စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်နဲ့ ယင်းမာပင်မြို့နယ်ကြားမှာရှိတဲ့ ကျောက်မျက်တောင် စစ်တပ်စခန်းငယ်ကို အောင်မြင်စွာ သိမ်းပိုက်နိုင်ခဲ့တဲ့ ယင်းမာပင်မြို့နယ် PDF ရဲဘော်တွေကို ဒေသခံ ပြည်သူတွေက ဂုဏ်ပြုကြိုဆိုခဲ့ကြတယ်လို့ ယင်းမာပင်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

ဆားလင်းကြီးမြို့နယ်နဲ့ ယင်းမာပင်မြို့နယ်ကြားမှာရှိတဲ့ ကျောက်မျက်တောင်ပေါ်မှာ တပ်စွဲထားတဲ့ စစ်ကောင်စီတပ်ရဲ့ နေရာကို PDF မဟာမိတ် ပူးပေါင်းတပ်ဖွဲ့က ဖေဖော်ဝါရီ ၁၉ ရက် ညနေပိုင်းက ဝင်ရောက်စီးနင်း သိမ်းပိုက်နိုင်ခဲ့တာ ဖြစ်ပါတယ်။

ထိတွေ့တိုက်ပွဲဖြစ်ပွားချိန် တနာရီခွဲအတွင်းမှာ နှစ်ဖက် အပြန်အလှန်ပစ်ခတ်မှု ရှိခဲ့ပြီး စစ်ကောင်စီဘက်က ထိခိုက်သေဆုံးရှိခဲ့သလို M-14 နင်းမိုင်းအလုံး ၄၀၊ စနစ်တံပါ MG-1 ပလတ်စတစ်လက်ပစ်ဗုံး အလုံး ၃၀၊ MM-5 ရှေ့ထွက်မိုင်း အလုံး ၅၀ နဲ့ Anti Drone Gun တလက် သိမ်းဆည်းရမိခဲ့တယ်လို့ KLG PDF တာဝန်ရှိသူတဦးက ဒီဗွီဘီကို ပြောပါတယ်။

တိုက်ပွဲအတွင်းမှာ မဟာမိတ်တပ်ဖွဲ့က ရဲဘော်တဦး ကျဆုံးခဲ့ပြီး နောက်ထပ် ရဲဘော်တဦးလည်း အသက်အန္တရာယ် မစိုးရိမ်ရဒဏ်ရာ ရရှိခဲ့တယ်လို့ ဒီဗွီဘီကို ပြောပါတယ်။

အခုတိုက်ပွဲအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကိုတော့ ဒီဗွီဘီအနေနဲ့ သီးခြားအတည်မပြုနိုင်သလို စစ်ကောင်စီဘက်ကလည်း သတင်းမထုတ်ပြန်ထားပါဘူး။

စစ်ကိုင်းတိုင်း၊ ကနီမြို့နယ်၊ ချင်းတွင်းမြစ်ကြောင်းတလျှောက် ကုန်းကြောင်း၊ ရေကြောင်း ထိုးလာတဲ့ စစ်ကောင်စီ စစ်ကြောင်းတွေနဲ့ တော်လှန်ရေးတပ်ဖွဲ့တွေအကြား တိုက်ပွဲ တစ်လနီးပါး ကြာမြင့်ခဲ့ပြီးနောက် ကာကွယ်ရေးတပ်ဖွဲ့တွေ အောင်ပွဲဆင်နိုင်ခဲ့တယ်လို့ Myanmar defense force က ထုတ်ပြန်ပါတယ်။

ပြီးခဲ့တဲ့ ဒီဇင်ဘာလ ပထမပတ် ကတည်းက ကနီမြို့နယ် ချင်းတွင်း မြစ်ကြောင်းမှာ ကာကွယ်ရေးတပ်ဖွဲ့တွေနဲ့ စစ်ကောင်စီကြား စတင် တိုက်ပွဲပြင်းထန်ခဲ့ပြီး စစ်ကောင်စီဘက်မှ စစ်သား ၅၀ ကျော် သေဆုံးကာ လက်နက်ကြီး၊ငယ်တွေလည်း သိမ်းဆည်းရမိသလို ကာကွယ်ရေးတပ်ဖွဲ့တွေဘက်က ရဲဘော် ၅ ဦးကျဆုံးပြီး ၁၀ ဦးထက်မနည်း ထိခိုက်ဒဏ်ရာ ရရှိခဲ့တယ်လို့ ဆရာစံ -PDF ကပြောပါတယ်။

စစ်ကောင်စီတပ်တွေ အရှုံးနဲ့ ပြန်ဆုတ်သွားပြီး‌နောက် အောင်ပွဲနဲ့ပြန်လာကြတဲ့ တော်လှန်ရေးတပ်ဖွဲ့ဝင်တွေကို ကနီမြို့နယ်အတွင်းရှိ ကျေးရွာ ၂၀ လောက်က ပြည်သူ ထောင်ချီဟာ စုရပ် ၇ ခုမှာ စုဝေးကာ အောင်သပြေပန်း၊ အိုးစည်ဒိုးပတ် အကအခုန်တွေနဲ့ သောင်းသောင်းဖြဖြကြိုဆိုကြပြီး၊ အစားအသောက် ဧည့်ခံ ကျွေးမွေးတာနဲ့ တော်လှန်ရေးထောက်ပံ့ငွေတွေ လှူဒါန်းခဲ့ကြတယ်လို့ သိရပါတယ်။

အောင်ပွဲပြန် ကြိုဆိုပွဲကို MDF နဲ့ ဒေသခံကာကွယ်ရေးတပ်ဖွဲ့ ၆ ဖွဲ့ လောက်က ပြည်သူ့ရဲဘော် ၁၀၀ ကျော် တက်ရောက်ကာ ပြည်သူ့မေတ္တာ ခံယူခဲ့ကြတယ်လို့ ဖော်ပြထားပါတယ်။