အစည်းဘက်ကမှ လုပ်ဆောင်တယ်လို့မထုတ်ပြန်ဘဲ အသတ်ခံလိုက်ရတဲ့ ဖြစ်စဉ်တွေလည်း ရှိနေတာကြောင့် ရေဖြူဒေသမှာ စစ်ရေးလှုပ်ရှားမှုနေတဲ့ ပြည်သူ့ကာကွယ်ရေးတပ်ဖွဲ့ ၄ ဖွဲ့က အဲဒီဖြစ်စဉ်တွေနဲ့ ပတ်သက်ဆက်စပ်မှုမရှိဘူးလို့ စက်တင်ဘာလ ၁၁ ရက်က သတင်းထုတ်ပြန်ထားပါတယ်။

စစ်ကိုင်းတိုင်း၊ မုံရွာမြို့နယ်၊ မုံရွာ-အရာတော်လမ်းမှာ ဇွန်လ ၅ ရက်မနက်က  အလယ်တန်း ကျောင်းအုပ်ဆရာမတယောက် ပစ်သတ်ခံရတယ်လို့  မျက်မြင်ဒေသခံက ပြောပါတယ်ပါတယ်။

“ မနက် ၁၁ နာရီလောက်မှာ မုံရွာ-အရာတော် သွားတဲ့လမ်းက ရွာတုံလမ်းခွဲထိပ်မှာ ပစ်ခံရတယ်။ ဆရာမက သူ တာဝန်ကျကျောင်းကို ဆိုင်ကယ်နဲ့သွားတယ်။ ဆရာမ နောက်ကနေ ဆိုင်ကယ်တစ်စီးက လိုက်ပစ်ခတ်လို့ ဆရာမ အဲဒီနေရာမှာပဲ ပွဲချင်းပြီးသေဆုံးသွားတယ်” လို့ မျက်မြင်တစ်ဦးက ပြောပါတယ်။

သေနတ်ပစ်ခံရသူ အသက် ၄၄ နှစ်အရွယ် ဆရာမဒေါ်စိုးမြတ်အေးဟာ မုံရွာမြို့ မြို့သစ်ရပ်ကွက်မှာ နေထိုင်ပြီး မုံရွာမြို့နယ် စည်သာကျေးရွာ အလယ်တန်းကျောင်းခွဲမှာ တာဝန်ကျနေသူ ဖြစ်တယ်လို့ သိရပါတယ်။

ကျောင်းအုပ်ဆရာမကြီး ဒေါ်စိုးမြတ်အေးကို ဘယ်အဖွဲ့အစည်းက ပစ်သတ်တယ်ဆိုတာ ထုတ်ပြန်ထားခြင်း မရှိသေးပါဘူး။

ကျောင်းအုပ်ဆရာမကြီးဖြစ်သူ ဒေါ်စိုးမြတ်အေးဟာ ရင်ညွန့်ကျည်ဖောက်ဝင် ဒဏ်ရာတစ်ချက်၊ ဝဲလက်မောင်းထိုးသွင်းဒဏ်ရာ တစ်ချက်နဲ့သေဆုံးခဲ့တာဖြစ်ပြီး PDF အဖွဲ့က လက်နက်ငယ်နဲ့ ပစ်ခတ်သတ်ခဲ့တာလို့ စစ်ကောင်စီပြန်ကြားရေးက သက်သေအထောက်အထားမရှိဘဲ စွပ်စွဲ ထုတ်ပြန်ထားပါတယ်။