စစ်ကိုင်းတိုင်း ကသာခရိုင် ဗန်းမောက်မြို့နယ် စီးမော်ကျေးရွာက နေအိမ်တွေကို အောက်တိုဘာ ၈ ရက် မနက် ၆ နာရီကျော်လောက် စစ်ကောင်စီတပ်ဖွဲ့က ထပ်မံမီးရှို့ဖျက်ဆီးနေကြတယ်လို့ ဒေသခံ တွေက ပြောပါတယ်။

ဒီနေ့မနက် ဒုတိယအကြိမ် မီးရှို့တာဖြစ်သလို အောက်တိုဘာ ၇ ရက်ကလည်း နှစ်ဘက် တိုက်ပွဲ ဖြစ်ပွားခဲ့တာ မရှိဘဲ နေအိမ် ၄ လုံးကို မီးရှို့ခဲ့တယ်လို့ ဒေသခံ တဦးက ပြောပါတယ်။

ဗန်းမောက်မြို့နယ်မှာ အောက်တိုဘာ ၃ ရက်ကနေ ၆ ရက်အထိ စစ်ကောင်စီတပ်နဲ့ KIA ၊ PDF ပူးပေါင်းအဖွဲ့တို့ နေ့စဥ်လိုလို ထိတွေ့တိုက်ပွဲဖြစ်နေပြီး စစ်ကောင်စီဘက်က လေကြောင်းကနေ တိုက်ခိုက်တာကြောင့် ပြည်သူတချို့ ဗုံးထိမှန်သေဆုံးခဲ့သလို နေအိမ်တချို့လည်း မီးလောင်ခဲ့ပါတယ်။

အောက်တိုဘာ ၅ ရက် ညနေပိုင်းက ချောင်းဦးမြို့နယ် ခင်မွန်ကျေးရွာကို ရောက်ရှိလာတဲ့ အင်အား ၁၀၀ လောက်ပါ စစ်ကောင်စီစစ်ကြောင်းဟာ အောက်တိုဘာ ၆ ရက်နဲ့ ၇ ရက် နှစ်ရက်ဆက် နေအိမ်တွေ မီးရှို့ဖျက်ဆီးခဲ့ပြီး ပြည်သူ ၄၀၀ လောက်ကို ဖမ်းဆီးခဲ့တယ်လို့ ဒေသခံတွေက ပြောပါတယ်။

ဖမ်းဆီးထားသူ ၄၀၀ လောက်ကို မင်းကျောင်းနဲ့ ချမ်းသာကြီးဘုန်းကြီးကျောင်းတွေမှာ NLD ပါတီဝင်တွေ၊ PDF နဲ့ ပတ်သက်ဆက်နွှယ်သူတွေအကြောင်း ရိုက်နှက်စစ်ဆေးမေးမြန်း တာကြောင့်  ​အောက်တိုဘာ ၇ ရက်က ပြည်သူ ၃ ယောက် သေဆုံးခဲ့တယ်လို့ ခင်မွန်ကျေးရွာမှ ထွက်ပြေးတိမ်းရှောင်လာသူ တဦးက ပြောပါတယ်။

“၃ ယောက်လောက်သေသွားတယ်။ ၄ ယောက်လောက်က အခြေအနေ ပြင်းထန်တယ်။ ယောကျ်ားလေးတွေ အများကြီးပဲ ဖမ်းပြီး နှိပ်စက်ခံနေရတာ။  ဝင်ကတည်းက ပြည်သူ  ၁၀၀ လောက် ဖမ်းတယ်။ နောက်ပိုင်းကျ တရွာလုံးကို ခြုံပြီး အကုန်ဖမ်းတာ။ ကျောင်းတွေထဲမှာ အကုန်ဖမ်းပြီးတော့ နေရာတွေ ခွဲထားတာ။ NLD မဲပေးတဲ့ အိမ်တွေကိုလည်း  မီးရှို့တယ်။” 

ချောင်းဦးမြို့နယ် ကံဇီးကျေးရွာမှာရှိတဲ့ စစ်ကောင်စီတပ်ဖွဲ့နဲ့ ပျူစောထီးအဖွဲ့ကို အောက်တိုဘာ ၇ ရက် မနက်ပိုင်းက ဒေသကာကွယ်ရေး‌အဖွဲ့တွေက ဝင်ရောက်တိုက်ခိုက်ခဲ့ရာမှာ အနီးကပ်အပြန်လှန်ပစ်ခတ်မှုဖြစ်ပြီး စစ်ကောင်စီတပ်နဲ့ပျူစောထီးအဖွဲ့ဝင် ၆ ယောက် သေဆုံး‌ခဲ့ တယ်လို့ ဒေသကာကွယ်အဖွဲ့တွေက ဆိုပါတယ်။

ဒေသကာကွယ်ရေးတပ်ဖွဲ့ဖြစ်တဲ့ Aung San Force (A.S.F) မှ တာဝန်ရှိသူတဦးက  "မဟာမိတ်တပ်ပေါင်းစုတွေနဲ့ ကံဇီး (ပျူရွာ) ကို တိုက်ခိုက်ခဲ့တာပါ။ သူတို့ဘက်က အင်အား ၄၀ လောက်ရှိတယ်။ ကျမတို့အဖွဲ့အနေနဲ့ကတော့ ဒါနဲ့ဆို ကံဇီး (ပျူရွာ) ဘက်က စစ်ကောင်စီတပ်ဖွဲ့ကို တိုက်ခိုက်တာ ၂ ကြိမ်မြောက်လို့ ပြောလို့ရပါတယ်" လို့ ပြောပါတယ်။

တိုက်ပွဲအတွင်း ချောင်းဦးမြို့နယ် ကင်ပွန်းတော်ပျူစောထီးစခန်းမှ စစ်ကူလာရောက်တဲ့ ပျူစောထီးအဖွဲ့အများပြားလည်း ထိခိုက်ဒဏ်ရာရရှိသွားခဲ့ပြီး ဒေသကာကွယ်ရေးပူးပေါင်းအဖွဲ့ အထိခိုက်မရှိ ဆုတ်ခွာနိုင်ခဲ့တယ်လို့ သိရပါတယ်။

ဖောင်းပြင်မြို့နယ်၊ သရောင်းကျေးရွာကိုလည်း အောက်တိုဘာ ၇ ရက်မနက်က အင်အား ၅၀ လောက်ပါ စစ်ကောင်စီတပ် ဝင်ရောက်စီးနင်းကာ  ရွာခံ လူငယ် ၄ ယောက်ကို ဖမ်းဆီးပြီး နေအိမ် ၄ လုံး မီးရှို့ခဲ့တယ်လို့ ဒေသခံတဦးက ပြောပါတယ်။ 

“အခု မနက်ပိုင်း ၆ နာရီလောက်  ရွာထဲ လာတယ်။ ရွာထဲမှာရှိတဲ့လူငယ် ၄ ဦးကို အိမ်ရှေ့မှာ ဈေးဆိုင် ဖွင့်တဲ့ချိန် ဖမ်းသွားတယ်။ အဲဒါပြီး လူနေအိမ် ၄ လုံးကို မီးရှို့သွားတယ်။”

ဖောင်းပြင်မြို့နယ်မှာ  စစ်ကောင်စီတပ်နဲ့ PDF တွေ ပြီးခဲ့တဲ့ရက်ပိုင်းက တိုက်ပွဲ ဖြစ်ပွားခဲ့ပြီး ဖောင်းပြင်၊ ဟုမ္မလင်း၊  ခန္တီးနဲ့  ကလေးမြို့နယ်တွေမှာ MPT ဖုန်းလိုင်းတွေ ဖြတ်တောက် ထား တယ်လို့ ဒေသခံတွေက ဆိုပါတယ်။

ကန့်ဘလူမြို့နယ်ထဲက ကိုးတောင်ဘို့တိုက်နယ်၊ ဇော်ချောင်းကျေးရွာကိုလည်း စစ်ကောင်စီတပ်က ၄ ကြိမ်တိုင် မီးရှို့ဖျက်ဆီးခဲ့ရာ အိမ်ခြေ ၂၀၀ ကျော်ရှိတဲ့အနက် ၉ အိမ်ပဲ ကျန်တော့တယ်လို့ ဇော်ချောင်းရွာ ဒေသခံက ပြောပါတယ်။

"မီးရှို့ဖျက်ဆီးခံရတာ ၃ ကြိမ်ရှိပါပြီ။ မနေ့က ၄ ကြိမ်မြောက် မီးရှို့ခံရတာပါ။ ဘာမှမကျန်ဝောာ့ဘူး အိမ် နည်းနည်းပဲကျန်တော့တယ်။" 

ဇော်ချောင်းရွာကို မီးရှို့ဖျက်ဆီးပြီးနောက် စစ်ကောင်စီတပ်သားတွေဟာ သင်တောရွာကို လက်နက်ကြီး၊ လက်နက်ငယ်‌တွေနဲ့ ပစ်ခတ် ဝင်ရောက်ခဲ့တယ်လို့ ဒေသခံတွေက ပြောပါတယ်။

အခုလိုဖြစ်စဉ်တွေနဲ့ပတ်သက်လို့  သီခြားအတည်ပြုနိုင်တာ မရှိသလို စစ်ကောင်စီဘက်ကလည်း ထုတ်ပြန်တာ မတွေ့ရသေးပါဘူး။

ရခိုင်ပြည်နယ်၊ မောင်တော-အငူမော်ကားလမ်းကို ပိတ်ထားတာကြောင့်  သြဂုတ် ၁၄ ရက် မှာ မောင်တောမြို့နယ်တောင်ပိုင်း ကျေးရွာ ၈ ရွာက စာသင်ကျောင်းတွေ ယာယီပိတ်ထားရတယ်လို့ ဒေသခံတွေဆီက သိရပါတယ်။

မောရဝတီကျေးရွာဒေသခံတယောက်က "ဟုတ်ပါတယ်။ မောရဝတီ (အ.ထ.က)ခွဲ ကျောင်း ဒီနေ့ပိတ်ထားပါတယ်။ ကားလမ်းပိတ်ထားတော့ မောင်တောက ဆရာ၊ ဆရာမတွေ မလာနိုင်တော့ ကျောင်းပိတ်ထားရတာလို့သိရတယ်" လို့ပြောပါတယ်။

မောင်တောဒေသ၌  ဒေသထုံးစံအရ ဝါတွင်းကာလ အဖိတ်နေ့ နဲ့ ဥပုသ်နေ့တွေမှာ စာသင် ကျောင်းတွေ ပိတ်ထားတာကြောင့် အပတ်စဉ် စနေနေ့ နဲ့ တနင်္ဂနွေနေ့တွေမှာ ကျောင်းတက်နေရ တာလည်း ဖြစ်ပါတယ်။

မောင်တော-အငူမော်လမ်းမှာ တိုက်ပွဲတွေ ပြင်းပြင်းထန်ထန်ဖြစ်နေလို့ မောင်တောမြို့နယ် တောင်ပိုင်းကျေးရွာတွေဖြစ်တဲ့ ဗောဓိကုန်း၊ ခရေမြိုင်၊ ကင်ချောင်း၊ ရွှေဗဟို၊ သရီကုန်းဘောင်၊ ကိုင်ကြီး၊ မောရဝတီ၊ ဥဒေါင်းရွာတို့က ကျောင်းတွေကို ပိတ်ထားရတာပါ။

အင်းဒင်ကျေးရွာမှာတော့ အထက်တန်းဖွင့်ထားပေမယ့် ကျောင်းတက်ရောက်သူ တယောက်မှ မရှိဘူးလို့ ဒေသခံတွေက ပြောပါတယ်။

သြဂုတ် ၁၃ ရက် မနက် ၈ နာရီကျော်က အငူမော် - မောင်တော ကားလမ်းပေါ်၊ ရသေ့တောင်မြို့နယ် ဒုံးပိုက်နဲ့ ချိန်ခါလိန်ကျေးရွာကြားမှာ စစ်ကောင်စီတပ်နဲ့ အေအေတို့ တိုက်ပွဲ ပြင်းပြင်းထန်ထန်ဖြစ်ခဲ့ပြီး မောင်တောမြို့နယ် မောရဝတီစစ်ဗျူဟာကနေ စစ်ကူလာတဲ့ စစ်ကား တစီးဟာလည်း ကျောက်ပန်းဒူရွာနားမှာ အေအေရဲ့ မိုင်းခွဲတိုက်တိုက်ခိုက်ခံခဲ့ရပါသေးတယ်။