ရလဒ်မကောင်းဖြစ်နေတဲ့ လီဗာပူးအသင်းအနေနဲ့ ခက်ခဲတဲ့ကာလကို ကျော်ဖြတ်ဖို့ တိုက်ပွဲဝင် သွားရမယ်လို့ နည်းပြကလော့ပ်ကပြောပါတယ်။
လီဗာပူးအသင်းဟာ မနေ့ညက ကစားခဲ့တဲ့ ဘရိုက်တန်နဲ့ အိမ်ကွင်းပွဲစဉ်မှာ ၃ ဂိုး စီသရေကျခဲ့ရပါတယ်။
ဒီရလဒ်ကြောင့် ပွဲစဉ် ၇ ပွဲအပြီးမှာ ၂ ပွဲပဲ အနိုင်ရခဲ့ပြီး ၄ ပွဲသရေ ၁ ပွဲရူံးရလဒ်နဲ့ အမှတ်ပေးဇယား အဆင့် ၉ အထိ ကျဆင်းခဲ့ရပါတယ်။
ပွဲအပြီးမှာတော့ ခက်ခဲတဲ့အချိန်ကာလတစ်ခုကို ကျော်ဖြတ်ဖို့အတွက် တိုက်ပွဲဝင်သွားရမှာဖြစ်ပြီး စွမ်းဆောင်ရည်တိုးတက်လာဖို့လိုအပ်ကြောင်း နည်းပြကလော့ပ်က ပြောပါတယ်။
“ကျနော်တို့ တိုက်ပွဲဝင်သွားရပါမယ်။ ကစားသမားတွေဟာ ခုထက်အများကြီး ပိုကောင်းအောင် ကစားနိုင်ပါတယ်။ တည်ငြိမ်မှု၊ ညီညွတ်မှုနဲ့ ထိပ်တန်းအဆင့်ခံစစ် စွမ်းဆောင်ရည်တွေ လိုအပ်နေပါတယ်” လို့ နည်းပြကလော့ပ်က ပြောပါတယ်။
လီဗာပူးဟာ အခုနှစ်ရာသီမှာ နိုင်ပွဲ ၂ ပွဲသာရသေးလို့ အမှတ်ပေးဇယားထိပ်ဆုံးက အာဆင်နယ်နဲ့ ၁၁ မှတ် ကွာဟနေပြီး လက်ရှိချန်ပီယံ မန်စီးတီးကိုမီဖို့လည်း ခက်ခဲတဲ့အခြေအနေတစ်ခုကို ရောက်ရှိ သွားခဲ့ပါတယ်။
