တနင်္သာရီတိုင်း၊ မြိတ်ခရိုင်၊ ကျွန်းစုမြို့နယ်ရှိ ပင်လယ်ဒေသတချို့မှာ အာဏာဖီဆန် CDM လုပ်ထားတဲ့ ကျောင်းဆရာ၊ ဆရာမတွေကို စစ်ကောင်စီရေတပ်က လိုက်လံဖမ်းဆီးဖို့ ရှာဖွေနေတယ်လို့ ဒေသခံပြည်သူတွေဆီကနေ သိရပါတယ်။
အခုရက်ပိုင်းအတွင်း ကျွန်းစုမြို့နယ် ပင်လယ်ဒေသတွေမှာ စစ်ကောင်စီရေတပ်က စစ်သားတွေနဲ့ သူတို့လက်အောက်ခံ လူတချို့ကနေပြီး CDM ကျောင်းဆရာ၊ ဆရာမတွေကို ဖမ်းဆီးမလို့ဆိုပြီး လိုက်လံမေးမြန်းနေကြတယ်လို့ ဒေသခံတဦးက ပြောပါတယ်။
“သူတို့ရေတပ်က စစ်သားတွေနဲ့ ပါလာတဲ့ အုပ်ချုပ်ရေးပိုင်းထဲက လူတယောက်က လိုက်မေးနေတယ်။ ဒီရွာတွေမှာ CDM လုပ်ထားတဲ့သူ ရှိမရှိပေါ့။ တကယ်လို့ ရှိတယ်ဆိုရင် ရေတပ်ကနေ ဖမ်းဖို့ရှိတယ်လို့ ပြောတယ်တဲ့။ အနီးအနားက ရွာတွေကိုလည်း ရေတပ်က စစ်သားတွေ ဝင်ပြီးစစ်ဆေးတာတွေ လုပ်နေတယ်” လို့ ကျေးရွာနေ ဒေသခံတဦးက ပြောပါတယ်။
အရင်ကတည်းက ကျွန်းစုမြို့နယ်ထဲရှိ ပင်လယ်ဒေသ အနီးတဝိုက်မှာ စစ်ကောင်စီရေတပ် အခြေချထားပြီး ဒေသခံတွေရဲ့ ရေလုပ်ငန်းတချို့ကို လက်ဝါးကြီးအုပ် ခြယ်လှယ်တာတွေရှိတယ်လို့ သိရပါတယ်။
ပင်လယ်ရေလုပ်ငန်း လုပ်ကိုင်သူတဦးက “ရေတပ်က ဒီပင်လယ်ပိုင်းဒေသတွေနားမှာ ရှိနေတာကြာပြီ။ ပင်လယ်ရေလုပ်ငန်းတွေမှာ လုပ်ငန်းရှင်တွေနဲ့ လက်ဝါးကြီး အုပ်ထားတာတွေရှိတယ်။ ဂျင်းကန်လုပ်ငန်းတွေမှာဆို သူတို့ရေတပ်က ခြယ်လှယ်ထားတာတွေရှိတယ်။ ရွာတွေဝင်ပြီး ဒေသခံတွေဆီက ပိုက်ဆံတောင်းတာတွေပါ ရှိနေသေးတယ်” လို့ ပြောပါတယ်။
ဒါ့အပြင် စစ်ကောင်စီရေတပ်က သူတို့ဂျင်းကန်အနီး ဂျင်းခရုလာကောက်တဲ့ ပင်လယ်ရေလုပ်သားတချို့ကို သေနတ်နဲ့ လိုက်လံပစ်ခတ်ခဲ့တယ်လို့လည်း ပြောပါတယ်။
အခုလိုမျိုး စစ်ကောင်စီရေတပ်က ကျေးရွာတွေထဲ ဝင်ရောက်စစ်ဆေးမေးမြန်းနေလို့ ကျေးရွာနေ ဒေသခံတွေ စိုးရိမ်ထိတ်လန့်နေတယ်လို့ သိရပါတယ်။
ပုစွန်ခြောက်တွေ ဈေးကောင်းရလာပေမဲ့ ဒီဇယ်ဆီဈေးနှုန်း အဆမတန် မြင့်တက်လာတဲ့အတွက် တနင်္သာရီတိုင်း၊ ကျွန်းစုမြို့နယ်ရှိ ပင်လယ်ဒေသတွေက ရေလုပ်ငန်းရှင်တချို့မှာ အမြတ်ငွေ သိပ်မကျန်ဘဲ လုပ်ငန်းအခက်အခဲတွေ ရှိနေတယ်လို့ သိရပါတယ်။
စစ်အာဏာသိမ်းပြီးနောက်ပိုင်း ပုစွန်ခြောက်ဈေးနှုန်းတွေ ပြီးခဲ့တဲ့နှစ်ကစပြီး ဈေးကောင်းရရှိခဲ့ပေမဲ့ အလုပ်သမားငှားရမ်းခတွေ ပေးဆောင်ရတဲ့အပြင် လုပ်ငန်းမှာ အသုံးပြုတဲ့ ဒီဇယ်ဆီဈေးနှုန်းတွေ အဆမတန် မြင့်မားလာတာကြောင့် လုပ်ငန်းလုပ်ကိုင်သူတချို့ အခက်အခဲရှိနေတယ်လို့ ပုစွန်ခြောက်လုပ်ငန်း လုပ်ကိုင်သူတဦးက ပြောပါတယ်။
“ဈေးက တက်လာတယ်ဆိုပေမဲ့ ဒီဇယ်ဆီဈေးက အဆမတန် တက်နေပြီးတော့ အလုပ်သမားခတွေကလည်း ရှိသေးတယ်လေ။ အဓိကတော့ ဒီဇယ်ဈေးတွေ အဆမတန် တက်နေလို့ပါ။ ရွာမှာက အားလုံးက ရေလုပ်ငန်းပဲ လုပ်ကိုင်နေကြတော့ စက်လှေတွေ အဓိကအသုံးပြုနေရတာပေါ့လေ။ ပုစွန်ပိုက်ဆွဲဖို့ ပင်လယ်ထွက်ရင် စက်လှေတွေနဲ့ ထွက်ရတော့ ရလာတဲ့ ပုစွန်တွေနဲ့ သွားရတဲ့ခရီးစရိတ်က မကိုက်ဘူးဖြစ်နေတယ်” လို့ ရေလုပ်ငန်းရှင်တဦးက ပြောပါတယ်။
ပုစွန်ခြောက်ဈေးနှုန်းဟာ အရင်က တပိသာ ကျပ် ၃၀,၀၀၀ ကျော်သာ ရရှိပေမဲ့ ပြီးခဲ့တဲ့နှစ်ကစပြီး တပိသာကို ကျပ် ၆၀,၀၀၀ ကျော်အထိ ဈေးကောင်းရရှိလာတယ်လို့ သိရပါတယ်။
ဒါ့အပြင် ဒီဇယ်ဆီဈေးနှုန်းမှာ စစ်အာဏာမသိမ်းခင်က ၅၅ ဂါလံပါတဲ့ ဒီဇယ်ဆီ တပီပါကို ကျပ် ၂ သိန်းခန့်သာ ရှိခဲ့ပေမဲ့ စစ်အာဏာသိမ်းပြီးနောက် ဒီဇယ်ဆီတပီပါကို ကျပ် ၇ သိန်းကျော်အထိ ဈေးနှုန်းထိုးတက်လာတယ်လို့ သိရပါတယ်။
