မန်ယူအသင်းနဲ့ ကစားခဲ့တဲ့အက်ဖ်အေဖလားပွဲစဉ်မှာ ကွင်းလယ်ဒိုင်ကို တွန်းထိုးခဲ့တဲ့ ဖူဟမ်တိုက်စစ်မှူး မီထရိုဗစ်ဟာ ၈ ပွဲပယ်နဲ့ ဒဏ်ကြေးချမှတ်ခံရပါတယ်။
အဲဒီပွဲစဉ်မှာ အသင်းဖော်ဝီလီယံ ထုတ်ပယ်ခံရပြီး ပင်နယ်တီပေးခဲ့တဲ့အပေါ် ကွင်းလယ်ဒိုင်ကာဗန်နက်ချ်ကို မီထရိုဗစ်က ဒေါသတကြီး တွန်းထိုးခဲ့တာပါ။
တိုက်ရိုက်အနီကတ်ပြစ်ဒဏ်အတွက် သုံးပွဲပယ်၊ တွန်းထိုးခဲ့မှုအတွက် သုံးပွဲပယ်နဲ့ မသင့်လျော်တဲ့စကားနဲ့ စော်ကားပြောဆိုခဲ့မှုအတွက် နှစ်ပွဲပယ်၊ စုစုပေါင်း ၈ ပွဲပယ်ခံခဲ့ရတာပါ။
ဒါ့အပြင် ပေါင် ၇၅၀၀၀ ဒဏ်ကြေးဆောင်ဖို့လည်း လွတ်လပ်သောစုံစမ်းစစ်ဆေးရေးကော်မရှင်က ပြစ်ဒဏ် ချမှတ်ခဲ့တာပါ။
ကွင်းလယ်ဒိုင်ကို စောဒကတက်ခဲ့ပြီးနောက် ထုတ်ပယ်ခံခဲ့ရတဲ့ ဖူဟမ်နည်းပြ မာကို ဆေးလ်ဗားကိုတော့ ၂ ပွဲပယ်ပြစ်ဒဏ်ချမှတ်ခံရပါတယ်။ ပြီးခဲ့တဲ့တစ်ပတ်က မီထရိုဗစ်နဲ့ ဆေးလ်ဗားတို့ကိုယ်တိုင် ဒိုင်လူကြီးကိုတောင်းပန်စကားဆိုခဲ့ကြပေမဲ့ အခုလို ပြစ်ဒဏ်တွေ ချမှတ်ခဲ့တာဖြစ်ပါတယ်။
အင်္ဂလန်ပရီးမီးယားလိဂ်ရဲ့နာမည်ကျော်ကွင်းလယ်ဒိုင် မိုက်ဒိန်းဟာ ကွင်းလယ်ဒိုင်တာဝန်ကနေ အနားယူခဲ့ပေမယ့် VAR ဒိုင်လူကြီးအနေနဲ့ ပြောင်းလဲတာဝန်ယူသွားမှာပါ။
ပရီးမီးယားလိဂ်မှာ ၂၂ နှစ်ကြာ တာဝန်ယူလာခဲ့တဲ့ မိုက်ဒိန်းဟာ ပြီးခဲ့တဲ့လပိုင်းကမှ ကွင်းလယ်ဒိုင်လူကြီးဘဝကနေ အနားယူ ကြောင်းကြေညာခဲ့တာပါ။
လက်ရှိအချိန်မှာတော့ ရုပ်သံအနှေးပြကွက်တွေကိုပြန်ကြည့် ပြီးဆုံးဖြတ်ရမယ့် VAR ဒိုင်အနေနဲ့ တရားဝင်စာချုပ်ချုပ်ဆိုခဲ့ပါတယ်။
မိုက်ဒိန်းဟာ မေလအတွင်းက ကစားခဲ့တဲ့ ချဲလ်ဆီးနဲ့ ဝက်ဖို့ဒ်ပွဲစဉ်ဟာ သူ့ရဲ့နောက်ဆုံး နှုတ်ဆက်ပွဲဖြစ်ခဲ့ပေမဲ့ VAR ဒိုင်လူကြီး အနေနဲ့ ပရီးမီးယားလိဂ်ဆီပြန်လာခဲ့တာပါ။
အင်္ဂလန်ပရီးမီးယားလိဂ်မှာ ဒိုင်လူကြီးဟောင်း မိုက်ရီလေးက ဒိုင်ချုပ်ရာထူးကနေ အနားယူခဲ့ပြီး ဟောင့်ဝါ့ဒ်ဝက်ဘ်က ပြောင်းလဲတာဝန်ယူမှာ လည်းဖြစ်ပါတယ်။
VAR ဒိုင်အဖြစ်ပြောင်းလဲတာဝန်ယူမယ့် မိုက်ဒိန်းဟာ ကွင်းလယ်ဒိုင်လူကြီး ဘဝသက်တမ်းအတွင်း အဝါကတ်ပြားပေါင်း ၂၀၀၀ ပြသခဲ့ပြီး အနီကတ် ၁၁၄ ကတ်ပြသခဲ့ပါတယ်။
