ပဲခူးတိုင်းအနောက်ပိုင်း၊ အုတ်ဖိုမြို့နယ် အရှေ့ဘက် ပဲခူးရိုးမအနီးမှာတည်ရှိတဲ့ ကြို့ကိုးပင်ကျေးရွာက ဒေသခံပြည်သူတွေပိုင်ဆိုင်တဲ့ လူနေအိမ် ၁၀ လုံးထက်မနည်းကို စစ်ကောင်စီတပ်သားတွေက ဒီဇင်ဘာ ၁၃ ရက်နေ့၊ မွန်းလွဲပိုင်းမှာ မီးရှို့ဖျက်ဆီးသွားကြတယ်လို့ ဒေသခံတွေက ပြောပါတယ်။
စစ်ကောင်စီတပ်သားတွေဟာ ဒီဇင်ဘာ ၁၃ ရက်မနက်ပိုင်းကတည်းက ကြို့ကိုးပင်ကျေးရွာ ရဲ့ အပြင်ကနေ ရွာကိုဝိုင်းထားကြပြီး ညနေ ၃ နာရီအချိန်မှာ လူနေအိမ်တွေကို စတင်မီးရှို့ခဲ့ ကြတယ်လို့ ဒေသခံတဦးက ပြောပါတယ်။
“မနေ့က မနက်ပိုင်းက စစ်သားအင်အား ၁၀၀ လောက်က ရွာကိုအဝိုင်းခံရပြီး ရွာထဲကို ဝင်လာကြတယ်။ ရွာသား ၅ ယောက်လောက်ကို ဖမ်းတယ်။ ရွာထဲက PDF တွေ ထုတ်ပေးဖို့ ပြောတယ်။ ထုတ်မပေးရင် တရွာလုံးကိုမီးလောင်တိုက်သွင်းမယ်ပြောပြီး ညနေ ၃ နာရီလောက်မှာ အိမ် ၅ လုံးကို မီးစရှို့တယ်။ ရွာသားတွေလည်း ထွက်ပြေးကုန်ရပြီ။”
ဒီဇင်ဘာ ၁၂ ရက်နေ့က အဆိုပါကျေးရွာအနီးမှာ ကြို့ပင်ကောက်ကျေးရွာ ဒေသ ကာကွယ်ရေးတပ်ဖွဲ့နဲ့ စစ်ကောင်စီတပ်ဖွဲ့တို့ ၁ နာရီနီးပါးတိုက်ပွဲဖြစ်ပွားခဲ့ပြီး PDF တွေက အထိအခိုက်အကျအဆုံးမရှိ ဆုတ်ခွာနိုင်ခဲ့ကြကာ စစ်ကောင်စီတပ်သား ၁ ယောက်သေဆုံး ခဲ့တယ်လို့ ဒေသခံတွေဆီက သိရပါပေမယ့် ဒီဗွီဘီက သီးခြားအတည်ပြုနိုင်ခြင်းတော့ မရှိသေး ပါဘူး။
အဆိုပါတိုက်ပွဲအပြီးမှာ စစ်ကောင်စီကကျေးရွာအနီးတဝိုက်မှာ ကင်းပုန်းတွေချထားပြီး စစ်အင်အားအလွန်အကျွံထပ်မံပို့ဆောင်နေတယ်လို့ ဒေသခံတွေဆီက သိရပါတယ်။
