ရှမ်းပြည်နယ်မြောက်ပိုင်း မူဆယ်ခရိုင်၊ ကြူကုတ် (ပန်ဆိုင်း) မြို့က ကုန်စုံဆိုင်မှာ လာရောက် အလုပ် လုပ်တဲ့ အသက် ၂၀ အရွယ် ဆိုင်းနော်ဆိုသူကို အမည်မသိအဖွဲ့က ဩဂုတ် ၉ ရက်မှာ ဖမ်းဆီးသွားတယ်လို့ သူ့မိသားစုနဲ့ အသိမိတ်ဆွေတွေက ပြောပါတယ်။
ဆိုင်းနော်ဟာ ဈေးသွားပြီး စားစရာဝယ်ရာက ပြန်လာချိန် လူ ၄ ယောက်ပါတဲ့ အမည်မသိအဖွဲ့ က သေနတ်ထောက်ပြီး ဖမ်းဆီးခေါ်ဆောင်ခံရသလို နောက်ထပ် လူငယ် ၁ ယောက်ကိုလည်း ထပ်မံ ဖမ်းဆီးသွားတယ်ဆိုတဲ့အကြောင်း အကိုဖြစ်သူက ဆိုပါတယ်။
ဖမ်းဆီးခံရသူ အစ်ကိုက “သူ ပျောက်သွားတဲ့ အချိန်က ၉ ရက်နေ့ ညနေ ၄ နာရီလောက်တည်းက ပျောက်သွားတာ။ အဲဒီကတည်းက သူ့ကို အဆက်အသွယ်မရဘူး။ အဲဒီည ၉ နာရီကျော် ၁၀ နာရီ လောက်မှ တခြား ဖုန်းနံပါတ်အစိမ်းနဲ့ ဖုန်းဆက်လာလို့ သိရတယ်” လို့ ပြောပါတယ်။
အဲဒီနောက် ကားပေါ်အရောက် ခေါင်းငုံ့ ခိုင်းကာ သေနတ်နဲ့ ချိန်ပြီး ကြူကုတ်(ပန်ဆိုင်း) ကနေ နမ့်တောင်းဘက်ကို ကားနဲ့ ခေါ်သွားချိန် လမ်းမှာ အဖွဲ့ တဖွဲ့က တားတာကို မရပ်ပေးလို့ ပစ်ခတ်ခံရပြီး ကားပေါ်ပါသူ ၄ ဦးအနက် ၂ ဦး သေဆုံးကာ သူမှာတော့ ကျည် ၃ ချက် ထိမှန်သွားတယ်လို့ ဆိုင်းနော်က ပြောကြောင်း အကိုဖြစ်သူက ဆက်ပြောပါတယ်။
အဲဒီနောက် သေနတ်ပစ်ခံရတဲ့ အလောင်း ၂ လောင်းကို ပစ်ချခဲ့ပြီး လမ်းမှာ ခဏနားချိန် ဆိုင်းနော်က တောထဲ ထွက်ပြေးရာက လွတ်မြောက်သွားတယ်လို့ အကိုဖြစ်သူက ပြောပါတယ်။
"အခုသူရောက်နေတဲ့ နေရာက ရေရှိတဲ့ စပါးခင်းမှာတဲ့။ အဲဒီမှာ သူမှောက်နေတယ်တဲ့။ သူနောက်ဆုံး ပြောခဲ့တဲ့စကားပဲ။ အဲဒီလောက်ပဲ ပြောနိုင်တယ်။ သူပြောတဲ့ စကားအတိုင်း ကျနော်တို့ နေ့တိုင်း လိုက်ရှာနေတာ ခုထိ မတွေ့ရသေးဘူး။"
လက်ရှိ ဖမ်းခံရပြီး ပျောက်ဆုံးနေတဲ့သူတွေက ပန်ဆိုင်းမြို့ခံတွေ မဟုတ်ဘဲ တခြားနေရာက အလုပ်လာလုပ်သူတွေ ဖြစ်တယ်လို့ ပန်ဆိုင်းမြို့က လူမှုကူညီရေးအသင်း တာဝန်ရှိသူက ပြော ပါတယ်။
"လူပျောက်တာ မှန်တယ်။ ၃ ရက်လောက်ရှိပြီ။ အခုထိ ဘယ်သူတွေ ခေါ်သွားတယ်ဆိုတာ အတိကျ မသိသေးဘူး။ ခေါ်သွားတဲ့သူတွေက အရပ်ဝတ်နဲ့လို့ သိရတယ်။"
ရဲစခန်းကို တိုင်ထားပေမဲ့ ဘာမှ လုပ်မပေးလို့ တတ်နိုင်သလောက် ကိုယ့်အစီအစဉ်နဲ့ ကိုယ် ရှာဖွေနေသလို ပန်ဆိုင်းနဲ့ ၁၀၅ မိုင်ကြားက အဖွဲ့အစည်းတွေကို အကြောင်းကြားပြီး ရှာဖွေပေမဲ့ သေဆုံးသူ ၂ ယောက်ရဲ့ အလောင်းကို မတွေ့သေးတဲ့အပြင် ဆိုင်းနော်ကိုလည်း ၄ ရက်ကြာတဲ့အထိ ရှာမတွေ့သေးဘူးလို့ဆိုပါတယ်။
ဆိုင်းနော်အနေနဲ့ သူရှိတဲ့နေရာကို အတိအကျ မပြောနိုင်တဲ့အတွက် ရှာမတွေ့သေးလို့ အသက်အန္တရာယ် စိုးရိမ်နေရတယ်လို့ မိသားစုဝင်တွေနဲ့ သူငယ်ချင်းတွေက ပြောပါတယ်။
မူဆယ်ခရိုင်မှာ အခုနှစ်အတွင်း ကွတ်ခိုင်နဲ့နမ်းခမ်းဘက်မှာ မူလတန်းကလေးငယ်တချို့ ပြန်ပေးဆွဲ ခံ ရပြီးငွေပေး ပြန်ရွေးယူရတဲ့ဖြစ်စဉ် တချို့ ရှိခဲ့ဖူးတယ်လို့ ဒေသခံတွေက ပြောပါတယ်။
ပြန်ပေးဆွဲမှု နဲ့ လူသတ်မှုတွေဟာ ရှမ်းပြည်နယ်မြောက်ပိုင်း ကျောက်မဲ၊ သီပေါ၊ လားရှိုး၊ ကွတ်ခိုင်၊ တာမိုးညဲ၊ မူဆယ်မြို့နယ်၊ နမ့်ခမ်းမြို့တွေမှာ ၂၀၂၁ နောက်ပိုင်း အများဆုံး ဖြစ်ပွားလာတာပါ။
ရှမ်းပြည်နယ်မြောက်ပိုင်း၊ မူဆယ်ခရိုင်၊ မူဆယ်မြို့နယ်၊ ကြူကုတ် (ပန်ဆိုင်း) မြို့နယ်ခွဲမှာ ကချင်လွတ်မြောက်ရေးတပ်မတော် (KIA) နဲ့ စစ်ကောင်စီတို့ ဒီဇင်ဘာ ၅ ရက်နေ့မနက်ပိုင်းက တိုက်ပွဲဖြစ်ပွားခဲ့တယ်လို့ သိရပါတယ်။
KIA တပ်မဟာ ၆ နယ်မြေအတွင်း ထိုးစစ်ဆင်လာတဲ့ စစ်ကောင်စီ စကခ - ၁၇ အောက် ခမရ - ၃၃၂ နဲ့ KIA တပ်မဟာ ၆ ပူးပေါင်းတပ်ဖွဲ့တို့အကြား ဖွန်းပြန်ယန်အထက်က လက်ဝါးကားတိုင် တောင်ကုန်းပေါ်မှာ မနေ့မနက် ၁၀ နာရီ ခွဲလောက်ကနေ ည ၁၀ နာရီ ခွဲလောက်အထိ တိုက်ပွဲပြင်းထန်ခဲ့တယ်လို့ ဒေသခံတွေဆီက သိရပါတယ်။
ဒေသခံတစ်ဦးက “ခုည ဆယ်နာရီ တောင်ခွဲတော့မယ်။ ရွာကနေ လက်နက်ကြီး ပစ်နေတာ ၈ ကြိမ်လောက်ရှိပြီ။ အိပ်နေတာ လန့်နိုးသွားတယ်။ ဖွန်းပြန်ယန်ဘက်လို့ ပြောတယ်။ နေ့လယ်ကလည်း ရွာကနေ လက်နက်ကြီး ပစ်တယ်” လို့ ပြောပါတယ်။
စစ်ကောင်စီဘက်က ထိခိုက်ကျဆုံးမှုကို အတိအကျ မသိရပေမယ့် ထိခိုက်ဒဏ်ရာရမှု များလာတာကြောင့် အင်အားထပ်ဖြည့်လာတဲ့အပြင် မိုင်ဖန်ရွာနဲ့ ၁၀၅ မိုင်ဘက်ကနေ လက်နက်ကြီးနဲ့ ရမ်းသမ်းပစ်ကူနေကြောင်း KIA တပ်ဖွဲ့ဝင်တစ်ဦးက ပြောပါတယ်။
“ဘယ်လောက် သေဆုံး ဒဏ်ရာရတာတော့ အတိအကျ မသိရသေးဘူး။ စစ်ကြောင်းမှူး ထိခိုက်ဒဏ်ရာရတယ်။ စစ်ကောင်စီဘက်က ထိခိုက်ဒဏ်ရာရမှု များလာလို့ မိုင်းယု ၁၀၅ မိုင်နဲ့ မိုင်ဖန်ရွာကနေ နေရာအနှံ့စစ်ကောင်စီက လက်နက်ကြီး ရမ်းသမ်းပစ်ခတ်နေတယ်။”
ဇန်နဝါရီ ၄ ရက်နေ့ မနက် ၇ နာရီလောက်ကစပြီး နောင်ချိုရွာအနီးမှာ စစ်ကောင်စီတပ်ဖွဲ့တွေ ထမင်းဟင်းချက်စားနေချိန် KIA တပ်မဟာ ၆ ပူးပေါင်းတပ်က လက်နက်ကြီးပစ်ခတ်ထိုးစစ်ဆင်ခဲ့ပြီး ဖွန်းပြန်ယန်ဘက် စစ်ကောင်စီတွေ ပေါ်လာလို့ မွန်းတည့် ၁၂ နာရီကနေ ၁၂ နာရီခွဲအထိ နာရီဝက်ကြာ ၁ ကြိမ်၊ မွန်းလွဲ ၁ နာရီကစ ၁ ကြိမ် ထိတွေ့တိုက်ပွဲ ဖြစ်ပွားခဲ့တယ်လို့ ဆိုပါတယ်။
ရှမ်းပြည်နယ်မြောက်ပိုင်းအခြေစိုက် KIA တပ်မဟာ ၆ နယ်မြေ၊ မန့်ကန်တောင်အနီး မုံးလီရွာအထက်တောင်ကုန်းပေါ်မှာ စစ်မျက်နှာ သုံးဖက်ကနေ ထိုးစစ်ဆင်လာတဲ့ စစ်ကောင်စီတပ်နဲ့ KIA တပ်မဟာ ၆ တို့ အကြား ဇန်နဝါရီလ ၂ ရက်နေ့ မနက်ပိုင်း ၁၀ နာရီခွဲခန့်ကစ ၅ ကြိမ်တိုင် ထိတွေ့တိုက်ပွဲ ပြင်းထန်ခဲ့တယ်လို့ KIA တပ်ဖွဲ့ဝင်က ပြောပါတယ်။
ရွာဘက်ကနေ စစ်ကောင်စီက လက်နက်ကြီး ပစ်ကူနေတာကြောင့် တိုက်ပွဲထပ်မံပြင်းထန်လာမှာကို ဒေသခံတွေက စိုးရိမ်ကြောက်လန့်နေကြပါတယ်။
"စစ်တပ် အမြှောက်ပစ်နေတဲ့ နေရာကို ဟိုဘက်က လာပစ်ပြီး တိုက်ပွဲ အခြေအနေပိုဆိုးလာမှာကြောက်တယ်" လို့ ဒေသခံ နောက်တစ်ဦးက ပြောပါတယ်။
အဲဒီဒေသမှာ မကြာခဏ တိုက်ပွဲဖြစ်ပွားလေ့ရှိပြီး အသေးစားပစ်ခတ်မှုကလွဲလို့ တိုက်ပွဲ မဖြစ်တာ ၁ နှစ်ဝန်းကျင်ကြာပြီ ဖြစ်ပေမယ့် လတ်တလောအခြေအနေအရ KIA တပ်မဟာ ၆ ထိန်းချုပ်နယ်မြေမှာ နှစ်ဘက်စစ်ရေးတင်းမာနေပြီး တိုက်ပွဲ ဆက်လက်ပြင်းထန်လာနိုင်တယ်လို့ ဒေသခံတွေက ပြောပါတယ်။
အဲဒီဒေသမှာ စစ်ကောင်စီ၊ စစ်ကောင်စီ လက်အောက်ခံ ပြည်သူ့စစ်၊ KIA တပ်မဟာ ၆ တပ်ရင်း ၃၆၊ ကိုးကန့်တပ်ဖွဲ့ MNDAA၊ ရှမ်းပြည်တိုးတက်ရေးပါတီ/ရှမ်းပြည်တပ်မတော် SSPP/SSA နဲ့ မြောက်ပိုင်း မဟာမိတ်ညီနောင်အဖွဲ့တို့ လှုပ်ရှားရာနေရာဖြစ်ပါတယ်။
