ဗိုလ်ချုပ်မှုးကြီးမင်းအောင်လှိုင်ရဲ့ သားနဲ့ သမီးတို့ပိုင်ဆိုင်တဲ့ ထိုင်းနိုင်ငံ ဘန်ကောက်က ကွန်ဒိုတိုက်ခန်းနဲ့  ဘဏ်စာရင်းစာအုပ်ကို လက်နက်ပွဲစား ခရိုနီသူဌေး ဦးထွန်းမင်းလတ်နဲ့ ဆက်နွှယ်တယ်ဆိုပြီး ထိုင်းရဲတပ်ဖွဲ့က သိမ်းဆည်းထားတဲ့အပေါ် ပြန်လည်ရုပ်သိမ်းပေးဖို့ စစ်ခေါင်းဆောင်က တောင်းဆိုညှိနှိုင်းမှုတွေရှိနေတယ်လို့ ထိုင်းသတင်းမှာ ဖော်ပြပါတယ်။

ဒီအမှုကိစ္စနဲ့ ပတ်သက်ပြီး ထိုင်း Move Forward Party လွှတ်တော်အမတ် နိုင်းရန်းဆီမန်းရုန်း ကတော့ ဦးထွန်းမင်းလတ်ရဲ့ အမှုဟာသိသာထင်ရှားတဲ့အမှုဖြစ်ပြီး သူဟာ မြန်မာစစ်တပ် ခေါင်းဆောင် မင်းအောင်လှိုင်နဲ့ နီးစပ်သူဖြစ်တယ်ဆိုတာအားလုံးအသိဖြစ်တယ်၊ တောင်းဆို ညှိနှိုင်းမှုတွေလိုက်လျောပြီး သူတို့ပိုင်ဆိုင်မှုတွေပြန်ပေးလိုက်ရင် ထိုင်းနိုင်ငံရဲ့ တရားစီရင်မှု အချုပ်အခြာအာဏာကို တခြားတစ်နိုင်ငံက ဝင်ရောက်စွက်ဖက်တာကို လက်ခံလိုက်တဲ့ သဘောပဲလို့ ပြောပါတယ်။

“ဒီအမှုဟာ နိုင်ငံတကာရာဇဝတ်မှု၊ မူးယစ်ဆေးဝါးနဲ့ ငွေကြေးခဝါချမှုတွေနဲ့ ဆက်နွှယ်နေ တာဖြစ်တယ်၊ နိုင်ငံတကာကလည်း   ထိုင်းနိုင်ငံဟာ မူးယစ်ဆေးဝါးနဲ့ အကြမ်းဖက်မှုတွေရှိနေတဲ့ မြန်မာနိုင်ငံနဲ့ နီးစပ်မှုရှိတာလား၊ ပတ်သက်နေတာလားဆိုပြီး မေးခွန်းထုတ်စရာရှိတယ်။ ထိုင်းနိုင်ငံရဲ့ဥပဒေအရ မိမိအချုပ်အခြာအာဏာထဲမှာ သံသယရှိတဲ့ ပိုင်ဆိုင်မှုတွေကို သိမ်းဆည်းခွင့်ရှိတယ်၊ ဥပဒေအတိုင်းဆောင်ရွက်ရမယ်”လို့  လွှတ်တော်အမတ် နိုင်းရန်းဆီမန်းရုန်းက ပြောပါတယ်။

မြန်မာခရိုနီ လက်နက်ပွဲစား ဦးထွန်းမင်းလတ်ရဲ့ Allure Group ကုမ္ပဏီနဲ့ ဆက်စပ်တယ်ဆိုပြီး တရားစွဲခံထားရတဲ့ ထိုင်းအထက်လွှတ်တော်အမတ် နိုင်းဥပကစ်ပါကျရိယန်ကွန်းရဲ့ အမှုကို တရားရုံးက သင်္ကြန်အပြီးမှာ စစ်ဆေးမယ်လို့ မူလကချိန်းဆိုထားပေမဲ့ နောက်ထပ် ရက်ရွှေ့ဆိုင်းလိုက်တဲ့အပေါ်မှာ Move Forward Party လွှတ်တော်အမတ် နိုင်းရန်းဆီမန်းရုန်း က ဧပြီ ၁၇ ရက်မှာ သတင်းစာရှင်းလင်းပွဲမှာ ဝေဖန်လိုက်သလို ဗိုလ်ချုပ်မှုးကြီးမင်းအောင်လှိုင် သားနဲ့သမီးပိုင်ဆိုင်မှုကိစ္စကိုပါ ထည့်သွင်းပြောကြားခဲ့တာပါ။

မြန်မာစစ်တပ်က လေယာဉ်ပေါ်ကနေ ဗုံးကြဲချတဲ့အကြမ်းဖက်မှုကြောင့် ကျောင်းသားငယ်လေး တွေအပါအဝင်  လူပေါင်း ၁၇၀ ကျော်ထိခိုက်သေဆုံးခဲ့တဲ့ ပဇီကြီးရွာ လေကြောင်း တိုက်ခိုက်ခံရမှုနဲ့ ပတ်သက်ပြီးလည်း အဆိုပါသတင်းစာရှင်းပွဲမှာ လွှတ်တော်အမတ် နိုင်းရန်းဆီမန်းရုန်းက ပြောသွားပြီး ဗိုလ်ချုပ်မှူးကြီး မင်းအောင်လှိုင်ရဲ့တောင်းဆိုမှုကို လိုက်လျောမယ်ဆိုရင် အကြမ်းဖက်ခံရတဲ့ မြန်မာပြည်သူ တွေရဲ့မျက်နှာ  ထောက်ရှုငဲ့ညာဖို့ ပြောဆိုခဲ့ပါတယ်။ 

ထိုင်းဗဟိုတရားရုံး ပြောရေးဆိုခွင့်ရှိသူ နိုင်းကိုးဆုတ်ဝပ် အင်ထုကျန်းရုန်းကတော့ အထက်လွှတ်တော်အမတ် နိုင်းဥပကစ်ရဲ့အမှုရက်ချိန်းကို ရွှေ့ဆိုင်းလိုက်တာဟာ - နိုင်းဥပကစ်က ဧပြီ ၃ ရက်က ဗဟိုတရားရုံးချုပ်ကို စာပို့ထားတာရှိတယ်၊ အဲဒီစာထဲမှာ မူးယစ်တရားခံတွေ ငွေလွှဲခဲ့တာဟာ Allure ကုမ္ပဏီတစ်ခုတည်းမကဘဲ တခြားကုမ္ပဏီကနေလည်း လွှဲခဲ့တယ်၊  ဘာကြောင့် သူတို့ကုမ္ပဏီကိုဘဲဦးတည်အရေးယူတာလဲ၊ သူဟာ ဝန်ကြီးချုပ်ပရာယုဒ် ကျန်အိုချားရဲ့ လူမ့်ထိုင်းဆန့်ချတ်ပါတီရုံးခန်းအတွက် မြေကွက်နဲ့ အဆောက်အဦ ထောက်ပံ့ခဲ့တယ်။ ဒါကြောင့် နိုင်ငံရေးအရ တိုက်ခိုက်ခံနေရသလားဆိုတာကို ပြန်လည်စိစစ်ပေးဖို့ တောင်းဆို ထားတယ်။

ပြီးတော့ သူပိုင်ဆိုင်တဲ့ သူနဲ့ဆက်စပ်နေတဲ့ ကုမ္ပဏီပေါင်း ၈၀ ကျော်ကို အထူးစုံစမ်းရေးကော်မတီ၊ စသုံးလုံးရဲတပ်ဖွဲ့တွေနဲ့ ပူးပေါင်းစစ်ဆေးနေတာ မပြီးပြတ်သေးလို့ အမှုရက်ချိန်းရွှေ့ထားရတာလို့ သတင်းထောက်တွေကို ပြောပါတယ်။

လွှတ်တော်အမတ် နိုင်းရန်းဆီမန်းရုန်းက “တရားရုံးအနေနဲ့ နိုင်းဥပကစ်ရဲ့ အမှုကို ပြစ်မှုထင်ရှားတဲ့ ထွန်းမင်းလတ်အမှုနဲ့ ယှဉ်တွဲလုပ်ဆောင်ရမှာဖြစ်တယ်၊ ကုမ္ပဏီပေါင်း ၈၀ ကိစ္စ နောက်မှစစ်ဆေးရမှာဖြစ်တယ်။ ဘာကြောင့်တုံ့ဆိုင်းနေတာလဲ၊ ထိုင်းမူးယစ်ဆေးဝါး တိုက်ဖျက်နှိမ်နင်းရေးရဲတပ်ဖွဲ့နဲ့ လာဘ်စားမှု၊ ငွေကြေးခဝါချမှုတိုက်ဖျက်ရေးဌာနအနေနဲ့လည်း ဒီအမှုအပေါ်မှာ ကိုင်တွယ်ဆောင်ရွက်မှုနှောင့်နှေးကြန့်ကြာနေတယ်”လို့  ဝေဖန်လိုက်ပါတယ်။ 

နိုင်းဥပကစ် နဲ့ ဦးထွန်းမင်းလတ်တို့ဟာ လွန်ခဲ့တဲ့ ၁၀ နှစ်ကျော်ကတည်းက တာချီလိတ်နဲ့ မယ်ဆိုင်မှာ ဟိုတယ်လုပ်ငန်း၊ ကာရာအိုကေ၊ ကာစီနိုကစားဝိုင်းနဲ့ လျှပ်စစ်ဓာတ်အား ရောင်းဝယ် ဖြန့်ဖြူးရေးတွေ အတူတကွလုပ်ကိုင်ခဲ့ပါတယ်။

အဲဒီနောက်ပိုင်း နိုင်းဥပကစ်က အဆိုပါလုပ်ငန်းတွေကို သမက်ဖြစ်သူထံ လွှဲပြောင်းပေးခဲ့ပြီး သူကတော့ နိုင်ငံရေးလောကထဲပါဝင်ကာ အထက်လွှတ်တော်အမတ်ဖြစ်လာ ခဲ့ပါတယ်။ 

ထိုင်းမှာ လွန်ခဲ့တဲ့ ၃ နှစ်ကျော်က မူးယစ်ဆေးဝါးဂိုဏ်းတွေဖမ်းဆီးရမိခဲ့ပြီး သူတို့ငွေစာရင်းတွေ ပြန်လည်စစ်ဆေးရာမှာ Allure ကုမ္ပဏီထဲကို ငွေကြေးအမြောက်အမြားလွှဲထားတာတွေ့ရှိလို့ ကုမ္ပဏီပိုင်ရှင် ဦးထွန်းမင်းလတ်၊ သူ့ကိုယ်ရေးအရာရှိ၊ ကုမ္ပဏီမန်နေဂျာ (နိုင်းဥပကစ်ရဲ့သားမက်)နဲ့ ကုမ္ပဏီစာရင်းကိုင်ဝန်ထမ်းတွေ ဖမ်းဆီးခံထားရပြီး ကုမ္ပဏီနဲ့ပတ်သက်သူတို့ရဲ့ ဘဏ်ငွေစုစာအုပ်၊ ကွန်ဒိုတိုက်ခန်း၊ မော်တော်ကား၊ ဟိုတယ်၊ မြေကွက်တွေပါတဲ့ ပိုင်ဆိုင်မှု ဘတ်သန်းပေါင်း ၂၀၀၀ ကျော်သိမ်းဆည်းခံထားရပါတယ်။

အဆိုပါ အသိမ်းခံထားရတဲ့ ပိုင်ဆိုင်မှုတွေထဲမှာ ဗိုလ်ချုပ်မှုးကြီးမင်းအောင်လှိုင်ရဲ့ သားဖြစ်သူ အောင်ပြည့်စုံရဲ့အမည်ပေါက် ကွန်ဒိုတိုက်ခန်းနဲ့ သမီးဖြစ်သူ ခင်သီရိသက်မွန်ရဲ့ ထိုင်းငွေစုဘဏ်စာအုပ်တွေပါ ပါဝင်နေပါတယ်။

ဦးထွန်းမင်းလတ်နဲ့ နိုင်းဥပကစ်တို့ဟာလည်း မူးယစ်ဆေးဝါးနဲ့ဆက်နွှယ်မှု၊ ငွေကြေးခဝါချမှု၊ နိုင်ငံတကာရာဇဝတ်မှုနဲ့ ပတ်သက်မှုတွေနဲ့ တရားစွဲခံထားရတာပါ။ 

ကိုးကား - Nation TV / Thai PBS / Workpoint News

မြန်မာနိုင်ငံမှာ နိုင်ငံရေးမတည်ငြိမ်မှုကြောင့် ပြည်တွင်းက အိမ်ခြံမြေတွေကို ထုတ်ရောင်းပြီး ထိုင်းနိုင်ငံဆီ ရွှေ့ပြောင်းမှု ပမာဏက ၂၀၂၂ ခုနှစ်အတွင်းမှာ သိသိသာသာများပြားခဲ့တယ်လို့ အိမ်ခြံမြေအကျိုးဆောင်လုပ်ငန်းရှင်တွေက ပြောပါတယ်။

ထိုင်းနိုင်ငံ အခြေစိုက် ဘန်ကောက်ပို့စ်သတင်းစာမှာ ဖော်ပြချက်အရ ၂၀၂၂ တနှစ်တာအတွင်းမှာ ထိုင်းနိုင်ငံအတွင်းရှိ ကွန်ဒို (လူနေအိမ်ရာ) အဆောက်အဦးတွေကို အများဆုံး ဝယ်ယူခဲ့တဲ့ နိုင်ငံ ၁၀ နိုင်ငံရဲ့ စာရင်းတွေကို ထုတ်ပြန်ခဲ့ရာမှာ မြန်မာက အဆင့် ၇ နေရာမှာ ရှိပြီး အရေအတွက်အားဖြင့် အိမ်ရာအခန်းပေါင်း ၁၈၈ ခန်းရှိပါတယ်။

မြန်မာနိုင်ငံသားတွေ ထိုင်းနိုင်ငံအတွင်းရှိ ကွန်ဒို (လူနေအိမ်ရာ) အဆောက်အဦတွေကို နှစ်အလိုက် ဝယ်ယူခဲ့တဲ့ အခြေအနေကိုကြည့်ရင် ၂၀၁၈ မှာ အိမ်ရာအခန်းပေါင်း ၄၈ ခု၊ ၂၀၁၉ မှာ အိမ်ရာအခန်းပေါင်း ၅၄ ခု၊ ၂၀၂၀ မှာ အိမ်ရာ အခန်းပေါင်း ၂၆ ခု နဲ့ ၂၀၂၁ မှာ အိမ်ရာအခန်းပေါင်း ၃၀ ခု ဝယ်ယူခဲ့တာ တွေ့ရပါတယ်။ ဒါကြောင့် ၂၀၂၂ တနှစ်တာအတွင်းမှာ မြန်မာနိုင်ငံသားတွေ ထိုင်းနိုင်ငံအတွင်းရှိ ကွန်ဒို (လူနေအိမ်ရာ) အဆောက်အဦ ဝယ်ယူမှုက သိသိသာသာ တိုးတက်မှု ရှိခဲ့ပါတယ်။

ထိုင်းနိုင်ငံဆီ အိမ်ရာရွှေ့ပြောင်းမှုပမာဏ အခုလို တဟုန်ထိုး တိုးမြှင့်သွားရတဲ့ အဓိကအကြောင်းရင်းက နိုင်ငံရေးနဲ့ တိုက်ရိုက်ချိတ်ဆက်မှုရှိတဲ့အကြောင်း ပြည်တွင်းက အိမ်ခြံမြေအကျိုးဆောင်လုပ်ငန်းရှင်တွေက သုံးသပ်ပြောပါတယ်။

ဝါရင့်အိမ်ခြံမြေအကျိုးဆောင်လုပ်ငန်းရှင်တဦးက “ဒါက နိုင်ငံရေး အခင်းအကျင်းနဲ့ တိုက်ရိုက် ပတ်သက်တာပေါ့။ ဒီအရွှေ့အပြောင်း အနုတ် အသိမ်းတွေက ဒီနှစ်ထဲမှာ တော်တော်လေး များခဲ့တယ်။ အနုတ် အသိမ်းတွေ များသွားလို့ ဈေးကွက်က ပျက်သွားခဲ့ရတယ်။ ဈေးကွက်ပျက်သွားတယ်ဆိုတာ ပုံမှန်ပေါက်ဈေး ဆိုတာထက် ကြိုက်ရောင်း ကြိုက်ဝယ်တွေ ဖြစ်သွားတာကို ပြောတာပါ။ ဒါတင်ပဲလား ဆိုတော့ မကဘူး။ တိုးတိုးတိတ်တိတ် လုပ်တာတွေလည်း အရမ်းများခဲ့တယ်။ အနုတ်အသိမ်း ဆိုတာက မြို့တခုကနေ တခြားမြို့တခုဆီ အလဲအထပ် လုပ်ကြတာ။ ရွှေ့တာကတော့ ကိုယ့်ပြည်တွင်းကနေ တခြားနိုင်ငံဆီ ရွှေ့တဲ့ အရွှေ့အပြောင်းလေ။ ဒီအရွှေ့အပြောင်းကလည်း အရမ်းများခဲ့တယ်။ အဲဒီတော့ ခြုံပြောရရင် ပြည်တွင်း အိမ်ခြံမြေဈေးကွက်က တော်တော်လေး ကမောက်ကမနိုင်တယ်” လို့ ဒီဗွီဘီ ကိုပြောပါတယ်။

အခုလပိုင်းတွေအတွင်းမှာလည်း ပြည်တွင်း အိမ်ခြံမြေဈေးကွက်မှာ တန်ဖိုးမြင့်နေအိမ်တွေနဲ့ ခြံတွေ  ရောင်းလိုအား မြင့်တက်နေတာကို မြင်တွေ့ရပါတယ်။ 

မြန်မာနိုင်ငံသားတွေက ရင်းနှီးမြှုပ်နှံမှု သဘောမျိုးနဲ့ ထိုင်းနိုင်ငံက ကွန်ဒိုအခန်းတွေကို ဝယ်ယူကြတာဖြစ်လို့  ဘန်ကောက်အခြေစိုက် အိမ်ခြံမြေလုပ်ငန်းနဲ့ နီးစပ်တဲ့ အကျိုးဆောင်လုပ်ငန်းရှင်တဦးက  မှတ်ချက်ပေးပါတယ်။

“အဓိကကတော့ ဒီမှာက နိုင်ငံရေး မတည်မငြိမ်တော့ လူတွေက ဟိုဘက်ကို ရွှေ့ကြတာပေါ့။ တချို့လည်း မိသားစုလိုက် ရွှေ့ကြတာရှိတယ်။ တချို့လည်း ရင်းနှီးမြှုပ်နှံမှုပုံစံမျိုး ဒီက ထုတ်ပြီး ဟိုဘက်မှာ ပြန်ထည့်တာပေါ့။ ဘာလို့လဲဆို သူ့အနေနဲ့ ဟိုဘက်မှာ ဝယ်ထားလိုက်တော့ နေလို့လည်း ရတယ်။ အခြေအနေတွေ တည်ငြိမ်သွားတဲ့အခါ ဒီဘက် ပြန်ရွှေ့မယ်ဆိုရင်လဲ ပြန်ထုတ်ရောင်းလို့ ရတယ်လေ။ နောက်တချက်က ပြည်တွင်းငွေလဲလှယ်နှုန်းကလည်း မငြိမ်တဲ့အတွက် အကျိုးရှိတော့ ဝယ်ကြတာပေါ့။”

မြန်မာနိုင်ငံကနေ ဘန်ကောက်မှာ လာရောက်ပြီး ကွန်ဒိုဝယ်ယူသူတွေထဲမှာ စီးပွားရေးလုပ်ငန်းရှင်တွေအပြင် နာမည်ကြီးသရုပ်ဆောင်တချို့နဲ့ အငြိမ်းစား စစ်ဗိုလ်ချုပ်ကြီးတွေရဲ့ သားသမီး မိသားစု ဆွေမျိုးအသိုက်အဝန်းတွေလည်း ပါဝင်ပါတယ်။

အဓိက အဝယ်များတာက မြန်မာငွေနဲ့ သိန်းနှစ်ထောင်ကျော်ကစပြီး သိန်း ခြောက်ထောင်ကျော်တန်တဲ့ အခန်းတွေ ဝယ်တာ များတယ်လို့ ဘန်ကောက်အိမ်ခြံမြေလုပ်ငန်းနဲ့ နီးစပ်သူကပြောပါတယ်။

“ထိုင်းဘတ်နဲ့ဆိုရင် ငွေလဲနှုန်းနဲ့ တွက်ကြည့်မှ ရမယ်။ (ခန့်မှန်းခြေ ထိုင်းဘတ် ၃ သန်းကျော်ကနေ ၇ သန်းကျော်) ဒီအခြေအနေတိုင်းဆိုရင် အရွှေ့အပြောင်းတွေက များလာမှာပဲ။ များလာလို့ရှိရင် ပြည်တွင်း အိမ်ခြံမြေ ဈေးကွက်အပေါ် သက်ရောက်မှုက ရှိလာနိုင်တာပေါ့။ ဘာလို့လဲ ခါတိုင်းက ဒီမှာပဲဝယ်ဖို့ စိတ်အားထက်သန်ကြတာလေ။ အခုတော့ တော်တော်များများက ဟိုဘက်မှာ ဝယ်ထားလို့ ရှိရင် အကျိုးရှိမယ်ဆိုတာ သိကြတဲ့အတွက် သွားကြတာပေါ့။ သွားတော့ အနည်းနဲ့အများတော့ ထိခိုက်မှု ရှိတာပေါ့။ ထိခိုက်တယ်ဆိုတာ ကိုယ့်ရဲ့ ဈေးကွက်ဝေစု ပါသွားတာပေါ့။ ဒီမှာ ဝယ်မယ့်သူတွေက ဟိုဘက် သွားဝယ်ကြတော့ ဝယ်လိုအားလျော့သွားတဲ့ သဘောပေါ့” လို့ ဒီဗွီဘီကို ပြောပါတယ်။

ထိုင်းနိုင်ငံအတွင်းရှိ ကွန်ဒို(လူနေအိမ်ရာ)အဆောက်အဦးတွေကို ၂၀၂၂ ခုနှစ်အတွင်း ဝယ်ယူခဲ့တဲ့ ထိပ်ဆုံး ၁၀ နိုင်ငံ စာရင်းထဲမှာ အများဆုံးဝယ်ယူတဲ့နိုင်ငံက တရုတ်နိုင်ငံ ဖြစ်ပြီး အရေအတွက်အားဖြင့် ၃၅၆၂ ခန်းရှိပြီး သူ့နောက်မှာ ရုရှားနိုင်ငံက ဒုတိယလိုက်တာ တွေ့ရပါတယ်။