စစ်ကိုင်းတိုင်း၊ ကျွန်းလှမြို့နယ်ထဲက ပျူကင်းစခန်းတစ်ခုကို ဧပြီ ၁၄ ရက်နေ့ မနက်ခင်း ၃ နာရီလောက်က ဝင်ရောက်တိုက်ခိုက်ခံရပြီး ပျူစောထီး ၆ ဦးသေဆုံးသွားတယ်လို့ ဒေသခံတွေထံက သိရပါတယ်။
အဆိုပါအပစ်ခံရတဲ့ ပျူကင်းစခန်းဟာ ကျွန်းလှမြို့နယ်က ပျူကျေးရွာဖြစ်တဲ့ ရွှေတောင်ကျေးရွာ ကင်းစခန်းဖြစ်တယ်လို့လည်း ဒေသခံတွေက ပြောပါတယ်။
ရွှေတောင်ဒေသခံရွာသားတစ်ဦးက “ပျူ ၆ ယောက်သေပြီး လက်နက်တွေလည်း ပါသွားတယ်လို့ သိရတယ်။ ဘာ့ကြောင့် တိုက်ကြတာလဲဆိုတော့ သိတဲ့အတိုင်းပဲလေ။ ပြည်သူမကြိုက်တဲ့ လုပ်ငန်းကိုလုပ်နေကြတာဆိုတော့ အခုလိုတိုက်ပွဲတွေကတော့ ဖြစ်နေကြဦးမှာပဲ။ ကျနော်တို့ ဒီရွာထဲနေရတာလည်း ပျူတွေရဲ့အနိုင်ကျင့်တာလည်းခံရတယ်။ ဒေသခံတယောက်အနေနဲ့ အမေစု အမြန်ဆုံးလွတ်မြောက်ပြီး ဒီအရေးအခင်းကြီးမြန်မြန်ပြီးမြောက်ပါစေလိုပဲ ဆုတောင်းပါတယ်လို့ ပြောပါတယ်။
ဒီတိုက်ခိုက်မှုကို ကျွန်လှမြို့နယ်တပ်ရင်း ၁ နဲ့ ကျွန်းလှမြို့နယ် တော်လှန်ရေး အင်အားစုတွေက တိုက်ခိုက်တာလို့ တော်လှန်ရေးအင်အားစုအဖွဲ့ဝင်တွေက ပြောဆိုပေမဲ့ သက်ဆိုင်ရာ ကျွန်းလှမြို့နယ် တပ်ရင်း ၁ အဖွဲ့ဘက်ကတော့ ထုတ်ပြန်ခြင်းမရှိသေးပါဘူး။
တိုက်ခိုက်မှုဖြစ်စဉ် အသေးစိတ်သိရဖို့ ကြိုးစားနေပေမဲ့ ဒေသတွင်း ဖုန်းလိုင်းနဲ့ အင်တာနက်အခက်အခဲ ရှိနေတာကြောင့် ဆက်သွယ်မေးမြန်းလို့ မရသေးပါဘူး။
ကျွန်းလှမြို့နယ်မှာ အခုလို ပျူဘက်က ၆ ဦးကျဆုံးကာ လက်နက်တွေပါ ပါသွားတာကြောင့် ပြည်သူ့ကာကွယ်ရေးအဖွဲ့နဲ့ စစ်ကောင်စီတပ်တို့ စစ်ရေး တင်းမာနေပြီး တိုက်ပွဲဖြစ်ပွားနိုင်တယ်လို့ ဒေသခံတွေက ပြောပါတယ်။
စစ်ကိုင်းတိုင်း၊ ကျွန်လှမြို့နယ်အရှေ့ခြမ်း ကျောက်အိုင်အုပ်စုက ကျေးရွာသုံးရွာကို စစ်ကောင်စီတပ်နဲ့ ပျူစောထီးတွေက ဧပြီ ၉ ရက် မနက်မှာ ရောက်လာပြီး ပျူသင်တန်း မဖြစ်မနေ တင်ရောက်ရမယ်လို့ ခြိမ်းခြောက်ခဲ့တယ်လို့ ဒေသခံတွေက ပြောပါတယ်။
ကျောက်အိုင်အုပ်စုအတွင်း ခြိမ်းခြောက်ခံရတဲ့ ကျေးရွာတွေကတော့ ကျောက်အိုင်ရွာ၊ ငှက်ပျောတောရွာနဲ့ တပေါင်ရွာတို့ ဖြစ်တယ်လို့ ဆိုပါတယ်။
ကျွန်လှဒေသခံတဦးက “ကျနော်တို့ရွာတွေက ပျူရွာတွေရဲ့ ကြားထဲရောက်နေတော့ အတော်လေးစိတ်ပျက်မိတယ်ဗျ။ သူတို့က ကိုယ်တွေ ကျေးရွာတွေအပေါ် မေတ္တာထားတာ လိုလိုနဲ့ PDF နဲ့ ရန်တိုက်ပေးတဲ့ပုံစံ လာလုပ်တယ်။ ဘယ်လိုပုံစံလဲဆိုတော့ ပျူသင်တန်းကိုတပတ်အတွင်း တက်ရမယ်ပေါ့။ တရွာကို အမျိုးသား ၆၀ တက်ရမယ်လို့ ကန့်သတ်တယ်။ နောက်ပြီး ရွာခံတွေက ငြင်းဆန်ပေမဲ့ သူတို့က ခင်ဗျားတို့ ဒီပျူသင်တန်း မတက်ခြင်လည်း တက်ရမယ်။ ပျူသင်တန်း မတက်ခြင်ဘူးဆိုတဲ့ ကောင်တွေကိုလည်း လည်ပင်းညှစ်သတ်ပြီး နတ်ပြည်တင်မယ်။ ပျူသင်တန်မတက်ဘူးဆိုရင် အခုလိုရွာတွေကို PDF မီးရှို့လာလိမ်မယ်ဆိုပြီး စစ်ကောင်စီက မီးရှို့ထားခဲ့တဲ့ ရွာတွေရဲ့ ဓာတ်ပုံတွေ ထုတ်ပြပြီး ခြိမ်းခြောက်တာတွေလည်း လုပ်တယ်” လို့ ပြောပါတယ်။
အဆိုပါ စစ်ကောင်စီရဲ့ တအိမ်တယောက်ပျူသင်တန်းတက်ရမယ်ဆိုတဲ့ အစည်းအဝေးကို ဒေသခံအမျိုးသားတွေ မတက်ရောက်ဘဲ အမျိုးသမီးအများစု တက်ရောက်တာကြောင့် စစ်ကောင်စီနဲ့ ပျုသောထီးခေါင်းဆောင်တွေက “ခင်များတို့ရွာဟာ မုဆိုးမတွေ နေတဲ့ရွာလား” ဆိုပြီး ပြောဆိုခဲ့တယ်လို့ ဒေသခံတွေက ပြောပါတယ်။
အခုလို ပျူသင်တန်းတွေ တက်ရောက်ခိုင်းနေတာကြောင့် ကျွန်းလှ၊ ကန့်ဘလူ ဒေသတွင်းကျေးရွာက အမျိုးသားတချို့ဟာ ကျေးရွာအတွင်းမှာ မနေရဲတော့တာကြောင့် ဖားကန့် ရွှေမှော်တွေမှာ တိမ်းရှောင်ရင်း အလုပ်လုပ်ကိုင်လာသူတွေလည်း တနေ့တခြား များပြားလာတယ်လို့ ဆိုပါတယ်။
