မကွေးတိုင်း၊ ရေစကြိုမြို့နယ် အခြေစိုက် စစ်ကောင်စီတပ်ရင်း ၂ ခု ဧပြီ ၁၆ ရက်မနက်မှာ ဒရုန်းနဲ့ ဗုံးကြဲတိုက်ခိုက်ခံရပြီး ၅ ယောက်လောက် အပြင်းအထန်ဒဏ်ရာရရှိခဲ့တယ်လို့ ရေစကြိုမြို့နယ် ပကဖကနေ သိရပါတယ်။

ရေစကြို ပကဖခေါင်းဆောင် ရဲဘော်ဝေကြီးက“ရေစကြိုမြို့နယ်အခြေစိုက် ခလရ ၂၅၆၊ ၂၅၈ ထဲမှာ လူစုနေတယ်လို့ သတင်းရတာကြောင့် ဧပြီ ၁၆ ရက် မနက် ၉နာရီလောက်မှာ ကျနော်တို့ဘက်က ဒရုန်းနဲ့ အီနာဂါဗုံးသီး ၃ လုံးဖြုတ်ချတိုက်ခိုက်ခဲ့တယ်”လို့ ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ၅ ယောက်လောက် အပြင်းအထန်ဒဏ်ရာရရှိခဲ့ပြီး ရေစကြိုပြည်သူ့ဆေးရုံမှာ ဆေးဝါးကုသမှုခံယူနေရကာ တယောက်ကတော့ စိုးရိမ်ရကြောင်း တပ်တွင်းသတင်းပေးတွေအရ သိရတယ်လို့ ဆိုပါတယ်။

အဲဒီတိုက်ခိုက်မှုကို ရေစကြိုမြို့နယ် ပကဖ၊ သံမဏိသိန်းငှက်ပြောက်ကျားတပ်ဖွဲ့၊ MRTF တို့ ပူးပေါင်းတိုက်ခိုက်ခဲ့ကြတာဖြစ်ပြီး ပြည်သူ့ကာကွယ်ရေးရဲဘော်တွေ ထိခိုက်မှုမရှိခဲ့ဘူးလို့ ရဲဘော်ဝေကြီးက ပြောပါတယ်။

ရေစကြိုမြို့နယ် ဇီးကုန်းနဲ့ ဇီးကုန်းကျွန်းကျေးရွာကြားမှာလည်း ဧပြီ ၈ ရက်နေ့က စစ်ကောင်စီတပ်သားတွေ ဒရုန်းနဲ့ ဗုံးကြဲတိုက်ခိုက်ခံရပြီး ၂ ယောက်သေဆုံးကာ အများအပြား ဒဏ်ရာရရှိခဲ့ပါတယ်။

မကွေးတိုင်း ကျောမြို့မှာလည်း ဧပြီလ ၁၅ ရက် ညနေပိုင်းက ကင်းလှည့်ထွက်လာတဲ့ စစ်ကောင်စီတပ်သားတွေ တိုက်ခိုက်ခံရပြီး ထိခိုက်သေဆုံးသူရှိနိုင်တယ်လို့ ဂန့်ဂေါခရိုင် တပ်ရင်း(၁၉)PDF-ကျောကနေ သိရပါတယ်။

ကျောမြို့ ရဲစခန်းဘက်ကနေ သစ်တောဂိတ်ဘက်ကို အင်အား ၃၀ လောက်နဲ့ ထွက်လာတဲ့စစ်ကောင်စီတပ်သားတွေကို ဧပြီလ ၁၅ ရက် ညနေ ၅ နာရီလောက်မှာ ဒုတပ်ရင်းမှူးဦးစီးတဲ့ကွန်မန်ဒိုရဲဘော်တွေက အနီးကပ်ပစ်ခတ်တိုက်ခိုက်ခဲ့တာလို့ PDF-ကျောရဲ့တာဝန်ခံ နွေဦးမေတ္တာက ပြောပါတယ်။

နှစ်ဘက်အပြန်အလှန်ထိတွေ့တိုက်ပွဲ နာရီဝက်လောက်ဖြစ်ပွားခဲ့ပြီး စစ်ကောင်စီဘက်က ထိခိုက်သေဆုံးသူရှိနိုင်ပေမယ့် အတိကျမသိခဲ့ရဘူးလို့ ဆိုပါတယ်။

စစ်ကောင်စီဘက်က ပြန်လည်ပစ်ခတ်ပေမယ့်လည်း PDF  ရဲဘော်တွေ ထိခိုက်မှုမရှိခဲ့ဘူးလို့ဆိုပါတယ်။

စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်မှာတော့ ညောင်ပင်သာရဲစခန်းမှာ တပ်စွဲထားတဲ့ စစ်ကောင်စီတပ်နဲ့ ရဲပူးပေါင်းတပ်တွေကို ဒေသတွင်းပြည်သူ့ကာကွယ်ရေးတပ်တွေက လက်နက်ကြီးနဲ့ နှစ်ကြိမ် ပစ်ခတ်တိုက်ခိုက်ခဲ့တယ်လို့သိရပါတယ်။

ဧပြီ ၁၆ ရက် မနက် ၁၀ နာရီလောက်မှာ ညောင်ပင်သာရဲစခန်းကို ပြည်သူ့ကာကွယ်ရေးပူးပေါင်းတပ်တွေက လက်နက်ကြီးနဲ့ အလုံး ၅၀ လောက် ၊ညနေ ၃နာရီမှာ လက်နက်ကြီးအလုံး ၅၀ လောက်နှစ်ကြိမ်ပေါင်း အလုံး၁၀၀ ကျော်ခန့် ပစ်ခတ်တိုက်ခိုက်ခဲ့တယ်လို့ National Revolutionary Guards မှ ပြန်ကြားရေးတာဝန်ခံ ဗိုလ်သူရိန်က ပြောပါတယ်။

"အဲ့ရဲစခန်းမှာက စစ်ကောင်စီ၊ ရဲ ပူးတွဲထိုင်တပ်စွဲထားတာပါ။ ညညဆိုမူးပြီး ရမ်းသန်း လျှောက်ပစ်တာတွေရှိတယ်။  ကျနော်တို့ နှစ်ကြိမ်ပေါင်း ၃ နာရီလောက် တိုက်ပွဲ ဖြစ်ပွားခဲ့ပြီး ရဲစခန်းထဲလည်း လက်နက်ကြီးလက်နက်ငယ်တွေနဲ ပြန်လည်ပစ်ခတ်ခဲ့ပါတယ်။ အကျဆုံးကတော့ များနိုင်ပါတယ်။ ကျနော်တို့လည်း သေချာတော့မသိဘူး"လို့  ဆိုပါတယ်။

အဆိုပါတိုက်ခိုက်မှုတွေကို National Revolutionary Guards NRG/Salingyi၊ Figther 9 Force Salingyi ချင်းတွင်း ဒိုင်းနမိုက်နဲ့ တခြား ညီနောင်မဟာမိတ်တပ်ဖွဲ့တွ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က အကျအဆုံးရှိနိုင်ပေမဲ့ အရေအတွက် အတည်ပြုနိုင်ခြင်းမရှိပါဘူး။

စစ်ကိုင်းတိုင်း၊ မြင်းမူမြို့နယ်မှာတော့ မန္တလေး-မုံရွာသွားကားလမ်းက မြင်းမူတိုးဂိတ်အနီး  စစ်ကောင်စီတပ်တွေကို ဧပြီ ၁၆ ရက် ညနေ ၅ နာရီလောက်က  လျှက်ဆားပုလင်း လက်ပစ်မိုင်းနဲ့ ပစ်ခတ်ခဲ့တယ်လို့ ဒေသခံကာကွယ်ရေး ခေါင်းဆောင်တွေက ပြောပါတယ်။

အပစ်ခံရတဲ့ စစ်ကောင်စီတပ်တွေဟာ PDF ဝတ်စုံတွ အသွင်ယူဝတ်ဆင်ကာ  ခရီးသွားကားတွေကို ငွေကြေးကောက်ခံတာလို့ မြင်းခြံခရိုင် တပ်ရင်း ၂ Zero ပြောက်ကျားတပ်ဖွဲ့  တပ်ရင်းမှူး ကိုသက်ကြီးက  ပြောပါတယ်။

“ပြည်သူတွေရဲ့ သတင်းပေးချက်အရ ကျနော်တို့ အနီးကပ်သွားပစ်ခတ်ခဲ့တာဗျ။ စစ်ကောင်စီက ရှစ်ယောက်တည်းပါ။ PDF တွေကို အမည်ဖျက်ချင်လို့ ကျနော်တို့ PDFဝတ်စုံတွေနဲ့ ငွေးတောင်ရမ်းနေတာ။ အဲဒါကို ကျနော်တို့က လျှက်ဆားပုလင်းတစ်လုံးနဲ့ သွားပစ်ခတ်ခဲ့တယ်။ စခ နှစ်ကောင်ကတော့ နေရာတင်သေတယ်။ ကျန်တဲ့အကောင်တွေကတော့ ပေါက်ပြဲဒဏ်ရာရသွားတယ်။”

အခုတိုက်ခိုက်မှုကို ZERO ပြောက်ကျားတပ်ဖွဲ့(မြင်းခြံ)တပ်ရင်း(၇)နဲ့ True Fighter တပ်ခွဲ(၃) တို့ပူးပေါင်းလုပ်ဆောင်တာဖြစ်ပြီး ဒီတိုက်ခိုက်မှုမှာ PDF ရဲဘော်တွေထိခိုက်မှုမရှိပေမဲ့  ဆိုင်ကယ်တစ်စီးဆုံးရှုံးခဲ့တယ်လို့ ကိုသက်ကြီးက ပြောပါတယ်။

Zero ပြောက်ကျားတပ်ဖွဲ့အနေနဲ့ ဧပြီ ၁၅ ရက်ကလည် မြင်းမူမြို့နယ်၊ ထီးဆောင်းရွာက စစ်ကောင်စီ စစ်ဆေးရေးဂိတ်ကို GPS စနစ်ပါ ၈၀ မမ၊ ၄၀ မမတွေနဲ့ သွားရောက် အလစ်ဝင်ရောက် ပစ်ခတ်ခဲ့လို့ စစ်ကောင်စီတပ်ဖွဲ့ဝင် ၁၂ဦး သေဆုံးခဲ့တယ်လို့ ဆိုပါတယ်။

အဆိုပါ တိုက်ခိုက်မှုအတွင်းမှာ ထိခိုက်သေဆုံးသူ အရေအတွက်အတိအကျကိုတော့  ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်း၊ ရေစကြိုမြို့နယ်မှာ စစ်ကောင်စီကား ၂ စီး တိုက်ခိုက်ခံရပြီး ပျူစောထီးခေါင်းဆောင် အပါအဝင် ၁၀ ယောက်သေဆုံးကာ လက်နက်ခဲယမ်းတွေ သိမ်းဆည်းရရှိခဲ့တယ်လို့ ပခုက္ကူခရိုင် တပ်ရင်း-၃ ရေစကြို-PDF က ဖေဖော်ဝါရီ ၇ ရက်နေ့မှာ ထုတ်ပြန်ပါတယ်။

ပခုက္ကူ-ရေစကြိုကားလမ်း ကိုရှိန်းဆီဆိုင်ရှေ့မှာ ဖေဖော်ဝါရီ ၄ ရက် ညနေ ၄ နာရီလောက်က အိမ်စီးကား ၂ စီးပေါ်မှာ လိုက်ပါလာတဲ့ စစ်ကောင်စီတပ်သားနဲ့ ပျူစောထီး ၁၄ ယောက်ကို ရေစကြို-PDFက စောင့်ကြိုတိုက်ခိုက်ခဲ့တာလို့ ရေစကြို-PDF တာဝန်ရှိသူတယောက်က ဒီဗွီဘီကို ပြောပါတယ်။

“အဲဒီတိုက်ခိုက်မှုအတွင်းမှာ ဟင်္သာကျေးရွာ ပျူစောထီးခေါင်းဆောင် အောင်နိုင်မိုး အပါအဝင် ၇ ယောက် ပွဲချင်းပြီးသေဆုံးကာ CRV ကားပေါ်မှာပါသွားတဲ့ ဒဏ်ရာရ စစ်(...) ၃ ယောက်ကတော့ ဆေးရုံပေါ်မှာ သေဆုံးသွားပြီး ဒဏ်ရာရသူ ၃ ယောက်နဲ့ နောက်တယောက်ကတော့ ခြေလျင်ထွက်ပြေးလွတ်မြောက်သွားတယ်။”

အဲဒီတိုက်ပွဲအတွင်းမှာ ကာဘိုင်သေနတ် ၆ လက်၊ MA4 သေနတ်တလက်၊ ကာဘိုင်ကျည်ဘောက် ၆ ခု၊ MA4 ကျည်ဘောက် ၅ ခု၊ ကျည်ဆန်အတောင့် ၂၄၀၊ လက်ပစ်ဗုံး ၃ လုံး၊ ၄၀ မမ ဗုံးသီး ၄ လုံးနဲ့ ဆက်စပ်ပစ္စည်းတွေ သိမ်းဆည်းရရှိခဲ့တယ်တယ်လို့လည်း ဆိုပါတယ်။

ပခုက္ကူခရိုင် တပ်ရင်း-၃ ဟာ အမှတ်-၁ စစ်ဒေသ၊ ပခုက္ကူခရိုင်ရဲ့ ကွပ်ကဲမှုအောက်မှာ ရာနှုန်းပြည့် တာဝန်ထမ်းဆောင်နေပြီး မိဘပြည်သူတွေအနေနဲ့လည်း စစ်ကောင်စီကို အားပေးကူညီတာတွေ၊ စစ်ကောင်စီတပ်သားတွေနဲ့ အနီးကပ်နေထိုင်သွားလာတာတွေ လုံးဝမပြုလုပ်ကြဖို့ မေတ္တာရပ်ခံ သတိပေးထားပါတယ်။

အလားတူ ရေစကြိုမြို့မှာ ဖေဖော်ဝါရီ ၅ ရက် မနက်ပိုင်းက ဘုန်းကြီးကျောင်းမှာ တပ်စွဲထားတဲ့ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၂ ယောက်သေဆုံးကာ အများအပြား ဒဏ်ရာရရှိခဲ့တယ်လို့ ပခုက္ကူခရိုင် အမှတ် ၁၀ တပ်ရင်း၊ တပ်ခွဲ ၂ - သွေးသောက်တော်လှန်ရေးတပ်ဖွဲ့ကနေ သိရပါတယ်။

ရေစကြိုမြို့၊ အမှတ် ၈ ရပ်ကွက်၊ ကပ်ကျော်ဘုန်းကြီးကျောင်းမှာ အထိုင်ချ တပ်စွဲထားတဲ့ စစ်သားနဲ့ ပျူစောထီး အယောက် ၅၀ ကျော်လောက်ကို ဖေဖော်ဝါရီလ ၅ ရက်နေ့ မနက် ၃ နာရီလောက်မှာ M16၊ AK47 သေနတ်တွေ၊ လက်ပစ်ဗုံးတွေနဲ့ သွားရောက်ပစ်ခတ် တိုက်ခိုက်ခဲ့တာလို့ သွေးသောက်တော်လှန်ရေးတပ်ဖွဲ့ တာဝန်ခံ ဗိုလ်ပန်က  ဒီဗွီဘီကို ပြောပါတယ်။

နှစ်ဖက် အပြန်အလှန် ထိတွေ့တိုက်ပွဲဖြစ်ပွားချိန် မိနစ် ၂၀ လောက် ကြာမြင့်ခဲ့ပြီး စစ်ကောင်စီဘက်က ၂ ယောက်သေဆုံးကာ အများအပြား ဒဏ်ရာရရှိခဲ့တယ်လို့ ဆိုပါတယ်။

“အဲဒီဘုန်းကြီးကျောင်းမှာ စစ်(...)၊ ပျူ(...)တွေ အင်အား ၂၀ ကျော်လောက်နဲ့ အထိုင်ချ တပ်စွဲထားတာ တလကျော်လောက်ရှိနေပြီဗျ။ ကျနော်တို့ သွားတိုက်တဲ့နေ့ကျမှ အင်အားက ၅၀ ကျော်လောက်ဖြစ်နေတာ။ သူတို့ဘက်က ၆၀ မမတွေ၊ လက်နက်ငယ်တွေနဲ့ ပြန်လည်ပစ်ခတ်ခဲ့ပေမဲ့ ကျနော်တို့ဘက်က ရဲဘော်တွေ ထိခိုက်မှုမရှိဘဲ ပြန်ဆုတ်တဲ့ အချိန်မှာသာ မတော်တဆ ထိခိုက်မိပြီး ရဲဘော် ၂ ယောက် ပွန်းပဲ့ဒဏ်ရာ ရရှိခဲ့တယ်” လို့ ဗိုလ်ပန်က ပြောပါတယ်။

ထိခိုက်ဒဏ်ရာရရှိတဲ့ ရဲဘော် ၂ ယောက်ကိုတော့ စခန်းပြန်ရောက်တဲ့အချိန်မှာ ဆေးထည့်ပေးထားပြီး ဒဏ်ရာအခြေအနေက စိုးရိမ်စရာမရှိဘူးလို့ ဆိုပါတယ်။

အဲဒီတိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်း ဂန့်ဂေါမြို့နယ်မှာတော့ ကျောမြို့က စစ်ရှောင် ၃၀၀ ကျော်လောက် စားနပ်ရိက္ခာနဲ့ အရေးပေါ်အကူအညီတွေ လိုအပ်နေတယ်လို့ ဂန့်ဂေါခရိုင် တပ်ရင်းအမှတ်-၁၉ PDF-ကျောက ပြောပါတယ်။

လွန်ခဲ့တဲ့ ၆ လကျော်လောက်က ကန့်သတ်ကျေးရွာဘက်ကို စစ်ကြောင်း ဝင်ရောက် တပ်စွဲထားတာကြောင့် ရွာလုံးကျွတ် ထွက်ပြေးလာကြကာ ဖြစ်သလို နေထိုင်နေကြတယ်လို့ PDF-ကျောရဲ့ တာဝန်ခံ နွေဦးမေတ္တာက ပြောပါတယ်။

အဲဒီကျေးရွာဟာ စစ်ကောင်စီရဲ့ က.ပ.စ ၂၃ နားမှာ တည်ရှိသလို စစ်တပ်က အထိုင်ချ တပ်စွဲထားလို့ စစ်ရှောင် ၃၀၀‌ လောက်ဟာ ဒီနေ့အထိ နေရပ်မပြန်ရဲဘူးလို့ ဆိုပါတယ်။

နွေဦးမေတ္တာက “သူတို့ရဲ့ စားဝတ်နေရေးအတွက် အနီးနားပတ်ဝန်းကျင်ရွာတွေကို နေ့တိုင်း အလှူပတ်ခံပြီး စစ်ဘေးရှောင်တွေဆီ ပို့ပေးတယ်။ ပြီးတော့ နီးစပ်ရာ ဟင်းသီးဟင်းရွက် ရာသီပေါ် သီးနှံလေးတွေနဲ့ ကျွေးမွေးနေရတာ” လို့ ပြောပါတယ်။

စစ်ရှောင်တွေအတွက် စားနပ်ရိက္ခာ၊ အဝတ်အထည်၊ စောင်၊ ခြင်ထောင်၊ ဆေးဝါးနဲ့ ကျန်းမာရေးစောင့်ရှောက်မှုတွေ လိုအပ်နေတယ်လို့ ဆိုပါတယ်။