ဥရောပကွန်းဖရန့်လိဂ် ဗိုလ်လုပွဲအဖြစ် အီတလီကလပ် ရိုးမားနဲ့ ဒတ်ချ်ကလပ် ဖီယင်နုတို့ မေလ ၂၅ ရက် မနေ့ညက ယှဉ်ပြိုင်ရာ ရိုးမားအသင်းက တဂိုး ဂိုးမရှိနဲ့နိုင်ပြီး ဗိုလ်စွဲသွားပါတယ်။
ရိုးမားအသင်းအတွက် တလုံးတည်းသော အနိုင်ဂိုးကိုတော့ ပွဲချိန် ၃၂ မိနစ်မှာ ဇာနီအိုလိုက သွင်းယူပေးခဲ့ပါတယ်။
ဖီယင်နုအသင်းဟာ ဦးဆောင်ဂိုး ပေးလိုက်ရပြီးနောက် ချေပဂိုးရဖို့ တိုက်စစ်မြှင့်ကစားခဲ့ပြီး ဂိုးကန်သွင်းချက်ရော ဘောလုံးပိုင်ဆိုင်မှာပါ အသာစီးရယူနိုင်ခဲ့ပေမယ့် လိုအပ်တဲ့ ချေပဂိုး မရခဲ့ဘဲ အရှုံးပေးခဲ့ရတာပါ။
ဒီပွဲမှာ ဖီယင်နုအသင်းရဲ့ တိုက်စစ်ကို အကောင်းဆုံး ဟန့်တား ကာကွယ်နိုင်ခဲ့တဲ့ ရိုးမားအသင်း နောက်ခံလူ စမောလင်းကို ကွန်းဖရန့်လိဂ် ဗိုလ်လုပွဲရဲ့ အကောင်းဆုံးကစားသမားအဖြစ် ရွေးချယ်ခဲ့ပါတယ်။
စမောလင်းဟာ ဖီယင်နုအသင်းတိုက်စစ်မှူးတွေဖြစ်တဲ့ ဒက်ဆာစ်၊ ဆာနစ္စတယ်ရာတို့ရဲ့ အားကောင်းလှတဲ့ တိုက်စစ်ကို ပွဲချိန်ပြည့် ကာကွယ်နိုင်ခဲ့တာ ဖြစ်ပါတယ်။
UEFA Technical Observer အဖွဲ့က စမောလင်းကို ရိုးမားအသင်း နောက်တန်းမှာ ခိုင်မာတဲ့ ကျောက်ဆောင်တခုလို စွမ်းဆောင်နိုင်ကြောင်း ချီးကျူးခဲ့ကြပါတယ်။
ရိုးမားနည်းပြ မော်ရင်ဟိုအတွက်လည်း ဒီရာသီမှာ ပထမဆုံးအကြိမ် ကျင်းပတဲ့ ကွန်းဖရန့်လိဂ်မှာ ပထမဆုံး အောင်ပွဲရယူနိုင်တဲ့ မှတ်တမ်းကောင်းကို ပိုင်ဆိုင်သွားသလို ချန်ပီယံလိဂ်ဖလား ၂ ကြိမ်၊ ယူရိုပါလိဂ် - ၂ ကြိမ်၊ ကွန်းဖရန့်လိဂ် - ၁ ကြိမ် စုစုပေါင်း ဥရောပမေဂျာဖလား ၅ လုံး ဆွတ်ခူးနိုင်တဲ့ နည်းပြအဖြစ် မှတ်တမ်းဝင်သွားပါတယ်။
ဒီကနေ့မနက်ပိုင်းက ယှဉ်ပြိုင်သွားတဲ့ ယူရိုပါလိဂ် ဆီမီးဖိုင်နယ် ပွဲစဉ်တွေမှာ ရိန်းဂျားနဲ့ ဖရန့်ဖတ်အသင်းတို့ဟာ လိုက်ဇစ်နဲ့ ဝက်စ်ဟမ်းအသင်းတွေကို ကျော်ဖြတ်ပြီး ဗိုလ်လုပွဲ တက်ခဲ့ပါတယ်။
စကော့တလန်ကလပ် ရိန်းဂျားအသင်းဟာ နာမည်ကြီး လိုက်ဇစ်ကို ပထမအကျော့က ၁ ဂိုး ဂိုးမရှိနဲ့ ရှုံးနိမ့်ခဲ့ပေမဲ့ ဒုတိယအကျော့ အိမ်ကွင်းပွဲစဉ်မှာ ၃ ဂိုး ၁ ဂိုးနဲ့ အနိုင်ယူခဲ့ပါတယ်။ ဒါကြောင့် နှစ်ကျော့ပေါင်းရလဒ် ၃ ဂိုး ၂ ဂိုးနဲ့ ယူရိုပါလိဂ်ဗိုလ်ပွဲဆီ တက်လှမ်းနိုင်ခဲ့တာပါ။
ဂျာမန်ကလပ် ဖရန့်ဖတ်အသင်းဟာလည်း ဝက်စ်ဟမ်းအသင်းကို အိမ်ကွင်းမှာ ၁ ဂိုး ဂိုးမရှိနဲ့ အနိုင်ရခဲ့ပြီး နှစ်ကျော့ပေါင်းရလဒ် ၃ ဂိုး ၁ ဂိုးနဲ့ ဗိုလ်လုပွဲ တက်ခဲ့တာပါ။
ဗိုလ်လုပွဲစဉ်ကို လာမယ့် မေ ၁၉ ရက်မှာ စပိန်နိုင်ငံ ဆီဗီလာမြို့မှာ ကျင်းပသွားမှာ ဖြစ်ပါတယ်။
ယူရိုကွန်းဖရန့်လိဂ် ဆီမီးဖိုင်နယ်ပွဲစဉ်တွေမှာတော့ ဖီယင်နုက မာဆေးကို ဂိုးမရှိသရေ ကစားခဲ့ပြီး နှစ်ကျော့ပေါင်းရလဒ် ၃ ဂိုး ၂ ဂိုးနဲ့ ဗိုလ်လုပွဲတက်ခဲ့ပါတယ်။
အလားတူ ရိုးမားအသင်းကလည်း လက်စတာကို ၁ ဂိုး ဂိုးမရှိနဲ့ အနိုင်ရခဲ့ပြီး နှစ်ကျော့ပေါင်းရလဒ် ၂ ဂိုး ၁ ဂိုးနဲ့ ဗိုလ်လုပွဲတက်ခဲ့ပါတယ်။
ကွန်းဖရန့်လိဂ် ဗိုလ်လုပွဲကိုတော့ အယ်လ်ဘေးနီးယားနိုင်ငံမှာ မေ ၂၆ ရက်နေ့ ကျင်းပသွားမှာ ဖြစ်ပါတယ်။
