မကွေးတိုင်း၊ ပေါက်မြို့နယ်မှာ ဇန်နဝါရီ ၁၂ ရက် နေ့လယ်ပိုင်းက ပြည်သူ့ကာကွယ်ရေးအဖွဲ့ (PDF) စိုက်ပျိုးထားတဲ့ သီးနှံစိုက်ခင်းတွေကို လာရောက်ဖျက်ဆီးတဲ့ စစ်အုပ်စုတွေ မိုင်းဆွဲတိုက်ခိုက်ခံရပြီး ၂ ယောက်သေဆုံးကာ ၂ ယောက် ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။

မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက “ပေါက်မြို့နယ်၊ လယ်ဘဲ့ရွာဘက်ကို ဇန်နဝါရီလ ၁၂ ရက်နေ့ နေ့လယ် ၁၂ နာရီခွဲလောက်မှာ ကင်းပတ်ထွက်လာတဲ့ စစ်(...)တွေနဲ့ ကုက္ကိုစုရွာက ပျူ(...)တွေပေါင်းပြီး မြိုင် ပ.က.ဖ နဲ့ ပေါက်ပ.က.ဖ-ASTF တို့ စိုက်ပျိုးထားတဲ့ စိုက်ခင်းတွေကို ဖျက်ဆီးဖို့ ခြေလျင်လျှောက်လာတဲ့အချိန်မှာ ASTF နဲ့ပူးပေါင်းပြီး မိုင်းဆွဲတိုက်ခိုက်ခဲ့တာ” လို့ ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်း စစ်ကောင်စီဘက်က ၂ ယောက်သေဆုံးကာ ၂ ယောက် ဒဏ်ရာရရှိပြီး ဆေးကုသမှု ခံယူနေရတယ်လို့ ဆိုပါတယ်။

အဲဒီတိုက်ခိုက်ခံရတဲ့ဖြစ်စဥ်မှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်း၊ နတ်မောက်မြို့နယ်မှာလည်း ဇန်နဝါရီ ၁၂ ရက် ညနေပိုင်းက Non CDM မူလတန်း ကျောင်းအုပ်ဆရာတယောက် သေနတ်နဲ့ ပစ်သတ်ခံခဲ့ရတယ်လို့ ဒေါင်းစစ်သည် ပြောက်ကျားတပ် (နတ်မောက်) ကနေ သိရပါတယ်။

နတ်မောက်မြို့နယ်မှာ စစ်ကောင်စီကိုထောက်ခံတဲ့ ဖျောက်ဆိတ်ကုန်းရွာ အ.မ.က ကျောင်းအုပ် ဦးဝင်းခိုင်ကို မနေ့က ဇန်နဝါရီ ၁၂ ရက် ညနေ ၄ နာရီလောက်မှာ မကွေးပြောက်ကျားတပ်-MGW နဲ့ပူးပေါင်းပြီး သေနတ်နဲ့ ၅ ချက်ပစ်ခတ် ရှင်းလင်းခဲ့တယ်လို့ ဒေါင်းစစ်သည် ပြောက်ကျားတပ်ဖွဲ့ရဲ့ ပြန်ကြားရေးတာဝန်ခံ ဒေါင်းသွေးနီက ဒီဗွီဘီကို ပြောပါတယ်။

“အဲဒီ Non CDM ကျောင်းအုပ်က စစ်(...)၊ ရဲ(...)တွေနဲ့ ပူးပေါင်းပြီး နတ်မောက်မြို့နယ်ထဲမှာ စစ်ကောင်စီရဲ့ တရားမဝင်ရွေးကောက်ပွဲအတွက် မဲစာရင်းကောက်ဖို့ စည်းရုံးတာတွေ၊ တာဝန်ကျတဲ့ နေရာတွေမှာ မဲပေးဖို့ စည်းရုံးတာတွေ၊ ပညာရေးဝန်ထမ်းတွေကို မဲစာရင်းကောက်ဖို့ ဖိအားပေးတာတွေ ပြုလုပ်နေလို့ သုတ်သင်ရှင်းလင်းလိုက်တာ။”

တရားမဝင်ရွေးကောက်ပွဲအတွက် ပူးပေါင်းဆောင်ရွက်နေတဲ့ Non CDM ဝန်ထမ်းတွေ၊ ထွေအုပ်ဝန်ထမ်းတွေ၊ စစ်ကောင်စီခန့် အုပ်ချုပ်ရေးမှူးတွေအနေနဲ့ ပြည်သူလူထုကို မဲအတင်းအဓမ္မ ကောက်ခံပါက ပစ်ခတ်ရှင်းလင်းသွားမယ်လို့ ပြောပါတယ်။

ဒေါင်းစစ်သည်ပြောက်ကျားတပ်နဲ့ မကွေးပြောက်ကျားတပ်တို့ ပူးပေါင်းပြီး စစ်အာဏာရှင် ကျရှုံးတဲ့အထိ တိုက်ခိုက်ချေမှုန်းသွားမှာဖြစ်လို့ မိဘပြည်သူတွေအနေနဲ့ စစ်အုပ်စုတွေနဲ့ ခပ်ဝေးဝေးမှာ နေထိုင်ပေးကြဖို့ သတိပေးထားပါတယ်။

နတ်မောက်မြို့နယ်မှာ ဇန်နဝါရီ ၅ ရက် မနက်ပိုင်းကလည်း စစ်ကောင်စီခန့် အုပ်ချုပ်ရေးမှူးတယောက် သေနတ်နဲ့ ပစ်သတ်ခံခဲ့ရတယ်လို့ ဒေသခံတွေဆီကနေ သိရပါတယ်။

ရခိုင်ပြည်နယ် အမ်းမြို့နယ် ခရမ်းကျွန်းကျေးရွာက ကျောင်းအုပ်ဆရာကြီးတဦးနဲ့ မအီမြို့က စီးပွားရေးလုပ်ငန်းရှင်တဦးကို နိုဝင်ဘာ ၁၄ ရက်နေ့မှာ စစ်ကောင်စီတပ်က ဖမ်းဆီးသွားတယ်လို့ မိသားစုဝင်တွေနဲ့ ရင်းနှီးသူတွေက ပြောပါတယ်။

အမ်းမြို့နယ် င/လက်ကျေးရွာအုပ်စု ခရမ်းကျွန်းကျေးရွာ အလယ်တန်းကျောင်းခွဲက ကျောင်းအုပ် ဦးဇော်ဖြိုးဝေကို စစ်ကောင်စီတပ်ဖွဲ့ဝင်လို့ ယူဆရတဲ့ အရပ်ဝတ်နဲ့ လက်နက်ကိုင်တွေက နိုဝင်ဘာ ၁၄ ရက် နေ့လယ်ပိုင်းက ကျောင်းဝင်းထဲမှာ ဖမ်းဆီးသွားတာလို့ ကျောင်းအုပ်နဲ့ နီးစပ်သူတဦးက ပြောပါတယ်။

“မနေ့က နေ့လယ် ၁ နာရီလောက်မှာ အရပ်ဝတ်နဲ့ လက်နက်ကိုင် ၅ ယောက်က ကျောင်းထဲဝင်ပြီး ဖမ်းဆီးတာဖြစ်တယ်။ ဖမ်းသွားတဲ့သူတွေက စစ်သားတွေလို့တော့ ပြောကြတယ်။ အခုထိ ဘယ်မှာထိန်းသိမ်းထားတယ်ဆိုတာ မသိရသေးဘူး။”

ဖမ်းဆီးခံလိုက်ရတဲ့ ကျောင်းအုပ် ဦးဇော်ဖြိုးဝေဟာ အမ်းမြို့နယ် ခွဆုံပြင်ဇာတိဖြစ်ပြီး ခရမ်းကျွန်းကျေးရွာမှာ တာဝန်ကျနေတာ ၂ နှစ်လောက် ကြာနေပြီလို့ ဆိုပါတယ်။

ဒါ့အပြင် တောင်ကုတ်မြို့နယ် မအီမြို့ အမှတ် ၂ ရပ်ကွက်က စီးပွားရေးလုပ်ငန်းရှင်တဦးဖြစ်တဲ့ ဦးထွန်းကြွယ်ကိုလည်း နိုဝင်ဘာ ၁၄ ရက်နေ့က တောင်ကုတ်မြို့မှာ စစ်ကောင်စီတပ်ဖွဲ့ဝင်တွေက ဖမ်းဆီးသွားတယ်လို့ မိသားစုဝင်တဦးက ပြောပါတယ်။

“ဖမ်းဆီးခံလိုက်ရတာက ဟုတ်တယ်ဗျာ။ မနေ့က နေ့လယ် ၃ နာရီလောက်မှာ တောင်ကုတ်မှာ အဖမ်းခံလိုက်ရတာ ဖြစ်တယ်။ ဘယ်မှာထိန်းသိမ်းထားတယ် ဆိုတာတော့ မသိရသေးဘူး။”

ဖမ်းဆီးခံထားရတဲ့ ဦးထွန်းကြွယ်ဟာ ရွှေဇီးဇံကုမ္ပဏီလုပ်ငန်း၊ စက်သုံးဆီဆိုင်၊ ဘတ်ဖိုးလုပ်ငန်းတွေနဲ့ ကုန်စုံဆိုင်တွေရှိတယ်လို့ မအီမြို့ခံတွေက ပြောပါတယ်။

ရခိုင်ပြည်နယ်မှာ ရက္ခိုင့်တပ်တော် (အေအေ) နဲ့ စစ်ကောင်စီတပ်အကြား တိုက်ပွဲတွေ ပြင်းထန်လာပြီးနောက် စစ်ကောင်စီက နိုင်ငံရေးတက်ကြွလှုပ်ရှားသူတွေနဲ့ လူမှုရေး တက်ကြွလှုပ်ရှားသူတွေကို လိုက်လံဖမ်းဆီးတာတွေ ရှိနေပါတယ်။

စစ်ကောင်စီက စီးပွားရေးလုပ်ငန်းရှင်တွေနဲ့ အရပ်သားတွေကို ဖမ်းဆီးမှုတွေလည်းရှိပြီး ငွေကြေးအမြောက်အမြားပေးမှ ပြန်လွှတ်ပေးတယ်ဆိုပြီး ဒေသခံတွေက ပြောဆိုနေကြပါတယ်။