စစ်ကိုင်းတိုင်း ကျွန်းလှမြို့နယ်က ပြည်သူတွေကို စစ်ကောင်စီက ပြည်သူ့စစ်သင်တန်း မတက်မနေရ အတင်အကျပ်စေခိုင်းပြီး စစ်တိုက်ရာမှာလည်း ပါဝင်ခိုင်းနေတာကြောင့် ဒေသခံတွေ မကျေမနပ် ဖြစ်နေကြပါတယ်။
စစ်တပ်က ပြည်သူတွေကို အတင်းအကျပ်စေခိုင်းရာမှာ အဓိက ဦးဆောင်သူတွေက ဘုန်းကြီးဦးဝါသဝနဲ့ မကျီးအင်းဆရာတော်တို့က ပြုလုပ်နေတာလို့ ဒေသခံတွေက ပြောပါတယ်။
“ပထမက ပျူသင်တန်းမတက်မနေရ တက်ခိုင်းပြီး ကင်းစောင့်ခိုင်းတာတွေ လုပ်ခိုင်းတယ်ဗျ။ ကင်းစောင့်ရတာက ဘာမှမဖြစ်သေးဘူး၊ အခုဆိုရင် စစ်ကြောင်းထွက်ရင်လည်း ကျနော်တို့ကို မလိုက်မနေရခေါ်တယ်။ အဲလို စစ်ကြောင်းလိုက်ရပြီဆိုရင်လည်း သူတို့ရဲ့ ရှေ့ကနေ သွားခိုင်းတယ်။ ပြောခြင်တာက သူတို့က စစ်တိုက်မသွားရင်လည်း ရွာထဲမှာ အရက်သောက်၊ ဖဲရိုက်ပြီး စခန်းထဲ နှပ်နေကြတာ။ ကျနော်တို့ကတော့ ကင်းစောင့်၊ မြေကျင်းတူး အဲတာတွေလုပ်ရတယ်။ အဲတာတွေမလုပ်နိုင်ဘူးဆိုရင်လည်း ဘုန်းကြီးက ရွာအပြင်ထုတ်မယ်ဆိုလို့ လုပ်နေရတာ၊ အခုလို လုပ်ကိုမလုပ်ခြင်တော့ဘူး” လို့ ဒေသခံတဦးက ပြောပါတယ်။
အတင်းအကျပ် စေခိုင်းခံနေရတဲ့ ရွာတွေကတော့ ကျွန်းလှမြို့နယ် စံပြရွာ၊ သဖန်းဆိပ်ရွာ၊ အုတ်ဖိုရွာက ပြည်သူအများစုဖြစ်တယ်လို့ ဆိုပါတယ်။
ဒေသခံ နောက်တဦးက “ကျနော်တို့ရွာတော့ ပျူစောထီးတွေက ခိုင်းနေတာဗျ။ အလှည့်ကျ ဆယ်အိမ်စုလိုက် ကင်းစောင့်ရမယ်ပေါ့နော်။ ကင်းမစောင့်ချင်တဲ့လူတွေက တောထဲမှာ နေကြပေါ့။ မြို့မှာနေရင်တော့ ကင်းစောင့်ရမယ် အဲ့လိုမျိုး ပြောပြီး ခေါ်ခိုင်းနေတာဗျ။ ကျနော်တို့ပြည်သူတွေကတော့ ဒီခေတ်ကြီး မြန်မြန်ပြီးပါစေလို့ ဆုတောင်းမိတယ်။ နှစ်ဖက်ကြားမှာ နေရတာ အခက်သားဗျ။ ပြည်သူဘဝကတော့ နီးရာဓားကြောက်နေရတယ်” လို့ ပြောပါတယ်။
ဒီနေ့ မတ် ၁၃ ရက်နေ့မှာလည်း ကျွန်းလှမြို့၊ ပျဉ်းမမြိုင် ရပ်ကွက် ဒေသခံတွေကို အစည်းအဝေး တရပ်လုပ်ပြီး အလှည့်ကျ ကင်းစောင့်ခိုင်းတဲ့ကိစ္စနဲ့ ပတ်သက်ပြီး ဆွေးနွေးနေကြတယ်လို့ ဒေသခံတွေက ပြောပါတယ်။
စစ်ကိုင်းတိုင်း ကျွန်းလှမြို့နယ်မှာ ပြည်သူ့စစ်လို့ခေါ်တဲ့ ပျူစောထီးတွေ ဖြစ်လာဖို့ ဦးဝါသဝလို့ခေါ်တဲ့ ဘုန်းကြီးက ဦးဆောင်နေပြီး ကန့်ဘလူမြို့နယ်အတွင်းက ကျေးရွာတွေကိုလည်း စစ်ကောင်စီတပ် နယ်မြေရှင်းလင်းရေးလုပ်တိုင်း ရွာတွေကို မီးရှို့ ဖျက်ဆီးနေကြတယ်လို့ ကျွန်းလှမြို့နယ်ပြည်သူတွေက ပြောပါတယ်။
စစ်ကိုင်းတိုင်း၊ ကျွန်းလှမြို့နယ်၊ သဖန်းဆိပ်ဆည်အနောက်ဘက် ကျေးရွာ ၁၁ ရွာလောက်ကို နိုဝင်ဘာလ ၁၆ ရက်နေ့ကစတင်ကာ ဒီနေ့အထိ အကြမ်းဖက်စစ်တပ်က စစ်ကြောင်းထိုးပြီး မွှေနှောက်ဖျက်ဆီးနေတာကြောင့် ပြည်သူ ၅၀၀၀ ကျော် စစ်ဘေးရှောင်နေကြရတယ်လို့ ဒေသခံတွေဆီက သိရပါတယ်။
ဒါ့အပြင် ပြည်သူ ၂ ဦးနဲ့ PDF ၁ ဦး ပစ်သတ်ခံရကာ စစ်ဘေးရှောင်အချို့လည်း စားဝတ်နေရေး ခက်ခဲမှုတွေနဲ့ ကြုံတွေ့နေရတယ်လို့ ဒေသခံပြည်သူ့ကာကွယ်ရေး တပ်ဖွဲ့တွေဆီက သိရပါတယ်။
“ဆည်အနောက်ဘက်ခြမ်းက ရွာတွေကို အင်အား ၃၀၀ နဲ့ ၄၀၀ ကြားရှိတဲ့ အကြမ်းဖက်စစ်တပ်က စစ်ကြောင်းထိုး ဖျက်ဆီးတယ်၊ ပစ်ခတ်တယ်။ တစ်ချို့အိမ်တွေဆို ရှေ့ဆက်နေစရာ စားစရာမရှိအောင်ဖျက်ဆီးခံရတယ်။ တောင်နီရွာက အသက် ၇၀ ကျော် အဖိုးကြီးတစ်ယောက် နှလုံးရပ်သေဆုံးခဲ့တယ်။ ဥသျှစ်ကုန်းကျေးရွာက အပြစ်မဲ့ပြည်သူရွာသားတစ်ဦး နဲ့ ပကဖ အဖွဲ့ဝင်တစ်ဦးကိုလည်း နှိက်စက်သတ်ဖြတ်ခဲ့တယ်” လို့ ဒေသခံပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောပါတယ်။
အကြမ်းဖက်စစ်တပ်ဟာ မော်တုံကျေးရွာကနေအိမ် ၉ လုံး၊ ကုန်းစည်းကျေးရွာက နေအိမ် ၂ လုံး၊ ပေပင်ချောင်ကျေးရွာကနေအိမ် ၇ လုံး စုစုပေါင်းနေအိမ် ၁၈ လုံးကို ဆက်လက်နေလို့မရတဲ့ ထိအောင် ဖျက်ဆီးသွားကြတယ်လို့ ဆိုပါတယ်။
အိမ်တွင်းပစ္စည်းတွေကို မွှေနှောက်ဖျက်ဆီးခံရတဲ့ အိမ်ခြေက ၄၀ လောက်အထိ ရှိကာ မော်တုံနဲ့ ပေပင်ချောင်းကျေးရွာ နှစ်ရွာကတော့ ရွာလုံးကျွတ်အမွှေခံရတယ်လို့ သိရပါတယ်။
ကျွန်းလှမြို့နယ် သဖန်းဆိပ်ဆည်အနောက်ဘက်ခြမ်းက မော်တုံ၊ ပေပင်ချောင်၊ ဝေလမူ၊ ကုန်းစည်း၊ တောင်နီ၊ ဥသျှစ်ကုန်း၊ လိပ်ဆင်းတောင်၊ သက္ကယ်ကျင်း၊ မော်ကယ်၊ သပူတော၊ ညောင်ပင် စတဲ့ကျေးရွာ ၁၁ ရွာကို စစ်ကြောင်းထိုး မွှေနှောက်ဖျက်ဆီးခဲ့တာကြောင့် သိန်း ၇၀၀၀ ဖိုးလောက် ပျက်စီးဆုံးရှုံးခဲ့တယ်လို့ သိရပါတယ်။
ဒါ့အပြင် စစ်တပ်ထောင်ခဲ့တဲ့ မိုင်းနင်းမိလို့ ဥသျှစ်ကုန်း ရွာသားတစ်ဦး ဒဏ်ရာရရှိခဲ့ပြီး ပျောက်ဆုံးနေတဲ့ ရွာသားတွေလည်း ရှိနေတဲ့အတွက် ဆက်လက်ရှာဖွေနေကြဆဲဖြစ်တယ်လို့ ဒေသခံပြည်သူ့ကာကွယ်တပ်ဖွဲ့ဆီက သိရပါတယ်။
